E

RIN EI HA’ARAHESI

NAU MAEA

NI

MELANESIA

HA’ATE NI AROSI, HANUATO’O.

(Ura)

No'ai Ata na i Ama ma na Gare Ma na Hi'ona Maea. Amen.

Oha'inia goni:
 

God huunai mena, na mwani ahu ra waawaa na'i maa'mu.
O irara i hei-irisi ada'i inoni, bwa'i nei ai tosi bwarasia i adoma'i giru ana baani O.
    Ha'a manoraa i mwani adoma'i mami inia i manawasia mai i Hi'ona Maea amu. Huni i'ami mi'i huunai ta'ahi O, Mi gu'i orana ini haa'asaa i Ata mu na maea, ini Jesus Christ ia Araha amami. Amen.

Araha O ta'ahi'ami
Araha O ta'ahi'ami
Araha O ta'ahi'ami

Kraist O Ta'ahi'ami                             Kyrie eleison
Kraist O Ta'ahi'ami                             Christe eleison
Kraist O Ta'ahi'ami                             Kyrie eleison

Araha O ta'ahi'ami
Araha O ta'ahi'ami
Araha O ta'ahi'ami
 

OHA'INIA MA'UA GANARIA

UNU ha'aasaa God no'ai aro
Mei ano gooroha tanara i noni ahugoro.
Mi ha'aaneane O mi ha'agorohi O.
Mi ginata'ini O mi ha'aasa O
Mi ha'ahou O ini rarahamu na raha riu.
Araha God nwaeraha ni Aro God Ama hunai mena.
Araha Gare otohu Jisas Kraist. Unu ha'asaa unu ha'asaa God
Araha God Lamb ana God Garena i Ama.
Na O waia beira'i inona i marewana, O ta'ahi'ami.
Araha I'oe O waia beira i inona i marewana, O heresia i ha'arahesi amami.
Araha I'oe O heinagu i rima odona God i Ama, O ta'ah'ami.
Inia I'oe ete'o O maea, I'oe ete'o na Araha.
I'oe ete'o Kraist beia i Hi'ona Maea.
O ahaahaarakahi i rarahana God i Ama Unu ha'asaa Unu ha'asaa God. Amen.

Gau Ha'arahesi.
 

Na Kollekt (Collect) ana i Danisi Ma'ua Sadesi.

NA USU-USU MAEA (inoni-huna heinagu)
NA TAROHA GORO (inoni-huna ura)

P. Ia Araha ai O'a bei amou.

(Inoni) Me i bei'o.

Naonai Toroha Goro—

I'ami mi Haa-osa O God

Murinai Toroha Goro—

I'ami mi Haa-aneane O Kraist.

SUKURU HADAHADA.

HINI HINI.
 

NAU hinihinia i ta'i God. I Ama hunai mena.
  Na ha'apwa'ara i aroo mana ano, mana ahutani hereho, gaomesi'i ma ga ai'a omesi'i. Ma e ta'i Araha ia Jisas Kraist.
    Garena God e Ta'ai otohu. Na huta bania ama na'ona i madora.
    God bania i God, Bewaa bania i bewaa, Hunai God bania i hunai God.
    A huta ra ai'a ha'apwa'araa, Iia e ta'ai raroma be'inia i Ama.
    A ha'apwa'ara'i ahutani hereho. A dio mai i aro tanagia inoni rago ini ha'atahigia. A rurua inia i Hi'ona Maea, beia i Geregare mawasu ia Meri. Ma ha'inoni; ma ra rabua ro'u na'i dadahoro, inigia bahaina Pontius Paelat. A ronomaata'i ma ra aroaa.
    Me i oruna i dani a suruta'e ahoi onai Usuusu Maea: Ma ara'a I aro ma heinagu mau na'i rima odona i Ama.
    Ma ai boi ro'u be'inia i raraha ini hiirira inei ra tahi mana nei ra mae. Na Hourana ana a bwa'i hako.
    Nau hinihinia i Hi'ona Maea, na Araha, na Ha'amauri. A hura'a mai ania i ama mana Gare. Iia ni, be'inia i Ama mana Gare ga ginata'inia ma ga ha'aasaa. A ha'ate i noda'i mwani rarabe'a.
    Nau hinihinia i Ta'i Bwareo Maea iadau i Ha'ataari i ahutani omaa. Nau hinihinia i Ta'i Heisoi Maea ini ruhasia i ino. Nau nanasia i suruta'e aho'i bania i Mae, mana tahina no'ai marewana nai boi. Amen.

(Na haarahesi ini i Heisoi ma na Noni huna Rai Topira’i ruru.)

Gau ha'arahesi inia i heiso hako ana Kraist ma na inoni huna suria i hei'irisi da.
 

God huunai Mena, O ha'ausuri ami no'ai Ha'atee Maea amu, huni Mi'i unuha'agora hi O ma Mi'i potai O inira i mwani inoni, me i ohani mi ha'ate-ha'agorohi O ini'i mwani bane rago amu'i ......

P. Gai haate-ha'agorohia Araha.
Nr. Iami ha'agorohi O God.

Mi potai O, O heresia i haarahesi amami inia i Heisoi hako ana Kraist, huni ai honu inia Hi'ona ni goroha ma na nagu, huni ira i nei ra hinihinia i Ata mu na Maea rai adoma i ta'isada inia i tawaado ana i haate maea amu, rai awa hagu hagu onai tai buruna, awa aratara awa heitaahi mono'a.

P. Araha inia i heita'ahi amu.
I. O ronoa i ha'arahesi amami.

O ha'a honusi ra ini'i bane amu inei ra tau'arona i Haate amu ma na Sacrament amu'i ororiu noni-tatau'aro (........) Bishop amami'i, me irau i Priest ma na dikon ana i Provens ni (.........) ma rai ha'ata'inia i raraha mu inia i tahina ma na ha'ausurina'i ada, ma rai taragoni'i mwani inoni hako tano 'O.

P. Araha inia i heita'ahi amu.
I. O ronoa i ha'arahesi amami.

Mi ami potai O inira i noni ra maruni suri'i mwani marau, ororiu non-tatauaro amu wagiraha Elizabeth me irau i nei ra daua i dora-ni omesuri (ororiu .....) huni rai maruni hai-madoma beia i rine-i-ha'a-odo-odo ma rai haawou i goroha ma na rine i omesuri rau mwani noni rago.

P. Araha inia i heita'ahi amu.
I. O ronoa i ha'arahesi amami.

O na'otara ma O a'auhi ra i nei ra tau'aro ana i taroha'i adara'inia i Taroha Goro amu suri'i mwani omaa, ma rai waia wou iei Bewaa ana i Hi'ona amu suri'i mwani dora-ni-ha'ausurina'i, mana dora mi tau'aro Mana dora-ni-ha'atahii.

P. Araha inia i heita'ahi amu.
I. O ronoa i ha'arahesi amami.

Me i tana ra inoni amu'i na O soi ra ini tau'arona i rine mu O watea i bane ni aro amu (ororiu ........) Me i tana ami noni tatau'aro amu'i huni mi'i ronobahua i Ha'ate maea amu inia i ahugoro, ahu-mwa'emwa'e, ma mi tau'aro tawaado tana o suri mwani dani mami.

P. Araha inia i heita'ahi amu.
I. O ronoa i ha'arahesi amami.

Ma mi potai O Ama, huni na heita'ahi amu na raha riu si ma na ahugoro amu, ai ha'a-aro ahu da ma ai a'auhi ra i nei ra o'a mama'ari'a ma ra ahutotou, ma ra rabamatoo, ma ra doaha (ororiu ........)

P. Araha inia i heita'ahi amu.
I. O ronoa i ha'arahesi amami.

Mi ha'arahesi inira inoni-tatau'aro amu'i na ra arita'inia i tahina ni ha'i hinihini ma na ginagina ini O (........) ma mi haa-aneane O inira inoni maea amu'i (........) mi ha'agorohi O inia i awaha da na goro, ma mi haarahesi huni mi'i tauara suria ma mi'i siri beirau na'i dora-ni wa'ewa-e amu na o'a tarau.

O wate'i mai hereho ini Ama maea ona ra suria i hei'irisi amu inia i Gare mu a Jisas Kraist ia Araha amami. Amen.
 

(Ta neini Ha'arahesi inia i Heisoi ma na Noni-huna. Na Priest ai ha'atee "Mi ha'agorohi 'O' Ma'ua "Mi ha'arahesi 'O' na noni huna aramai "Araha o ronoa i haarahesi amami")

Inia i (.........) mi haagorohi 'O Araha O ronoa i haarahesi amami.

Inia i hagugoni adau i mwani ra hinihinia Kraist na'ai Ta'ai Heisoi Mae, Mi ha'arahesi 'O.

Inira i mwani bishop, priest ma na dikon me irau tara'i nei ni tatau'aro amu'i no'ai Heisoi (ororiu ........) Mi ha'arahesi 'O.

Inia i mwani noni huna rai ronobahua ma rai daua i Haate amu (ororiu .......) Mi ha'arahesi 'O

Inirau i ahurodo surii mwani marau amamii (ororiu ......) Mi ha'arahesi 'O.

Inira i noni hemaruni suri'i mwani marau ma rai omesuri goro suria i hei'irisi amu na Maea. Mi ha'arahesi 'O.

Inira i mwani marau bei ami na'i Solomon mei inia wagiraha Elizabeth meirau i nei ra omesuri bei ami (ororiu .....) Mi ha'arahesi 'O.

Inira hako i mwane ma na urao no'ai tahinada ado dani, ma na tau'aro adau'i (ororiu ........) Mi ha'arahesi 'O.

Inira i hei ra tau'aro suri'i toane ma ne teseni (ororiu ...) me i surii haka (ororiu ........) mi ha'arahesi 'O mi ha'arahesi 'O.

Inira i buruna ami'i ma na koa mami'i ma na nei ra hagu goro bei ami, mei rau i mwani ama ma na ina, mei rau i gare'da ado omaa, mi ha'arahesi O.

Inira i nei ra ha'ia-aidani, ma na nei ra siba suri'i skuul ma na kolej amami'i (ororiu .....) Mi ha'arahesi O.

Inira i neira aariha na'i anomamata me i asi, mei rau nei ra ta'e suri'i hakarohoroho (ororiu ........) Mi ha'arahesi O.

Inira i pohara, ma na hioro, ma na rei ra a'osi, mei rau na nao, ma na mwarugu (ororiu ........) me irau nei ra ai'a to'ora ano-omaa ma'ua ruma ana i mono. Mi ha'arahesi O.

Inira i nei ra raba tau'aro. Mi ha'arahesi O.

Inira i nei na totou i ahuda ma na nei ra aia omesuri rau goro. Ma ra haa-maata'i rau. Mi ha'arahesi O.

Inira i maerona mami, mei rau nei mi haa-maati'i rau, mi ha'arahesi O.

Inira i nei ra daoha ma ra ronomaata'i na'i abe'da, me i raroma da (ororiu ........) Mi ha'arahesi O.

Inira i nei ra gaarani mae, mirau nei ra arita'inia i tahina ni na'i marewana ni, (ororiu ........) Mi ha'arahesi O.

Gai ha'arahesi ha'i-nonoto suri'i hei-irisi aga'i.

NOTOBURU

P. Araha inia i heita'ahi amu
I. O ronoa i haarahesi amami.

O Watei hereho ini, Ama Maea, ona ra suria i hei'irisi amu, inia i Gare mu a Jisas Kraist ia Araha emami. Amen.

NA ARI'AHU

Gai boi hai-ahutotou ma na hinihini tawaado, ma gai unu tahana'ini'i oraora'a agai'i tana God i Ama ga na'i aro.
 

NAU UNU TAHAHANA'I

Ama huunai mena, O hiiri ra inoni hako, mi oraora'a bwarasi O, ini adomai'i, ha'atee, ma na tau'aro amami, Mi ai'a ta'ahi O ini ahu mami hako, mi ai'a ta'ahi ra inoni amu'i onaa i'ami aho'i, O adoma'i nugasia i ino mami inia ia Gare mu na Ha'atahi amami ia Jisas Kraist, ma O 'a'auhi ami mi'i tau'aro tana O ini awaha haoru, ana i raraha na i Ata mu. Amen.

NAGAWASI INO

God huunai mena, Amaga huunai heita'ahi, na durua gawasi'i inoda i nei ra adoma'i orisi tawaado mara gari aho'i beia ha'i hinihini mara ha'aagu ini adoma'i nugasira i nei etea. Iia ai ta'ahi amou ma ai adoma'i nugasi'i ino mou'i, ai ha'atahi amou baani'i oraora'a amou'i, ai ha'a'o'ori amou noai ado rine goro, ma ai wai amou anai tahina na'i o'a tarau, inia Jisas Kraist ia Araha aga. Amen.
 

NA WAWATE
(Ura)

P. Na goroha ana God ai o'a waiori bei amou
I. Me i bei O.

P. Igia na Abe na Kraist
I. Inia i ta'i Hi'ona ga bwareoirarona i ta'i Abe.

P. Amauasia i haguhagu ana i Hi'ona
I. No'ai aro ni goroha.

DORA I TAROHA-GORO (omesigihia i nei na orana i dani si)

Na bewaa amou ai arara na'i maa'da inoni rogo ma rai ome-irara i tau'aro goro amou, ma rai ha'a-aneanea i Ama mou ara'a i Aro inia.

Wate'i tana God i haagorohi amou, ma O haaua i taha O durua tana Mo'o na Aha-aha riu.

O haa tauara inoni i hereho o irisia raui haa tano O, maani adoma'i ana i ha'atora ma na ha'ausurinai adau rarabea.

Na auna da inoni odo-odo no'ai ruma na God. Ma bwai'i maho taa nai ha'ata'airau.

Ia Araha a hauasa bei ra i Maea ana'i Mou boi gai topira'i bwara sia Rai suru gana nai ini.

(Na bread ma na waeni ra wate'i ma ra aha'i nia naani)

P. Tana O Araha huunai Mwaeraha ma na Mena, ma na Romo, ma na Hauasa.
I. Ahutani hereho no'ai aro me i ano iamu'i me i hereho amy'i mi hau'i tana O.
 

KAENI HA'ATEE HAAGOROHI

P. Mou hau'i ara'a i ahu mou
I. Mi hau'i ara'a tana Araha.

P. Gai haate-haagorohia Araha God aga
I. A goro ma odo-odo i haaua o'asi.

GORO ma odoodo huni mi'i haa-aneane o ma mii haa-asa o ma mi haagorohi o Ama i Aro, inia i Gare mu a Jisas Kraist ia Araha amami. Tarana Iaa na o haa-pwa'ara'i mwani mano mau mai tarawa'ana, ma O haau ami suria i omeha mu, taraha Iia oha na tari madora O hasui ami oha mi oraoraa iei ma O watea na huta ha'i-inoni ini mae huna'na i dadahoro ma ai surutae aho'i tara mami O haa-ura Sia no'ai raraha na'i rima odo mu tana ami O watea i Hiona Maea amu ini haa-maea ma ai ha'a-o'ori ami huni mi'i honura'inia i tahina haoru, ma Mi'i adoma'i heitotori inia i boi ana i hourana amu.

INIASI bei rau Angel ma na Na'ohanai Angel, ma na ahutana hako i ruruha ni Aro, Haiwa'ewa'e mi haa-aneane O ma mi haatee oani.

Maea Maea Maea Araha God Sabaoth Aro ma na Ano araru honu inia i rarahamu. Mi ha'a-asa O Araha-Aha-aha.
Ha'agorohia Mo'o na boi no'ai Ata 'na i Araha.
Hosanna ara'ai Aro.

(To-pira’ruru)

Ahutani Raraha Tana O Ama i Aro inia i heita'ahi amu na raha rakahi, O watea i Ta'i Gare mu otohuu ia Jisas Kraist huni ira hako i nei ra hinihinia rai daua nada i tahina na o'a tarau.
    O rono ami Ama, inia ia Gare mu a Jisas Kraist ia Araha amai inia Iia ai heresia i ha'a-aneane mi hoasi o inia, ma O banea mai tana ami, huni inia i Mena ana i Hiona Maea amu na bane ini na bread ma na waen, rai ha'i-maho asa tana ami, i abena ma na Abu na.
    No'ai rodo i na'o ma a gu ronomaata'i hunana i Dadahoro A daua i bread me i oha na haatee ha'agorohi O, A uubia ma ha-tana rau rono-isuri ana'i A ha'atee o'ani "Daua naua. Naani abe'gu Na haa tahi amou, Mou haaua o'ani ini adomai aho'isi au na mou irara do nau bei amou A oasi rou a hako i nau, A daua i tete'u, me i oha na haatee ha'agorohi O, A haua tana raau A haatee oani "Mou gonohia naani, ahuta mou, Inia naani Abu gu ana'i duruduru ha'oru Na ahe iniamou ma na inoni rago, ini gawasia i ino, Mou haaua o'ani ado oha mou gonohia ini adomai ahoisi au, ma mou i irara do inau bei amou."

(Rai haatee aratara oani)

Na Mae hana mi haata'inia
Na suruta'e ana mi ha'arahasia
Na boihana mi mamasia
            Raraha tana O Araha huunai aha-aha.

Ma naasi Ama iami haaua oani inia ia Gare mu na ha'atora ami inia ma mi haa wou tana o i Bread ni Tahina ma na O'i ni Ha'atahi do e ho'asi ni haa-aneane ma e haagorohi, ma ini haata'inia i mae ana i hunaua i Dadahoro inia i ino na'i marewana, na surutae ahoi ana na Ramo, mo na Ara'a-ahoi.

O ha’a-maoto ami no’ai Iia i Haatahi amami, Na haaua i ta’i huunai Ho’asi na arari goro, ma o banea mai huni i’ami hako inei mi heresia i Mau Masu ni, Mi’i ha’i-ta’i no’ai Heisoi maea Amu, na Abe’na i Gare mu ia Jisas Kraist, ia Araha amai, inia Iia no’ai hagugoni ana i Hi’ona Maea, ahutani Ha’a-hou, ma na raraha tana O Ama Hiunai mena Tarau tarau. Amen.

Onaia i Araha aga na Ha’ausuri gia gai ha’atee o’ani.
 

Ama mamii noai Aro Ata'mu ai maea, na hourana amu ai boi, na hei'irisi amu ai mwada'u no'ai ano onaa no'ai aro. Haa mai de'eni tana ami hereho-i-nau na orana i dani ni, O adoma'i-nugasi'i ino mami, onaa iami mi adoma'i-nugasia inei ra ha'a-ino bwarasi ami. O abu wai ami ini ohoni ami baania i oraora'a. Inia iamu i hourana ma na mena ma na raraha tarau tarau. Amen.
 

NA UUBIA I BREAD

    P. Na bread ga uubia ni, e hasura’i inia abe na Kraist.
    I. Suria naasini ta’i  Bread, igia gar ago e ta’i abe, inia ga hasurai’i inia i ta’i bread.

Lamb ana God na O waia beira’i ino’na i merewana O ta’ahi, ami.
Lamb ana God na O waia beira’i ino’na i merewana O ta’ahi, ami.
Lamb ana God na O waia beira’i ino’na i merewana O haa tana ami i gooroha amu.

Mou boi hai ahu-hinihini-mou heresia i Abe’na Araha aga Jisas Kraist na haa ini amou ma na abu na na ahe taramou, mou masurainia i ahu mou no’ai hinihini beia i ha-agorohi.

(Ini hanani na Priest ai oani)

Na abe na Araha aga Jisas Kraist
Na abu na Araha aga Jisas Kraist

(Rainau-maea hako, na Priest ai oani)
 

Gai ha'arahesi

God huunai mena, huuna i tahi tarau, i'ami haagorohio ini ahu mami hako inia O hanani ami inia i maho-i-nau hauasa i Abe na ma na Abu na i Gare mu na Ha'atahi amami ia Jisas Kraist. Ma mi ha'agorohio ro'u inia O haau ami huni mi'i ha'i-aba na i Abe na na tahi, na rurua i noni amu'i ma'o watea tana ami huni mi daua ro'u i tahina na o'a tarau.

Ahutada oha'i

Iniasi Ama o dau ami no'ai bane amu, ma mi'i haa'i tatau'aro goro na o haa-agau-i no'a tana ami, ma naani mi wate ami haari ami tana'o e hoasi na tahi ma maea. Inia Jisas Kraist ia Araha amami. Tanaa me i tana'o beia i Hiona Maea i ahutani'i haa-hou ma na raraha tarau tarau. Amen.

Na Ha'agorohi

Ari ini gooroha, mou ta'ahia ma mou tau'aro tana Araha, ma mou honura'i wa'ewa'e no'ai mena ana i Hiona Maea. Ma na Ha'agorohi ana God huunai mena, i Ama, ma na Gare, ma na hi'ona Maea, ai oa bei amou, ma ai mono bei amou, tarau tarau. Amen.