Na Sasavona Hahani Tabu

TANA HOKONI VATURANA GUADALCANAL
ETAMISAHINI NA BISHOP
NA HINI AGO TANA DIOCESE
NI MELANESIA.

JESUS CHRIST e mai konigu tana Hahani Tabu. E tusu vaniau na Kokorana e Takokojo mategu mana Habuna e Tave mategu. E tusu na Mamaurina ke vatuvi hini na tidaogu meke susulihasi na kokoragu.
    Kau paepanete na tahoana Jesus tana Hahani Tabu inau au nao na tuhutoba. Tutunina mana Veila.

Tuhutoba

    Taruna tabu nina God, Ko sanau ti kau rei hadovi na kibogu, moko Sana au ti kau padasavi manana matedira.

(Ko papada matena na mamaurimu ti ko rei vulahi hini na Kibomu. Ti hoe o hini padasavi sosono matena visu na Kibomu. Ko noni na priest ke varono-siho tana nimu nusi Kibo.)

    Eo, God Inau, Inau au tanotobo sosono kaputiho Ihoe. Inau au padasavi sosono ti inau au sosonoliho hini nigu na tanotobo.
    Au dodoni laka a Jesus Christ e mate mategu ti ke nusi masa-okati au tani na tanotobo. Inau au jojovata konina Jesus ti ko molotahani tani au, ma ti hini Nimu sosono Ihoe nau au nao natami kaputiho ti Ko molotahani vani au na Kibogu kode.

Tutuniwa

    Mama, Inau au tutunina ti Hoe O subuni A Dalemu Jesus Christ ti ke ba Mauris au.
Inau au tutunina ni nau kau taho Aia tana.

Hahani Tabu

    Inau au mololuani visu au ti kau jojovata Ikonina Jesus tau ikonugi visu.

Veila

    Eo Mama, Inau au veilaho naronona tana mena ihami ami tanotobo mu Ihoe o Subuni Jesus ti ke mate matemami.
    Jesus Inau au nao kau veilaho manana naronona Ihoe O hida o veilau.
    Jesus Ko mai konigu moko tusu vaniau na mauri, ti nau kau tau vilivota taniho.

IHAMI ami tau jojovata ipolimami visu ti ihami ami aza, Lord, tana mena ihami ami mai tana Nimu na Table Tabu, ma ti Nimu na veihaluve e loki sosono. Ihami ami tau aza ti kami vanijavu dato na duduna ivana Nimu na mena hahani. Ma ti Ihoe o veihaluve saia. Ko mololuani vanihami ekoaza, Lord na veihaluve, ti kami hani na Kokorana Dalemu hamu veila Jesus Christ, mana inuviana na Habuna, ti kami hini totu tuhudani Ikonina Aia, ma Aia Ikonimani. Amen.

TANA Soana na Mama, mana Dale, mana Taruna e Tabu. Amen.

(Na Toha)
 

GOD Pukuna mana hira na toba kode ara abe kaputiho, Ihoe o dodoni dira padanoa kode, me tahara jiki ome kara molopoi taniho; ka malesi na papadamami hini na mamahona Nimu na Taruna e Tabu; ti hami kami hini veila puji ba vaniho ma kami hini azali na Soaveseali na Soamu e Tabu; hini aia Jesus Christ amami a Lord. Amen.

NA COLLECT.
(Pages 76-255 Tana Book Sasavo vaobu)

NA MAMARE (Totu Sivo)
Na Voihavo e Vesea (Tu)

P. A Lord ke totu ikonimiu.
T. Mi tana tidaomu.

TUTUGU.
 

    HITA ka sasavo matedira na Soasivo kode nina Christ, ma matedira na tinoni kode taoni kode taoni dira padanao.

GOD Pukunamana ekoaza e totovohi hami nohohini naho komu e tabu, ti kami soaveseali ma kami sasavo matedira na tioni kode, mi kalinade ihami ami Soavesealiho matena pipi nimu jonisavu kode . . . . .

P. Ihita ka soaveseali a Lord.
T. Soaveseali vani aia God.

    IHAMI ami nonijajaiho ti ko taho nimami na sasavo matedira na Soasivo kode nina Christ, ti danali hini na taruna na laovesea mana manabo, ma ti hirasei kode ara tutunina tana Soamu e tabu kara hini tami kaputi hini na manana hini Nahokomu e tabu makara hini totu pakikokolu tana manabo mana veila.

P. Lord hini nimu veihaluve.
T. Ronomi amani na sasavo.

    Ko jonisavu vanihira kode nimu na tinoni ago hini na hokomu mana Sacrament, me pujiba hira nimu na mane ago . . . . . . nimami na bishop, mi hira na priest mana deacon kode lalaka tana diocese iade . . . . . ti hini na tototudira ma dira na hoko totojajaha hira kara tusulabati na totoramu makara ragasai hira na tinoni kode vaniho.

    IHITA a sasavo matedira na mane pujikae kode tana maramana, me pujiba nimu na daki ago Queen Elizabeth (mana Taovia ni France), mi hirasei kode na mana konidira mana reitutuhu . . . . te hira kara reitutuhu jajahali ma kara reitutuhu hotoli, makara sau mai na manabo mana reitutuhu adira na toha.

P. Lord hini nimu veihaluve.
T. Ronomi amani na sasavo.

    Ko tahaovi moko Sana, ihami ami sasavo vaniho, matedirasei kode ara agoago na jarivulahiana nimu voihavo vesea tana pipi vera . . . . . , na tusuvalahiana na mararana nimu na Taruna tana pipi vera, sasani mana maurisi . . . . .

P. Lord hini nimu veihaluve.
T. Ronomi amani na sasavo.

    Vanihira nimu toha tana pipi sosoadira ko tusu vanihira Nimu na molosavu ni hotu, me pujiba ( ...... ma) vanihami hira nimu mane ago,ti hami kami ronomi na Hokomu e tabu hini na vesea mana laopapara, ma kami ago manana vaniho tana pipi boni mamauri mami.

P. Lord hini nimu veihaluve.
T. Ronomi amani na sasavo.

    Mi hami ami noniho, Mama, ti hini nimu veila mana laohaluve e loki ba, ko kakaisi moko sana hirasei kode tana vajanisavi, padasavi, nao sasana se ara mamate . . . . . . .

P. Lord hini nimu veihaluve.
T. Ronomi amani na sasavo.

    Mi hami ami sasavo
    Ko molosavu mai vanihami na sasavo hirade, Mama o tabu, ti hirade ara aza tana nimu padanao, hini Aia Jesus Christ amami a Lord. Amen.
 

(E tau aza ti ke joko kode na sasavo kurade etanomana na molole kura, se javo sai, se jokopabo hini, ekoaza a ome e jojoko e padanao )

(Na hokotuhu imurina "Ihami ami soavesealiho" se "Ihami ami sasavo vaniho"
Laka, Lord, ronomi amami na sasavo.)

    Matena . . . . . ihami ami soavesealiho.
    Matena na paki kokoludira na toha nina Christ tana ekesa na soasivo tabu, ihami ami sasavo vaniho.
    Matedira na bishop kode, priest mana deacon, mi hirasi kode ara agoago tana soasivo (pujiba . . . . . ) ami sasavo vaniho.
    Matedira na tinoni kode ti hira kara ronomi ma Hokomu (pujiba . . . . ), ihami ami sasavo vaniho;
    Matedira ponotoba kode tana pipi momorumami (pujiba . . . . ), ma matedirasei ara ago ilevuhadira, ihami ami sasaovo vaniho;
    Matena na manabo tana maramana popono (pujiba . . . ), ami sasavo vaniho;
    Matedirasei kode ara taovia kaputi na tototu i maramana ti hira kara reitutuhu masaokali taoni nimu padanao e tabu, ihami ami sasavo vaniho;
    Ma ti matedira na Veramami visu ma matena Queen Elizabeth (mana Taovia ni France) ma matedirasei kode ara hidavi hami (pujiba . . . . ), ihami ami sasavo vaniho;
    Matedira na men mana daki tana boni na mamauridira mana ago (pujiba . . . . ) hami ami sasavo vaniho;
    Matedirasei kode ara agoago tana town mana plantation mana vaka, ihami ami sasavo vaniho;
    Matedira kamamami ma hamami udu, ma matedira tamamami ma tinamami, mi hira na jijiu pipi vera, ihami ami sasavo vaniho;
    Matedirasei kode ara totovohi se ara sasani tana mami School mana College kode (pujiba . . . . . ), ihami ami sasavo vaniho;
    Matedirasei kode ara vinano tana sautu, tasi mana oka (pujiba . . . . ), ihami ami sasavo vaniho;
    Matedira na Sekonale na vito mi hirasei e tahara veradira, ihami ami sasavo vaniho;
    Matedirasei ara nao na ago, ihami ami sasavo vaniho;
    Matedirasei ara totu senidira mi hirasei ara tau reitutuhu hira vesea (pujiba . . . ), ihami ami sasavi vaniho;
    Matedira hada linamate mi hirasei ara sosonoli hira, ihami ami sasavo vaniho;
    Matedira ara lobohu mara vajanisavi tana papada mana kokora (pujiba . . . . ), ihami ami sasavo vaniho;
    Matedirasei ara mate mi hirasei kode ara tatavota tani na mamuri iade (pujiba . . . . ) ihami sasavo vaniho;
    IHITA ka sasavo dodo matena dida padanao.

TOTU MUI.

P. Lord hini nimu veihaluve.
T. Ronomi amani na sasavo.

KO jonisavu mai vanihami amami na sasavo hirade, Mama o Tabu, ti hira ara azali Nimu padanao, hini a Dalemu Jesus Christ amami a Lord. Amen.
 

EO e vesea hita ka paki kokolu mai hini na padasavi ma hini na tutunina e manana maka nusi na kiboda vani aia Tamada ihotu.
 

GOD Pukuna mana, pede hira na tinoni kode, ihami ami tanotobo kaputiho hini na papadamami, tana hoko ami panete. Ihami ami tau veilaho hini na laomami popono; ihami tau veila hira nimu toha ekoaja ihami visu. Ko mololuani vanihami naronona a Dalema a Bamaurisi hami a Jesus Christ, mo ko Sana hami ti kami ago vaniho hini na tototu e vaolu, hini na Soadatoana na Soamu. Amen.

MOLOTAHANI KIBO

GOD Pukuna mana, Mama e veihaluve, Ihoe o hini moloboni ti ko molotahani tanihirasei ara padasavi manana vaniho mara hini kakapili hini na tutunina mara paepanete matena na molotahani tani hirasei; Aia ke veihaluve hamu, ke molotahani me ke maurisi hamu tani na kibomiu kode lalaka, me ke kakaisi hamu hini hira na ome kode e vesea, me tanani hamu tana maurisali tuhudani hini aia Jesus Christ adida Lord. Amen.
 

P. Na manabo nina God ke totu ikonimiu tuhudani.
T. Mi konimu ihoe.
P. Ihita na kokorana Christ.
T. Hini ekesa na Taruna ihita a hini Lesovitabu hini ekesa na kokora.
P. Tovo susutihasi na toani tutuhu na paki kokolu hini na Taruna.
T. Hini na taina na manabo.

NATETE (Ihira visana na tete ekoaza e vili)

    Amiu na marara ke marara tana matadira na tinoni toha, ti hira kara rei miu ago e vesea, ma kara soadato a Tamamiu ihotu.
    Ko tusu vani Aia God nimu soadato, moko panete na ome ihoe o hini moloboni vani A DATO Pujikae.
    Ko panete vanihirasei na ome ihoe o nao kara panete vaniho; iade na papadana na voihavo susubu ma dira hoko totojajaha na prophet.
    Na tidaodira na hoto itana Limana God, me tahara jiki jojodo ke hadovi hira.
    A Lord e totora ikonidira hira Nina Tabu, Kamu mai ti hita ka kukuni Aia.

(Tana mena hita a tusu vani aia na Bread mana Wine mi hita a jari koaza de)

P. Vaniho Lord na pujikae, mana Mana mana Soadato, mana Susuliha mana tanirono.
T. Pipi ome kode ihotu mi vavana animu, ma Nimu ome seni ihami ami tusu vaniho.
 

P. Kamu abe dato na laomiu.
T. I hami ami abe dato vani Aia Lord.
P. Ihita ka soaveseli adida a Lord God.
T. E vesea, me raho ti ka panete koaza.

EO e vesea ma raho ti hita kode ka soamamavali ka soadato makami soavesea-liho Ihoe Mama Ihotu hini A Dalemu Jesus Christ amami a Lord, naronona hini Aia Ihoe o vusa pipi ome tana tuturihana mo panete hami ekoaja Ihoe; ma hini Aia tana mena e jau mai na tahuna Ihoe o Suivisu hami, tana mena ihami ami puka tana tanotobo, O tusu vani Aia ti ke boja ekoaza na tinoni, ke mate ipolina na Hai-ulusavu meke hini tavisu tuhu matemami, mo molo Aia hini na totora tana Madoamu. Ma vani hami ihami Ihoe o tusu vani hami Nimu Taruna e Tabu ti ke panete hami ti kami Nimu toha tabu, ti ko danali hini hami hini na mauri vaolu mo ko tusu vanihami na papada pitu poi ke laba maina Tototumu.
    Me koaza kolu hira na angel mi hira pukuna na angel mi hira jupuna Taruna totora kode Ihotu, mama jara ekoaza—
    Tabu, Tabu, tabu Lord God Sabaoth, ihotu mi vavana ara ba danali hini na tootramu, ihami ami soadatoho, Lord o pujikae sosono.
    Kamu Soaveseali amea e mai tana soana Lord.
    Hosanna tana parako.

NA TANIRONO KODE VANIHO IHOE,

MAMA Ihotu hini Nimu laohaluve O tusu mai a Dalemu Vasu pesehe Jesus Christ ti hirasei kode ara tutunina Aia kara taho dira na maurisali.
    Mama ko ronomi hami hini a Dalemu Jesus Christ amami a Lord, ma hini Aia ko taho amami na kodobo na soaveseali, moko jonisavu ti hini na mana Nimu na Taruna e Tabu na vanalaka hirade na bread mana wine ke tusu vani hami Na kokorana mana Habuna.
    Mi tana boni nene Aia e tau vitu vajanisavi mu ipolina na Hai-ulusavu, Aia e tanoli na bread, mi tana mena Aia, e hoko veseali vaniho, Aia e niti vota me tusu vanihira Nina vavarono, me jari koaza, "Tanoli hani, IADE NA KOKORAGU E BA TUSU MATEMIU; KAMU PANETE KOAZA DE HINI NA PADA VISU AU MA KAMU DODONI TI INAU IKONIMIU" Me koaza hoto nene tana mena e kode na hahani Aia e tanoli na jeu, mi tana mena Aia e hoko veseali Vaniho, Aia e tusu vanihira, me jari koaza, "Hamu kode kamu inu iade, NARONONA IADE NA HABUGU HINI NA MOLOBONI E VAOLU E BA TAVE MATEMIU MA MATEDIRA NA TINONI TOHA HINI NA MOLOTAHANIANA NA TANOTOBO: KAMU PANETE KOAZA DE TANA MENA IHAMU AMU ININU TATU, HINI NA PADA VISU AU MA KAMU DODONI TI INAU IKONIMIU."

Pipisei—
    Namateana Mama ihami ami tusu labati, Nina tuvisu tuhu ihami ami jari vulahi, Na mai Ana ihami ami pipitu, Soadatoho Ihoe, Lord O pujikae sosono.

Priest.
ME koaza nene Mama ihami ami panete ekoazade ekoaza a Dalemu e hini susubu noho, ihami ami tusu Vaniho na bread na Mauri mana Jeu na Bamauri ekoaza nimami kodobo na Soadato mana Soaveseali, e tusu labati namateana ipolina Hai-ulu-savu matena na kibona na maramana, Nina Tuvisu e pujikae mana Datoana e totora.
    Taho hami Ikonina Aia a Bamaurisi hami, E hini Kodobo e kesa kalina na kodobo uruuru laka moko molosavu ti hami kode ami taho na Hahani Tabu iade kami hini ekesa tana Nimu Soasivo e Tabu, Nakokorana a Dalemu Jesus Christ, a Lord ihami; Ma hini Aia ma hini na pakikokolu nina na Taruna e Tabu, na padamamava kode mana tanirono vaniho Ihoe, Mama Pukuna mana, ke ba me ba. Amen.
    Nimu ome seni ihami ami tusu vaniho.
 

E KOAZA a Lord ihita e totovohi hita hita jari koaza Mana ihotu, ke ba Tabu na soamu, ke mai na tototumu. Ke mana na jajahamu, ivavana ekoaza keneni, ko molotahani na kibomami ekoaza ihami ami molotahani na kibodira. Ko jika na mololuami hami tana gugure, ko taho tahani hami tani na tanotobo. Animu na tototu mana mana, mana totora, ke ba me ba. Amen.
 

P. Na bread ihita a niti, e tau hini tuva tana kokorana Christ?
T. Naronona hini ekesa na bread, ihita a avo hini ekesa na kokora, naronona e ba vatuvi hita hini ekesa na bread.

    A Lamb Nina God, O taho tahani na kibona na maramana, ko haluve hami.
    A Lamb Nina God, O taho tahani na kibona na maramana, ko haluve hami.
    A Lamb Nina God, O taho tahani na kibona na maramana, ko mololuani mai Nimu na manabo.

    Kamu mai varani hini na tutunina-Kamu taho na Kokorana Lord hita Jesus Christ e ba tusu matemiu, mana Habuna e ba tave matemiu, ma kamu vatuvihamu hini Aia tana tobamiu hini na tutuina ma hini na Soaveseali.

(Tana sauana na muja Tabu na priest kejari koaza)

    Na kokorana Lord ihita Jesus Christ.
    Na Habuna Lord ihita Jesus Christ.

(Imurina na jahi maleana na plate mana jeu na priest ke jari koaza)
 

GOD Pukuna mana pukuna maurisati tuhudani, ihami ami soavesealiho hini na laomani kode matena Ihoe O Vaturvi hami hini na Muja Tabu hini na Kokorana mana Habuna a Dalemu, a Bamurisi hami a Jesus Christ. Mi hami ami hini Soavesealiho naronona Nimu veila ma Nimu reitutuhu hami Mo panete hami ti kami vavarina na Kokorana mauri ma hini na paki kokolu adira Nimu toha, mo ko tusu vanihami na maurisali tuhudani.

(Pipisei)
MANA ronona iade Mama Ko reitutuhu hami hini Nimu na molosavu, ti hami kami hini panete na ago e vesea Ihoe O pae-panete manohati vanihami Iade ihami ami tusu visuhami natidaomami mana Kokoramami Vaniho, ti ke hini tabu me ke kodobo mauri, hini a Jesus Christ amami a Lord, ma hini aiai mi Hoe mana Taruna e Tabu, hini na mana kode mana tanirono ke ba me ba. Amen.

KAMU julusivo hini na manabo, veila ma kamu agoago vania Lord, ke ba danali hini hamu na lalaoma hini na mana Nina na Taruna e Tabu.
    Mana Baveseali Nina God Pukuna mana, na Mama na Dale mana Taruna e Tabu ke ikonimiu meke totu ikonimiu ke ba me ba. Amen.

Ko kiki ko jajari, ke avo kalina, na sasavo koaza hirade:—

    Lord inau ma God inau,
    Soavesealiho Lord Jesus ronona Ihoe O mai pujiba vaniau.
    Kalinade inau au tamaniho tana laogu
    Oli au, ti nau kau koaza Ihoe,
    Inau au tusu visu au vaniho, kokora, tidao, mana taruna, ti kau panete Nimu padanao tabu,
    Baveseali, soadato mana batabu ana Jesus Christ tana tototuna tani rono, tana Sacrament e Tabu pujikae tana Altar, mi tana vale Tabu tana laogu.
    Ko pada visu laka laona na dani popona Jesus ilaomiu.