THARAI HAMERANE

HYMN.

(Mae Velepuhi)

IARA te thuru soru, ba teke dofra hage naugna Lord te louloku gau teuiara.

2. Iara teke pulo ari ka kmagu, teke chekena, iara Ia fa jafra frunini kligna, nu ke ulumu egu, ne theome nabagu te kilo gau iara thumu teuna egu.

3. U gaogathogna noda Lord God na, u gaogatho kokhonigita, nu atha koko phaluha, nu tahati na te huhuguni, ne theome fa uveni teu chekegna Lord noda God Theome legui u nogna vetula teke na’a mei ke uluda.

4. Mae ihei te jafra na, ke gatho fapulodi unha na teke fajafrai na, ke eni unha te doglo ka nonomho te keli, ame ke fakarhi ni na tharuna gna na egu.

TAHATI te cheke fatakle nakhiboda ranhini thofno God te nolagi.
 

(Mae Tharai)

GEHATI te tarai ranhinigo Lord, mala tusu lao ka ihei re nou naikno te lao nagnafadi ka u nodi najafra. Mala loku ranhinigo ka nagnafa nha’a fa kmu. Naugna Jesus Christ noda Lord. Amen.

(Tharai na vuvuha agne)

V. Lord tothora phepeo mi gre;
R. Foflo mi cheke fakeli nigo.
V. God gose mei fakarhi gami;
R. Lord chari mei togogami.
V. Kilo fnaknoi Mama, Thugna nu Tharuna te Blahi;
R. Mala ja eu tifa teu gognarogne teu fabrahu te heo me hui. Amen.
V. Kilo fa fnaknoi Lord;
R. Kilo fnaknoi nanhagna Lord.

PSALM 95.

TAHATI te mei koje ranhini Lord: tahati te joke glealea ranhini i thina fakarhada.
    2. Tahati te lao cheke fakeli ke ulugna: tahati te koje balu glealea ranhini ka khoje.
    3. Mana nala Lord, God te fnakno: mana mae tu lao ke uludi ka God te fateoteo.
    4. Ka u khamegna u gloha te mamhara: egu la nala ke kligna gna thogele.
    5. U nhorara mana neke vuavuha: ka u khamegna mana neke fa khapra ni u glose.
    6. Tahati te mei tufru pogo te thufru soru: te turupuku ranhini noda Lord teke vuhagita.
    7. Mana u noda God: tahati nogna u naikno ka u nogna nagre, balu sheep ka nogna tothogei.
    8. Tahati te rogrini u chekegnana gognaro, those ke maumaku: jateu teke fariuriu gami ka namono nagou.
    9. Make kmami teke faririu mala filodi unha na teke edi iarare: me filoni na te ke eni iara.
    10. Phiatutu finoga iare te dia nagnafagu eidu u mavitu igre ame cheke ni iara: u mavitu ne tei fa jafra, mare theome legui nabrou guarana.
    11. Ka u nogu dia nagnafa iara te na’a cheke: mare theome jugru hage ka u nogu phari keli.
    Kilo fnaknoi Mama, Thugna nu Tharuna te Blahi;
    Mala ja eu tifa teu gognarogne teu fabrahu te theo me hui. Amen.

(Ne iju Psalm na nu koje te khegra gnokno te ijuiu na)

U GRIORISO

Kaisi grioriso kolho te atha ka kaisei koje Psalm ke igre na.
 

TE DEUM LAUDAMUS.

GEHATI te fa fnakno nigo God: gehati te lasenigo iago Lord.
  2. Nauthoglu fateo te pogo soru: ia mama karha feitifa.
    3. Mae tothogei Angel te poapola fa bio: kligna ba gobi lepo fateoteo te au balu nolagi.
    4. Mae Cherubim ge Seraphim te poapola legu narane.
    5. Blahi, Blahi, Blahi, Lord God mae tothogei.
    6. Kligna ba pari te fodu u nafnakno te bio.
    7. U tothogei mae blahi te sigla te fnakno nigo.
    8. U thofno fofoudi nodi mae Projpets te fa fnakno nigo.
    9. Mae tothogei Martyrs te fa fnakno nigo.
    10. U Khiloau te blahi ka nauthoglu te theo ka huigna.
    11. I mama u nou nauthoglu te theo ka huigna.
    12. Thofno thumu kaisei nala gehati te gatho tahuni.
    13. Nu Tharuna te Blahi te farerheta.
    14. Iago u funei te sigla iago thofno Christ.
    15. Iago thofno thugna te kulu au mei Mama.
    16. Iago te ke kulu vuavuha hi naikno nu theome susukuni i thiagna u khupi.
    17. Te nheta frununi u magra ka u glehe iago te tora ni u nauthoglu kligna ranhidi mae te fatutuani.
    18. Iago te gnokro ka khame nhetagna God ka u siglagna mama.
    19. Gehati te fatutuni ni mala ke pulo mei nu mala fate gami.
    20. Gehati te tarai ranhigo mala togo mei gami edi nou naikno teke lehe tugudi ka u dadaramu.
    21. Kaha faidu gami balu di mae te blahi karha te fei tifa.
    22. Lord fakarhidi u nou naikno nu fakelidi mae nou tothogei.
    23. Funei frunigami pala hage gami gile tifa.
    24. Leulegu narane gehati te fnakno nigo.
    25. Te pogo soru ka nanhamu gile tifa te tifa.
    26. Lord togo mei gami ka u gobi nogu nakhibo.
    27. Lord kokhoni gami kokhoni gami.
    28. Lord fa mei ke klignami u nou kokhonigami.
    29. Lord ka iago nala te ronu age nigo those snakregau me fiti au mamaja.

U Grioriso.

BENEDICTUS.
Luke 1: 68-79.

KILO fnakno ni Lord God Israel: neke mei sigodi, neke fakarhidi.
  2. Mama neke mei fakarhigita: ka nogna vike David mae u nogna khuru.
    3. Ka teke na’a cheke ka foflodi mae Prophet te blahi: ke teke theome au mei naka vuvuha na.
    4. Mala fakarhigita ka u naoka: ka khamedi mae te suskugita.
    5. Mala kokhonidi mae ke bioda: mala ke gatho fapuloni teke na’a cheke ranhidi.
    6. U na’a cheke teke fa lao ka kmada Abraham mala fakarhigita mala loku ranhini: balu theome mhagu ka nha’a te blahi legu narane.
    7. Iago sua te kilonigo Prophet mae nogna nafnakno te fnakno kligna lahu: mala loku fa ulu ke ulugna Lord tasrei brou ke ulugna mana.
    8. Eigna nogna mavitu tela vuha laseni hi la mana: eigna tela gatho kokodi u nakhibo.
    9. U nogna kokhonigita noda God u phage nathunu rane: mala faphaegita.
    10. Mala faphae di ihei re te au ka na’aromno: ke pari gromno lehe mala fa doglo di gaheda ka u nabrou te nasnagla.
    Kilo fnaknoi Mama, Thugna nu Tharuna te Blahi;
    Mala jateu tifa teu gognarogne teu fabrahu te theo me hui. Amen.

JUBILATE (Psalm 100)
 

U FATUTUANI.

IARA te fatutuani ni God Mama, te vuavuhadi thoa lepo fateoteo kligna ba pari. Nu Jesus Christ thofno Thugna noda Lord: mana neke vuavuha ka u Tharuna te Blahi, te karha ka khupi Mary, mana neke fa paparani ke parigna Pontius Pilate, neke tupi juru ni ka gaju fafatha, neke lehe neke giugiluni. Mana teke lao ka u nauthoglu fapulo ka glehe, mana te hage kligna, te gnokro teu ka khame nheta gna God Mama thofno nolagi. Jare meu mana me mei me vahidi mae tela lehe hi, nei karha na teu gre egu. Iara te fatutuani ni Tharuna te Blahi u fofoudu nogna khiloau te blahi, tothogei mae te fatutuani u atha koko phaluha, ka khegra fapulo nauthu’u nauriha ka u karha te theo ka huigna. Amen.

V. Lord te au ka gotilo;
R. Nei ka iago.

Tahati te tarai.
 

MAMA kligna te blahi nanhamu, te mei nauthoglumu, te leguni u gaogathomu agne pari, jateu la nau kligna. Tusu ranhigami u gano te naba gognaro, atha fa deli di unha lepo na te kea jafra di hi, mala nu ke hata fadeli di na nau unha lepo na mare te ke fadia ranhigami. Those snakre gami ka u thua lepo te fa nanaguana. Nu fakarhigami ka toa glepo te dia. Ka u nou nafnakno, ka u nolagi te siasigla, te tifa te tifa. Amen.
 

COLLECT GNA WEEK
COLLECT AU PHARI KELI.

GOD eidi ihei re na te au ka phari keli, kaisei gaogatho iei re na te lasenigo te athi nodi ni u karha. Mae iheirana te loku ranhinigo, mare te au snagla nodi. Khegra fa nagri gami gehati nou naikno, ka mei di mae thara te fa nagra gehati te thofno gighiu fa’age te fanagragami, mala te theome kmagu ni u nheta gna mae te mala fa ereigami, ka u nogna nolagi Jesus Christ noda Lord. Amen.
 

COLLECT FA KEKHELI.

LORD Mama kligna God thofno nolagi atha fa snagla gami mala ke thoke mei ka hamerane gognaro gne, Khegra fanagragami ka nou nheta mala heome dini gehati ka u puhi najafra mala theome lao deni u glehe kakarha, fa sagelegugami ka thoa gloku te doglo ke ulumu naugna Jesus Christ noda Lord. Amen.
 

NOGNA THARAI ST. CHRYSOSTOM.

GOD thofno nolagi iago te tusu fa mei hi u gobi lepo, gehati te kafe khapru mei gognaro gne, neke kulu na’a cheke hi, neu ba ne phiei thiloi teu mae te mei torei ka nanhamu na snakre laou nala unha lepo na mare te tore ni. Lord fa thoke ni u nomi gaogatho gne gognaro, ka u nomi tharai te mala togo mei gami, snakre ranhigami u glepo te mala laseni u nou cheke te tutuani ka nauthoglu aigne. Nu u karha te theome hui ka u nauthoglu te mei. Amen.

U KOKO fakasai noda Lord Jesus Christ, u namha nogna God, u nha’a faidu nogna Tharuna te Blahi te au ka tahati te tifa. Amen.