NA VOIHAVO MATENA

NA HAHANI TABU.

[MA NA SASANA MATENA;
MA NA VISANA NA SASAVO MATENA
PIPI BONI.]

Printed at the Melanesian Mission Press,
138 Smith Street, Summer Hill, N.S.W.
 

Holy Communon Manual,
with Prayers for Daily Use,
in the language of
Vaturana (Guadalcanar),
British Solomon Islands.
 

NA SASAVO MATENA PIPI BONI.

E Visana na Papada matena nigu na Sasavo.

1. Tana mena inau au sasavo au hoko vani aia God.

2. Na ronona nene, anigu ti kau pada visu laka au varanisi ba tana matana tana mena au sasavo.

3. God e pujikae sosono, ma ti e ronomi saia nagu na sasavo na ronona Aia e veila vani au.

4. Tana visana kalina God e nao na hoko visu vani au ti ke jari vulahi vani au Nina na padanao. Me koaza nene, e vesea ti kau totu dodo matena na varonosiana. “Ko hoko, Lord, matena animu na tinoni ago ke ronomi.”

5. Na hoko na sasavo iade e lave matena na sasana mu; ti ke tanomana, e vesea ti pipisei ke pabo ekoaza aia e papada senina matena.
 

NA SASAVO TANA MARAJAKA.

Tana kalina visini rerei.

“Inau au nora sivo au maturu noho, ti au rerei visu, na ronona aia Lord e tulani au mu.”

Soa dato na Mama, ma na Dale, ma na Taruna e Tabu;
Ekoaza tana na turihana, mi kalinade, me ke tau kode. Amen.

¶ E vesea ti na sasavo na nidana na on-te tana pipi boni. Ti ko tanomana, ko vano tuturu tana Vale Tabu ti tana valemu tana maarajaka. Ko pada visuho laka o mai varanisi na matana God, ma ti ko hoko vani Aia; mo ko jari koaza—

TANA Soana na Mama, ma na Dale, ma na Taruna e Tabu. Amen.

“GOD, Ihoe God inau, tana marajaka inau kau laveho numu.”

GOD, nau au soavesealiho sosono matena Ihoe o reitutuhu au ti au jauli na marajaka iade. Nau au mai konimu ti kau noni Nimu na ba veseali matedira pipi peleome nau kau panete ke neni. Ko saikesa ikonigu ti kau totu laoveila, laomolomuri, laomaroha; Ko sana au ti kau totu masaoka tani na tanotobo kode; Ko panete ti nau kau taoniho tana zajaha e hoto, na Soamu ke hini tanirono matena; hini aia Jesus Christ amami a Lord. Amen.
 

MAMA ihotu, ke ba tabu na Soamu. Ke mai na tototumu. Ke mana na zajahamu ivavana ekoaza ihotu. Ko tusu vanihami mai ke neni na muza ke aza ke neni. Ko molotahani na kibomami, ekoaza ihami ami molotahani na kibodira. Ko jika na mololuani hami tana na gugure. Ko taho tahani hami tani na tanotobo. Animu na tototu, ma na mana, ma na totora ke ba me ba. Amen.

LORD Jesus, Ihoa o ba tanirono a Tamamu tana mena o totu matena na ago i Nasareth: Ko sana au ti kau ago malobu ke neni matena pipi ome e azali mategu, ti kau taoni kodasi na maamu pukuna e vesea. Amen.

¶ Ko joko na sasavo e azali matena na boni tana p. 7, 8, ma ti ke tanomana, na visana hoto tana p. 9-11.

MAMA ihotu, Ko ba veseali mo ko tatabe kaputi hami ikalinade me ke ba me ba. Amen.

NA SASAVO TANA NULAVI.

¶ E vesea ti iso sasavo ekoaza ole e varanisi na mena ko ba nora; ekoaza na sasavo na nidana ma na kokodesina na ago tana pipi boni. Ko ba tuturu tana Vale Tabu ti tana valemau. Ko ba papada visuho laiva o varanisi God, ma ti ko hoko vani Aia, mo Iso jari koaza—

Tana Soana na Mama, ma na Dale, ma na Taruna e Tabu. Amen.

“Puku na soaveseali aia Lord, hira kode ara agago anina Lord: hira ara tu tana valena Lord tana boni.”

Soa dato God e vusa au:
Soa dato aia Jesus Christ e sui visu au:
Soa dato na Taruna e Tabu aia e ba tabu au. Amen.

GOD, Mama na Puku na mana, Ihoe o taho patesi au ti au jauli na vuvusina na boni iade, mi nau au soa vesealiho pujiba matena Nimu na veila; mi nau au tau azali matena na ronona na kibogu kode, Ko ba panete au ti kau padasavi manana matena; hini aia Jesus Christ amami a Lord. Amen.

¶ Kode iso vevesu visuho matedira hira na ome o sasilahini ineni.

Inau au totu laoveila? au tabe kaputi? au paki vesea?
Au panete hini na malobu hira na ome e azali au?
Au sarevosi na ago e vesea e azali au ti kau agosi?

¶ Kode ti ko jarivulahi vani aia God na kibomu—

GOD, inau au jarivulahi vaniho ti inau au sasi ineni tana matamu (me pujikae inau au . . . . . . ). Ko manali au ti kau padasavi manana matena, Ko molotahani vani au na kibogu kode, vani aia Jesus amami a Lord. Amen.
 

MAMA ihotu, ke ba tabu na Soamu. Ke mai na tototumu. Ke mana na zajahamu ivavana ekoaza ihotu. Ko tusu vanihami mai ke neni na muza ke aza ke neni. Ko molotahani na kibomami ekoaza ihami ami molotahani na kibodira. Ko jika na mololuani hami tana na gugure. Ko taho tahani hami tani na tanotobo. Animu na tototu, ma na mana, ma na totora ke ba me ba. Amen.

¶ Ko vili e visana na sasavo tana p. 9-11 ko joko iade, ti na sasavo tovosi ihoe o papada noho matena.

Lord, Ko toravi na tidaodirasei ara mate sai na tutunina, hira kara totu manabo. Amen.

God, Ko ba veseali, mo ko reitutuhu kaputi hami tana boni iade me ke ba me ba. Amen.

Tana mena o nora sivo matena na maturu.

“Inau au nora manabo sivo ma kau maturu, matena Ihoe, senimu, Lord, Ko sanahami ti kami totu masaoka.”
 

NA SASAVO MATENA PIPI BONI.
Ka hini padavisi na Tototuna Jesus Christ.

SUNDAY—Jesus e Tuvisu tuhu me ba dato visu ihotu.

GOD Puku na mana, Ihoe o suivisu hami hini na mateana Dalemu a Jesus Christ, ma hini nina na tuvisu e lau hami tavi na kimana Satan; Ko panete ti hami kami mate tani na tanotobo pipi boni, ti hami kami totu ikonimu tana nimu na lalaoma tuhudani; hini Aia numu a Jesus Christ amami a Lord. Amen.

MONDAY.—Jesus e boja Tinoni.

GOD Puku na mana, Ihoe o veila kodasi na maramana, ti o mololuani a Dalemu vasu pesehe ti e tinoni me totu ikonimami; Ko panete hami ti kami rei na totoramu tana kokora, kami taoni na zajahana Jesus Christ; hini Aia numu a Jesus Christ amami a Lord. Amen.

TUESDAY.—Jesus e labati visu Aia.

GOD Puku na mana, Ihoe o toravi na rodo tana maramana iade suo ba labati vanihira na duli toha kode aia a puku na Marara a Jesus Christ; Ko panete ti na maramana kode ke danali na totoramu, ma ti Ko taovia kaputi na tinoni toha; vani Aia Jesus Christ amami a Lord. Amen.

WEDNESDAY.—Jesus e totu i Nasareth.

GOD Puku na mana, Ihoe o panete ti aia a Dalemu Jesus Christ e hini loki na laovesea ikonimu mi konidira na tinoni toha; Ko jonisavu vani hira, na baka kode, ti hira kara laki koaza hini na tabekaputiho, ma hini na taoniana pipi boni na mama Jesus matena Nina na tototu puku na tabu; hini Aia numu a Jesus Christ amami a Lord. Amen.

THURSDAY.—Na Sacrament e Tabu.

GOD, Ihoe o panete ti tana Sacrament e Tabu Ihoe o molo papadana vani hami Nimu na Vajanisavi ilaona; Ko panete hami ti kami tutunina kukuni hira na ome e utuhana me tabu matena na Kokoramu ma na Habumu, ti ihami kami vajani vulahi tana laomami na mana mauri itana; Ihoe o mauri ikonina na Mama ma na Taruna e Tabu, God kesa mu, e tahara na tokona. Amen.

FRIDAY.—Na Haiulusavu e Tabu.

LORD JESUS, Ihoe o totu ipolina na Haiulusavu ekoaza ineni de, mo mololuani na tidaomu tana kimana a Tamamu ti Ko mololuani masaokali hami tani na inate tuhudani hini na mateamu; Ko sana hami hini Nimu na jonisavu ti ihami kami mato tani na tanotobo ti kami mamauri ikonimu, me ke dani ke hira Ko taho hami atu tana Nimu na tototu tuhudani; Ihoe o mauri ikonina na Mama ma na Taruna e Tabu ke ba me ba. Amen.

SATURDAY.—Ara beku na Kokorana Jesus.

LORD JESUS, Ihoe o totu i Hausoru ekoaza ineni, mo mololuani masaokali na tidaodirasei ara tutunina ma ti ara totu sosori pituho noho; Ko panete ti hirasei ara vano tani na maramana iade hinina tuttunina kara totu masaoka hini na lalaoma i Paradise; Ihoe o totu mo taovia itana, God ke ba me ba. Amen.
 

MATEDIRA PIPI JONISAVU.

Matena na Tutunina.

GOD inau, inau au tutuniho mi hira na voihavo totozajaha kode tana nimu na Soasivo, na ronona Ihoe o hoko mo jari koaza laka Nimu na hoko e manana.

Matena na Naopitu.

GOD inau, inau au pitu mau avesiho matena na jonisavu ikalinade ma matena na totora ke dani ke hira, na ronona Ihoe o moloboni matena mo mana veihaluve.

Matena na Veila.

GOD inau, inau au malobu na veila Ho, ma na ronona na Soamu inau au voita hagu vera kolu ekoaza inau visu; Ko sana au ti kau ago patesi vaniho, ma ti kau veilaho saviliu.

Matena na Padasavi.

GOD inau, inau au padasavi ronona inau au tanotobo kaputiho a Puku na Tabu; Ko sana au ti kau tau hi tanotobo hoto.

Ti na panete na Padanao nina God.

LORD, Ko mololuani vani au mai na jonisavu ti kau papada na lave hira na ome Ihoe o nao, ti kau rei vulahi, ma ti kau agago taoni, na Soamu e Tabu ke hini totora matena; na ronona a Jesus Christ. Amen.

Matena na Lao Marabu.

LORD Jesus Christ, tana mena Ihoe o panete ti ko taho na zajahamami, O boja ikonina na Puku na Siama; Ko mololuani mai na Jonisavu, ti kau tanomana na tukaputi na padanao tanotobo, ma na zajaha naguha tana tobagu, ti nau kau taoniho hini na toba e maroha ma na tototu marabu; Ihoe o mauri ikonina na Mama ma na Taruna e Tabu, ke ba me ba. Amen.

Matena na Suhuradi visu.

Jesus o Veila, Ko sana au, ti kau taho kae pipi boni nigu na haiulusavu, ti nau kau suhuradi visu au, ti nau kau hao tani hira na ome nanale tana maramana iade, ma ti kau puku na nimu na vavarono. Amen.

Tana mena o Mamate.

Mama Puku na vesea, na mamate e hadovi au, inau au sasavo vaniho, ti Ko rei haluve au mo ko ba maurisi visu au. Ko ba nanale na sosono. Ko panete na kokoragu ti ke susuliha tuhu ti inau kau tanomana na soa datoho tana nigu na agago; hini aia Jesus Christ a Lord inau. Amen.
    Mama ihotu, Ihoe o mololuani mai na masahi iade ti e hadovi au inau a dalemu. Mi nau au nonijajaiho, ti Ihoe ko nao, Ko ba nanale na sosono tani au, mo Ko panete ti kau mauri visu hoto. Ko totu saviliu ikonigu; Ko panete ti kau beteni hini na padavisu matena Christ e kalahai Nina na Haiuhlsavu me vajanisavi mategu. Ko sana au ti kau totu koaza numu a puku na dalemu; na ronona a Jesus Christ. Amen.

Matena na Vera.

Lord, Ko rei na vera iade, Ko peo sivo tani hira na ome taulaka; hira nimu na Angel kara tototu ide ti kara reitutuhu kaputi hami tana manabo, ma Nimu na baveseali ke totu tuhudani ipolimami; hini Aia Jesus Christ amami a Lord. Amen.

Matedira Tasigu mi hira Kulagu.

Lord, inau au nonijajaiho, Ko ba veseali hira tasigu mi hira kulagu; Ko tukaputi hira tani hira na ome e taulaka, mo Ko manali hira ti kara ago patesi vaniho tana adira na tototu ide, me ke dani ke hira kara jauli Nimu na tototu tuhudani; hini aia Jesus Christ amami a Lord. Amen.

Matedira ara Mamate.

Lord Jesus, Ihoe o ba maurisi hira ara mamate tana mena Ihoe o tinoni, mi Hoe o rei haluve mu hirasei ara totu padasavi; Ko ba veseali sana hira ara tatao kolu na mamate (me puji ba . . . . . .); Ko rave na laodira ti hira kara jojovata i polimu, ti tana mena ara tatao tasahana Ko babanu na tidaodira hini Nimu na jonisavu; Ko ba maurisi visu hira ekoaza Ihoe o nao; Ihoe o mauri ikonina na Mama ma na Taruna e Tabu, God kesa mu ke ba me ba. Amen.

“Anima Christi.”

Mamaurina Christ, ba tabu au.
Kokorana Christ, ba maurisi au.
Habuna Christ, ba naravi au.
Ko tani na kakajana Christ, ba lesovi au.
Vajanisavi nina Christ, babanu au.
E! Jesus Puku na vesea, Ko ronomi au.
Tana Nimu na mamana boka Ko poi au.
Jika na mololuani au ti kau jida taniho.
Tani Satan na linamate Ko tukaputi au.
Tana boni kau mato Ko soa au;
Ko hoko laka, Mai ikonigu.
Ko panete ti, ikonidira animu Tabu,
Kau tanomana na soavesealiho,
Ke ba me ba. Amen.
 

Na Hoko Veseali.

Puku na soaveseali God.
Puku na soaveseali na Soana God e Tabu.
Puku na soaveseali aia Jesus Christ puku na God puku na tinoni.
Puku na soaveseali na Soana Jesus.
Puku na soaveseali Jesus Christ tana Sacrament e Tabu tana Bela Tabu.
Puku na soaveseali God na Taruna e Tabu, a ba masaoka.
Puku na soaveseali Tinana God ko Mary e Tabu.
Puku na soaveseali God ikonidira na Angel mi hira nina Tabu.
Puku na soaveseali God.