Liturgical panpipe dancers as St. Peter's, Waihi
(Photo courtesy Bp. Terry Brown)

A LITURGY FOR MELANESIA
in the Language of
SA’A (MALAITA)
SOLOMON ISLANDS

First Edition 1200 – 1979

Translated from English by Mr. David Lilimae

And

Published by the Diocese of Malaita
 

Printed by Provincial Press
Honiara Solomon Islands.
 

DAUAKAUNE HUNE NAU MAAI
1

    Ana Satana Mama, na Kale, na Lioa Maai. Amen.
    GOD, ana emi kei ahoa Amu emi saa roroa qaoa na meola isulie, niie mai Lioa Maai Ioe ke lolose na ke alaha hahie saemami inoruhaana Jesus Christ a Lord iemi.
    LORD Jesus Christ, ana maholo Okei lae mai ilaona Sacrament Maai Ioe, emi ke dau akau ana saemami losio.

(Hymn—Tolirohu—Unuhadai—Daupelena)

    GOD, Oke peieu ani lesilana mui rorana ineu mala O leosii oto, ana uri noko onisae oto toohu maanii ani sae asileni.

IO MAMANOTO

    NOKO haahoue mui roroana ineu hunia God Mama, na hunia God Kale, na hunia God Lioa Maai, na inaona mu Angel na kira Maai, uri nou takalo ana mu neisaena i saeku, na ana walaku, na ana helelaku, oto liuta . . . . . ; aena urinena nok o eitanaio God hunie, oke amasieu.
    GOD Hahuana Nanama, ke amasikie, ke sae asie mui roroana ikire, na ke tole kie ilaona maurihe hu.

Priest Haliite—

    LORD Amasine ke amasiomu maanie ahutana mu orahaa iomu, ani onisaena oto toohu ilaona maurihe, ne ke sapei omu ana walu niine e diana ana Lioa Maai Ineie. Amen.

Kie ke suke niine huni aaila ana Nau Maaine

    GOD, Oke da hunie neke diana ana Nau Maaine ienini na hunie neke oho aailaa maanie walumamalu, na hasio, na Satan.

Kie ke suke maurihaaka ke Hiolo na ke Marou.

    LORD Jesus Christ, Oke da huni neke lae mai neke hiolo na neke marou hunie Nau Maaine ana Manatadianana Ioe, na oto ie emi kesi pote ana O haanau emi.

Kie ke suke ni norutoona ana Christ ke lae maai ilaona Sacrament e Maai.

    GOD, Oke niie neke norutoo, uri emi ke lae mai hunie Nau Maaine iemi ienini, huni lokona mai Naomu.

Kie ke aitanaia God hunie kie ke neie taataa hatana ilaona Sacrament Maai.

    GOD, Oke da huni emi ke neie taataa Pulita ni inoni a Christ, Oke niie ana maholo Nau Maaine e Maai Ioe emi ke neie taataa hatana hailiu huni emi taraurei oto di peire Pulita kira Maai Ileni.

Kie ke aitanaia God hunie kie ke lae ni haamaune mai ilaona Sacrament Maai.

    GOD, Oke da huni emi ke lae mai ni hele ana Sacrament Maai, emi ke lae karaini pei Arenaine na ni laeni Haamaune, na kie kesi adona laena karainie Ora ni unuunu Ioe.

Kie ke aitanaia God mane kie mauteinie laena mai.

    LORD Jesus Christ, O harai emi oto ani lae hadai mei takoie naunekume ni Niine Ioe, Oke niie hunie emi ke aailaa ani rono maneko na mane emi akohe ana Osoi emi ni sae dianana.

    A HAAURILANA walumalau, Ohanui emi ilenine Poupou ana Apumu e tohunei maai;
    Haauriemi Oke peiemi, iemi mu mei inoni Ioe Lord.

MAURIHAANA Christ, haamaaieu.
Sapena Christ, haaurieu.
Apune Christ, haalaelaeau.
Wai maanie paraparaana Christ, lotohieu.
Sapesalune a Christ, haasusueu.
A Jesus tohunei diana, oke ronoau.
Ilaona mu halata amu eu mumunieu.
Mane O toitoliasieu, mane nou opa maanio.
Maania Satan a maeloona e ure honosieu.
Ana haidine maelaku Oke soieu;
Oke teuri, lae mai sulieu.
Neke io peie Muini Maai Ioe,
Neke soihaamanikuluao,
Oto di oto di Amen.

    Kie ke lio oto i mahuohuo, koe kie ke lio ani liona hunia Christ: kei lae mai i waalie i mahuohuo huni niie Maraana huni hieani Nisilana Bread, ana Tai Ioe God iemi oto di.

    MAMAA ileni satamu e maai. Alahana ioe ke lae mai. Moola saemu eni deuleni qaolani ke lae oto, iano ileu mala oto ileni. Da mai siiri huniemi mui meula ke adona siiri. Na oke sae asie humiemi mui roroana iemi, mala iemi noone ko sae asie roroana ikire na muini ko haaroroaire huniemi. Na mane o toliaseiemi hunie malaahonalamami oke si haauriemi maania orahaala. Ana o tooana alahana na nanamana na manikuluana, oto di oto di. Amen.

A Lord ke io peiomu;
Na peie maurihaamu.
 

DAUAKAUNE HUNE NAU MAAI
2

    ANA Satana Mama, na Kale, na Lioa Maai. Amen.

(Hymn. Tolirohu wa Unuhadai)

Neke hodarerea aku maanie Orahaa.
Emi kesi kelie ora ni unuunu, Ioe Lord.

Ne Ioe, Lord, oke amasiemi.
Tolahai palahena taane huni a God.

Maana ahutada ko maohio, Lord;
Uri oke haadora ani Neula isulie qonide.

A Lord ke io peiomu;
Na peie maurihaamu.

Mano urine Priest (Palopalo) kei unue

    A JESUS e teuri, toohu toohu noko unue huniomu, ana omu kaa naue hasiona a Kale ni inoni pei inuhie apune, omu saa roroa manatainie maurihe amiu. Ini ko neue hasioku peie ko inuhie apuku ne kesi manatainie maurihe hu, na nekei taea lou ana dine oreta. Ana hasioku hahuei ola ni neu, na apuku hahuei ola ni inu. Ini ko neue hasioku na ko inuhie apuku nei ko io susu oto aku na ineu oto ana.

    Amasitoo ana mui mei wala ini Maai ineie, St. Paul.

    KAOKAO ni haadianana neena kie ko haadiana, uri e kaa hatana oto ana apuna Christ, mei bread neena kie ko nisie, uri e kaa hatana oto ana sapena Christ? Tae na inoni ke leie maraana, ne kesi neu ana mei bread neena, na ke inu ana kaokao neena.

IO MAMANOTO

    Maeni esiku, kie ke unu tahanainie mui roroana ikie hunia God hahuana nanama.
    EMI ko haahoue mui roroana iemi hunio God Mamaa Kale na Lioa Maai na inaona mui ini maai, uri emi takalo ana mui neisaena isae mami, na ana wala mami na ana helelamami, isulie urine emi ko eitanaio God hunie oke saease mui roroana i emi.
    GOD, ioe o alaha hale ahutana walu ola, oke amasiemi, saeasie ahutana mui roroana iemi na oke hauri emi manie mui ola tataala, niie huni emi aailaana huni esu diana, na na oke tole emi huni maurinehu, inoruhaana Jesus Christ a Lord iemi.

Priest ko io, ke unue uri

    GOD hahuana nanama, a Mamaa, a Kale na a Lioa Maai, ke haadianaa kie oo molana ana na dine, oto di oto di. Amen.

Kolu ke arenai.

    JESUS Deidehio, o lae Karaini emi mei kira dau hahota ana Sacrament ana Sapemu na Apumu, oke helewalamano ana saemami losio mai, oke niie mai huni emi ke onisae toohu ana mui roroana emi deui oto ue mai, huni hiwalaimoli ana ohanui emi ilenine Poupou, ani sae madoro huni menireie tolahamami, hunie manata dianana hunio na hunie ahutana mu inoni, emi kesi melisine laena uri oke nunuhei que inume iemi, tae oke unue mola na mei wala ne emi kesi melisine tolakonilemu isaemami. Lord Jesus, oke lae mai saemami huni haarerea emi; Lord, oke lae mai saemami huni haamolaa sapemami lou; Lord, lae mai saemami huni haasusu emi. Oke dau uri maholo emi hele ana oto Sapemu na Apumu, maane emi opa lou maanio isulie mui rorana iemi, tae emi ke iohu oto namue, hule ana emi kei lesio, maa ani maa, ana Alahana Ioe ileni, ole meuri pee a A Mamaa na Lioa Maai, taataa God oto di oto di. Amen.

    GOD hahuana nanamana haahe ileni ma nai haha, iemi kira orahaa. Ko sare unu ola iseemu ana nimana Priest Ioe, ana unune ana Nau Maaine ienini, huni haa amasitoo ana maelana Jesus Christ, sapeitanatohunana unune Ineie; e unue hautaai ana ilenine Poupou; emi ko sare unuola ana uri ni haamanikulua nani palaheo ana, na huni amasitoo ana maelana na ana sapesalune Ineie; na ani palaheo hahie walu haadiana ana oko ninii mei huni emi; hunie ahutamami mu inoni ke hele ana sae asi rorana na ni luheasi orahaa; hunie emi ke hele niine na mu haadiana ana ooritamami na ahutana Soihadaine, uri na muinie io ue ke isitaa odoie ilenimaena Ioe ana maelada, na uri na muini e mae oto kire ke mamalo pee hanuelamana Ioe na maohine ana tae laine odoie manikuluhaamu oto hu; emi ko eitanaio urine isulia Lord iemi; a Jesus Christ. Amen.
 

DUAKAUNE HUNE NAU MAAI
3

    I LAONA nau Maaine a Lord Jesus kei lae mai ilalo aku, kei niie maoi sape ineie hunieu na Apune e ahe honotaku, kei niie hunieu maurihaana huni haanaue maurihaaku na ke haa aailaa sapeku.
    Dauakaune huni maohe a Jesus kei lae mai ilaona Nau maaine. E diana uri neke, Saeasiroroana, Hiuwalaimoli, na Manatadiana.

Saeasiroroana
    LIOA MAAI a God, oke peieu huni heitalea mui roroana ineu na oke da neke saehu luita ani.
    Haitale diana isulie iona ioe hune oke dau odoie mui roroana ioe. Mala oko neisae hiehie isulie na mui roroana, unue hune Priest ke ronoa haahoune ioe.
    GOD ineu, nou tohunei orahaala liuta i maamu. Sae hune ineu e liuta isulie nou nei malaka amu aena mui roroana ineu. Nou manatainie uri a Jesus Christ e mae honotaku hune neke io luhetai manie orahaana. Nou norutoo ilenine a Jesus hune neisaeasie mui roroana ineu, na pee peine ioe nou heri hunie luluisulilemu, na neke dau take laine mui orahaana.

Hiuwalaimoline.
    MAMAA, Nou hiuwalaimoli uri o haatola a Kalemu Jesus Christ hune ke nee haauri ineu.
    Nou hiuwalaimoli uri nekei tolea hou ilaona saeku ana maholo nau Maaine, nekei koniie norutoona ineu ilenine a Jesus, nou saa norutoo ileniku maraku.

Manatadianana.
    MANAA, Nou manatadiana hunio, isulie maholo emi io ue ilaona orahaana o niie mai a Jesus hune ke mae honotamami.
    Jesus, nou saetooana neke mantadiana hunio liuta isulie ioe o holai manatadiana hunieu.
    Jesus, lae mai seeku hune oke niie hunieu maurihe, na neke suuri ahoa manio.

    LORD amasine, emi kaa neisae rarama uri emi melisine lae na ana Table ienini. Emi kaa norutoo ana toolahamami uri e odotai, tae peenie amasine Ioe o haiaopai na e liuta, Emi kaa malisine siokonilana mui ehuhuei neula hahana Table Ioe; tae peie manatamu Lord e io ue manatana ni amasine. Lord amasine, Oke niie mai huniemi emi ke naue Hasiona a Kalemu a Jesus Christ mela maai Ioe; emi ke inuhie Apune, sapemami mei sape ni orahaa hunie esi rerea ana Sapena, na hunie esi hodalia maurihaamami ana Apune e tohunei Maai; emi si io hu oto i saena na Ineie oto i saemami. Amen.
 

PALONA HAALU
ANA
NAU MAAI

    ANA Satana Mama, na Kale, na Lioa Maai. Amen.

Mani Saie:—
 

    GOD hahuana nanamana, ahutana mui sae ko rokatai inaomu, O sai manea mo’ola emi ko heri huni, mu neisaena ialona sae saa mumuni manio, haamanola mui neisaena ilaona saemami ani uhileie mai Lioa Maai loe hoi saemami, emi kesi manata dian hunio ani sai meumeu ana Satamu e Maai; inoruhaana Christ a Lord iemi. Amen.

Lord oke amasiemi
Lord oke amasiemi
Lord oke amasiemi

Christ oke amasiemi    (wa)     Kyrie eleison
Christ oke amasiemi    (wa)     Christe eleison
Christ oke amasiemi    (wa)     Kyrie eleison

Lord oke amasiemi
Lord oke amasiemi
Lord oke amasiemi
 

MANIKULUANA

    MANIKULUANA hunia God tai salo, ke dailama ana walumalau, mo inoni kire ke hata diana! Emi ko palaheo, ko saidiana amu, ke poruru hahio, ko houleinie tarohaamu e manikulue, ko sai haamani kuluao isulie houlemu e paine liuta Lord God, Inemauri tai leni God Mamaa, hahuana nanama. Lord taataa mela moutei a Jesus Christ, Lord God, Lamb a God, Kalana Mamaa, loe a Taasilana roro alana walumalau, Oke amasiemi. Ioe a Taasilana walumalau Oke helesie qao’olana iemi. Ioe o lo i qaloqalona Goa Mamaa, Ole amasiemi. Ana tai oe O Maai; tae ioe O Lord, tae iomoroi a Christ na a Lioa Maai moro liuta tai saana God Mamaa. Amen.

Kolu ke arenai.

COLLECT

EPISTLE (ioiano)

IO MAMANOTO

HYMN

GOSPEL (ureileni)

A Lord ke io peiomu.
Na peie maurihaamu.

LAELIWALANA

NOU NIWALAIMOLI

    NOU hiwalaimoli ana ataataa God, a mamaa hahuana nanama, a Maa hola ileni na iano, Na walutana na ola lesilana ko laelae na mui ni lesileni kaa lae:
    Na ana a taataa Lord a Jesus Christ, Kalena God taataa mele moutei, E aehota ana Amana ure oto mai na mu welumalau haike ue God mai maania God, Dani, mei maanie Dani, tohunei God mai maanie tohunei God, Kalena God kaa ola haahola ike E taataa tolaha adarue na Amana, Haaholalana taena na ola e lae ana: E siho mai ure ileni itehulaaka mui inoni huni haaurikie, E lodo ana Lioa Maai ana a Mary Keni Raorii, E nei inomi, kire aroroa itehulaaka ilenine poupou i melutana Pontius Pilate. E mae, kire aorie, Olune na haidine e taelai elihoi mala usulana e lae oto, E lae alihoi ileni, ko oi oto i qaloqalona Mamaa. Kei lae manikulue lou mei huni leie muini e mauri ue na muiniu e mae oto: Alahana ineie kaa tootaitelihana.
    Nou hiwalaimoli ana Lioa Maai, a Lord na a Haauri, E ure mai maanie Mamaa na a Kale, kire ko haamau na ko soihaamanikilua raelu na a Mamaa na a Kale, E unue ana mui Prophet. Nou hiwalaimoli ana taataa Soihadaine mui Hurulaa ana walu henue. Noko maohie taelana muini e mae oto na maurihe ana hanue ue mai. Amen.
 

RIHUNEINE
(Poruru)

    KOLU ke tolaola talana ahutana Soihadaine a Christ ko oho ue mai ano.
    GOD huana nanama, hahuana maurihe hu, ana O haausuli emi ana Hurulaa maai loe huniemi ke areo, palaheo hahie taenana tolahai inoni, Oke hele konie niie na unune iemi ie . . . . .

Priest. Emi ko eitanaio Lord.
Ruruha. Palahea God.

    Oke tolai sulie qao’olana iemi, God emi ko unu hahie Manikulu haamu ana: ani eitanai lemu, hune oke uhileine Lioa ni hatana Lioa e walaimoli, hahie ahutana Soihadaine loe hune ke tainelute, na oke qaoa mumuni ke sasaie Satamu e Maai hunire kire ke maesie walamu e Maai na e Walaimoli mane kire haiheitoheana tae pee kire ke io kire ke hatahata oto mola halite.

Priest. Lord ilaona amaine ioe.
Ruruha. Oke ronoa mui arenaine iemi.

    Mamaa ileni oke nie hunire mui Bishop na muini priest na deacon kire ke houleine Walamu, tohunei meurihe, ana helelada na ana Walada, hunie kire ke qaoa mui Sacrament Maai loe mala O haatooi oto, na kire ke toolea mui inoni takoio.

Priest. Lord ilaona amaine ioe.
Ruruha. Oke ronoa mui arenaine iemi.

    Emi ko eitanaio oke haurie na oke ure honotana Elizabeth konikonihe loe, na muini ko alaha i melumelutana, kire ke haitale manirei ana tolahana mui inoni ikire, kire ke susuraaie hunie kira orahaala, na kire ke peie na muini tolaisulie tolahamu e walai moli.

Priest. Lord ilaona amaine ioe.
Ruruha. Oke ronoa mui arenaine iemi.

    Emi ko eitananaio oke lio isulie mui inoni loe kire ko tarohaine walamu hune taena na hanue . . . . . Oke Peire kire ke haausuli diana ana mala na hune kire ke rapeie walada ana iona e adoni.

Priest. Lord ilaona amaine ioe.
Ruruha. Oke ronoa mui arenaine iemi.

    Oke niie niine loe urei leni hunie ahutana mui inoni loe, na tohunana hunie mala e ruruie, hunie kire ke qaronoisuli maneke, kire ke hele haamau ana Walamu e Maai kire ke asu nemue ana iona e Maai na e odo tai suli heidine ikire.

Priest. Lord ilaona amaine ioe.
Ruruha. Oke ronoa mui arenaine iemi.

    Emi ko eitanai ni haamau emu, Lord, sulie amasine loe Oke haa saedodoa na Oke peie muini ko Siohaa wa ko saehu wa ko io ni haamasire, wa ko maemae, ma muini mo maela hai aopai ko tapaoliire lou.

Priest. Lord ilaona amaine ioe.
Ruruha. Oke ronoa mui arenaine iemi.

    Emi ko saidiana ana Satamu e Maai aena mu inoni loe kire lae oto peie hiwalaimoline ni haamaune amu maanie iona maiileu . . . . Oke niie mai huni emi emi ke ladoa aaeda: emi si loko tainelute ana Alahana ioe tai ileni.
    Oke niie mai waluola ienini Mamaa isulie a Jesus Christ, ini ko haaure ruru, ko eieitanaio talamami. Amen.
 

WA HAIKE MUI RIHUNEINE IE

(Ee kaa harihunie ahuteni saileni ke lae. Liue na mui ini, sai tarakonii, e rue wa e olu, mala inoni ko tolea palona e sae tooana)

(Alamine i purine “Emi ko palaheo,” “Emi ko arenai hunio” uri: Lord oke ronoa arenaine i emi.)

    Hune . . . . . emi ko palaheo;
    Hune mui ini e hiwalaimoli ke io hatahata ilaona e taataa Soihadine maai, emi ko arenai hunio;
    Hune mui Bishop, Priest, na mui Deacon na ahutana kira haahaa usuli ana Soihadaine (oto liuta . . . . . ) emi ko arenai hunio;
    Hune mui inoni kire ke ronoa na kira ke tolea Walamu (oto liuta . . . . . ) emi ko arenai hunio;
    Hune kira puo ana mui malamalau ikie (oto liuta . . . . . ) emi ko arenai hunio;
    Hune hanuelamana ana Walumalu (oto liuta . . . . . ) emi ko arenai hunio;
    Hune mui alaha ana mui pooni Walumalu kire ke tolea mala i sulie tolahamu e maai, emi ko arenai hunio;
    Hune mui malamalau i emi ha hune a Queen Elizabeth (Na President ni Fance) na hune mui alai i emi (oto ni France) na hune mui alaha i emi (oto liuta . . . . . ) emi ko arenai hunio;
    Hune iona suli hei dine na asune mui inoni (oto liuta . . . . . ) emi ko arenai hunio;
    Hune mo tekihaha na mui malahuke, na hune mui amaka na mui nikaka na hune memela ana taena na malamalau emi ko arenai hunio;
    Hune mui haasuli ma mui ini kire ko aasaire ila moi School na mui College (oto liuta . . . . . ) emi ko arenai hunio;
    Hune kira maitale na mui ini kira ko hiolo na mui ini ko siohaa, emi ko arenai hunio;
    Hune mui ini kira kaa to’oasune, emi ko arenai hunio;
Hune mui ini kire io mara’ada namui ini tauneinilada e lae (oto liuta . . . . . ) emi ko arenai hunio;
    Hune mui maelona i emi na mui ini emi nei malaka ada, emi ko arenai hunio;
    Hune kire maemae a’a na muini kire ko meri ani sae na ani sape (oto liuta . . . . . ) emi ko arenai hunio;
    Hune mui ini e io huni maena na na mui ini kire toliase oto iona ila walumalau (oto liuta . . . . . ) emi ko arenai hunio.
    Kie ke arenai mamanoto huni haitalea harihunine ikie.

IO MAMANOTO

Priest. Lord ilaona amasine ioe.
Ruruha. Oke ronoa arenaine i emi.

    OKE niie mai waluola ienini Mamaa, isulie a Jesus Christ, lni ko haaure ruru, ko eieitanaio talamami. Amen.
 

HAARONONA

    OMU ke lae mai peie hiwalaimoline, omu ke haahou ni mei inoni ana mo orahaa iomu hunia God hahuana nanama.

IO MAMANOTO

HAAHOU ROROANA

    GOD hahuana nanama, Amana Lord iemi a Jesus Christ, ini e haahola taenana ola ini ko leie ahutana mui inoni; emi ko haahou pei narana ana mui orahaa iemi na mu esume talaala, uri emi hele raramaa hunehu naa hahie manikuluhaamu God, ana mui neisaena isaemami na ana wala mami, na ana helelamami; emi teu rarahio huni Oke ere, amami na huni Oke saesaewasuliemi itehulaani. Eki ko onisae toohu, saemami ko hu taane isulie mu takalona iemi ie, emi ko onisae odoii, na saemami kosi unuhi emi; emi saawawala ike mui roroana iemi. Mamai hahuana Amasine, Oke amasiemi, Oke amasiemi, oke sae asie helelamami inao itehulaana Kalemu a Lord iemi a Jesus Christ; na Oke da huni emi ke asu nemue oto ie na ana na dine ana iona a haalu mala e tooi saemu, hunie Satamu kesi hie isulie na ke manikulu ana; inoruhaana Jesus Christ a Lord iemi. Amen.

HAAREREANA

    GOD hahuana nanama, Amaka ileni, ana amasine lneie e liuta e ponie ana saeasilana orahaa hunie na muini ko elihoi takoie ani sae ni onisaena na ni hiwalaimoline toohu; lneie ke amasiomu; ke sae diana huniomu, ke haasapemawaa omu maanie ahutana mui orahaa iomu; ke haasusu na ke sapei omu ana waluola e diana, ke tola omu ilaona mau rihe hu; ana Jesus Christ a Lord ikie. Amen.
 

NIINE MAAI
(Ureileni)

    Priest. Hanuelamana a Lord ke io pei omu, tarau,
    Ruruha. Na pee maurihaamu.
    Priest. Ikolu oto sasarana Christ,
    Ruruha. Pee tataa Lioa Maai emi lotomaai ilalo ana e taataa mei sape.
    Priest. Aailaa pee iona hatahata a Lord,
    Ruruha. Ilalo ana taataa hanuelamana.

Bread na Wine nileni elae saie:—

    Priest. Hunio Lord ana toolamu e liuta na ana nanamana, na ana manikuluhaamu, na ana maelamu na ana alahana.
    Ruruha. Mui ola tai leni na mui ini mai ano mui ola loe, mui ola ioe oto hu emi ko nii hunio.
 

NAOHAI PALAHENA

    TOOHU, e diana, na e Odotai, na leu oto i sapemami urini, uri emi suli heidine na ana taenana hanue emi ke palaheo Lord, Mamaa Maai, God hahuana nanama, hahuana maurihe hu.
    ISULIE urinena iemi na mui Angel, na pulita tai leni, emi ko pala he na ko soi haamanikulua Satamu e manikulue; emi ko sai diana amu taraurei, emi kosei teuri;
    Maai, Maai, Maai, Lord God Sabaoth, ileni na mai ano e honu ana manikulujaamu: emi ko sei haamnikuluao, Lord ini e Liuta.
Deidehie ini ko lae mau nunuhaana satana Lord.
    Hossana tai salo.

(Poruru)
    GOD hahuana nanama, Mamaa ileni, ana amasine loe O toliasie Kalemu taataa mela moutei, huni ke mae ilenine poupou ani henuilamami; na lneie ilenine poupou e unue mara'ana seemu oto hautaai ana taataa unune e ooana na e mousie oto mui orahaa ahutana walumalau; na ineie e aehotaa meola ni amasitoo ana maelana e tohunei maai, na ana Tataroha Diana e maai e haatolanaini emi huni emi ke qaoqaoa meiolana onioni ke hule ana dike kei oli lou mei; Mamaa amasine, emi ko eitanaio ani sae maneko, Oke qaronoisuli emi, na ana maholo emi ko hele ana mei ola ienini O holaie kau, Bread na Wine, sulie maai a Kalemu a Jesus Christ, a Haaurilamami e aehotaa kau, huni amasitoo ana Maelana na Sapesalune lneie, Oke si qaoemi emi ke hele haaadoemi ana Sapena na Apune e tohunei diana.
    NA ana hairodo neena qelolana e lae ana, e da hoi Bread, oto e ere ni palahena mano, esi nisie, kosi haadora mui qaaronoisuli ine ie ana, e teuri, HELEANA, HAUE, HASIOKU NEIE IENINI, TOLIASILANA E LAE ITEHULAAIU: OMU KE TETURINI HUNI AMASITOONA AKU ANA, NA OKE MANATAINE URI INEU TAANE PEINIO.
    Urine lou naune e mano, e hele ana kaokao, oto e ere ni palahena mano, eni niie lou hunire, ke teuri, OMU KE MANI INU ANA IENINI, ANA APUKU NE IENINI ANA HAALUNE HAALU E AHE ITEHULAAMIU NA TAENANA INONI HUNI LUHE ORAHAA. OMU KE TETEURINI MAHOLO OMU KO INUHE, ANI AMASITOONA AKU, NA OKE MANATAINE URI INEU TAANE PEINIO.

Mai Saie
    Maena ineie Mamaa emi ko hataine, taelaine ineie emi ko unu tahanainie, laena ineie mai emi ko maohe, Haamanikuluao Lord alaha liuta.

Priest
    Na oto ie Lord Mamaa hahie ileni, iemi mu mei inoni ioe ani amasi toona ana maelana e asa na ana sapesalune a Kalemu e tohunei diana; na e taelai peie nanama e liuta, peie tahelaine laineie e manikulue, na isulie lneie tohunei Niine e maai, E da nane, e aehota haatainie Alahana lneie e tohunei liuta peie mu Niie e Maai, na huni amamasitoo ana e lau kei oto nana, emi ko eitanaio mu takalona iemi e lae otoi hune emi saa neisae susulii mara'amami ana loe oto o kaa pei emi.
    Oke hele ni amasine ana unune ni saediana na ni haasadiana, emi ko unu ana iseemi ie. Isulie maelana a Kalemu a Jesus Christ e oana, na isulie hiwalaimoline norutoo ana Apune, emi ko eitanaio ni mei inoni huni oke nii mei huni emi na hunie ahutana Soihadaine loe emi ke helesie luhesilana mu orahaa na waluola diana e ure mai maanie Sapesalune a Kalemu. Na huni omo'olu na a Kale na a Lioa Maai taena na haamaune oto peie manikuluana, oti do oto di. Amen.

* * * * * * *
IO MAMANOTO
* * * * * * *

    Mala a haauri lamami a Christ e qonie na e haasusuli emi keu eni, ne emi ko norutoo emi ko teuri—
 

    MAMAA ileni Satamu e maai. Alahana ioe ke lae mai. Mo'ola saemu eni deuleni qaolani ke lae oto, iano ileu mala oto ileni. Da mai siiri huniemi mui neula ke adona siiri. Na oke sae asie huniemi mui roroana iemi, mala iemi noone ko sae asie mui roroana ikire na muini ko haaroroaire huniemi. Na mane o toliasiemi hunie malaa-honalamami, oke si haauriemi maanie orahaa. Ana o tooana alahana na manmana na manikuluana, oto di oto di. Amen.
 

NISILANA MEI BREAD

Priest.       Mei bread kie ko nisie ni ado ana Sapena Christ.

Ruruha.    E taataa mei bread, kie hune tae e tataa mei Sape sulie kie kei meni adoana e taataa mei bread.

A Lamb a God o taasie roroalana walumalau.
    Oke amasiemi.
A Lamb a God o taasie roroalana walumalau.
    Oke amasiemi.
A Lamb a God o taasie roroalana walumalau.
    Niie mai hanuelamana ioe huniemi.

* * * * * * * *

    LAE mai pei hiwalaimoline ni helese Sapena a Lord ikie a Jesus Christ toliasilana e lae itehulaamu na Apune e ahe itehulaamu, na oke na nau Ana Sapena na Apune a Lord wau i saemu pei hiwalaimoline na pei palahena hahie.

Na ana maholo Priest ko niie Naune Maai ke teuri.
 

SAPANA A LORD ikie a Jesus Christ. Amen.
APUNA A LORD ikie a Jesus Christ. Amen.

* * * * * * * *

Mei wala ni palahena

Kolu ke arenai
 

    GOD hahuana nanama, hahuana maurihe hu, emi ko palaheo oto liutaa aena anaamasine loe O haanau emi, emi hele haadoemi oto ana meola maai ie ni deu anoana, ana naula ni Lioa, oto ana Sapena na Apune hahuei maai a Kalemu a Haauri lamami a Jesus Christ, Na emi ko pala heo ana haaliosai emi ana uri saemu e diana huni emi, na uri emi mui sasarai Sapena a Kalemu, Sape ni Lioa, pulita ni inoni hiwalaimoli, na uri emi hele hu oto ana alahana ioe ani maohine susu oto, aena Kale madu loe e oana na isulie Maelana na Sapesalune ineie tohunei maai.

Mani Saie

    Na emi ko eitanaio, ni mei inoni, Mamaa ileni, Oke pe iemi ana nii lemu, emi ko hata peie pulita ni inoni maai ioe, emi ke sulu isulie mui palona diana, mouqelini oto huni emi ke sulu isulie itehulaana Jesus Christ a Lord iemi, na huni omo'olu na a Kale na a Lioa taenana haamaune oto peie manikuluana oto di oto di. Amen.
 

HAADIANANA

    HANUELAMANA a God, naini saa neisae talihana ke kakalie saemiu na mu lonaine iomu, omu kesi manatainie, omu kesi saepaine ana God na Kalena a Jesus Christ a Lord ikie. Haadianaana God nanama a Mamaaa na a Kale na a Lioa Maai ke io i matolamiu oto ie na ke raururu oto peiomu oto di oto di. Amen.

* * * * * * * *
 

Bread wa Wine ko mano Priest ke unue—

Kolu ke arenai

    MAMAA amasine, emi ko eitanaio ani sae maneko, Oke qarohoisuli emi, na ana maholo emi ko hele ana mei ola ienini O holaie kau, Bread na Wine, Sulie maai a Kalemu a Jesus Christ, a Haaurilamami, e aehotaa kau, huni amasitoo ana Maelana na Sapesalune Ineie, Oke si qaoemi emi ke hele haa adoemi ana Sapena na Apune e tohunei diana.

Na ana hairodo neena qelolana e lae ana

(hune bread)

    JESUS e da hoi Bread, oto e ere ni palahena mano, esi nisie, kosi haaadora mui qaaronoisuli ineie ana, e teuri, Heleana, naue, hasioku neie ienini, toliasilana e lae itehulaaamiu: omu ke teteurini huni amasitoona aku ana.

(hune wine)

    Jesus e hele ana kaokao, oto ere ni palahena mano, esi niie lou hunire, ko teuri, Omu ke mani inu ana, ienini, ana apuku ne ienini ana haalune haalu e ahe itehulaamiu na taenanainoni huni luhe orahaa. Omu ke teteurini maholo omu ke inuhie, ani amasitoona aku.
 

I purine Nau Maai

Oniana na mui rihunaine uri, saai rako ani:—

    LORD emi mui ini emi ko areo mai ano ileu ilaona nume maai mai haha, emi ke areo ana na dine tai salo pee mui ini maai Ioe ana leu O io ana, Taataa God oto di oto di. Amen.
    LORD Jesus Christ O io oto kau pei emi ilaona Sacrament Maai ie, Oke rape amami suli heidine huni lio ahui emi aena Ioe oto malahumamami O manatadiana huni emi. Amen.
    PRIEST a Lord, palahea Lord, saidianana na haamanikulua oto di.
    MUI haeraretai a Lord, palahea Lord, saidiana na haamanikulua oto di.
    MUI Lioa na mui sae rerea, palahea Lord, saidianana na haamanikulua oto di.
    MUI Inoni Maai na mui saemaneko, palahea Lord, sadianana na haamanikulua oto di.
    KIE ke palahea Mamaa, a Kale ne Lioa Maai, kie ke saidianana haamanikulua oto di.

Lord ineu na God ineu,
Palaheo Lord Jesus aena laena Ioe mai ilalo aku.
Ana kele maholo ie nou toleo oto hou ilaona maurihaaku.
Oke oliseu hune neke urihemu.
Noko nie Sapeku, maurihaaku, na manoku hunio maraku,
huni esuie mui esune maai Ioe.

Palahea, saidianana, na haamanikulua a Jesus, Christ taau ana iohana e manikulue, na ilaona tohunei Sacrament Maai ana alta, na ilaona nume maai hou i saeku.

* * * * * * * * *

AMASITOO ANA URI A JESUS E IO ILALO AMU SULI HEIDINE.

* * * * * * * * *