THE BOOK OF

COMMON PRAYER,

ACCORDING TO THE USE OF THE

PROTESTANT EPISCOPAL CHURCH

IN THE

United States of America.
 

TRANSLATED INTO THE MOHAWK OR IROQUOIS LANGUAGE BY

THE REV. ELEAZER WILLIAMS, V.D.M.
 

SECOND EDITION.
 

PUBLISHED FOR THE INDIAN COMMISSION

OF THE

PROTESTANT EPISCOPAL CHURCH.

New York:

T. WHITTAKER, 2 BIBLE HOUSE.

1875.

KENTHO

KATOKENSTON,

NE

NIATEWENNISERAKE ORHONKENE IONTERENNAIENTAKWA.

THE ORDER FOR

DAILY MORNING PRAYER.

¶ Nonen ne Ratsihenstatsi enthatasawen ne Orhonkene Ionterennaientakwa, nè enthatierente ne ken ètake kariwatenion enhawennaton, Oiatonseratokentiket karakwen, toka skariwat, kihens, tenkariwakehake teinikon, nok akwekon n' onkwe ok sa-ok tenietane.

RAWENNIIO renteron ne raononsatokentike; kati wahonni Onwentsiakwekon nisa n'onkwe, ok-sahtikenhak. Hab. ii. 20.
    Tsit karakwinekens entewatasawen, tsi iatewatshonthos ǒk-ne sakarakwa ienkaniharake enkowanenhake ne aksenna tsi ienakeronnion ne iah teiakorihwiioston. Nok akwekon tsi ok nonwe enionksennaienheke, nok tenionkenonweratonheke, aseken, enkowanenhake ne aksenna rononrhake ne iah tehotiriwiioston, raton ne Rawenniio. Mal. i. 2.
    Kenhak tsinahoten enkatati tsiksahkaronte, nok tsinahoten enkennontonnnion ne akweriasakon, tiotkont asenonwehake tsi taskanerake, O Sewenniio, ise wahi ne akeshatstensera nok seskeskontakwen. Psalm xix. 14,15.
    Ne onen ne roriwaneraakskon ne ronkwe tonsahatkarhatenien ne raoriwaneraaksera tsinihatierhakwe, nok etho nonsahahaiere tsiniiohahoten, ne tkariwaieri nok ioteriwakwarision, nè enhatshennonniaten ne rahotonnhets tsi enionnheke. Ezek. xviii. 27.
    Keriwaienterese tsinisewakateriwatewaton, nok, akeriwaneraaksera, tiotkont akhenton kariwataties. Psalm li. 3.
    Satkonsaseten ne akeriwaneraaksera, nok sasatont tsiniwakeriwannhikon. Psalm li. 9.
    Ne tokenskè teiakotennikonriakon nè ronwatewenteton ne Niioh, ne teiotiakon ne akaweriane nok tsiontatrewata, O Niioh, iah tasekenrons. Psalm li. 17.
    Tesewatateriasoren, nok iahten ne sewatiatawit, nok Niioh Rawenniioke n'onsasewatierat; tsinihoianere nok rotennitenraskon, ronikonkatste nok kowanen thoriwaieri, nok, satatrewata ne wahetken ne ise sewariwake. Joel ii. 13.
    Rotennitenraseraien, nok, sesonkwariwatontenni ne onkwariwaneraaksera, sane, ètsitewanikonraksaton, iah tetsitewathontati tsinihawennoten ne Niioh sonkwawenniio, nene aionkwathahiten tsinikarihotens sonkwariwaienni. Dan. ix. 9, 10.
    O Sewenniio, takrewat, nok tetsiatoret, tosa sanakwenserakon, onwa-ok ne etho nenskiere, iah othenon tenskieronnihake. Jer. x. 24; Psalm vi. 1.
    Sasewatatrewat, aseken ne karoniake aowenniiosera onen ok-etho tawe. St. Matt. iii. 2.
    Tenktane nok rakenineha enkete, nok enhiienhase, Rakenih, karoniake nonkati wakeriwaneren, nok, iseke, nok iah etho teskiatoten ne aionkenatonkwe ise takienha. St. Luke xv. 18, 19.
    O Sewenniio, tosa sarewatatserakon ahtsiatorenne ne sannhatsera, aseken, tsiteskanere iah onka n'onkwe teiakonnhe ne aiakoteriwakwarision.
    Toka entewenron iah teionkwariwaneraakseraien, wetewatatenikonrhaten, nok ne tokensketsera iah tewat ne onkionrhake; nok ne tokat ken-tentewariwaien ne Onkwariwaneraaksera, tsinithoriwaierikowa nok tsinihoteriwakwarision ne Niioh, ensesonkwaronkwase ne onkwariwaneraaksera, nok, ensesonkwanoharese akwekon tsiniionkwariwaksenseraien. 1 John i. 9.
 

¶ Kentho enhenron ne Rateihenstatei.

Exhortation.

AKWA kwanoronkwa tewatatekenson, tsiok nonwe ne kaiatonseratokentike ionkwaretsiarons ne aonsetewatateriwaienterese, ken oni tahetewariwakeron tsi nateionanetar'ion ne onkwariwaneraaksensera; iahten ne ahetewarhorokseke, iah oni, ne ahtsitewariwa setenniheke ne Niioh karoniake Tetsitewaniha, iah othenon tehonoronse; nok, ok heken, atsitewariwaienhase nonwa, aionkwennitentonhake, aontaionkwanikonrenhon, aonsetewatatrewatake, nok onkwer'iane aonsatsitewawennarakwake; aontiesenhake kati, tsiniiatewakte roianerekowa, nok rotennitenron, aonsasonkwariwaneraakserakewase. Saetho sane, tiotkont aionkwennitenton, tsi atsitewariwaienniheke ne Niíoh ne onkwariwaneraaksera; ethone ki senha, nonen katke nè wetewatkennisahate ne tatsitewanonweraton tsiniiaweta tesonkwatsiakwarisiennis, ne atsitewasennakonnienste, ne ahetewaronke oni ne rahowennatokentikowa; nok, atsitewaneken tsinateionatonwentsioni ne tewaieronke nok nonkwatonnhets. Wahonni kati, wakwennitentase tsinitsion nonwa ne kentho sewatkennison, ne ahetewakwekonhatie, aontesewater'iasiioste, nok, aionkwawennententonhake, tsitkentenronseraien karoniake nitewatewennaierat, nok, tewatonhek.

¶ Kentho ne Niioh ok-tiotokwekton ronwarihotasiennis ne akoriwaneraaksera, enthonwawennaserete ne Ratsihensitatsi, nok, akwekon teniontontshoten.

A General Confession.

NIIOH Kwaniha, iah othenon tesanoronse nok satennitenraserowanen;-ionkwaiatatonhon, nok, ionkwathăhărakwen tsi nisahahoten;— tsi sotsi ne iakwaianenhawis tsinitewaterientatshenries, tsi oni nitiotontakwennis ne onkwer'iasakon.— Ionkwaiesaton ne sawennatokentihokon.— Iah etho teionkwa-ieren tsiniskwarihonte;— nok etho ni-ionkwatieren tsinahoten iah teskwarihonte:— Nok nè ionkionnhaksaton tsi iah thietsiakionnhaieri.— Nok, O Sewenniio, takwentenrhek, tsiniionkwentent ionkwariwaneraakskon.— Taskwanonianike. O Niioh, nonwa ne ken kwariwakeronnis tsinikwasentenni.—Takwentenr tontakwateweienton, tsiniiakion nonwa ne tokenske-onwe tsiakwatatrewata;— tsi etho sonkwawenniioke Iesos Keristos niskwarharatstenni akwekon ne iakionkwe.— Nok, O Kwaniha, tsinisatennitenraserowanen ne Raoriwake, etho naskwaierase;— Ne ohnakenke tsi n'aiakionnhotenhake, aionkwariwhiioston, aionkwateriwakwarison nok aionkionnhatokentonhake;— nok etho nontawe tsinitsennanoron akwasennatokentiste. Amen.

¶ Kentho raonha-ok ne Ratsihenstatsi tenshatane, nok akwekon teniakotontshotake, nok, ensakorihowanaten tsi entsiakoteronkwase, nok entsiakoteriwanentasien ne akoriwaneraaksera.

NIIOH ne iah othenon tehonoronse, Roniha ne sonkwawenniio Iesos Keristos, iah tehanowes ne iakoriwaneraakskon aiontkaronni. Nok, tennon, senha ne ranonwes ne tonsakonwatkarhatenien ne akoriwaneraaksera, nok karoniake tsini-ienhenwe iaiakonnheke: sakoshatstenserawi, sakorihonte oni, ne Rahotsihenstatsihokon ne ahsakotirihowanaten, nok, ahsakotiriwaienhase, n'onkwehokon, tsi enwaton ne tsiakotatrewaton entsiakoteronkwase, nok, entsiakoteriwanentasien ne akoriwaneraaksera. Raonrha ne Niioh ensesakoriwatonten, nok, ensesakoronkwase ne akoriwaneraaksera, akwekon ne tokenske-onwe entsiakotatrewaton, nok akonikonrakwekon entiakawetakon tsinihawennoten ne kaiatonseratokentike. Wahonni kati, èhtsitewennitentas, ne ahsonkwarihon ne oriwiio-onwe aonsetewatatrewate, nok aontasonkwatennietase ne Rahonikonratokenton; aontatsitewanikonraierite kati tsi nentewaiere nonwa, nok tsi nenwe sekon entionnheke, aionkwaiatatokentonhake, aontiesenhake kati, iah-kahewe, iahetewawe ne rahotonnhakanonniaserakow, ne iah nonwenton t'iakariwentane; ne raoriwa etho-naiawene ne sonkwawenniio Iesos Keristos. Amen.

¶ Kentho akwekon n'onkwehokon, nok, akwekon tsi ieiotoktanion tsiniwaterennaientataerake, eniahiron, Amen.

¶ Tokat ken kaien enwatston.

NIIOH ne iah othenon tehonoronse, karoniake tesonkwaniha, ne tsinihotennitenraserowanen sakorharatstenni ensesakoronkwase nok ensesakoriwatonten ne akoriwaneraaksera, akwekon ne akaweriane entietako tsi entsiontatrewate, nok, tokenskeonwe entiakewetakon nonen raonrhake nentsiontierate; ahtsisewentenre kati nise, aonsatsisewaronkwase nok aonsatsisewariwanentasiase, akwekon ne sewariwaneraaksera, ahtsisewanikonranirate nok ahtsisewashatstenseron ne-ŏkti-ioriwakwekon ahesewaianereke, nok, iah kahewe karoniake iahtsisewaiatinionte, ne raoriwa etho-naiawenne, ne Iesos Keristos sonkwawenniio. Amen.

¶ Kentko onen ne Ratsihenstatsi tenshatontshoten, nok ne enhariwakaratate ne Takwaienha; nok sekon N'onkwehokon teniakotontshotake, nok kentho, tsi ok nonwe oni nonen ne enionterennaientakwe ne Takwaienha, enthonwawennaserete ne Ratsihenstatsi.
 

TAKWAIENHA ne karoniake tesiteron; ahiesasennatokentiste; Sawenniiosera aontawe; Tsinisanikonroten eh-naiawenne ne onwentsiake tsinitiot ne karoniake; Takwanont ne kenwente n'iatewenniserake onkwanatarok: Nok tontakwanikonrhens tsi niionkwariwaneren, tsiniiot n'ii tsionkwanihonrhens n'othenon n'onkwe ionkinikonraksaton. Nok takwaiatonnek tsi nonwe othenon n'aionkwanikonrotako: nok èren takwahawiten ne iotaksen; ise Sawenniiosera, ise sashatstensera nok ise Saroniaientonsera tsini-ienhenwe. Amen.

¶ Kentho onen enhenron ne Ratsihenstatsi,

    O Sewenniio iakwasene taskwannhohontiense;

¶ Taiontati.

    Nok tsi iakwasakaronte enkwasennakonnienste.

¶ Kentho onen akwekon tenietane, nok, enhenron ne Ratsihenstatsi;

Gloria Patri.

AONWASENNAIEN ne Ronwaniha, nok Ronwaienha, nok, Ronikonratokenton.

¶ Taiontati.

    Tsiniiotonne ne tiotierenton, tsiniiot nonwa, nok etho neniotonhake, tsini-ienhenwe. Amen.

¶ Ratsihenstatsi.

    Rawenniio nise tetsisewariwakwas;

¶ Taiontati.

    Rawenniio raosenna teniakwanonweraton.

¶ Kentho onen ne ken hetake nè tenkariwakwen, nok toka ok tankawennanotonke ne O karo kasene, &c. Nok wenniseratokenhaton ne iah ne tahaiontste, aseken oiah katokenston ne henwatston ne etho nonwe niwenniseratenion.

Venite, exultemus Domino.

O KARO kasene, Rawenniio tetsiteweriwakwas: Onkweriane tewatonnharen tsinihashatste ne sonkwaiatakennhas.
    Eh-ietewe tsithenteron ehtsitewatonron, nok tsi raonrhake ionkwatshennonni, tsi teionkwariwakwen ehtsitewanatonhas.
    Aseken ne Rawenniio Niiohserowanen; tsinihakowanen èhneken rotohetstakon akwekon ne Niiohokon.
    Tsi ieiotoktanion onwentsiakwekon ratsianenhawe; raowen tsiniionontanirons tsi ionontoton.
    Raowen ne kaniatarakekowa, raonrha roteweiennonni; rasnonke ioseronni ne aonwentsiathenke.
    O kasene, Etsitewasennaien, nok, tetsitewatiskwentarhas: nok tetsitewatontshothas ne Rawenniio sonkwaiatsion.
    Aseken ne Rawenniio onkwa-Niioh; sonkionkweta rahohentake ihtewese, tsiniio ne teiotinakarontonha rasnonke sakohawe.
    O ètsisewasennaien ne Rawenniio tsiniioweienston ne rahoriwatokenti; Onwentsiakwekon ŏk-tiiekenniatak tsinihonwatshanisek.
    Aseken tare, ne taretane ne tahaiatorete ne ken ionwentsiate; ioteriwakwarision tenhaiatoretakwe, nok N'onkwe raotokensketseratokenti.

¶ Kentho onen ne Psalms enwatasawen, tenhatiriwawenron ne Ratsihenstatsi tsi enkawennanotonke; nok akwekon tsi ieiotokte ne Psalms etho iensewasonterake ne Gloria Patri, tokat Gloria in excelsis.

Gloria in excelsis.

AONWASENNAIEN ne Niioh karoniake tenteron, nok n'onwentsiake skennon takenhake, tsi Onkwene ronikonriio.
      Ise tekwariwakwase,
      Ise kwasennaiens,
      Ise tekwaroniaientons,
      Ise tekwanonweratons,
tsinisiatanoronkowa, O Niioh Sewenniio, karoniake teskowanen, Niioh Iesaniha iah othenon tesanoronse. O Sewenniio, sonrhatsiwa iaienha ne Niioh, Iesos Keristos; O Niioh Sewenniio, ètsenikonraiewenthos ne Niioh Ianiha,
    Ise seriwatonta kariwaneren N'onwentsiake, katakwentenrhek.
    Ise seriwatonta kariwaneren N'onwentsiake, katakwentenrhek.
    Ise seriwatonta kariwaneren N'onwentsiake, takwathontats tsi ken nonwa kwennitentase.
    Ise ne etho satien tsi raweientetakon ne Niioh Ronwaniha, katakwentenrhek.
    Aseken sonhaha saiatatokenton, sonha-ok Sewenniio, sonha-ŏk, O Keristos, senikwekon ne Ronikonratokenton, ènekentsi ietsiateriwate, sateietsisennaiens, tsi tehonwaroniaientons ne Niioh Ronwaniha. Amen.

¶ Kentho onen ne Ratsihenstatsi ne enhawennanoton ne tiotierenton Lesson, iken ne kaiatonseratokentike tharakwen, nok n'onen ienrokten, onen ne enwatasawen ne Te Deum laudamus, tenkariwakwen, tokat tenkawennanotonke, tenhatiriwawenron.
 

Te Deum laudamus.

NIIOH ise tekwanonweratons, tsi kwaienteres ise ne Rawenniio.
    Onwentsiakwekon iesasennaiens; ok-sisonnhe ise akwekon iesaniha;
    Karoniakwekon ne Ratironiakeronon ronatewennakarataton,
    Ratikwe kon ne Cherubim nok Seraphim iah tehontorishens teiesariwakwase, nok rontonnion;
    Saiatatokenti, Saiatatokenti, Saiatatokenti, Niioh Sewenniio ne Sahaoth;
    Tsinisiatanoron, karoniakwekon, onwentsiakwekon oni kananon ne saroniaientonsera.
    Kentiokwanoron ne Iesos ratikwekonne, teiesanonweratons.
    Kentiokwanoron ne Prophets setokatennihakwe, teiesanonweratons.
    Iotiokwanerakwat ne kariwhiioston iakawenheiaton, teiesanonweratons;
    Ne kentiokwatokenti tateia-onwentsiawerhon iesaienterese;
    Tsi ise iesaniha, iah thiiaiehewe tsinisiatanoron ;
    Rosennaientatseraien, ne tokenske, iekenok Etsienha;
    Oni ne Ronikonratokenton, ne sonkwanikonriiosta.
    O Keristos, saroniaientontserakon ok-titeskowanen karoniake tsinitiotshennonniat;
    I'se tiotkon tsinahe shiiaienha ne Ianiha;.
    Nonen satesatateriwakwase ne enseseiatontako n'onkwe, etho nasatatkenron, ne wesateweton ne iah tekanakwaienteri.
   N'onen satesatonkote tsiniiononwakte ne kenheion, akwekon ne tiakawetakon wateshennhohontiense ne karoniake.
    Etho teshiteron tsi raweientetakon ne Niioh, raoroniaientoneserakon ne Ianiha;
    Tionkwetakon tsi sekon tentese, tenteskwaiatoretane;
    Takwentenr kati takwaienawas ne ken takwannhasehokon, tsi ne seskwaskontakwaton tsi nisenekwensanoron.
    Karoniake iaskwakwekte ne sewaiatatokentison, etho tsini-ienhenwe ienionkwatonnhakanonnihake;
    O Sewenniio, seiatanonstat ne sonkweta, nok seiatateristak;
    Sheiatsterist n'onwentsiake, aiontshennonni kati tsini-ienhenwe karoniake;
    Niatewenniserake kwasennowanata.
    Iah tekakonte kwasennaiens tsinikwasennanoronkwa, iah takariwentane;
    Takwaiatakennha, O Sewenniio, tosa ne ken wenniserate aiakwariwanerake.
    Takwentenrhek, O Sewenniio, katakwentenrhek.
    O Sewenniio, ne aontasatennakerate aionkwarane ne Satennitenrasera, tsinikwaniahesen.
    O Sewenniio, tsi kwaniahesen, tosa kati ne kanke ŏk thaskwatewentete.

¶ Tokat ken kaien enwatston, Canticle Konwaiats.
 

Benedicite, omnia opera Domini.

    O ise Raoiotenserakwekon ne Rawenniio, ètsisewatshennonniaten ne Rawenniio, ètsisewanenton, nok ètsisewakowanatak tsini-ienhenwe.
    O ise ne Rawenniio, raoroniakeronon, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne karoniahokon, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne Ohnekahokon ne èhneken tisewaientakwa, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne raosatstensera ne Rawenniio, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne karakwa entiekene nok ahsonthenne, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne Otsistohokon ne karoniake, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne Okennorasera nok ohaweiasera, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne Niioh raowera-hoken, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne Otsire nok Otarihensera, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne koserakene nok akennhake, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne ohaweiaserahokon nok ohsakenserahokon, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne iahonharaiensta nok othorasera, etsisewatshennonniaten ne Rawenniio, etsisewanenton, nok, ètsisewakowanatak tsini-ienhenwe.
    O ise ne ohwise nok ohniente, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne wasontatenion nok wenniseratenion, etsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne kaswathetsera nok tiokarasera, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne tewennirekarawas nok ioroniaronnionties, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O kenhak ne Io'nwentsiate, rotshennonniaten ne Rawenniio, tokenske ronenton ne raonrha, nok, rokowanatak tsini-ienhenwe.
    O ise ne Io'nontenion nok Io'nontaweronton, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise akwekon ne Ohontesonha onwentsiake wateiarons, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne Ionaweroton, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne kaniatarakekowa nok wahnotonnions, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne hentsiowanense nok akwekon ne kanonwakon ihsewese, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O akwekon ise ne Tsitenhokonha ne èneken, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise akwekon ne kario nok katshenen, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne sewaksahokonha ne tsionkwe, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O kenhak ne I-se-rel rotiriwhiioston, ronwatshennonniaten ne Rawenniio, ronwanenton, nok, ronwakowanatak tsini-ienhenwe.
    O ise ne Rawenniio raotsihenstatsihokon; ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne Rawenniio raonnhatserahokonètsisewatshenniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne kanikonrahokon nok sewatonnhets-hokon ne sewaiatatokentison, ètsisewatshennonniaten ne Rawenniio, ètsisewanenton, nok, ètsisewakowanatak tsini-ienhenwe.
    O ise ne seweriane sewennitenton Sewaiatatokentison, etsisewatshennonniaten ne Rawenniio; ètsisewanenton, nok, ètsisewakowanatak tsini-ienhenwe.

¶ Kentho onen enwatasawen ne tekenihaton Lesson ne ahse oiahtonseratokentike tkarakwen.
 

Jubilate Deo. Psalm c.

    Tsionwentsiakwekon Rawenniioke sewatonnharen; sewatshennonnihak ne Rawenniio tsi entsisewawenniiostake nok kasene tsi nonwe nihenteron tetsisewariwakwas.
    Tokenske ne Rawenniio raonrha ne Niioh; nok raonrha, nok, iah hii teionkwatatiatison; Sonkionkweta rahohentake ihtewese, tsiniiot ne teiotinakarontonha rasnonke sakohawe.
    O wahsene tsit-honnhokaronte, etho tetsisewanonweraton; nok ne rahononsakon tetsitewariwakwas: Tetsisewanonweraton, nok tsi ensewatati ètsisewasennanoronst.
    Rawenniio tsinihoianere, raotennitenrasera enkariwatatie; nok ne raowennatokentitsera tiotkon tsinahe takatatie tsi n'onkwe tontaiakotwatsiratenionhatie.

¶ Tokat ken kaien Hymen enwatson.

Benedictus. St. Luke i. 68.

    Ronwatonraserons, ne Israel Niioh Rawenniio ronwasennaiens; aseken, sakoiatorenhon, nok ne raonkweta sesakoskontakwen.
    Nok sonkwariwaketskwase karihowanen ne onkwatshennonniasera; etho raowatsirake David takaientakwe:
    Tsinithotati tsi ratisakaronte ne rao-Prophet-tseratokenti, iken tsinahe siionwenstiate ne takariwatatie.
    Tsi entsiethiniakense ne ionkhiswens; nok iah ratisnonke tiahetewaiatarane, akwekon ne iah teionkhinonwes.

¶ Kentho onen nè enkariwakarataton ne Tewaketakon, tetsiaron, ne Ratsihenstatsi nok N'onkwehokon, enhatitake. Enska tsikenhontentiate.
 

    Tewaketakonne Niioh Ronwaniha, iah othenon tehonoronse, roteweiennonni ne karonhia oni Onwentsia.
    Tewaketakon oni ne Iesos Keristos raonhatsiwa Niioh roienha ne sonkwawenniio; onkwe rotonhon, ne roiatison Ronikonratokenton; Onwari roteweton iah tekanakwaienteri; Pontias Pilatas roroniakenton, tekaiasontne ronwaiatanentakton, rawenheion, nok ronwaiataten; Onwentsiakon iehokton; nok asen watonta niwenniserake sotonnheton; karoniake ieshawenonton, nok, etho ieshenteron tsi raweientetakon ne Niioh Ronwaniha iah othenon tehonoronse; etho tenthaientakwe n'onen tentesakoiatoretane n'eniakonnheke, ne oni iakowentahon.
    Tewaketakon oni ne Ronikonratokenton; kentiokwaien ne kentiokwatokenti tateiaonwentsiawerhon; teiakoriwawakon ne akoiatatokentison; sewaterakewas ne kariwaneren; ensewatonnhete ne ieieronke n'onkwe, nok tsini-ienhenwe ientsiakonnhetie. Amen.

¶ Tokat ken kaien enwatston.
 

    Tewaketakon, enskat-ok ne Niioh Ronwaniha, iah othenon tehonoronse, roteweiennonni ne karonia, oni Onwentsia; nok akwekon tsini-iekens, nok tsinikon ne iah teiekens.
    Nok shaiatat ne Rawenniio Iesos Keristos, ne-ok ie-kenha Niioh roienha, oktsihaienha ne roniha arekho shiionwentsiatenion; Niioh, shiken Niioh, teioswathe, teioswathetakwake, tokenske Niioh, raonrha ki tokenske Niioh, iah tehonwason, shaniiatat ne roniha, raonrhake akwekon roteweiennison; ii ne Tionkwe sonkwaniente, shonkwatshennonniatennire tsi karoniake thawenonton, nok tsi rotonni Ronikonratokenton roteweiennonni, kaiata kon ne Onwari iah tekanakwaienteri; nok ONKWE ROTONHON, ii ionkwarihonni tehonwaientannhare, Pontius Pilitas, Roroniakenton, ronwaiataten nok sotonnheton asen wathonta, tsinitiotiaton ne kaiatonseratokentike, nok karoniake shawenonton, ieshenteron tsi raweientakon ne Roniha. Nok sekon tentre, enthoiatanerakwatonhatie, tentesakoiatoretana neniakonnheke nok iakowentahon nok ne Raowenniiosera iah tahontokten.
    Nok tewaketakon ne Ronikonratokenton, Rawenniio ne shonkionnheton, rononrhake ne roniha nok roienha thoientakon ne raonrha, nikwekon ne Ronwaniha nok Roienha, satehonwatisennaiens nok satehonwatironiaientons, tsinithotati nè ronwatatiase ne Prophets, sakatokatennihakwe.
    Nok tewaketakon skentiokwat ok ne kentiokwatokenti ne tateia-onwentsiawerhon “ne Iesos ratikwekonne ronwatiianenhawi.” Tewaketakon enskat ŏk ne ahtatnekoserhon sewaterakewatha ne kariwaneren; waker hare tsi entsiontonnhete ne iakowentahon, nok tsini-ienhenwe ientsiakonnheke. Amen.

¶ Kentho enhenron ne Ratsihenstatsi.

    Rawenniio sewakwekonhak nise.

¶ Taiontati.

    Nok n'ise sanikonrakon.

¶ Ratsi,—enhenron tewaterennaien.

    O Sewennio aionkwarane, ne Satennitenrasera.

¶ Taiontati.

    Nok askwentenre karoniake askwatshennonn'iaten.

¶ Ratsihenstatsi.

    O Niioh, onkwer'iasakon aontaskwanoharese.

¶ Taiontati.

    Nok tos èren tontakwahawiten ne sanikonratokenti.

¶ Kentho onen enwatawwetharho ne Collect ne n'iatewenniserake ioien, nok nonen ne ieiatarasta enwatston, etho-ki ne nonwe nen watoroke.
 

A Collect for Peace.

    O Niioh, ise ne skennon serihonnis, nok senonwes ne satekarihotens; nè satenientenstakon nenkwaienterihake, tsini-ienhenwe karoniake ieniakionnheke; ok-tiskwatiesastenni ne etho n'aiakwaiere tsiniskwarihonte; aontaskwannhe ne ken ionkwentent takwannhasehokon, akwekon tsi ionkhiriwaiahakihe ne ionkhiriwaswase, nok tsi tokenske ise ok kwaniahesen, iah onka ne ionkhiiatkonte teiakhitsanise tsi ionkwariwiioston, ne tsini-hashatstenserowanen ne Iesos Keristos sonkwawenniio. Amen.

A Collect for Grace.

    O Niioh Sewenniio, karoniake kwanihasonnhe-onwe, nok, iah othenon tesanoronse. I'se saskwaiatehewe ne ken-wente sontenniseratasawen; kenwentatie tsi niseshatstenserowanen askwanikonrarake, nok askwentenre tosa ne ken tsiniwenniseres kariwaneraàkserakon aiakwentakerane, iahten oni, ne hateronhonke aiakwete tsi nonwe nothenon naionkwanikonrotako, nok, ne aiokaronn'iate n'onkwatonnhets, nok tsi ise akwekon ahskwatako tsi n'en iakwatierhake, aontiesenhake, aionkwariwatokenton tsi tontaskwakanerake, nè ahskwentenrate tsinisakwaniahesen, ne Iesos Keristos sonkwawenniio. Amen.

A Prayer for the President of the United States, and all in civil authority.

Ahnatakarias ne President United States, ronwaterennaiennita, nok akwekon ne oiahson ne kaianerensera ronatsteriston.

    O Sewenniio karoniake tkwaniha, sonrhatsiwa ehnekentsi thiiesatte, tsiniseshatstenserowanen ise oriwakwekon skwatakwas, tsi tesiteron onwentsiakwekon n'onkwe tesekanere. Onkwanikonrakwekon, wakwennitentase, nè atsiatateriste ne Ahnatakarias nok ratikwekon ne kaianerenserakon ronaterihonte, nok etho-naiawenne aonsaseiesten ne sanikonratokenti raoianerenstakwa, tiotkont kati ahonatontakwaniheke tsinisanikonroten, nok ne ahonathahitake tsinisahahoten: ŏk taiawetowanen ahseriwatahase ne karoniake aontaseiatennietase; nok ne ahseiatateristakwe aionnise skennon tahonnonnheke n'onwentsiake, nok, nonen enhontonnhokten, tsiniienhenwe karoniake iahonatonnhakanonnihake, nè takwentenrat tsinisakwaniahesen ne Iesos Keristos sonkwawenniio. Amen.

A Prayer for the Clergy and People.

    Niioh iah othenon tesanoronse, nok sonnheonwe, akwekon tsiniskwawis iekaieris tsiniioianeres; askwentenre, tsiniiotonnhakanonn'iaseraien ne satennitenrasera, aontaseiatennietase ne Ratiriwawakonson, Ratitsihenstatsi nok tsi nikentiokwase ne sakonatsterista, tiotkont kati aontaiesanikonraieritsheke, nok, watoken tsi nontesaierenhake ahseiawiseke ne saiataterisera; ethonaiawenne, O Sewenniio, ne tsinihasennanoron ne sesonkwariwaseronnienni, Iesos Keristos. Amen.
 

A Prayer for all Conditions of Men.

    O Niioh, ise seiatison, ise oni seiatanonstats akwekon n'onkwe; wakwennitentase ne aonteserientiione, ne asetenrate, ne n'iateiakon, tsi ok oni ni-iakoiatawenserons n'onkwehokon, asenatonhase tsinisahahoten. Nok ne senha kwennitentase ne sentiokwatokenti tateiaonwentsiawerhon kentiokwaien, ne sanikonratokenti asakokwatakwenniheke, nok asakotennikonrakweniioste, akwekon kati ne iakoriwiioston niiakosennoten sawennatokentike asakonikonrenhawitake; skennon taiakoriwawakon, nok enskat tsi aontaiakawetakon tsiniseriwaieratenni ne iakoriwiiostakon.
    Nok Takwaienha tsinisaianere, iseke ieiakhiriwatati, akwekon tsi ok nikanonwhaktenseroten teiakokonhentons, nok ieiesase ne akonikonrakon, akoierontake oni, tokat, ne aoriwake tsi nahoten iakoien, ne askwentenre ahseiatorishenthose, nok, nè aontaioiànenhawe tsiniiakoiatawenserons, aonsaseiewentote, asenikonkatstate tsi iakoroniaken, nok ne aiakotshennonniaten tsinikanonwaktenseroten nonwa iakoroniakenta; nè raorihwake tsi ken nonwa kwennitentenni ne Iesos Keristos. Amen.

A General Thanksgiving.

    Niioh iah othenon tesanoronse, ise kwaniha, sonrhatsiwa tsinisatennitenraskon; ionkwennitenton ne ken takwannhasehoken tsi onkweriane tetkwanonweratons, akwekon tsiniskwaiatateristennis, nok tsiniskwanoronkwa takwateweienton, iakwakwekon ne sateiakionkwe. Tekwanonweratons, niawen, tsi takionnheton, takwaiatanonstatonhaties nonwa ne ken iakionnhenion;· nok, ne senha tsinisenoronkwa n'onwentsiakwekon n'onkwe, tsi setenron sesakoskontakwen ne Iesos Keristos sonkwawenniio; tsi oni niskwaiatateriston ne kariwhiiostonke nok iorharatst ne karoniake aiakwatshennonni. Kwennitentase oni ne etho n'askwanikonron ne iaiakwahewe, nok, aiakwatthokaseke akwekon tsiniskwentenranions, iakaierike kati n'onkweriane tsi takwanonweratonheke, nok, akwasennanoronstake; iah etho-ŏk iah kwasene tawenehake, nok etho akaieronnihake, tsi naiakionnhotenhake, tsi oni okwawenniiostake tsi iakionhe ne akwawennarakwake, nok sekon tsiniwenniserake eniakionnheke, tsi tontaskwakanerake, nè aiakwaianenhawi, naionkwariwatokentonhake nok aionkwateriwakwarison. Nè askwentenrate ethonaia wenne, tsinisakwaniahesen ne Iesos Keristos sonkwawenniio; nè senikwekon, nok Ronikonratokenton, satekwasennakonniensta, satekwaroniaientons oni, nonwa, nok, tsini-ienhenwe. Amen.

A prayer of St. Chrysostom.

Niioh iah othenon tesanoronse, waskwentenre tsi ken nonwa, enskatne aterennaientatserakon wakwariwaneken; nok sarharatston ne kanke teieiase, tokat ahsen neniakonhake enskatne sasennakon eniakotkennisonhonhake, enseiathontatshe, enseion tsi neniesaneken; Satatewennaierit kati nonwa, O Sewenniio, tsinateionkwatonwentsioni, tsi nikwanekennis oni ne ken takwannhasehokon: etho naskwaierase ne kentho nonwentsiake nakwawennaienterihake, nok nonen eniakwatonnhokten, karoniake tsini-ienhenwe iaiakionnheke. Amen.

2 Cor. xiii. 14.

Raotennitenron ne sonkwawenniio Iesos Keristos, nok tsinisonkwanoronkwa ne Niioh, tsi oni sonkwatiennis ne Ronikonratokenton, ahetwakwekon, nonwa, nok tsini-ienhenwe. Amen.