Solomon Is. flag
 The Book of Common Prayer
United States England Scotland Ireland Wales Canada World

   

Na Buka Fuana Fanga’a Ana Maoma Abu
Portions of the Book of Common Prayer in Kwara’ae

 

Na Buka Fuana Fanga’a Ana Maoma Abu:
‘Ani Fata’a ‘I Kwara’ae ‘I Malaita.

Portions of the Book of Common Prayer in Kwara’ae (2001)
 

Na ala’anga etaeta sulia na buka ne’e
Preface

Na buka ti’iti’i ne’e fikua na ‘a ro fo ‘osi fuana fanga ‘a ana na Maoma Abu ki ne’e kira rokisi’i ‘ani na Kwara’ae fuana ‘i ta’ena. Na fo’osi fuana sasi aka’u’anga ki ni’i logi ‘i saena. Nau ku alunga’i ni’i fuana kamu ke ilia fo’onga’a ‘ani’i saena na Dasis ‘i Mala’ita.

Na ala’anga ‘i Kwara’ae nia rokisi liu ana kaida’i ne’e ma nia ka ‘afita’i liu Fuana kersilana ta ala’anga ne’e na ngwae ki ka saele’a ta’ifau fa’inia. Ti ngwae oga ala’anga ‘ua ki, ma ngwae ana ‘i ta’ena noa’a kira kasi saiana. Ti ngwae ka oga fasi ala’anga ne’e ka di’ia go ‘o ne’e kulu ala’a. Na ala’anga fuana fo’osi nia bolo fa’inia na ru ne’e kuke kwai alee fa’inia: Na fo’osi ne’e ki ili ‘uana ne’e ke ‘adoa na lia’i ngwae ne’eri ki. Ma noa’a la’u fasi ne’e nia’anini’a na’a ma ka sui.

Nau ku oga liua kamu ka ilia fo ‘onga’a ‘ani ma di’ia ta ru ne’e noa’a kamu ‘iri alafafia muke saea fuana sa Mama Lionel Saefoa. Kamu saiana kamu ka lisia ana kula ne’e nia rao ana fuana Rokisilana Faualanga’i ‘anga Faolu fuana ‘i ‘Aoki. Nau ku fata le’a ana na rao’a ne’e ma nia le’a fuana kamu ka fo’o ‘ani’i.

The Rt. Rev’d Terry Brown
Na Bisop ‘i Mala’ita.
 

 

 

NA SASI AKA’U ‘ANGA FUANA FANGA’A SA’ULAFI NA AOFIA
Preparation for Holy Communion 1

‘ANI SATANA NA MA’A MA NA NGELA MA NA MANGO’IRU ABU. AMEN

God di’ia no’amu noa’a kami kasi bolo go’o fuana ne’e mike fa’a saele’a ‘oe. Kwatea ma’i na Mango’iru Abu ‘oe ke fa’asaga kami’a ma ka gwaunga’i saena maurilami’a‘ania sa Jesus na Christ, Aofia kami.

‘Iu Aofia sa Jesus na Christ karangi ‘oeko dao na’a ma’i saena na su’asia abu ‘oe, tabua saena maurilami’a fuamu talamu

Na fa’i ngu fuana kwaifiloi ‘anga naema ki tua nene

‘Iu God kwai’afi aku ‘iri nai lisia na su’u ngenge’a nau ki di’ia ba ‘oeko lisia logo ‘iri nai kakari alifa’i mamana ma ku fai danga ‘ani’i. Kami fuulangani ta’anga’a kami ki fuamu God Ma’a ‘oilaki’a dangalu, na Ngela, na Mango’iru Abu ma ‘ina’ona na fiku’a Abu lo ‘ilangi ta’ifau ne’e kami mala ta’a na’a amu ‘ani su’ungenge lamu saena manata lami’a, ‘ani fata lami’a, ma ‘ani abula lami’a tasa na’a........... ma mika amasi’o. God ‘oe ‘ofe kami ma’i ‘ani mauri’a faolu

Na fa’ale’a ‘anga ana na Fata abu.

Na kwai’ofe ‘anga ma na kwaimanatai ‘anga na Aofia nia ka rufuanata ana ta’anga’a kamu ki ma ka kwatea kaida’i fuana saora’i lana mauri lamu’a ‘ania kwai’ofe’a ma fani fa’angasi’a ana na Mango’iru Abu nia. Amen.

Kulu gani ‘uana fito’o ‘anga ana God.

‘Iu God ‘ofe kami ‘iri mike dao karangi ma’i amu ‘ani fito’o ‘anga ‘iri ke fa’angasi kami saena kaida’i ana ofo’a ‘usia ilito’o ‘anga ki saena magalia, noni fani sa Saetana. Aofia sa Jesus na Christ kwate mike fiolo ma mike silikwa’u mamana ‘uana maoma ana Alafe ‘anga ‘oe ma mike to’o ana na fanga ma’i amu ‘ilangi fani ‘inoto’angai ma’i amu.

Kulu fo’o ‘ani fito’o ‘anga ne’e na Christ ke dao ma’i saena fanga abu’a.

God ‘ae’o ne’e ‘oko fiku kami ‘ani na Christ. Kwate kami ka ‘ado fiku fani fikuta’i ngwae abu ‘i langi ma fa’ini’o saena maoma abu ne’e.

Kulu fo’o ‘uana ma’u abu’a

God kaida’i kami sasi aka’u fuana fanga’a ana maoma abu ne’e kami ke leka ma’i siamu ‘ani ma’u abu’a fani alafe’a ‘iri ne’e ‘oe kwalo kami ‘uana fuli fo’osi abu ‘oe.

Kulu fo’o ‘iri noa’a kusi ma’u la’u ‘ani leka’a ma’i sine’e kulu’a ngwae abula ta’a ki.

Aofia sa Jesus na Christ ne’e ‘oko ri ‘uami’a ‘iri ne’e mike leka ma’i ‘uana fuli gwaru’a ana kwai’ofe’a ‘oe, ma mike kwaro’oi amu ana ne’e ‘oko ri ‘uami’a.

Na ngwae ana fa’amaurilana magalia, ‘ania ‘ai rarafolo ana ‘abu’i ru ana oga ‘ato ‘oe ne’e fa’a noni ‘o kami. Fa’a mauri kami ‘afi kami nini’a kami gani enoeno amu.

Mangona sa Jesus ne’e kwate nauku abu, Mangona sa Jesus ne’e fa’amuri nau‘Abuna sa Jesus nia fa’asikasika nau, Kafo ma’i fa’asia gagarona sa Jesus ne’e sa’u nau: Noni fii’a sa Jesus ne’e fa’angasingasi nau, Rongo nau ma’i le’a lana Jesus: Safunga’i nau saena maala ‘oe ki, Kwate naisi fo’a nau la’u fa’asi’o Buringa’i nau fasi malimae nau ne’e ilanga’i nau, ‘Saena kaida’i ana maelaku ri ‘uaku Ma ‘oeko kwalo nau ‘iri nai leka ma’i siamu, ‘Iri ne’e nau’a fani to’a ‘olo’olo ‘oe ki Mike aura’e ‘oe tutua kasi sui. Amen.

Di’ia ngwae ki ne’e kira kwaimamani ana asoa, kami’a bore mike kwaimamani amu amu Christ: Dao ma’i fani asoa faolu ‘oko kwate ‘oe talamu ‘iri mike sai amu ana ngali lana beret ne’e ‘ae’o ne’e God kami ne’e ‘oeko mauri firi. Amen.

Ma’a kami ‘ilangi Satamu ne’e abu na gwaunag’i ‘anga ‘oe ke leka ma’i. Na oga’a ‘oe ka sai sulia ‘i ne’e ‘iano di’ia logo ‘ilangi. ‘Oeko kwatea ma’i fanga fuami’a ne’e ke bolo fani ta’ena. ‘Oe rufuanata ana ta’anga’a kami ki di’ia logo ne’e kami rufuanata ana ngwae ne’e kira abula ta’a ‘usi kami ki. ‘Okesi danga ‘ani kami saena ilito’o ‘anga bore ma ‘oe oli ta’i kami fa’asia ru ta’a. Osi’ana na ru ‘oe ne’e na ‘inoto’a ‘angai ma na to’ofu’a ka teoteo firi.

V. Na Aofia ka tua fa’i kamu.
R. Ma fa’i ni’o logo.

 
Cover, Kwara'ae BCP

Kwara’ae is the largest indigenous vernacular language in the Solomon Islands; it is spoken by more than 30,000 people, primarily on the island of Malaita, in the Anglican Church of Melanesia’s Diocese of Malaita. The services presented here are translations of the corresponding liturgies in A Melanesian English Prayer Book, first published in 1965.

Griffiths identifies Kwara’ae and “Fiu” as separate dialects in his Bibliography of the Book of Common Prayer 1549-1999; Fiu is in fact a large population center of northern Malaita in which Kwara’ae is spoken. The first extant translation of portions of the Book of Common Prayer into this language in 1909 is discussed by William Muss-Arnolt (Chapter XLVI; Griffiths 96:1); major liturgical books in Kwara’ae have since been published in 1911, 1923 (Griffiths 96:2), 1934, 1936, 1945 (Griffiths 97:1) and 1972. (A bibliography of Anglican liturgical publications in Kwara’ae is available at this address.) A significant account of the importance of this language to Anglicans is Karen Ann Watson-Gegeo and David Welchman Gegeo’s “The Impact of Church Affiliation on Language Use in Kwara’ae (Solomon Islands)” (Language in Society, Vol. 20, No. 4, Dec., 1991, pp. 533-555).

 

 

Terry Brown, retired Bishop of Malaita, provided a copy of this text. Richard Mammana transcribed parts of it and prepared it for online publication. This text was first published by the Anglican Church of Melanesia for the Diocese of Malaita, January 2001. This liturgy was produced concurrently with a new translation of the New Testament into Kwara'ae (Wycliffe Bible Translators, 2003); the late Reverend Lionel Saefo'oa was translation coordinator for both projects.

NA RUANA FIKI’A FUANA SASI AKA’U ‘ANGA FUANA FANGA ABU’A

‘Ani satana na Ma’a ma na Ngela ma na Mango’iru Abu. Amen.

Nai sau’ua na limaku ka sikasika fa’asia abula ta’anga’a
‘Iri nai leka ma’i ‘uana fuli fo’osi ‘oe.

Kwaimanatai ma’i fuami’a
‘Iri mike aura’ea Satamu.

Na ngwae ki ta’ifau lia ‘uamu
‘Iri ‘oe kwate fanga ana unita’i ‘ai nia nama.

Aiga’i ‘oe rebata limamu
‘Oke ba’a gwaleda ‘ani ru le’a ki.

Na Aofia ke tua fa’i kamu
Ma fa’ini’o logo

‘Unari na fataabu naema na ngwae kwai tala’i ke fata ‘uri;

Sa Jesus ba fata ‘uri, nia mamana liu nauku saea fuamu’a, si di’ia mukasi ‘ania na fasi’ana na Ngela Ngwae ma noa’a mukasi kwa’ufia. ‘Abuna, noa’a kamu kasi to’o ana ta mauri’a amu’a. Sa tai ne’e ‘ania fasi’aku ma ka kwa’ufia ‘abuku nia to’o ana mauri’a firi ma nau ku ta’ea ana bongi ‘isi. Du’ungana fasi’aku ne’e fanga mamana nama ma na ‘Abuku ne’e ru mamana fuanakwa’ufilana nama. Sa tai ne’e ‘ania fasi’aku ma ka kwa’ufia ‘abuku nia tua tari aku ma nau ku tua tari ana nia’a.

Manata oli ‘uana fatalana na ngwae fa’atalo nia sa Pol nia saea ‘uri;

Na titiu ana fa’a le’anga’a nini ki fa’ale’a ‘iri noa’a la’u daro kwaima’anga ‘ani ‘Abuna sa Jesus ne’eri’a, ma na beret nini’a ki ngiia na’a noa’a la’u daro kwaima ‘anga ana Nonina sa Jesus nari, bore ma ala ‘ani ngwae ka tala filoa maurilana ma ka fi’i fanga ana beret ne’e ma ka kwa’u ana titiu ne’e. Amen.

Manata nene sulia kala kaida’i ti’i ti’i.

‘Unari sasiku kina kwate kulu fuulanga’i enoeno ana rora’a kulu ki fuana God ‘oilaki’a

Kulu fuula ngani ta’anga’a kulu ki fuana God na Ma’a ma na Ngela ma na Mango’iru Abu, ‘i na’ona na ta’i fiku’a abu lo’ilangi ne’e kulu abula ta’a na’a ‘ani manata lakulu, fata lakulu, fa’inia ru nau ku sasi’i ki ‘ani noniku talaku. Ka ‘unari nauku kwai amasi amu God ‘iri ‘oe kwaimanatai ma’i fuami’a. God ‘oko ‘inoto’a ‘usi ru ki ta’ifau, kwaimanatai ma’i fuami’a, rufuanata ana ta’anga’a kami ki ma ‘oko su’usi kami fa’asia ru ta’a ki ta’ifau. Fa’a ngasi ngasi kami fuana fuli lana ru le’a ki. Kwalo kami kwau ‘uana saena mauri’a firi. Osi’ana sa Jesus Christ na Aofia kami.

Di’i na fataabu nia ‘ine’e niaka saea ma’e fata’a ne’e ki.

Osi’ana na kwaimanatai’anga na Aofia niake rufuana ta ana ta’anga’a kamu ki ma ka kwate kaida’i fuana muke baru faolo ana maurilamu’a ‘ani kwai’ofe’a fani na kwai’afi ‘anga ana Mango’iru Abu. Amen.

Kulu fo’o.

Le’a lana Aofia kami sa Jesus ne’e ‘oeko dao ma’i siami’a saena fanga abu’a ne’e nini rokisi na’a ‘ania fasi ‘amu ma na ‘abumu. Sasi aka’u ana mauri lami’a ‘iri mike to’o amu. Kwate mike kakari alifa’i mamana fa’asia ta’aga’a kami ki. Kami fa’amamana ne’e ‘oeko fa’amauri kami na’a fa’asi’i ana ‘ai rarafolo. Kwate mike oga lilisu ana fa’a sika sika lana na mangomi’a. Kwate ne’e mike alafe fuamu ma na ngwae ki ta’ifau ‘iri ke totolia ne’e . mike dao karangi ma’i amu. Noa’a kami ‘iri totolia ne’e mike to’o amu saena mauri lami’a. Bore ma ‘oe saea go’o ma’i fatalamu ‘iri ne’e ka totoli kami. Aofia Jesus ‘oe leka ma’i siami’a ‘oko fa’asikasika kami. Aofia leka ma’i ‘oeko gura kami. Aofia leka ma’i siami’a ‘oko fa’angasi kami. Aiga’i mika to’o amu alu na ta’anga’a kami ki kasi daro’i kami la’u fa’asi ‘oe bore ma kami’a ne’e ru ‘oe ki na’a ka dao ana ta asoa ne’e mike ba’a lia ‘i maamu saena ‘inoto’anga ‘oe ‘ilangi, kula ne’e ‘oeko mauri ma ‘oko to’ofu fani na Mangoiru Abu ta’i God tutua kasi sui. Amen.

GOD ‘oeko ‘inoto’a ‘i langi ma ‘iano, kami ngwae siroro ta’a ki kami oga mike sasi na su’asia ana na fanga abu’a ne’e fuana fa’amanata lami’a ‘ani maelana na Aofia kami fuami’a. Ta’i su’asia ne’e ni kwatea na’a ‘usi kami ana ai rarafolo. Kami sasi ‘uri fuana aura’e lana Satamu ma mike ba’atafe’o fuana fa’ale’a nga’a ‘oe fuami’a. Kami sasi ‘uri ‘iri ne’e kami’a fani ngwae ki ta’ifau mike to’o ana fa’ale’angai, sakadola ‘anga fa’asia ta’anga’a kami ki, ‘iri ke fa’a noni’o kami, ‘iri kami’a fani ta’i fiku’a abu ‘oe mike to’o ana fa’ale’anga. Kaida’i ana maelami’a mike ru’u saena saele’anga ‘oe. Ma ai ne’e kira mae na’a ki , kia mamalo saena aroaro’a ma saena kwaimamani’a. Kike ba’a tata’e saena ‘inoto’a ‘anga ‘oe ne’e ‘oko tua firi. Sulia sa Jesus Christ na Aofia kami. Amen.

 

 Preparation for Holy Communion 2

UULA FIKI’A FUANA SASI AKA’U ‘ANGA FUANA FANGA ABU’A.

Na Aofia nau sa Jesus ke ba’a dao ma’i siaku saena fanga abu’a ne’e. Nia kwatea ma’i fuaku na noni’i ru ngisia nia. Nia ke kwate na maurilana fuana sarelana mangoku ma fuana fa’a ngasilaku saena noniku.

Kaida’i nauku kwaimamani fuana ngali lana sa Jesus Christ saena fanga abu’a nau ku oga nai kakari alifa’i, nau ku fito’o ma nau ku alafe.

Manata oli’a.

MANGO’IRU ABU GOD, ‘ofe nau ‘iri na’i lia saiana abula ta’anga’a nau ki ma kwate nai kwaimanatai mamana du’ungani’i.

Manata ‘amu sulia tua lamu, di’ia fa’uta ‘oe kakari alifa’i fa’asi’i ‘oeko lisia na fatabu ‘iri ne’e nia rongo fa’a fuula nga’i anga ‘oe.

GOD NAU ‘AE, nauku abula ta’a ka lilisu na’a ‘usi’o ma nauku kwaimanatai liu na’a ne’e nauku fa’akaisi’o ‘ani na ta’anga’a nau ki. Nau ku saiana sa Jesus mae na’a olisi nau ‘iri nai sakadola fa’asia ta’anga’a nau ki ta’ifau. Nau ku manta fito’o na’a ana sa Jesus ne’e nia rufuana ta ana ta’anga’a nau ki. ‘Unari ne’e nau ku oga nai gani’o ‘iri ne’e ‘ani kwai’ofe’a ‘oe, nai kwai ro’oi amu ma nau ku fai danga ‘ani na ta’anga’a nau ki ta’ifau.

Fito’o ‘anga.

NAU KU fa’amamana ne’e nai ba’a ngali nonina ma na ‘abuna na Ngela ‘oe sa Jesus Christ ne’e ‘oeko kwatea ma’i ‘iri nia ke fa’amauri nau. Nau ku manata fito’o ana sa Jesus ma noa’a la’u nau’a talaku.

Alafe’a.

MA’ASI nau ku alafe fuamu du’ungana kaida’i kami’a mala saena ma’erodo ‘oeko kwatea ma’i Ngela muta’i ‘oe sa Jesus ‘iri ke mae fuami’a. Jesus nau ku oga liu na’a ‘ae’o sine’e ‘ae’o na’a ne’e ‘oeko etangia fa’ata’ilana ma’i na alafe’anga fuaku ‘iri nasi faidanga la’u’ani’o.

NOA’A kami kasi fii go’o to’ana na ‘olo’olo’a kami talami’a. God kaida’i kami leka ma’i siamu ana fuli fo’osi abu ‘oe, bore ma saena kwmantai ‘anga ‘oe fuami’a. Noa’a kami ‘iri totolia takama’i lana ngisi ngisina fanga ne’e ‘asia olofana tatafe abu ‘oe, bore ma kwaimanatai’anga fuami’a nia teoteo firi. Du’ungana ne’eri’a ne’e Aofia le’a kwatea na nonina Ngela alafe’a ‘oe sa Jesus, ne’e mike ‘ania ma mika kwa’ufia ‘abuna ‘iri kami ka tua tari ana nia’a ma nia’a bore ka tua tari logo ami’a. Amen.
 

 

 Preparation for Holy Communion 3
Fiu Cathedral
The cathedral at Fiu
 

NA TATABULA LANA MAOMA ABU NA AOFIA.

—Ngwae ki tata’e kika ngulia fa’i ngu Fataabu fani ngwae rao ki ru’u ma’i ma nia ka saea ma’e fata’a ne’e totolia kadi kaida’i ki.

‘Ani satana na Ma’a, na Ngela ma na Mango’iru Abu. Amen.

Ngwae ki ta’ifau saea
 

The Liturgy
(Holy Communion)

GOD ‘OILAKI’A LIU, maurilami’a asi folafola na’a ‘ina’omu ta’ifau. ‘Oko sai na’a ana ru ne’e kami oga’i ki. Ta manata’i ngwae sofunga’i bore kasi ago go’o fa’asi’o. ‘Oke fa’a sikasika na manata’i ngwae ta’a ki saena mauri lami’a ‘ani mangofilana ma’i Mango’iru Abu ‘oe. Kwate ne’e mike alafe ra’uto’o amu ma mika manta kulu’a mala ana Satamu ne’e abu. Sulia sa Jesus Christ na Aofia kami. Amen.

LORD kwaimanatai
LORD kwaimanatai
LORD kwaimanatai

CHRIST kwaimanatai
CHRIST kwaimanatai
CHRIST kwaimanata1
naema;
 KIRIE eleison
CHRISTIE eleison
KIRIE eleison.

LORD kwaimanatai.
LORD kwaimanatai
LORD kwaimanatai.
 

Collect for Purity

FU’USI ‘INOTO’A ANA GOD

Fu’usi ‘inoto’a ana God ‘ifafona salo ma ke babato’o ‘iano, ngwae ki kia kwaimaa faolo Kami aura’e’o, kami fu’usile’a amu, kami ba’atafe’o ki bobo uru uru fuamu. Ki fu’usi to’ofu amu si ne’e kwanga’a ‘oe no ‘iri maleko mala, Lord God Aofia ‘i langi, God Ma’a ‘oilaki’a, Lord ta’i Ngela muta’i sa Jesus Christ. Lord God Ngela God. ‘Aoru ‘oko tala kwau ta’anga’a ana magalia ‘oke manatai kami. ‘Aoru ‘oko tala kwau ta’anga’a ana magalia ‘oke manatai kami. ‘Aoru ‘oko tuai ‘olo ‘olo ana Ma’a ‘oko manatai kami. Sine’e ta’i ‘ae’o go’o ne’e ‘ako abu, ta’i ‘ae’o go’o ne’e gwaunga’i, ta’i ‘ae’o go’o ne’e na Christ ma na Mango’iru Abu ne’e tasa saena to’ofu ‘anga God na Ma’a. Amen.

Kulu fo’o

Na fiki’a ana kadi kaida’i
 

 Gloria in excelsis

KEREKERE’A ABU ngwae ki gwaru

FA’I NGU ngwae ki tata’e

NA FA’ARONGO’A LE’A

V. Na Aofia ke tua fa’i kamu
R. Ma fa’ini’o logo.

Na fa’arongo’a Le’a sa ............ ni keresia lisia ana bali etangia ana

V. Fu’usi ‘Inoto’a ana na Aofia
R. Mike ba’afakua na Christ.

NA FUNAU ‘ANGA ‘I NE’E.

NA FA’AMAMANA ‘ANGA
 

Collect, Epistle & Gospel

KAMI FA’A MAMANA ta’i God Ma’a ‘oilaki’a nia fulia ‘ilangi ma ‘iano, fani ru ta’ifau ki lisi’i ki ma fani ru noa’a kisi li’i ki. Ma na ta’i Lord sa Jesus Christ na ta’i Ngela muta’i God Ngela Ma’a ‘ina’ona mala ma’i bonge lana mala magalia ki. God fasi God madakola’anga fasi madakola’a. God mamana fasi God mamana. Ngela God nola’u ru fulingani God madakola ‘anga fasi, ta’i mali ta’iru adaro’o. Ma’a nia fulingani ru ki sui fuana. Nia koso ma’i ‘iano ‘uakulu ngwae ki ‘ike fa’a mauri kia. Nia ka uku ‘abu ‘ani na Mango’iru Abu ana ‘i Mere na kini abungani, nia sau ana na ngwae. Kika foto’ia ana ‘ai rarafolo fuaka ana kaida’i sa Pontias Paelat, ma nia ka nonifi kika kwaiatoa ma ana uula ma’e dangi nia ka tata’e oli di’ia ba kira keresia na’a saena kerekere’a abu. Nia fane’uana ‘ilangi ma nia ka tua na’a ana bali ‘olo’olo ana Ma’a. Nia ke ba’a oli ma’i saena ‘inoto’anga nia ‘iri ke kwaimatalangani ai mauri ma ai mae na’a ki na talo’a nia kasi ba’a sui. Kami fa’amamana na Mango’iru Abu, na Aofia ngwae ni kwatelana mauri’a nia saka ma’i fa’asia Ma’a ma na Ngela nia fa’inia na Ma’a ma na Ngela kulu fiku ‘afuta’inida ‘ani fo’osi’a fani fa’a’inoto’anga. Nia fata ‘ani na profet ki. Kami fa’a mamana na ta’i fiku’a abu ana to’a ana fa’a talo ki saena kwalu sui’i fanoa ki. Kami fa’a tafala ngani ta’i siuabu’anga fuana lia eko lana ta’anga’a ki. Kami lia ma’akwali ana tata’e lana to’a mae ki, ma na mauri’a ana magalia ke dao ma’i. Amen.
 

Nicene Creed

NA FO’ONGA’A FUANA RU TO’O’TO’O KI

Kulu fo’o fuana fiku ta’i to’a abu na Christ ta’ifau ma ‘afutana na’a ogalana ngwae ki ta’ifau:

Bobo uru uru

GOD ‘OILAKI’A, di’ia ba ‘oko fa’ananau kami na’a ‘ani fatalamu ne’e abui ana ne’e mike fo’o fuana ngwae ki ta’ifau ma nini’a mika ba’atafe’o na’a fuana fa’a le’anga’a ‘oe ki fuami’a ta’ifau......

V. Kulu ba’a fakua na Aofia
R. Ba’a tafea na Goa

Kami gani’o God ‘oe dau fafia na fo’onga’a kami ki ‘afutana na ta’i fiku’a abu na Christ ‘iri ne’e kia fungu ‘ani na Mango’iru Abu ana le’anga’a ma aroaro’anga ma ‘iri to’a ta’ifau ‘ani mamana’anga ana fatalamu ne’e abu ma kika tua usulia ta’i ato’a saena ta’i ‘ado fiku’a ma ‘ani alafe ‘anga.

V. Aofia saena kwaimanatai ‘anga ‘oe.
R. Rongoa fo’onga’a kami.

Fa’afungua ma’i ngwae ‘oe ki ne’e kira dau sulia na fata’a abu ‘oe ma na kwate’a abu ‘oe ki ‘ani kwai’ofe’a ‘oe ma’i ‘i langi tasa na’a sa.........ngwae folo kami ki ma na ngwae rao kami ki fani ngwae kwai ‘o’ori ki saena na bali Lalusae ne’e.... ‘iri ne’e ‘ani tua lada ma kwaitala’i lada kia fa’ata’inia na kwanga’a ‘oe ma kira ka inua ma’i ngwae ki siamu.

V. Aofia saena kwaimanatai’anga ‘oe
R. Rongoa fo’onga kami.

Kami fo’o fuana gwaunga’i ngwae ana fanoa ki ta’ifau tasa na’a fuana ‘i Elisabet na gwaunga’i kini an Kamonwel saena magalia. (Ma na gwauna’i ngwae fuana ‘i Frans) ma fuana ngwae ne’e to’o ana ngasingasi’anga fuana bubunga ne’e kami ki ma na ngwae ne’e lia sulia tua’a ki ta’ifau ........... Kwatea lia to’o ‘oe fuada ‘iri kia dau sulia ngwae ki ‘ani ‘olo’olo’a ma ko kwatea aroaro’a ma kia tagi sulia ngwae ki ta’ifau.

V. Aofia saena kwaimanatai’anga ‘oe
R. Rongoa fo’onga’a kami.

God rongoa kwaiamasi’anga kami ki ‘iri ‘oe fa’ina’o ma ko kwai’afi ana to’a ne’e kira rao fuana talonga’i lana na fa’arongo’a le’a ‘oe, saena fanoa ki ta’ifau. Alu kira ke ngali ma’i na madakola’a ana Mango’iru Abu ‘oe ka tala’ida saena kulana rao’a ki, fa’amanata ‘anga ma na fa’amauri’a ki.......

V. Aofia saena kwaimanatai’anga ‘oe
R. Rongoa fo’onga’a kami.

‘Ofea ma’i ngwae rao ‘oe ki ta’ifau ne’e ‘oko ri ‘uada fuana rao’a ‘oe ki, ‘ani kwate sakonga’i ‘anga ‘oe ma’i ‘i langi. Ma tasa na’a fuana sa ......... ma fuami’a logo na ngwae ‘oe ki nini’a kami fiku na’a, ‘iri mike rongoa logo fatalamu ne’e abu ‘ani manata’i ngwae ma’udi le’a ma mike rao mamana fuamu sulia asoa ki ta’ifau ne’e kami ke tua ‘ua suli’i saena magalia.

V. Aofia saena kwaimnatai’anga ‘oe
R. Rongoa fo’onga’a kami.

Kami kwaiamasi amu Ma’asi ‘iri ne’e ‘ani alafe’a ma fanga le’anga’a dangalu ‘oe fuami’a ‘oe kwaigwale ma ko kwai’afi ana to’a ne’e kira noni fi, kira kwaimanatai, kira bo’obo’o ma kira ka mata’i..........

V. Aofia saena kwaimanatai’anga ‘oe
R. Rongoa fo’onga’a kami.

Kami fo’o fuana na ngwae rao ‘oe ki ne’e kira mae na’a fa’asia na mauri’a ne’e ‘ani fito’o nga’a amu ‘ani ma’u abu’anga tasa na’a sa...........

V. Aofia saena kwaimanatai’anga ‘oe
R. Rongoa fo’onga’a kami.

Ma kami aura’e ‘oe fuana toa abu ‘oe ki ............ kami ba’atafe’o du’ungana le’anga’a kira, ma abula ‘anga le’a saena maurilada ne’e kira ‘auna’o ‘ani. Kami fo’osi’o ‘iri mike ru’u fa’inida saena saesae le’anga’a ‘oe tutua firi.
Ma’asi abu ‘oe rongoa ma’i fo’onga’a kami ki di’ia ni’i to’o sulia oga’a ‘oe, sulia sa Jesus Christ na Aofia kami. Amen.
 

Intercession

TI FO’ONGA’A DOKO DOKO LA’U FUANA BO’OBO’O ‘ANGA KULU KI.

Nia fuli go’o ana ngwae ne’e ngali fo’o nga’a—di’ia nia oga nia filia go’o ti ai, nam di’ia noa’a nia fikua go’o tiai.

Na ro kwaiamasi ‘anga ne’e ki ne’e ngwae ke filia tai adaro’o;

“Kami ba’atafe’o God” nam “Kami fo’o ‘ani amasilamu God.”
Olisi’a ne’e ‘uri; “Oe rongoa fo’onga’a kami”

Fuana.................

V. Kami ba’atafe’o God
R. ‘Oe rongoa fo’onga’a kami

Fuana kwaima’anga na fikuta’i fa’amamana ki ta’ifau saena kwaima’anga abu ne’e....

V. Kami fo’o ‘ani amasilamu God
R. ‘Oe rongoa fo’onga’a kami.

Fuana gwaunga’i ngwae folo kami ki, na fataabu ki ta’ifau ma ti ngwae rao la’u amu saena fiku’a abu ‘oe ma tasas sa.......

V. Kami fo’o ‘ani amasilamu God
R. ‘Oe rongoa fo’onga’a kami

Fuana ngwae ki ta’ifau ‘iri ne’e kia rongoa logo fata lamu ne’e, ma kika ngali ‘ani kwai ro’oi ‘anga tasa na’a..........

V. Kami fo’o ‘ani amasilamu God
R. ‘Oe rongoa fo’onga’a kami.

Fuana ngwae ne’e kira maladala fa’o ki ta’ifau saena na bubunga ne’e kami ki........

V. Kami fo’o ‘ani amasilamu God
R. ‘Oe rongoa fo’onga’a kami.

Fuana aroaro’a saena magalia ta’ifau tasa na’a..........

V. Kami fo’o ‘ani amasilamu God
R. ‘Oe rongoa fo’onga’a kami

Fuana gwaunga’i ana bubunga ne’e kami ki, ta’ifau ma tasa na’a sa .........

V. Kami fo’o ‘ani amasilamu God
R. ‘Oe rongoa fo’onga’a kami

Fuana ngwae ma na kini futa kami ki ne’e kira rao ana ti kula matamata, ma kira ka rao saena na faka ki......

V. Kami fo’o ‘ani amasilamu God
R. ‘Oe rongoa fo’onga’a kami.

Fuana ngwae ana kwalafa’a kami ki fani na ngwae kwaimaa kami ki, ma’a ma te’a kami ki ma fuana ngelami’a ne’e kira tua ana ti kula matamata

V. Kami fo’o ‘ani amasilamu God
R. ‘Oe rongoa fo’onga’a kami.

Fuana ngwae ne’e kira fa’a manata ma na ngela ne’e kira ka lulu saena kulani fa’a manata ki...................

V. Kami fo’o ‘ani amasilamu God
R. ‘Oe rongoa fo’onga’a kami.

Fuana ngwae ne’e kira to’ofolo kwailiu kira ka liu saena salo, kira ka liu fafona ano ma kira ka liu saena asi tasa na’a ...........

V. Kami fo’o ‘ani amasilamu God
R. ‘Oe rongoa fo’onga’a kami.

Fuana ngwae ne’e kira dala’a ma kira ka fiolo ma fani ngwae ne’e kira ‘isi to’o ana ta kula ‘ada fuana tua’a ana

V. Kami fo’o ‘ani amasilamu God
R. ‘Oe rongoa fo’onga’a kami

Fuana ngwae ne’e kira bo’obo’o ‘uana rao’a ki........

V. Kami fo’o ‘ani amasi lamu God
R. ‘Oe rongoa fo’onga’a kami

Fuana ngwae inamae ki ma fani ngwae ne’e kira malata’a ada’a ki, ma na malimae kami ki, ma na ngwae ne’e kira fa’akaisida ki.........

V. Kami fo’o ‘ani amasilamu God
R. ‘Oe rongoa fo’onga’a kami.

Fuana ngwae ne’e kira mata’i ki, kira ka nonifi, kira ka kwaimanatai, ma maurilada ka ‘asia na’a tasa na’a ngwae futa kami ki.........

V. Kami fo’o ‘ani amasilamu God
R. ‘Oe rongoa fo’onga’a kami.

Fuana ngwae ne’e kira teo na’a fuana maelada ki ma fuana ngwae ne’e kira mae na’a fa’asia na mauri’a ne’e.........

V. Kami fo’o ‘ani amasilamu God
R. ‘Oe rongoa fo’onga’a kami.

Kulu fo’o nene na’a sulia na bo’obo’onga’a kulu ki

TUA NENE TI’ITI’I.

Kwatea ma’i fuami’a Ma’asi abu na ru nini kami gani’i amu ki di’ia ni’i to’o sulia oga’a ‘oe’ani na Ngela ‘oe sa Jesus Christ na Aofia kami. Amen
 

Alternative Intercessions

KWAI KWALO ‘ANGA

KULU leka ma’i ‘ani kwaimanatai’anga sulia na fito’o ‘anga mamana ma kulu ka fuulanga’inia ta’anga’a kulu ki fuana God Ma’a kwaimanatai ‘ilangi.
 

Invitation

MA’A ngasi ngasi’a liu, ‘oko matalangani ngwae ki sulia ‘olo’olo ‘anga ‘oe ana ne’e kami olidoko fa’asi’o ‘ani manatami’a, fatalami’a, ma ‘ani abula lami’a. Noa’a kami ‘isi kwaimaa amu ‘ani maurilami’a ta’ifau, noa’a kami ‘isi kwaimaa le’a fani to’olami’a. Manata buru ‘ania ta’anga’a kami ki osi’ana ngasingasi ‘anga Ngela ‘oe sa Jesus Christ ne’e fa’amauri kami. Kwai’afi ami’a ‘iri mike rao fuamu ‘ani tua’a faolu fuana fa’a ‘inoto’a lana satamu. Amen.

GOD NGASINGASI’A Ma’a kwaimanatai mamana ‘oeko eta fata’a ‘ani manata logelana ta’anga’a ki fuana ngwae ne’e kira kwaimanatai ma kira ka ‘oita’i ma’i siamu, ani fito’o nga’a ma kira ka kwaimamanai fuana kia rufuanata ana to’olada logo. Nia ogale’a ma ka loge kamu fa’asia ta’anga’a kamu ki ma ka fa’angasi kamu fuana ru le’a ki ma nia ka tagi suli kamu saena mauri’a firi. Amen.
 

Confession & Absolution

ALU NARA’A

Tata’e ki uu

V. Na aroaro’a God ke tua fa’i kami
R. Ma fa’ini’o logo

V. Kulu’a ne’e nonina na Christ
R. ‘Ani ta’i Mango’iru kulu siuabu na’a saena ta’i noni.

V. Ili ili ‘uana kuke tua ‘ani ta’i ‘ado fiku’a
R. Saena to’ofu’i aroaro’a

FA’I NGU

Saea ala’anga ne’e ki kaida’i ki ngalia na beret fani na waen ma ti kwate’a la’u.

Na gwaumauri’a, na ngasingasi’angai, na ‘Inoto’anga’ na ofo’a ma na To’ofuu’a ne’e ru ‘oe God.
Na ru ki ta’ifau ‘ilangi ma ‘iano, na ru ‘oeki go’o God mana ru ‘oe ki nama nini’a kami ka olita’ini’i fuamu.
 

Offertory

NA BA’ATAFE’A TO’OFU

V. Muke lafuta’inia maurilamu’a.
R. Kami lafuta’inia fuana na Aofia

V. Kulu ba’atafea God kia
R. Nia le’a ma ka ‘olo’olo ne’e kui sasi ‘uri.

Nia le’a ma ka ‘olo’olo ne’e kui kwate na aura’e ‘anga ki fuami, ma na fu’usi ‘inoto’anga fuamu Ma’asi ‘ilangi ‘ani sa Jesus Christ na Ngela ‘oe na Aofia kami. Du’ungana ‘ani nia’a ne’e ‘oko fa’afulingani ru ki ta’ifau ana etangilana, ‘oko fulinga’i kami ka usuli’o na’a. ‘Ani nia’a kaida’i ru ki teo suli teolani ‘oko foli olita’i kami na’a, nia ka mae ana ‘ai rarafolo ka tata’e oli la’u fuami’a. ‘Oko kwate nia ka tua ana bali ‘olo’olo amu saena ‘inoto’anga ‘oe ma ‘oko kwate fuami’a na Mango’iru Abu ‘oe ‘iri ka kwate mike abu ma ka fa’a fungu kami ‘ani mauri’a faolu ma ka kwate mike tua kwaimamani ana ‘inoto’anga ‘oe loere ma’i;

TA NE’E kami’a fani na ‘ainsel ki ma na gwaunga’i ‘ainsel ki fani na fiku’a abu lo ‘i langi mike ba’atafe’o ma mika aura’e’a Satamu ne’e abu ma mika dangini fu’usi ‘inoto’a amu ma mika ‘uri;—

ABU, ABU, ABU, AOFIA GOD ANA RAMO’A ‘ilangi ma ‘iano kia fungu ‘ani to’ofu’a ‘oe, ‘inoto’anga fuamu Aofia tasa liu. Fata le’a ana Nia’a ne’e dao ma’i ‘ani ngasingasi’anga Aura’e ‘anga fuana tasa liu.

Fiki’a fuana fa’a abu lana Maoma ana Su’asia.

TO’OFU ‘ANGA ki ta’ifau fuamu Ma’asi ‘i langi ‘ani saena alafe’anga ma ‘ani kwaimanata ‘anga ‘oe, ne’e ‘oko kwate ma’i ta’i Ngela muta’i ‘oe sa Jesus Christ ‘iri ngwae ki ta’ifau ne’e kira fa’amamana kia to’o ana mauri’a firi. Ma’asi rongo kami ma’i ‘ani na Ngela ‘oe sa Jesus Christ na Aofia kami ‘ani nia’a ne’e ‘oko alafafia na fo’osi ‘ani aura’e ‘anga kami ki. Ma ka kwate sakonga’i ‘una’eri ana na beret ne’e ma na waen ne’e kika alua na’a Nonimu ma na ‘Abumu fuami’a ‘ani na Mango’iru Abu ‘oe. Saena ta’i rodo ne’eri nama ba nia noni fi saenai, nia ka ngalia na beret. Ma ana kaida’i nia kwatea ba’atafe’a fuamu nia ngi—ia na beret ka kwatea fuana fafarongo nia ki ka ‘uri;

“NGALIA MUKA ‘ANIA NA FASI’AKU NINI’A NE’E NAUKU KWATEA NA’A FUAMU’A. KAMU KA SASI ‘URI ANA FUANA MANATA ‘ANGA TO’AKU.”

ka ‘unari logo ‘i burina fanga’a nia ka ngalia na titiu ana waen ma kaida’i nia lafua logo ‘ani ba’atafe’a fuamu nia ka kwatea fuada ka ‘uri:—

“MUKA KWA’U TA’IFAU ANA OSI’ANA NE’E ‘ABUKU NINI’A ANA ALANGA’I ‘ANGA FAOLU NE’E NIA AFE NA’A FUAMU’A FANI NA NGWAE KI TA’IFAU FUANA RUFUANATA ‘ANGA ANA TA’ANGA’A KI. KAMU KA KWA’U FUNIFARA’A ANA RU NE’E FUANA MANATA ‘ANGA TO’AKU.”

Ngwae ki ta’ifau to’omani.—

Ma’asi ‘ani maelana kami fa’atafalangani ma mika talongani tata’e oli lana. Kami kwaimamani ana daolana ma’i. To’ofu ‘anga fuamu Aofia tasa liu.

Fata abu

Ka ‘una’eri Ma’asi kami kwatea kwaisu’usi’a ne’e di’ia ba ‘oko falangani na’a, ma mika failani fuamu na beret ana mauri’a fani na titiu ana fa’amauri’a. Ka usulia na’a kwaisu’usi ‘anga ‘ani aura’e ‘anga ma ‘ani ba’atafe’anga kami ki ne’e ka fa’atani ‘ani maelana ana ‘airarafolo fuana ana ta’anga’a ana magalia ‘ani tata’e oli lana ‘ani ramo’a nia fani to’ofuu’a nia, ‘ani fanelana ‘ala’a, ‘oe kwai alee ami’a ‘ani nia’a na ngwae ne’e fa’amauri kami Nia’a nama ne’e kwatea na su’asia le’a ne’eri. ‘Oe kwate kaida’i ne’e kami ka ngalia na fanga abu’a ne’e mika alu na’a ta’iru saena ta’i fiku ta’i ngwae abu ana Nonina na Ngela ‘oe sa Jesus Christ na Aofia kami. ‘Ani nia’a saena ta’i fiku ‘ado’a ‘ani Mango’iru Abu, fu’usi ‘inoto’angai fani to’ofu’anga fuamu ta’ifau. Ma’a ‘oilaki’a liu tutua kasi sui. Amen.

TUA NENE SULIA KAIDA’I TI’ITI’I.

Di’ia ba na Aofia fa’ananau kulu ka ‘uri;

MA’A kami ‘ilangi Satamu ne’e abu, na ‘inoto’anga ‘oe ke dao ma’i. Kami ka sasi na ru ‘oko oga’i ki nama ‘i ne’e saena magalia ka di’ia logo ‘i langi. ‘Oe kwatea ma’i fanga fuami’a ne’e totolia ta’ena. ‘Oe rufuanata ana ta’anga’a kami ki; ka di’i logo ne’e kami rufuanata ana ngwae ne’e kira abula ta’a fuami’a ki. ‘Oesi danga ‘ani kami saena ilito’o ‘anga ne’e ke liufi kami, bore ma ‘oe saigoni kami fa’asia ngasingasi ‘anga ana ai ta’a. Sine’e na ru ‘oe ne’e ‘inoto’angai, na ngasi ngasi ‘angai ma na to’ofuu’a ke tutua firi. Amen.

NGII LANA BERET.

V. Na beret nini kulu ngiia na’a kulu daro to’o to’o na’a ana Nonina na Christ
R. Du’ungana kulu ‘oro’a liu ma kuka ‘ado ana ta’i afu beret ne’e, kulu’a ta’i noni na’a fa’inia Christ.

Ngela God ne’e ‘oko tala kwau ta’anga’a ana Magalia
‘Oe Manatai kami.
Ngela God ne’e ‘oko tala kwau ta’anga’a ana Magalia
‘Oe manatai kami.
Ngela God ne’e ‘oko tala kwau ta’anga’a ana Magalia
‘Oe manatai kami.

‘IDU karangi ma’i ‘ani fito’o nga’a ‘iri mui ngalia Nonina na Aofia sa Jesus Christ ne’e nia kwatea na’ fuamu’a ma na ‘Abuna ne’e ka afe na’a ‘usi kamu, muke kwai saree ‘ani saena maurilamu’a ‘ani fito’o ‘anga ma fani na ba’atafe’a.
 

Great Thanksgiving

Kaida’i nia kwatea na fanga abu’a na fata abu ka fata ‘uri;

beret:
NA NONINA NA AOFIA KIA SA JESUS CHRIST FUANA FA’AMAURILAMU.
waen:
NA ‘ABUNA NA AOFIA KIA SA JESUS CHRIST FUANA FA’AMAURILAMU.

Burina fanga abu’a na fata abu ka fata ‘uri:

Kulu fo’o.

GOD ‘oilaki’a liu ‘oko mauri firi kami ba’atafe’o ‘ani maurilami’a ta’ifau; fuana sare lami’a ‘ani na fanga abu ne’e, na nonina ma na ‘abuna sa Jesus Christ na ngela ‘oe na ngwae ne’e fa’amauri kami. Kami ke ba’atafe’o logo fuana alafe ‘anga ‘oe ne’e kwate ‘oko dau suli kami ma ‘oko kwate ne’e kami ti kula na’a ana noni’iru mauri ‘oe, ma na ma’e tua’a ana ngwae ‘oe ki ta’ifau ma fuana kwate lana maurilami’a saena mauri’a firi: Amen.

Ngwae ki ta’ifau

KA ‘UNA’ERI MA’ASI, dau suli kami saena kwai’ofe ‘anga abu ‘oe ‘iri mike sasi rao’a ne’e ‘oko alua ma’akwali kami. Ma nini’a mike tala kwate kami na’a, na nonimi’a, fani na maurilami’a fuamu, ‘iri ne’e fo’osi kami ke abu ma ka mauri ‘ani sa Jesus na Aofia kami fuana nia’a ma fa’ini’o ma na Mango’iru Abu, fu’usi ‘inoto’angai ta’ifau fuamu tutua kasi sui. Amen.

Ala’anga fuana fa’abasu’a ki.
 

Words of Administration

NA FA’ALE’ANGA’A.

LEKA KWAU saena aroaro’anga, Alafe’a muka rao fuana Aofia kamu ke fungu ‘ani noni aleale ‘angai fani na ngasingasi ‘anga ana na Mango’iru Abu; Ma na fa’ale’a nga’a God na Ma’a ma na Ngela mana Mango’iru Abu ke tua fa’i kamu ma ka neke ta’i fa’i kamu tutua kasi sui. Amen.

 

 Blessing

FA’I NGU:

Di’ia na beret nama na waen sui ma kuka oga la’u ti ai fata abu ke fo’o ‘uri:—

MA’ASI rongo kami ma’i ‘ani na Ngela ‘oe sa Jesus Christ ‘ani nia’a ‘oke alafafia na kwate’a ‘ani aura’e ‘anga kami ki ma kwate ne’e ‘ani na ngasingasi’anga ana na Mango’iru Abu ‘oe, na kwate’a nini ‘ani afu beret ne’e, nama na waen ne’e ni’i ke alua na’a Nonina fani ‘abuna fuami’a.

Fiki’a fuana beret;

Ni ngalia na beret kaida’i ne’e ni kwatea ba’atafe’anga fuamu niaka kwatea fuana na fafarongo nia ki ma ka ‘uri; Ngalia muka ‘ania Noniku nini’a ne’e nauku kwatea na’a fuamu’a, mui ‘ania fuana manata’anga to’aku.

Fiki’a fuana waen;

Ni ngalia na titiu ana waen ma ana kaida’i ne’e nia kwatea ba’atafe’anga fuamu nia kwatea fuada ka ‘uri; Mulu kwa’u ta’ifau ana, sine’e ana alanga’i ‘anga faolu na ‘abuku ne’e ka afe ‘usi kamu fani ngwae ki ta’ifau fuana fa’asikasika lamu’a fa’asia ta’anga’a kamu ki. Muke kwa’u funifara’a ana fuana manata’anga to’aku.

 

 Supplemental Consecration

BURINA FANGA ABU’ANGA:—

Ngwae ka ta’i fo’o nene ‘ana ‘ani fo’onga’a ne’e ki;’una’eri ma di’ia fa’uta ‘oe olioli’a ani’i di’ia ‘oko oga.

Lord di’ia ne’e fa’uta kami’a nini mike fo’osi’o ‘ine’e saena fiku’a abu ‘oe ‘ine’e ‘iano mike ba’a fo’osi’o logo fani to’a ‘olo’olo ‘oe ki ana ta asoa ‘ilangi. ‘Ine’eri ne’e ‘oko mauri ma ko to’ofu, ta’i God tutua kasi sui. Amen.

Fata abu na Aofia ki mulu ba’afakua na Aofia, aura’ea, fu’usi ‘inoto’a ana tutua kasi sui.

Ngwae rao na Aofia ki, ba’afakua na Aofia, aura’ea fu’usi ‘inoto’a ana tutua kasi sui.

Kamu’a mangona ngwae ‘olo’olo ki ba’afakua na Aofia, aura’ea fu’usi ‘inoto’a ana tutua kasi sui.

Ngwae ne’e abu ma kika enoeno saena maurilada ki, ba’a fakua na Aofia aura’ea fu’usi ‘inoto’a ana tutua kasi sui.

Kulu ba’afakua na Ma’a, na Ngela, ma na Mango’iru Abu; kulu aura’ea fu’usi ‘inoto’a ana tutua kasi sui.

Aofia nau ma God nau: Ba’atafe’o Aofia sa Jesus fuana daolamu ma’i siaku. Kaida’i ne’e nauku to’o na’a amu saena maurilaku, bulata’i nau ‘iri nai usuli’o. Nauku kwate nau na’a talaku fuamu, na noniku, mangoku fani na maurilaku fuana fuli lana ru abu ‘oko oga’i ki. Fa’ale’anga fani ‘auabu’a fuamu Jesus Christ saena fuli gwaru’a ana ‘inoto’anga ‘oe, saena kwaisu’usi’a abu ‘oe ana fuli fo’osi ma na fuli tua’a ‘oe saena maurilaku. Amen.

MANATA TO’ANA SA JESUS CHRIST NIA TUA FA’INI’O SULIA BONGI FIRI

 After Communion

 
Web author: Charles Wohlers U. S. • England • Scotland • Ireland • Wales • Canada • World