The Book of Common Prayer
United States England Scotland Ireland Wales Canada World

    Holy Communion in Raga

 

Leo huri ganisabuga.

Tam lol Vatuwai gida ginia
i mulei
tam Bulvului lol Ganisabuga.

Taroaniara, British Solomon Islands: Melanesian Mission Press, 1954.
 


 

Raga is a major language of Vanuatu, spoken by Anglicans in the Diocese of Vanuatu of the Anglican Church of Melanesia. Raga speakers live mainly on the northern portion of Pentecost Island; they may also speak Bislama, an official language of Vanuatu, and English, a language of the previous colonial Anglo-French condominium when this country was known as the New Hebrides.

Anglican missionary activity on Pentecost Island began with early contact by John Coleridge Patteson and subsequent episcopal visits from the ship, the Southern Cross. The Mota-speaking missionary catechist Thomas Ulgau (d. 1904), commemorated in the calendar of saints of the Church of Melanesia, was also an important early Anglican influence on this island. Prominent western missionaries who served here were Charles Bice (1844-1922), Arthur Brittain (1858-1918), Henry Nelson Drummond (1880-1941) and William Henry Edgell (1873-1960). Despite missionary contact with this island from about 1860, the first confirmations on Pentecost weren't held until 1894.

The first Anglican liturgical translations into Raga were made in 1898, with others following in 1911, 1947 and 1954; a full Book of Common Prayer was published in 1970. The service of Holy Communion presented here is a translation into Raga based on the 1938 Book of Common Prayer Authorized for Use in the Churches and Chapels of the Diocese of Melanesia. This service begins with what appears to be an extended devotion on Holy Communion, including questions for self-examination, most likely done after evensong the night before the celebration. Tis is similar to the Preparation for Holy Communion in Vaturanga. There are also added devotional texts, prayers, and hymns towards the end of the Eucharistic liturgy.

William Muss-Arnolt discusses translations into languages of Pentecost Island in Chapter 45 of The Book of Common Prayer among the Nations of the World; Griffiths does not mention this liturgy in his Bibliography of the Book of Common Prayer, but he lists other translations into Raga as numbers 139:1-5.

Raga continues today as a spoken and written language of local importance, with a new translation of the Gospels published in 1988.
 


 

 

Title page, Raga Holy Communion

This document was transcribed by Richard Mammana from a 32-page booklet published by the Melanesian Mission Press in 1954. Thanks are also due to Bp. Terry Brown for help with the text.

GANISABUGA.

Tam lol vatuwai gida.

Tam lol vatuwai gida huri Ganisabuga gin togoana sabuga.

Vatahahei ma dogo sabuga ma do dedenigi huba be vi van aben Jesus lol mateana. Kunia mulei ma do dedenigi be vi van abena lol Sacrament keko. Ue, togoan sabuga ma lol vatuwai gida be tav gita dum Christ lol mateana i lol Ganisabuga mulei.

Tuai ma lalago tagaro Ganisabuga vataha Sunday, raru sihav harabora tehe. Jesus ma dan Ganisabuga gi ginaganiana huri atmateda. Tav lol vatuwai gida huria. Tua, gov gan ginau aben Jesus. Kea ma horago huria. Kea ma ratahigi maragai. Gosav van te son abena. Gov gagaru amua, rebehima vi melmelo. Gov hige amua huri nom dogoana, atmatema vi tavuha; bere lol qareqare ginau masin sabuga keko. Gov lol vatuwainigo gin avoana keki ma ravae.

    LA Ihan Tata, i Nitui, i Vui Sabuga. Amen.

Lord, hagav kamai.
    Christ, hagav kamai.
Lord, hagav kamai.
 

 

TATA amare, ihama na sabuga. Nom ute na mai. Nom doron na dum ataa kun amare. Lai garig lalai kamai ginaganiana vi dadariha huri garigi. Goi binihi kaburai vuromai, kun kamai gam binihi kaburai vurora. Govav lin te kamai lol kalkaliana; gov lai kamai nin qatigoro. Amen.

LORD GOD Vui Sabuga, gov atei kamai gaha, gov lol sabuga siqenimai, be Lord kamai vi himai vi gita dum non tanon togotogo tavuha; gom rahu abena i Tata, God gaituwa nan, nolina sigai. Amen.

PSALM 23.

    LORD ma radaiau: nasav ron tehe maron hano.
    Kea ma lin haharuiau lolo aran manea: ma lagoiau la benbenin nubu.
    Kea ma lol qaqaro atmateku: ma duleau la hal vavtutu, qatuna ihana.
    Nas la la malun mateana, nasav virururu tehe, huri gigo maiau: nom iruqi i nom malio ma aura mahuriau.
    Gom qalgului gaku la lolmatan nogu iwalu: gom buraiau gin huna, nogu laha ma masiri latlate.
    Ue, hogoi i hagaviana vi to hurinau vataha guqenigu: nav to rahurahu lol iman Lord vai tuai tuai.
    Uloi roron Tata, i Nitui: i Vui Sabuga;
    Kun tuai, kekhadogaha: si hav nogo tehe. Amen.

PSALM 26.

    GOV hige huriau, Lord, huri nam la dedenigi: nam butu alun Lord, nam butu tigonigi.
    Gov hudali halaku, Lord; gov lol gitau: gov lol ron siqenigu i loloku.
    Huri nom lolotavuha ma do goro mataku: nam la la nom masigi.
    Nam hav to tehe abera ram ladora: nasav dalinoro tehe abera ram dentene.
    Nam ron mahantai gin tatan hantai lalago: nasav to te bul abera qatigoro.
    Nav bagabaga melmelo limagu: kunia nai van sosori gin nom tanon tataroi, Lord.
    Be nav lol silo avkari vi hivo lol qerora: be nav seserai nom lalago ririhai.
    Lord, nam ron madavuha gin togoana lol imama: gin ute kehigea sarisarima ma dogo aia.
    Govav hara te utegaituwa atmateku abera qatigoro: i rahuku abera ram qiriwirihi.
    Limara ma lalago tavalten ginau: i matuara ma biagoi wolin saniana.
    Gita ke inau uhu, nav la dedenigi: goi vol muleiau, gov hagaviau.
    Qalageku ma du la ute melmelo: nav avkari Lord lol sinobu ram gogo.
    Uloi roron Tata, i Nitui: i Vui Sabuga;
    Kun tuai, kekhadogaha: si hav nogo tehe. Amen.

    Hage wuwuri Lalago vi toretore huri Ganisabuga. Nu nogo, sinobu rai vev vatuwa avoana keki.

    TATA masin Tavuha, nam hige gaha lol matama hurin leo gom horai kamai huria. Goi vagahiau bere sigi hano ninigo, huri gom ilo wuwuri huria. Nom Vui tavuha na gigitai siqenigu, nai binihi dum nogu bahalana duluai, nai binihi mos tuhi huri togoana tavuha; gin Jesus Christ, Lord kamai. Amen.

    Hage gov hige hurin Leo Horai non God. Be gos binihi dum ginahantai, goi veve kunkeki,
 

Lord's Prayer

    TATA, goi binihi kaburai vurok keki, gin Jesus Christ.

1.

    Nam liniau wuwuri lalai God sa sigai? Nam naitai huri lalago lalainia? Nam doron havanau amua nin God—inau siboku, atatu dolua, homu, boe? Nam huri sorago ureure i Uloilua?

2.

    Nam binihituhi be God vui—ma hav vora tehe atatu? Nam binihi dumia tagaro batena nam dataro, nam lol rovoga, nam lago la hala?

3.

    Nam binihi marahi God—imana sabuga, ira Lalago, non Sacrament, non Avoana? Nam uloi Ihana tagaro gin busbusi?

4.

    Nam avkari God huri guqenina? Nam dogo dedenigi lol Sunday? Nam lol rovoga sa sigai? Nam dataro doratora?

5.

    Nam binihi marahi ira ratahigi, ira Lalago, ira Vagahi? Nam gitagoro ira havaku—tamagu, ratahiku, ira nituku, tasalak, ahoak? Nam dogo binihimagemu?

6.

    Nam wehi bonogai atatu sa boe sa manu sa havanau? Nam lolhoro, nam bigaigai, nam hul bonogai?

7.

    Nogu togoana nu melmelo? Nogu binihiva nu tavuha? Nam lol havanau nai busbusi be Jesus si gitae? Nam min malogo nin tataro? Nam min wai taltali? Nam gan butbutui ginaganiana?

8.

    Nam surasura hano? Nam lol kaburai buguk duluai? Nam usi bilak homu nin God?

9.

    Nam dentene? Nam ruruhi ihei? Nam lol bahala nogu datauleo? Nam siburai ihei? Nam dul bonogai ihei?

10.

    Nam rawrawega huri hano? Nam avkari God huri non hogoi duluai? Nam hige maragai homu sa boe sa havanau dolua? Nam doron kehebehe ginau talol ureure sa ginau atamare?

    Wuwuri, sinobu rai vev vugeri vurora, rai vev vatuwa avoana keki,

    LORD, masin hagavi, masin tavuha, nam lolovono huri nogu ginahantai. Nam bahala gin nogu binihiva, gin nogu avoana, i gin nogu lalagova, ta liu hage nam bahala kunkeki . . . . . . Tata masin hagavi, gov hagaviau, gov hagaviau. Inau hage nituma; gov lolotavuhaiau. Goi binihikaburai vurok duluai; gin Nituma tabetabe, Jesus Christ, Lord kamai. Amen.

    LORD hagavi, gav hagatu aben nom tauon ginaganiana, gam hav butu tehe alun nomai vavtutu, hageta alun nom hagavi ivusi. Ma hav dadariha tehe be gav harahara mamarahana halaten nom tanon ginau; ta sinema, Lord, ma hahagavi radu; gov hogoi lalai kamai, Lord tavuha, be gav gan Vihogon Nituma tabetabe Jesus Christ, gai nim Dagana; vi lol melmelo rebehimai qatigoro gin Rebehina, vi garuhi atmatemai gin Dagana tavuha maragai; gav togo vai tuai alolona, i kea vi togo lol kamai. Amen.

    HOGOI non Lord gida Jesus Christ, tabetabe non God, bulbul non Vui Sabuga, na togo abeda duluai vai tuai vai tuai. Amen.
 

 

AMUA NIN GANISABUGA.

Mabon gaituwa gov hae lol Ima Sabuga, bell ma hav tatan te radu. Gov sisieqau lol tanoma. Gov tataro lalai God vi lol vatuwai siqenima huri Ganisabuga. Goi veve avoana uhu.

    GOD, nam dogo huba lol matama. Gov lol tavuha nogu binihiva. Gov lai lalaiau nom Vui Sabuga vi turau gaha, vi vatavuhaiau lol Ganisabuga garigi; gin Jesus Christ, Lord kamai. Amen.

Gov hudalinigo kunkeki

Nam lol vatuwaiau dedenigi?
Nam seserai wuwuri vuroku duluai?
Nam ron mahantai gin nogu bahalana?
Nam binihimasigi Varahuk vi hagaviau?
Nav Naitai huri togoana tavuha?

Hage gov siv veve lalai God

    LORD, nam binihileahi; gov loliau nai binihileahi dedenigi. Lord, nam binihimasigi; gov lol wasi nogu binihimasigi. Lord, nam dabego; gov lol gaivua nogu tabeana.

Goi binihituhi be gov hagatu aben Tamama ma dabe maragainigo. Gov hagatu aben Varahuma ma dabego vava nu mate. Kea sibona ma awo maigo, ma beve be, Giv mai huriau, kimiu duluai gim mana i ma buguri kimiu, nav lin mahuri kimiu. Ma beve mulei lalainigo be, Ihei si mai huriau, nasav vev dagarae tehe.

Tataro huri Siqen Melmelo.

    LORD, gov lol melmeloiau nin bahalana ivusi. Gov binihikaburai nogu bahalana duluai. Hage nav siv hago dum nom hogoi sabuga gin siqen raraniga; gin Jesus Christ, Lord kamai. Amen.

Be God vi lai gogogo.

    LORD GOD, Bread atamare, Rahun ureure duluai, nam lol qatigoro goro amare i loi matama, nam hav dadariha tete be men uloiau be nituma. Matu gigo, Lord, gov hagaviau. Goi mahina lalaiau be nav gani Vihogoma, be nai min dum Dagama, vi tug kaburai nogu qatigoro, vi lai rahuana vai tuai. Nam bevea kunkeki qatuna gom lalago huriau, i gom dogo radu aben Tata i Vui Sabuga, God gaituwa nan vai tuai tuai. Amen.
 

 

IBOI VI VASOGO.

Vatutu, Vat Varahu,
Vat sivigi huriau;
Wain vurok, Dagan rahuk
Ma rovo nin gagauma;
Lol halana tavuha,
Nam hili qatigoro.

Nam rihu holhole nan,
Nam bahala, salsala;
Garevok si mate tau,
Deiana si goea,
Nasav vol te vurok dum,
Keki noma, noma nan.

Wolin tabego sigai,
Nam dule la volvolo;
Sagau, nam do vuroi,
La maiau, nam lala nok,
Nam bibili, boboga,
Garuhi, varahuau.

Lol guqen rahuana,
Lol guqen mateana,
Lol guqen tomare hae,
Lol guqen vi veveau,
Vatutu, Vat Varahu,
Namen lugu atema!

 

Nam hav dadariha tehe, Lord,
Be gomen hi mai huriau;
Goi vev vatuwa siloma,
Qatigoro vi rahu.

Nam hav dadariha tehe, Lord,
Atmateku kun ute vuroi;
Gov mai huriau hanigi, Lord?
Goi vev be namen rahu.

Nam hav dadariha tehe, Lord,
Ta Gigo gom barahuau,
Gin Dagama masin sabuga,
Ma rovo vol inau.

Nam hav dadariha tehe, Lord,
Gita ke goi vananiau;
Lai gaku mai Vihogoma,
Lai magu Dagama.

Batena Priest vi dalinoro, gov tataro kunkeki

    GOD, gov lol sabuga nom Priest kekhado gin nom hogoi Vui, limana vi melmelo, binihina vi raraniga, gem siv tari dedenigi Tataroi sabuga keki la lolmatama; gin Jesus Christ, Lord kamai. Amen.

 

 

GANISABUGA.

Priest ma beve avoana keki Jesus ma bagahi gida huria. Tataro non Lord uhu ma dum dedenigi Ganisabuga.

TATA amare, ihama na sabuga. Nom ute na mai. Nom doron na dum ataa kun amare. Lai garig lalai kamai ginaganiana vi dadariha huri garigi. Goi binihi kaburai vuromai, kun kamai gam binihi kaburai vurora. Govav lin te kamai lol kalkaliana; gov lai kamai nin qatigoro. Amen.

Tua, God ma ilo wuwuri nom binihiva duluai; ma ilo wuwuri vataha ginau gom doron. Gov navohi Vui Sabuga be gov ilogo siboma, kun God ma ilogo huba. Goi vev lalainia vi lol melmelo nom binihiva batena Priest vi vasogo Leo Horai nu sabuga.
 

 Holy Communion

 

 

Lord's Prayer

GOD masin rorono, siqen duluai ma malagasi la lolmatama, gom ilo nomai doron duluai, gasav sigi te dum hano ninigo; gov uwi mai nom Vui Sabuga, vi lol raraniga binihin siqenimai, gav tabego masigi, gav uloi marahi ihama nu sabuga; gin Christ i Lord kamai. Amen.

Hage vi vasogo Leo Horai non God. Goi binihimulei nom bahalana. Ginau rituai gom lol hantai daga ta ma bongoro loloma huba. Goi veve be God vi lol kaburai buguma gom ilo radu i gom lena huba. Gov tataro be vainonaiha gov gogoi Leo Horai duluai keko.
 

Collect for Purity

GOD ma awo kunkeki, ma beve be, Inau Lord God gigo: govav binbinihi te huri God dolua niniau gaituwa.
    Lord, hagav kamai; gov dede siqenimai be gav gogoi leo keki.

    Govav taitai te nom nunu hurin rebehin vataha ginau lol mahao amare, i la tano ataa, i lol tahi halatena. Govav sisieqau te gorora, govav gogonainira tehe; huri inau Lord God gigo, nam gitagoro ginau ma du huriau, nam lol vurora tamara vi gao alura nitura, va vi votui lalanana gaitoluna i gaivasina ram hagaihino giau, i nam hagavira tari ram dabeau i ram gogoi nogu leo horai.
    Lord, hagav kamai; gov dede siqenimai be gav gogoi leo keki.

    Govav uloi te qareqare ihan Lord God gigo: huri Lord vi hav vevev te rahu, ihei vi uloi qareqare ihana.
    Lord, hagav kamai; gov dede siqenimai be gav gogoi leo keki.

    Goi binihi huri guqen mabuharai be gov gogonainia. Guqen gaiono gov lol rovoga, gov lol nom lalagova duluai alolora; ke guqen gaibituna guqen mabuharai non Lord God gigo. Govav lol te nom lalagova alolona: gigo, i nituma, ataman i vavine, nom atatun rovoga, ataman i vavine, boe bilama, i tausala la matgatava noma. Guqen gaiono Lord ma dau amare, i ataa, i tahi, i ginau duluai alolora; i guqen gaibituna ma mabuharainia alolona: qatuna kea Lord ma batavuha guqen gaibituna i ma gogonainia,
    Lord, hagav kamai; gov dede siqenimai be gav gogoi leo keki.

    Goi binihi marahi tamama maton ratahima, be guqenima vi vora ivusi la vanua Lord God gigo vi lai lalainigo.
    Lord, hagav kamai; gov dede siqenimai be gav gogoi leo keki.

    Govav wehiwehi te bonogai atatu.
    Lord, hagav kamai; gov dede siqenimai be gav gogoi leo keki.

    Govav tagataga tehe.
    Lord, hagav kamai; gov dede siqenimai be gav gogoi leo keki.

    Govav surasura tehe.
    Lord, hagav kamai; gov dede siqenimai be gav gogoi leo keki.

    Govav vev te ariari huri atalavanuama.
    Lord, hagav kamai; gov dede siqenimai be gav gogoi leo keki.

    Govav rawrawega te huri iman atalavanuama, govav rawrawega te huri tasalan atalavanuama, non atatun rovoga, ataman i vavine, i boe bilana, i vatvataha ginau nona.
    Lord, hagav kamai; kamai gam navohigo, gov rav duluai nom leo keki lol siqenimai.
 

Ten Commandments

Tataro huri Ratahigi.

Saint Paul ma hora gida be tav tataro huri ira Ratahigi. God ma daura la tanora. God ma Ratahigi goro ureure duluai. Tam dataro be vi hagav non Uloilua; be vi bului noda Ratahigi, vi gitagoro dedenigi gida.

GOD masin rorono, nom ute ratahigi vi togo vai tuai, nom rorono utuhina nu sigai; gov hagav Uloilua duluai; gov dede siqenin ELIZABETH, nom atat gitalua, ma ratahigi i ma lavoa goro kamai, be kea vi naitai huri lol marahinigo i huri lol roroinigo, gin iloute be ma lalago lalainigo: i be kamai mulei, maira atatuna duluai, gam iloe be gom daua, gav lalago garugusi lalainia, gai binihi marahinia, gav huri magemu non leo, maigo i lalainigo, hurin nom avoana tavuha i noin leo horai; gin Jesus Christ, Lord kamai, ma rahu, ma ratahigi abema i Vui Sabuga, God gaituwa nan, nolina sigai. Amen.

Collect, Gigigiri i Leo Tavuha.

Gov tai qeroma be gov ron batoi avoana keki. Ira Hala ram awo mai gida lol Gigigiri. Lol Leo Tavuha tam ron avoana huri Jesus Varahuda. Tam domare huri Leo Tavuha. Amua, tam beve be, Uloitavuha Gigo, God; atagu, tam beve be, Kamai gam avkarigo, Lord. Avoana non God nu kun ginaganiana huri atmateda. Tam avkari God huri gada ginau ma lai lalai gida.

Binihimasigi.

Ma hara bultai muan ginau tam binihimasigi. Goi vev mamaragainia. Tataro huri noda binihimasigi be vi wasi. Avkari God huri ma lol bisirainia lalai gida gin Nituna. Uloi tavuhai Jesus huri ma bora atatu be vi to dum abeda lol Ganisabuga.
 

Prayer for the Queen

NAM binihimasigi God gaituwa Tata masin rorono, ma dau amare i ataa, i ginau duluai tam gitae, i tam hav gitae tehe.
    I Lord gaituwa Jesus Christ, Nitun God voragaituwa, Nitun Tamana amua nin ureure duluai, God nin God, Rani nin Rani, Masin God nin Masin God, Nitun God masigi, ma hav taua tehe, sinera gaituwa mai Tata, ma dau ginau duluai ginia; ma hi mai amare huri atatu, be men varahu gida, ma rosia gin Vui Sabuga aben Vavingogona Mary, ma bora atatu, ma boha bolvoloe huri gida halaten Pontius Pilate; ma mate, ma davinia; guqenina ma gaitolu ma domare mulei kun ma ravae huba, ma hae vai amare, ma dogo la matuan Tata; vi mai mulei mai sarisarin be men vevevera ran rahu maira ran mate huba; non ute si hav nogo tehe.
    Nam binihimasigi Vui Sabuga, Lord i qatun rahu, ma magohorai nin Tata i Nitui; ma gogonainia i ma roroa mai Tata i Nitui; ma awo gin ira prophet. Nam binihimasigi Uloilua gaituwa nora Hala vataha vanua. Nam mahina huri Garuhisabuga gaituwa huri tug qatigoro. Nam do hohov lol domare ira atmate, i rahuana lol ureure vi mai. Amen.
 

Nicene Creed

Tataroi.

Tuai ma dau leo be sinobu rai mai mai homu huri tataroi, i Jesus ma beve be tav lol raduinia, i Saint Paul ma ravae lalai gida be tav hige homu huri Ganisabuga. Guqen rituai gov lai homu lalai God; sa be homu sigai abema gov atei ginau dolua—tana sa qana sa livon boe. Sa be ginau sigai abema, nu tavuha nan, goi vev lalainia be, God, gom iloe be nogu ginau sigai, take nam avkarigo tagaro huri nom hogoi duluai. Gosav lai tehe ginahantai lalai God.

NOMIU gigitana na gigita la lolmatara atatu, be rav gita nomiu lalago tavuha, gem siv uloi roron Tamamiu atamare.
    Givav hogon tehe nomiu rosrosona la tano, vi dadaga, i bebe vi gan sivinia, i atat surasura ram lage ima, ram sura; ta giv hogon nomiu rosrosona amare, vi hav dadaga tehe, i bebe vi hav gania tehe, i atat surasura vi hav lage tehe, vi hav sura tehe.
    Vataha ginau duluai gim doron be atatu rav lol lalai kimiu, giv dohi lol mulei lalainira: keki higea leo i ira prophet.
    Vataha atatu ma bev lalaiau be, Lord, Lord, vi hav dalinoro tehe lol ute atamare; take wani kehigea ma lol hurin doroniva non Tamagu ma dogo amare.
    Zaccheus ma du, ma bev lalai Lord be, Gita, Lord, nam lai vatvatahara hiru gin tavalun bilak ginau; be nam hara homu nin atatu gin tenteneana, nav lai mulei vavasi lalainia.
    Kea ma rivu tirigi vi harahara tirigi: kea ma rivu gaivua vi harahara gaivua. Vataha atatu na lol kun ma binihi rotoe lol siqenina; vi hav usinia tehe, vi hav horae te huria: huri God ma doron atatu higea ma lai susuwai bilana.
    Ihei ma hagav atat hiruga ma lai huba lalai Lord; vi vono mulei non lalagova tavuha.
    Kea higea wani vatavuha ma binihi huri ira hiru: Lord vi lol mahurinia lol guqen hantai.

Vi hagai Tataroi i Bread mai Wine.

Kaki gaha gov gita Priest vi lol ginau gairua—(1) Vi hagai homu lalai God. Kunia gov gita bilam homu ma do huba la lolmatan God. (2) Vi tari bread mai wine lol tanon tataroi. God ma laia huba vai huri rebehida; tuhuba vi mom laia be vi vatavuha atmateda ginia. Batena Priest vi lai hagatu lalai God, goi veve be,

    God, vataha ginau duluai bilama wuwuri; gom lai huba lalai kamai, i gam lai matu masin bilama. Garig goi vanan kamai gin hinaga vui, gabe Rebehin Christ, i Dagana tavuha. Amen.
 

Offertory

Tataro huri Uloilua.

Amua tam navohi God vi lai gogo noda tataroi, Babe homu i bread mai wine, i mulei be vi tai qerona huri noda tataro. Tam busbusi huri tam lai ginau vuroi, to God ma ratahigi maragai. Take God vi hav varihai tehe noda ginau tirigi huri ma dabe mutai gida. Hage wuwuri tam dataro huri vataha atatu duluaiira Ratahigi maira Bishop matora Lalago i sinobu duluai non God, ira hahagavi maira duluai ram mate huba aben God.

GIDA tataro huri Uloilua duluai non Christ, ma qalo radu halteti ataa.

GOD masin rorono, masin rahu vai tuai, gom bagahi kamai gin nom Hala sabuga, be gav tataro i gav avkarigo huri atatu duluai; kamai gam navohi magemu gigo gov lai gogo nomai (hogoi i) tataroi i gov ron hagavi nomai tataro; gov uwi tagaro nom Vui masigi vai lol Uloilua duluai, vi togo tabetabe, vi bulgaituwa nan; gov hogosira duluai ram uloi ihama sabuga, rav mahina huri nom avoana sabuga, rasav vigaigai te huria, ta rav togo bulbul nano. Kamai gam gainigo, gov tugoro ELIZABETH, nomai Queen maira ratahigi duluai ram huri leo non Christ, rav hora dedenigi nora malagelo, rav buluira ran tavuha i rav hulura qatigoro.
    Tata amare, gov hogos ira Bishop duluai, liu hage . . . maira Lalago nom leo, rav seserai nom avoana masigi gin alenara i gin nora togoana, rav lalago nom Sacrament sabuga kun gom horai huba. Gov hogoi lalai nom sinobu duluai, i lalainira teti, nom hogoi atamare; rav ron binihi magemu, rav lai gogonai nom avoana sabuga, rav lalago sabuga, lalago vavtutu lalainigo vataha guqenira.
    Hage kamai gam navohi gogonainigo, Lord, gov lol bamahuri, gov bului irahei ram do bovonosi lolovono, marogagasi, haroharo, hahagavi . . .
    Kamai gam uloi tavuha ihama sabuga qatuna nom atatu duluai ram ban huba nin ureure keki gin binihimasigi i gin gogonainigo . . . ; gov lol kamai gav huri lolianara tavuha, gav to bul la nom ute amare. Hogoi mai keki, Tata, gin Jesus Christ, ma du alolona, ma dataro huri kamai. Amen.
 

Intercessions

Ma ware gida huri Ganisabuga.

Ma uloi gida be tav hagatu gin binihimasigi. Ke Jesus ma uloinigo. Kea sibona ma navohigo. Gov ron silona lol qeroma. Kea vi lol kaburai vuroma, vi loligo gov to nagomahuri.

TARUA, be gim binihi leahi masigi huri vuromiu; be gim lolotabetabe atatu duluai; be gim binihi tuhi huba huri togoan gara, be giv huri leo horai non God, be giv lago nin kekhadogaha la halana sabuga; giv hamai gaha mai binihimasigi, giv lai Sacrament sabuga keki huri tura kimiu; giv sisieqau goroe gin busbusi, i gin vev vugeri vuromiu duluai lalai God masin rorono.
 

Invitation

Avoan vev Vugeri Qatigoro.

Tua, goi van sosori gin God, ta sinema nu hantai, i nom qatigoro ivusi. Goi vinihi dum sinema ma hav tavuha tehe, nom dogoana nu hantai. Take mulei wate, goi vinihi be God masin tabeana, masin hahagavi.

Keki gaha gov seserai wuwuri nom bahalana. God ma iloe huba, ta gov seserai lalainia kun be ma hav iloe tehe. Goi veve be,

    Lord, nogu bahalana ivusi maragai, nogu qatigoro gaivutalele. Gov loliau nav hagaihino gin nogu ginahantai, nav naitai huri togoana tavuha.

GOD masin rorono, Taman Lord kamai Jesus Christ, Dau ginau duluai, Vevev atatu duluai; gam seserai gin lolovono be gam lol qatigoro i gam bahala gin binihiva, i gin avoana, i gin nomai lalagova; gam siehigo tagaro, God, gam suwainigo be gov lolhoro i gov hul kamai huria.
    Gam binihi leahi masigi, gam lolovono maragai huri gam siehigo, ma bonos lolomai huri gam binihi mulei huria, ma buguri mamaragai kamai. Tata masin hagavi, gov hagav kamai, gov hagav kamai; goi binihi kaburai vuromai duluai, gin Nituma, Lord kamai Jesus Christ; gov lol kamai be gav lalago lalainigo nin kekhadogaha, gin togoana gara kun gom doron, ihama vi roroa, vi sarisari ginia; gin Jesus Christ, Lord kamai. Amen.

Avoasi Lol Kaburai Qatigoro.

Ihei vi lol kaburai nom bahalana? Gom binihi be Priest? Auwi, ma hav vora tehe Priest—God sibona ma hagavigo; kea magahena ma lol kaburai buguma. Gov ron avoana keki kun be silon God ma awo maigo. Hage goi veve be,

    Tata, nam avkarigo. Nogu qatigoro ma gaivua, ta nom hagavi ma gaivua liu hae. Nam binihimagigi be gom hara dagai nogu bahalana. Nam avkarigo masigi, Tata tavuha.

GOD masin rorono; Tamada amare, ma lolohagavi gaivua, ma datauleo be vi vinihi kaburai vurora duluai ram mai mulei huria gin binihileahi dedenigi, i gin binihimasigi ma mauri; na hagav kimiu, na lolotavuha kimiu, na binihi kaburai vuromiu duluai, na tura bibin kimiu lol ginau tavuha, na lai kimiu vai lol rahuana vai tuai; gin Jesus Christ, Lord gida. Amen.
 

Confession & Absoluition

Avoan Mahurigi.

Jesus sibona ma awo. Silona ma navohigo. Vatahahei ma ban abena vi haqe tanon mabuharai nu tavuha gabe rahuana vai tuai.

GIV ron avoana Varahuda Christ ma bev mahurinira duluai ram dabagilu masigi huria.

GIV mai huriau kimiu duluai gim mana i ma bugurai kimiu, nav lin mahuri kimiu.
    God ma dabe maragai ureure, ma lin Nituna voragaituwa, be ihei ma binihimasigi vi hav mate tehe, take vi hago rahuana vai tuai.

Saint Paul ma beve be kea sibona muan atat qatigoro. Matu inau hage, inau nam bora muan qatigoro: ta Jesus ma mai be vi varahura qatigoro kuniau uhu.

GIV ron mulei avoana Saint Paul ma bevea,

    Keki avoana masigi, ma du be tav lai duluai, be Christ Jesus ma mai lol ureure be men varahura qatigoro.

Avoana keki ma boro aluku, huri inau nam lol qatigoro tagaro. Avkari God! Jesus ma dataro huriau; Jesus ma heheiau. Lord, avoana keke ma dura bibin sinegu. Vi kunia tagaro nan.

GIV ron mulei avoana Saint John ma bevea,

    Atatu si lol qatigoro, Jesus Christ masin vavtutu ma dogo, ma dataro mai Tata huri gida; kea higea noda tabetabe huri noda qatigoro.

Tam Dede hae Siqenida.

Ma lol vatuwai ginaganiana atamare; gov dede hae siqenima vai amare. Goi binihi dum, ginau atamare—ginau atalol ureure na vorai vina huba.

GIV dede hae siqenimiu.
    Gam dede hae huri Lord.

Tav avkari Lord God gida.
    Nu tavuha, nu vavtutu tav lol kunia.

Gita, ira Angel ram bulus gida. Amare sinobu ram avkari God ma hav mosmos tehe, i tam boha ute gaituwa siloda, tam avkari Tata, Nitui i Vui Sabuga. Vina kaburai na binihiva huri ginau ririgi talol ureure; gom uloiroron God kekhadogaha—gigo maira Angel atamare.

UE, nu tavuha masigi, nu vavtutu, nomai nan hagea be vataha guqen, vataha vanua, gav avkarigo Lord, Tata Sabuga, masin rorono, masin rahuana vai tuai.

QATUNA kea, kamai maira angel matora muan angel mai sinobu atamare, gam roroa ihama lavoa; gam avkarigo tagaro gam bev aliali be,
    Sabuga, Sabuga, Sabuga, Lord God Sabaoth, amare i ataa ma masiri gin sarisarima; gam bev tavuhainigo, Lord Holomare Hae. Amen.
 

Comfortable Words

AVOAN BULUI GAHA.

CHRISTMAS.

HURI gom lai Jesus Christ Nituma be men vora kun bategaha huri kamai; kea ma bora atat masigi gin Vui Sabuga aben vavingogona Mary ratahina; ma bora melmelo be men lol melmelo kamai nin qatigoro duluai.

EASTER.

HAGE liu hage gam uloi tavuhainigo huri Nituma Jesus Christ Lord kamai ma domare mai sarisari nin mateana: huri kea masin Lamb Halbiskalau ma mate huri kamai, ma lai dagai vuron ureure; ma lol kaburai mateana gin mateanana, ma lai mulei rahuana vai tuai lalai kamai gin non tomareanmulei.

HAE MULEI.

GIN Nituma tabetabe Jesus Christ Lord kamai, huri ma domare huba mai sarisari gaivua ni mateana, ma siv visirai abera non Hala duluai, i ma hae vai amare la lolmatara be men lol vatuwai tanomai, be gav hae la ute, kea ma dogo aia, be gav ratahigi abena lol sarisarina.

WHITSUNDAY.

GIN Lord kamai Jesus Christ, huri Vui Sabuga ma hi mai amare kun bategaha, hurin avoana Jesus ma bev taua, dumdumina nu vora kun lan gaivua ma bibiltai, i memean gabi ma boro alura Hala be men vagahira, be men tomuainira lol masigi duluai; ma roronoinira be rav av dodolua, be rav aliali huri vev mutmutai huri Leo Tavuha vataha vanua; ma lol malue kamai nin ute meto i nin nomai salana vai lol masin gigitana, i gam ilo dedeninigo i Nituma Jesus Christ.

TRINITY.

UE, gigo God gaituwa, Lord gaituwa; ma hav vora te Wani gaituwa, take Wani gaitolu lol sinema gaituwa. Kun gabe gam binihi masigi huri sarisarin Tata, gam binihi masigi kunia huri Nitui, i huri Vui Sabuga, ma bora gaituwa, ma hav dodolua tehe.

QATUNA kea, kamai maira angel matora muan angel mai sinobu atamare, gam roroa ihama lavoa; gam avkarigo tagaro, gam bev aliali be,
    Sabuga, Sabuga, Sabuga, Lord God Sabaoth, amare i ataa ma masiri gin sarisarima; gam bev tavuhainigo, Lord Holomare Hae. Amen.

Tataro Binihimagemu.

Hage tam samara wuwuri abera atamare, tam dabagilu mulei ninira vai lol tano. Tam hav dadariha tehe be tav togo vai nava abera, qatuna noda ginahantai.

Keki gaha tav ron avoana nu ririhai, nu sabuga maragai. Tav lol hanina: ginavarihai gida!—ma hav dadariha tehe be tav harahara vain ginaganiana ma hovi, ta God ma uloi gida be tav gan masin ginau keki la lolmatana. Lord, gov lol melmelo nogu binihiva kekhadogaha.

    God masin hagavi, gov gita nomai hogoi ma dogo abema gaha; Gov hora nom Vui Sabuga vai alura, bread keki vi vogi gi Rebehin Christ; wine keki vi vogi gi masin Dagana.

WANI vatavuha kea ma mai la ihan Lord;
Hosanna alun mahao.
 

Proper Prefaces

LORD hagavi, gam hamai gaha aben nom tanon ginaganiana, gam hav butu te alun nomai vavtutu, hageta alun nom hagavi ivusi. Ma hav dadariha tehe be gav harahara mamarahana halaten nom tanon ginau; ta sinema, Lord, ma hahagavi radu; gov hogoi lalai kamai, Lord tavuha, be gav gan vihogon Nituma tabetabe Jesus Christ, gai min dagana; vi lol melmelo rebehimai qatigoro gin rebehina, vi garuhi atmatemai gin dagana tavuha maragai; gav togo vai tuai alolona, i kea vi togo lol kamai. Amen.
 

Prayer of Humble Access

Avoan Lol Sabuga.

Avoana kekhado nu ririhai maragai. Gov tai qeroma huria; gov ron vataha avoana gin busbusi. Ke Priest ma leahigo ma awo mai God, ma lol sabuga bread i wine gov siv hagoe.
    (1) Amua tam beve huri tataroi tavuha Christ ma daria alun volvolo. Kea ma dau qatun Sacrament keki be tai binihimulei huri mateanana masin tavuha. Tam dataro be tav lai dedeninia gem siv hago dum Rebehin Christ i Dagana.
    (2) Priest ma lol kun gabe i Lord ma lolia lol guqen ma dau qatun Ganisabuga. Ma hago bread, ma biha borae; ma hago laha, ma batavuha.

Avoana duluai keko tam bevea lalai God. God ma gita Tataroi non Nituna, i atatu mulei ram gitae. Ue, God ma gitae, i gida tam gitae; kunia ma harabultai gida mai God gin Tataroi non Nitun God i Nitu atatu. Tam bev dum ginau aben God qatuna Jesus; i God ma lai lalai gida qatuna Jesus.

Hage vi lol sabuga wuwuri, goi binihi tuhi be Bread i Wine nu sabuga mutaigi. Tam hav gania tehe kun be ginau vuroi, hageta tam bevea be Rebehin Christ i Dagana.

Hage kekhadogaha gov naitai huri tataro. Gov sisieqau dedenigi la tanoma. God vi ron dum nom dataro huri gom dataro gaha la lolmatan Jesus. Gosav gitagita tehe atatu ram hagatu vai lol tano sabuga.

Vasogo avoana rituai vi buluigo. Gov tataro huri havama mairahei gom dabera. Goi veve ginau hurigo ma siboma vai huri togoana tavuha.

GOD masin rorono, Tata amare, gom lai hagav Nituma gaituwa Jesus Christ, na mate la volvolo be men vol kamai mulei; hage batena ma dau muleinia amare, ma dataroi vatuwa lalainigo, be men vol vuron ureure duluai, be men lol kaburai nan; i kea ma dau qatuna, i lol non Leo Tavuha sabuga ma hora kamai huri lalagova kea, gai binihi radu ginia, huri mateanana tavuha maragai, va vi mai mulei.
    Tata masin hagavi, gam navohi gogonainigo, gov ron kamai; hage batena gam hago bread i wine keko gom daua, kun Varahumai Nituma Jesus Christ ma lol sabugainia, gin binihimulei huri kea ma mate i ma ron gagarasi, gov lol kamai be gav hago dum Rebehina i Dagana nu tavuha maragai.
    Hage lol guqen higea ma sinea, kea ma hago bread, i ma avkari huba, ma biha borae, ma lai vatvataha lalainira rorontai; ma beve be, Hago, gani, keki Rebehiku ma lai huri kimiu: giv lol kunkeki be giv binihi raduiau. Kunia mulei gangani nu nogo kea ma hago laha, i ma avkari huba, ma lai lalainira, ma beve be, Giv minmin duluai, huri keki Dagaku non datauleo gara, ma rovo huri kimiu maira ivusi be vi tug qatigoro nin kimiu: giv lol kunkeki batena gim minua, be giv binihi raduiau. Amen.
 

Prayer of Consecration &
Words of Administration

Amua nin gom hagatu.

    LAMB non God, ma lai dagai vuron ureure, gov hagav kamai.
    Lamb non God, ma lai dagai vuron ureure, gov hagav kamai.
    Lamb non God, ma lai dagai vuron ureure, hogoi nom tamata lalai kamai.

    KUN hart ma mana huri wai halhala: kunia atmateku ma mana hurigo, God. Atmateku ma madouga huri God, huri God i Rahu baten hano nav to goro lolmatan God?
    Lord, nam ron madavuha gin togoana lol imana: gin ute kehigea sarisarima ma dogo aia.
Jesus ma beve be, Gita, nam du nam dorodoro alun gatava. Ihei si ron siloku, si havan gatava, nav didi dalinoro vai abena, nav gan ginau abena, i kea maiau. Lord, nam ron siloma, nam havan siqenigu vai hurigo. Gov dalinoro abeku ba taru vi gan ute gaituwa.
    Lord, maro ma gasiau; nam doron Bread non God gabe Vihogon Christ. Nam madouga; nam doron Wine atamare gabe Dagana tavuha. Gov loliau nav toron maragai ginaganian vui keko; gov lol guqa atmateku gin nom ginatavuha; gin Varahuk, Jesus Christ. Amen.
    Lord, ma hav dadariha tehe be nai veve ginau abemu, matu Gigo Lord gom hahagavi radu. Nam bahala; gov tug kaburai vuroku. Nam madamada; goi varahu atmateku. Nam matagara; masin Gigitana gov gigitaiau. Nam hiruga; Ratahigi gov lai nom ginatavuha. Nam la vuroi; gov sagau gin gaisaga melmelo talol silo vavtutu. Jesus hagavi, gov ronoau. Jesus tavuha, hogos atmateku gin hogoi tavuha kekhadogaha vai tuai. Amen.
    Lord Jesus, gom lago maira ramuru ban vai la vanua Emmaus, i ramuru gita dumigo batena gom biha bora bread. Hagaviau, nav gita dumigo kekhadogaha lol Ganisabuga uhu. Gov ronoau, Lord Jesus, gom ratahigi mai Tata i Vui Sabuga God gaituwa nan vai tuai tuai. Amen.

Hamai gaha, giv gan Rebehin Lord,
Giv min Dagana masin sabuga.

Ma barahu gida gin Dagana,
Ma banan gida gin Rebehina.

Christ Varahu ma rihu maragai
Gin Dagana alun volovolo.

Ma mate huri gida duluai,
Ma dataroi ginia sibona.

Atatuai ram wehi nitu sheep
Ma bora dovonan Ganisabuga.

Kea ma bol gida nin mateana,
Ma hogos gida gin non hogoi.

Hamai gaha mai binihimasigi,
Giv hago rahuana vai tuai.

Marogagasi, gamiu ma do nan;
Gim madouga, giv min wai varahu.

Muana, Nogonana abeda,
Sinobu gaha rav gogonainia.

Tata Sabuga, gom uloiau,
Inau nituma, nam sala ninigo;
Gov tug kaburai vurok niniau,
Nav siv tabagil hurigo.

Lord Jesus Christ, gom hivo huba mai
Mai nom rorono, sarisarima;
Gov ron hagavi nogu mahorhor,
Varahuk, hahagaviau.

Vui Sabuga, qatun tavuha,
Nam butuau vatuwai aluma;
Gom wareau, nai van sosorigo,
Masin Turai, lol rahuau.

God rorono, Tata, Nitui, Vui,
Tamak, Varahuk, Lol sabuga inau;
Nam sariau hurin qalagema,
Gomen gitau mai nituma.

Batena gov hagatu huri Ganisabuga goi binihi dum ginau gaituwa keki, be gov gita Ratahigi lol sarisarina. Gita mamaragai tanon-tataroi mai volvolo aluna. Sisieqau dedenigi lol tanoma. Dari dedenigi ranoma hohov i Priest. Hago maragai laha bere gem hovi. Minu tirigi nan lol laha. Binihiva keko vi togo lol siqenima be gom dogo aben Varahuma.

REBEHIN Lord gida Jesus Christ ma lai hurigo, na gogoi rebehima i atmatema va vi votui rahu vai tuai. Hagoe, gania, gin binihimulei huri Christ ma mate hurigo, gov gan binihimasiginia lol siqenima gin gariana.

DAGAN Lord gida Jesus Christ ma rovo hurigo, na gogoi rebehima i atmatema va vi votui rahu vai tuai. Minua, gin binihimulei huri Dagan Christ ma rovo hurigo, i gin gariana.

Hage gov tabagilu vai la tanoma. Gom lai huba Jesus; gov avkari God huri non tabeana. Gov tataro radu huri vataha ginau, huri vi ron dum nom avoana. Keki ginau rituai gomen navohi God huria

Uloilua,
Ira Ratahigi goro vanua,
Bishop maira Lalago.
Ira Vagahi,
Ira Havama,
Vanua School ta Raga,
Atatu gom gita gorora,
Atatu gom lol hantainira,
Atatu ram lol hantainigo,
Ira Lenlena ta Raga,
Ira Lenlena talol Ureure.

Avoan Avkari.

Keki gaha gov uloi avoana keko gin masin avkari. Gov awo mai Tamada kun gabe naturigi ma awo mai tamana. God ma binihi kaburai vuroma; Kea ma lai lalainigo ginaganiana ma du huri atmatema; Kea vi tugorogo nin kalkaliana.
 

Agnus Dei

TATA amare, ihama na sabuga. Nom ute na mai. Nom doron na dum ataa kun amare. Lai garig lalai kamai ginaganiana vi dadariha huri garigi. Goi binihi kaburai vuromai, kun kamai gam binihi kaburai vurora. Govav lin te kamai lol kalkaliana; gov lai kamai nin qatigoro. Huri nom ute, i rorono, i sarisari vi togo vai tuai. Amen.

Tam Lin gida ma siboda.

Tam navohi God kunkeki
    (1) Vi lai gogo noda tataroi.
    (2) Vi tug kaburai vuron Uloilua duluai, i vi hogoi lalai gida ginau tavuha duluai Christ ma bol lalai gida gin mateanana.
    (3) Tam lai mulei gida lalai God, atmateda i rebehida huri vataha rovoga vi hora gida huria.
    (4) Vi lol kunkeki, ma hav vora tehe qatuna tam davuha, i noda tataroi nu tavuha. Sigai lenlena!—ta vi lai gogo gida qatuna Jesus.

Hage gov lin muleinigo vai lol liman Tata gin binihimagemu, kun be gom hanoraga, ta Jesus ma lol tavuhainigo. Goi veve avoana keki,

    God, nam lai nan gina ririgi i nu hantai, hageta gov lai gogoau. Lord, nasav harabora tehe ninigo vai tuai, ta nav toga gi bilama gabe atatuma vai tuai tuai. Amen.

LORD, Tata amare, kamai nom atat binihimagemu gam navohigo, Tata masin tavuha, be gov lai hahagavi nomai tataroi gam uloi tavuhainigo i gam avkarigo ginia; i gam gai gogonai maigo, gov hogoi lalai kamai mai nom Uloilua duluai gam binihi masigi Dagan Jesus Christ, tug qatigoro i ginau tavuha duluai Nituma ma bol lalai kamai gin mateanana. Lord, gam dau mulei kamai gorogo gaha, atmatemai i rebehimai, gi tataroi dedenigi nu sabuga i nu rahu; i gam navohi gogonainigo be gov lol guqa kamai gam lai huba Bulbul Sabuga keki, gin nom hogoi i nom batavuha atamare.
    Masigi, ma hav dadariha tehe be gav tataroi lalainigo qatuna vuromai ivusi, ta gam gainigo be gov lai gogo nomai lalagova; govav vului tehe nomai lolian tavuha, ta gov binihi kaburai nomai gina hantai, gin Jesus Christ, Lord kamai; gam binihimarahinigo, gam bev roroinigo, Tata masin rorono, bultai maia i Vui Sabuga, nolina sigai. Amen.

Avoan Avkari dolua.

    Lol avoana keki tam haqe ginau gairua.
    (1) Tam avkari God huri ma banan atmateda gin hinaga vui gabe Rebehin Christ i Dagana. Mulei, tam avkaria huri ma hav varihai tehe gida, take ma gaos gida alun Christ masin Nituna.
    (2) Tam navohi God vi hogoi mai lalai gida tav to bulbul abera Sabuga, i tav lol noto vataha lalagova tavuha.

Hage goi vev gogonai be,

    God, gov buluiau la nogu togoana, nav hige tagaro nom vataha ginau la ureure keki, i vainonaiha nai votui nom ute amare, gin Jesus Christ Nituma. Amen.
 

Lord's Prayer

GOD masin rorono, masin rahu vai tuai, gam avkari maragainigo huri gom banan kamai, gam lai huba ginau ririhai sabuga keki, gin ginaganian Vui, be Rebehin Nituma Varahumai, Jesus Christ, i Dagana masin tavuha maragai.
    Gam avkarigo huri gom seserai lalai kamai be gom doron kamai i gom lolotavuha kamai; be kamai masin vatahanan Rebehin Nituma nu ririhai, gabe vatugi atat binihimasigi duluai, i be gav hago houn nom ute vai tuai, qatuna Nituma tabetabe ma matevol kamai, ina ron gagaras huri kamai.
    Gam navohi gogonainigo, Tata amare, gov bului kamai gin nom hogoi, be gav bul radu lol vatugi nom atat sabuga, be gav lol lalagova tavuha duluai, gom binihi tau be gav huria; gin Jesus Christ, Lord kamai, gam binihimarahinia, gam bev roroinia i Gigo i Vui Sabuga, nolina sigai. Amen.

Uloi roron God alun Mahao.

Keki gaha tam bul siloda, tam uloi roron God, gida hage maira Angel tam bev rorona. Batena Jesus nu vora ira Angel ram lol iboi keki; hage kekhadogaha Jesus ma mom bora lol siqenida tam lol iboina. Giv samalagai God, giv samalagainia: giv samalagai noda Ratahigi, giv samalagainia. Uloi runon Jesus ma lai dagai vuron ureure! God gaituwa ma dabe gida, avkari maragai Ihana tavuha.

ULOI roron God alun mahao, tamata la ureure abera atatu lolotavuha. Gam lol roroinigo, gam uloi tavuhainigo, gam siolo gorogo, gam bev lavoainigo, gam avkarigo huri sarisarima gaivua, Lord God, Ratahigi atamare, God Tata masin rorono.
    Lord, Nitui voragaituwa Jesus Christ; Lord God, Lamb non God, Nitun Tata, gom lai dagai vuron ureure, gov hagav kamai. Gom lai dagai vuron ureure, gov hagav kamai. Gom lai dagai vuron ureure, gov ron nomai tataro. Gom dogo la matuan God Tata, gov hagav kamai.
    Huri Gigo gaituwa sabuga; Gigo gaituwa Lord; Gigo gaituwa, Christ, mai Vui Sabuga, ma holomare hae, lol sarisarin God Tata. Amen.

Avoan Vatavuha.

Hage keki uhu nogonan avoana non Jesus lalainigo. Kea ma lai non tamata lalainira Hala batena vi van dagai ninira, i ma batavuhainira batena vi gelesia vai amare. Nu kunia keki gaha. Gom do bul mai Jesus, i kea ma lai non tamata, ma batavuhainigo, take si hav van to dagai ninigo, huri ma beve be, Inau hage abemiu vataha guqen va vi hago ureure.

TAMATA non God, si hav ilo to huria, na gogoi siqenimiu i lolomiu, giv ilo i giv tabe God, i Nituna Jesus Christ, Lord gida. God masin rorono, Tata, Nitui i Vui Sabuga, na vatavuha kimiu nin kekhadogaha vai tuai tuai. Amen.

ATAGUN GANISABUGA.

Gosav malue te vilehi nin Ima Sabuga. Ira Lalago rav qihi avare, ta gigo gov to radu, goi veve avoana keki amua, hage wuwuri gov siv qihi avare.

TATA masin hagavi, gom iloe be sinemai nu madamada i gam hav rihu te maragai dum. Gov hagav kamai; goi binihi kaburai vataha bahalana talol Ganisabuga garigi. Avoana rituai daga ma hay tavuha tehe; nomai binbinihi ma dadaligi nan; gam lalago qareqare nom ginau sabuga keki daga. Matu Gigo, Lord, gov hagav kamai, i gov tabe radu kamai, gin Nituma masin tavuha Jesus Christ. Amen.

Sabu, Sabu, Sabu! Lord God Rorono!
Ute bon i rani, gam uloi roroma.
Sabu, Sabu, Sabu! Rorono, Hagavi!
Ra Wani gaitolu, God gaituwa nan.

Sabu, Sabu, Sabu! Sarisari amare!
Lord masin rorono, gom dau ginau gaha.
Kerubim i Seraphim siolo gorogo,
Gom dogo nan mau, Rahu vai tuai.

Sabu, Sabu, Sabu! Sinen God ririhai!
Si hav gita tehe, si hav vinihigo tehe.
Silomai vi hae, vi hae hae votu maigo,
God muramura, God tabetabe.

Sabu, Sabu, Sabu! Lord God Rorono!
Tano, mahao, tahi, ma uloi roroma.
Sabu, Sabu, Sabu! Rorono, Hagavi!
Ra Wani gaitolu, God gaituwa nan.

Saint Luke 2. 29.

LORD, kekhadogaha gom lin nom atatu lol tamata: kun gom bevea.
    Huri mataku: ma gita varahuma.
    Gom lol vatuwai: la lolmatara sinobu duluai.
    Rani be men gigita sinobu gaha: sarisari non Israel nom sinobu.
    Uloi roron Tata, i Nitui: i Vui Sabuga;
    Kun tuai, kekhadogaha: si hav nogo tehe. Amen

LORD hage gaku i magu wuwuri: kea higea la matuaku, nasav virihurihu tehe.
    Kea vi tauleoinira non Angel hurigo: be ramen magui dedeninigo la halama duluai.

God inau, nam avkari mamaragainigo. Amen.

Tua, gom malue nin Ima Sabuga kekhadogaha, ta God ma do rada abema. Gom haqe Jesus lol Ganisabuga, i giru la bul vataha guqen—vi gita nom vataha ginau duluai, vi to bibin abema gi buluima. Gov naitai huri togoana tavuha: nom dogoana duluai na tavuha abena. Kunia God vi gita batoi be gom avkaria huri non Ganisabuga, i mulei, nom dogoana tavuha vi lol vatuwainigo huri nom Ganisabuga vainonaiha.

    Hage la ute ravrav batena gov maturu gomen veve avoan tataro keki ma ravae,

GOD, gom mahina lalaiau kahagarig be namen lai Sacrament sabuga talol Rebehin Nituma i Dagana masin tavuha. Nam avkarigo, Tata tavuha, huri nom hogoi gaivua keko. Gov lol gaivua nogu tabeana, nav huri garugusi nom doron vataha guqen, i vainonaiha batena Sacrament vi vorai vina nav gita radu lolmatama la ute amare; gin Jesus Christ ma dau qatun Sacrament keko, Nituma Voragaituwa, Lord kamai. Amen.

Gloria in excelsis


 

 

Web author: Charles Wohlers U. S. EnglandScotlandIrelandWalesCanadaWorld