CLADDEDIGAETH Y MARW.

¶ Noder yma, Na ddylid arfer y Gwasanaeth a ganlyn dros neb a fo marw heb fedydd, neu dan Ysgymmundod, neu a'u lladdasant eu hunain.

¶ Yr Offeiriad a'r Ysgolheigion, wrth gyfarfod â'r Corph wrth borth y Fynwent, ac yn myned o'i flaen i r Eglwys, neu tu a'r Bedd, a ddywedant, neu a ganant,

MYFI yw'r adgyfodiad a'r bywyd, medd yr Arglwydd: yr hwn sydd yn credu ynof fi, er iddo farw, a fydd byw. A phwy bynnag sydd yn fyw, ac yn credu ynof fi, ni bydd marw yn dragywydd. St. Ioan xi. 25, 26.

MYFI a wn fod fy Mhrynwr yn fyw, ac y saif yn y diwedd ar y ddaear. Ac er ar ol fy nghroen i bryfed ddifetha'r corph hwn, etto caf weled Duw yn fy nghnawd: yr hwn a gaf fi im fy hun ei weled, a'm llygaid a'i gwelant, ac nid arall. Job xix. 25, 26, 27.

NI ddygasom ni ddim i'r byd, ac eglur yw na allwn ddwyn dirn allan chwaith. Yr Arglwydd a roddodd, a'r Arglwydd a gymmerodd ymaith; bendigedig fyddo Enw yr Arglwydd. 1 Tim. vi. 7. Job i. 21.

¶ Gwedi eu dyfod i'r Eglwys, y darllenir un o'r Psalmau hyn yn canlyn, neu'r ddwy.
 

Order for the

Burial of the Dead

Dixi, custodiam. Psal. xxxix.

DYWEDAIS, Cadwaf fy ffyrdd, rhag pechu â'm tafod : cadwaf ffrwyn yn fy ngenau, tra fyddo'r annuwiol yn fy ngolwg.
    Tewais yn ddistaw, ïe, tewais â daioni : a'm dolur a gyffrôdd.
    Gwresogodd fy nghalon o'm mewn : tra'r oeddwn yn myfyrio, ennynodd tân, a mi a leferais â'm tafod.
    Arglwydd, par i mi wybod fy niwedd, a pheth yw mesur fy nyddiau : fel y gwypwyf o ba oedran y byddaf fi.
    Wele, gwnaethost fy nyddiau fel dyrnfedd; a'm heinioes sy megis diddym yn dy olwg di : dïau mai cwbl wagedd yw pob dyn, pan fo ar y goreu.
    Dyn yn ddïau sydd yn rhodio mewn cysgod, ac yn ymdrafferthu yn ofer : efe a dyrra olud, ac ni's gŵyr pwy a'i casgl.
    Ac yn awr beth a ddisgwyliaf, O Arglwydd : fy ngobaith sydd ynot ti.
    Gwared fi o'm holl gamweddau : ac na osod fi yn waradwydd i'r ynfyd.
    Aethum yn fud, ac nid agorais fy ngenau : canys ti a wnaethost hyn.
    Tyn dy bla oddi wrthyf : gan ddyrnod dy law y darfûm i.
    Pan gospit ddyn â cheryddon am anwiredd, dattodit fel gwyfyn ei ardderchowgrwydd ef : gwagedd yn ddïau yw pob dyn.
    Gwrando fy ngweddi, Arglwydd, a chlyw fy llef; na thaw wrth fy wylofain : canys ymdeithydd ydwyf gyd â thi ac alltud, fel fy holl dadau.
    Paid â mi, fel y cryfhawyf : cyn fy myned, ac na byddwyf mwy.
    Gogoniant i'r Tad, ac i'r Mab : ac i'r Yspryd Glân;
    Megis yr oedd yn y dechreu, y mae yr awr hon, ac y bydd yn wastad : yn oes oesoedd. Amen.
 

Domine, refugium. Psal. xc.

TI Arglwydd, fuost yn breswylfa i ni : ym mhob cenhedlaeth;
Cyn gwneuthur y mynyddoedd, a llunio o honot y ddaear a'r byd : ti hefyd wyt Dduw o dragywyddoldeb hyd dragywyddoldeb.
    Troi ddyn i ddinystr : a dywedi, Dychwelwch, feibion dynion.
    Canys mil o flynyddoedd ydynt yn dy olwg di fel doe : wedi'r el heibio, ac fel gwyliadwriaeth nos.
    Dygi hwynt ymaith megis â llifeiriant; y maent fel hûn : y bore y maent fel llysieuyn a newidir.
    Y bore y blodeua, ac y tyf : prydnawn y torrir ef ymaith, ac y gwywa.
    Canys yn dy ddig y difethwyd ni : ac yn dy lidiowgrwydd y'n brawychwyd.
    Gosodaist ein hanwiredd ger dy fron : ein dirgel bechodau yngoleuni dy wyneb.
    Canys ein holl ddyddiau ni a ddarfuant gan dy ddigofaint di : treuliasom ein blynyddoedd fel chwedl.
    Yn nyddiau ein blynyddoedd y mae deng mlynedd a thrugain; ac os o gryfder y cyrhaeddir pedwar ugain mlynedd : etto eu nerth sy boen a blinder; canys ebrwydd y derfydd, a ni a ehedwn ymaith.
    Pwy a edwyn nerth dy soriant : canys fel y mae dy ofn, y mae dy ddigter.
    Dysg i ni felly gyfrif ein dyddiau : fel y dygom ein calon i ddoethineb.
    Dychwel, Arglwydd, pa hŷd : ac edifarhâ o ran dy weision.
    Diwalla ni yn fore â'th drugaredd : fel y gorfoleddom ac y llawenychom dros ein holl ddyddiau.
    Llawenhâ ni yn ol y dyddiau y cystuddiaist ni : a'r blynyddoedd y gwelsom ddrygfyd.
    Gweler dy waith tu ag at dy weision : a'th ogoniant tu ag at eu plant hwy.
    A bydded prydferthwch yr Arglwydd ein Duw arnom ni : a threfna weithred ein dwylaw ynom ni; ïe, trefna waith ein dwylaw.
    Gogoniant i'r Tad, ac i'r Mab : ac i'r Yspryd Glân;
    Megis yr oedd yn y dechreu, y mae yr awr hon, ac y bydd yn wastad : yn oes oesoedd. Amen.

¶ Ar ol hynny y canlyn y Llith, wedi ei chymmeryd o'r bymthegfed Bennod o Epistol cyntaf Sant Paul at y Corinthiaid.
 

¶ Yna y dywedir, neu y cenir,

MI a glywais lais o'r nef yn dywedyd wrthyf, Ysgrifena, O hyri allan gwy`nfydedig yw y meirw y rhai sydd yn marw yn yr Arglwydd: felly y dywed yr Yspryd; canys y maent yn gorphwyso oddi wrth eu llafur.

¶ Yna y dywed yr Offeiriad,

Arglwydd, trugarhâ wrthym.
    Crist, trugarhâ wrthym.
Arglwydd, trugarhâ wrthym.
 

EIN Tad, yr hwn wyt yn y nefoedd, Sancteiddier dy Enw. Deued dy deyrnas. Bydded dy ewyllys ar y ddaear, Megis y mae yn y nefoedd. Dyro i ni heddyw ein bara beunyddiol. A maddeu i ni ein dyledion, Fel y maddeuwn ni i'n dyledwŷr. Ac nac arwain ni i brofedigaeth; Eithr gwared ni rhag drwg. Amen.

Offeiriad.

HOLL-alluog Dduw, gyd â'r hwn y mae yn byw ysprydoedd y rhai a ymadawsant oddi yma yn yr Arglwydd, ac yn yr hwn y mae eneidiau y ffyddloniaid, wedi darfod eu rhyddhâu oddi wrth faich y cnawd, mewn llawenydd a dedwyddyd; Yr ydym yn mawr ddïolch i ti, fod yn wiw gennyt waredu ein brawd hwn allan o drueni'r byd pechadurus hwn; gan attolygu i ti ryngu bodd it', o'th radlawn ddaioni, gyflawni ar fyrder nifer dy etholedigion, a phrysuro dy deyrnas; modd y gallom ni, gyd â'r rhai oll a ymadawsant â'r byd mewn gwir ffydd yn dy Enw bendigedig, gaffael i ni ddiwedd perffaith, a gwỳnfyd ynghorph ac enaid, yn dy ddicirangc a'th dragywyddol ogoniant; trwy Iesu Grist ein Harglwydd. Amen.
 

Y Colect.

O Drugarog Dduw, Tad ein Harglwydd Iesu Grist, yr hwn yw yr adgyfodiad a'r bywyd, ym mha un pwy bynnag a gretto, a fydd byw, er iddo farw; a phwy bynnag a fo byw ac a gretto ynddo ef, ni bydd marw yn dragywydd; yr hwn hefyd a'n dysgodd (trwy ei Apostol bendigedig Sant Paul) na thristâem, fel rhai heb obaith, dros y rhai a hunant ynddo ef; Nyni yn ostyngedig a attolygwn i ti, O Dad, ein cyfodi ni o angau pechod i fuchedd cyflawnder; fel y bo i ni, wedi ymado â'r fuchedd hon, orphwys ynddo ef, megis y mae ein gobaith fod ein brawd hwn; ac ar yr adgyfodiad cyffredin y dydd diweddaf, ein caffael yn gymmeradwy yn dy olwg di, a derbyn y fendith a ddatgan dy garedig Fab yr amser hwnnw i bawb a'r a'th ofnant ac a'th garant, gan ddywedyd, Deuwch, chwi fendigedig blant fy Nhad, meddienwch y deyrnas a barottowyd i chwi er pan seiliwyd y byd: Caniattâ hyn, ni a attolygwn i ti, O drugarog Dad, trwy Iesu Grist ein Cyfryngwr a'n Pryniawdwr. Amen.

GRAS ein Harglwydd Iesu Grist, a chariad Duw, a chymdeithas yr Yspryd Glân, a fyddo gyd â ni oll byth bythoedd. Amen.