A Fagarafenga tangaa na bwanu mai ana mereaka.

O God Emamami, ui mai afainigami mataina mi rafesigo mana fagaakaufigo ana i ruma iamu; ui meeria mai i obwamami ka faiobwaninga tangago, kamii obwanigo teefari na mwarao namii fagaatea na mwarao ne koro tangago; ui rongogami i na wawaiaro, mana mataina no rongogami, ui fagagumwagami makui fagarakorofigami, tararua o Jesus Christ na Arafa iamami. Amen.

A Fagarafenga mereaka maka kafu furafura.

O God Emamami, ui fagagumwagami maangaa mi tataakosi na mwarao getegi na mataina mi rarafesigo igaa. Mi korogo rainia no tamanigami. Ui tagarainigami gatagataa tangaa a taagaraanifa iamami, ki taua mi fagaofu; kamiii fagaakaufigo i na maurifamami, tararua o Jesus Christ na Arafa iamami. Amen.

FAGARAFENGA NI GOMAGOMAAFATANA.

¶ Ai ura fato.

    O God, mafarufaru mai kui fagatafigami.
    Na Arafa, afaro mai kui tamanigami.

    Maawetana funu tangaa o Waema, mina Kare, mina Nununa Apuna;
    Mataina igaa na fagaanegaa, me ekaa, mena raorao mwa, maa ni tonga bwotona. Amen.

Mui fagaakaufia ka Arafa.
Mi fagaakaufia na Atana na Arafa.

HYMN.

LESSON.

¶ Bwogureiuwa ana.

Arafa, ui takoigami.
Christ, ui takoigami.
Arafa, ui takoigami.
 

IGIA kai rangaria tangaa ko God faufugana ramwofa, o Waema, mina Kare, mina Nununa Apuna, ka oraoraga ana igaa ka taakofa, mina woita, mina taanui ana, suri ka agua aera iaka mereaka, makai nongia ko God ki takoigia.

O GOD faufugana ramwofa, ui takoigami, makui fagagumwagami nainigi ka arani ginomami, ui fagaramworigami igaa ka arani korofa, makui toraigami ana wau tangaa ka tafinga mina raorao mwa. Amen.

NA ARAFA, Emamami i na wawaiaro, o God, faufugana ramwofa, faufugana tafinga raorao mwa, no taugami maniraanigami tangaa ka fagaanegana tangiana ngaekaa, ui mamainiga puusigami i na faufugana ramwofa iamu, makui fagamarumungainigami siaana kamii wota afuri rao ka oraoragaanifa ngaekaa, i siaana aera kamii totongo ana ni peerefa, maka arani mwarao namii taanui ui ono surigami, kamii taanui otooto i nagomu, tararua o Jesus Christ na Arafa iamami. Amen.

(Taana fagarafenga ki igaa.)

Na Arafa ki oga afainigamu.
Mi afainia ka nunumu.

Makai fagakorofia ka Arafa.
Fagakorokoroo tangaa ko God.

NA ARAFA, ki fagakorofigia maki manimanigia paania ka agua fato ne aera, maki toraigia tangaa ka tafinga mina raorao mwa. Amen.

FAGARAFENGA NI MANUURAFITANA.

¶ Ai ura fato.

NA ARAFA, faufugana ramwofa, kaa ki fagamarumungainia mai ka maraapefana na bwongiana mana aotomigana na fatonga iaka.
    Agoaku, mui ura gatagataa kamui ono, suria na maerongamiu o Satan, maangaa na lion ne nguungunguruaga, raorao rai gariana taani ni fafagaaerisia, makamui nganganiaga, makamui fere gatagataa rainia ka raronimwora ana.

Makigoo, na Arafa, ui takoigami.
Na Arafa, afaro mai kui tamanigami.

MAAWETANA funu tangaa o Waema, mina Kare, mina Nununa Apuna;
    Mataina igaa na fagaanegaa, me ekaa, mena raorao mwa, maa ni tonga bwotona. Amen.

Mui fagaakaufia ka Arafa.
Mi fagaakaufia na Atana na Arafa.

MUI rao mai tangaau, igamu fato mu taagara rafa makamu tora figa, makau pagai fagamamarogamu.
    Fagakorokoroo tangaa ko God.

    Irarona rimamu, na Arafa, kau maafata rainia ka nunuku.
    Irarona rimamu, na Arafa, kau maafata rainia ka nunuku.

    Surigo ki igoo na auruku, na Arafa, na mworana o God.
    Kau maafata rainia ka nunuku.

    Maawetana funu tangaa o Waema, mina Kare, mina Nununa Apuna; mataina igaa na fagaanegaa, me ekaa, mena raorao mwa, maa ni tonga bwotona.
    Amen. Irarona rimamu, na Arafa, kau maafata rainia ka nunuku.

HYMN.

LESSON.

UI MANIMANIGAMI, na Arafa, mataina mi rite, makui ono surigami igaa na mataina mi mauru, suria ka mataina mi rite, kamii onoono afainia ko Christ, mana mataina mi mauru, kamii mamaro igaa ki ngaia.

NUNC DIMITTIS.

NA ARAFA, nga nui kasia ka kari iamu ki rao wau i na rama: takena nga na woita iamu.
    Au rea rainigi ka maaku: ka fagatafingamu,
    Suria no bwani fagananaua: i nagota na arani inuni;
    Ke tao rai maawefa ke maawesira ka auna inuni getea: mana wageta na auna ruma iamu Israel.
    Maawetana funu tangaa o Waema, mina Kare: mina Nununa Apuna;
    Mataina igaa na fagaanegaa, me ekaa, mena raorao mwa: maa ni tonga bwotona. Amen.

UI MANIMANIGAMI, na Arafa, mataina mi rite, makui ono surigami igaa na mataina mi mauru, suria ka mataina mi rite, kamii onoono afainia ko Christ, mana mataina mi mauru, kamii mamaro igaa ki ngaia.

¶ Ai woisia faku ha Raronimwora ana iata na Kasifaisuri.
 

INAU kau raronimwora nainia o God o Waema, faufugana ramwofa, na Fagaworafinga ana nainia na wawaiaro mina finua rifurifu ka.
    Mana rainia o Jesus Christ, Karena ne tagai togo, na Arafa iaka,
    Mama Nununa Apuna ke mai kasia tangaa ke wora igaa ka Mary makumaku;
    Ke ape fafara i rugana o Pontius Pilate, ka rapusia woroa igaa ka Taoworo, ke mae, ka toongia,
    Ke wato rao i Rotomanu;
    Mina aoruta na tangiana ke afaraga aporo paania ka maefa,
    Ke akau i na wawaiaro, make oga i otona o God o Waema faufugana ramwofa;
    Ngaekana ke pagai aporo mai ke fafagageira ka ainuni na mauri mana ani na bwani mae.
    Inau kau raronimwora nainia ka Nunuma Apuna;
    Ka Atewau apuna nga takutaku; ka apunagana fakunga;
    Ka fagagumwafa ni gino;
    Ka afaraga aporo ana na ape; mana tafinga raorao mwa. Amen.

¶ Bwogureiuwa ana.

Arafa, ui takoigami.
Christ, ui takoigami.
Arafa, ui takoigami,
 

E MAMAMI i na wawaiaro, na Atamu ki apuna. Na arafanga iamu mai. A mwarao no obwani kai tatanui i anokaa, ki maangaa nikao i na wawaiaro. Ui wategami mai kamii ngaufa tangaa ngaekaa. Makui fagagumwagami paanigi ka ginomami, suria igami kamii fagagumwara kaniata na ginota ka inuni na fagaaera mai tangagami. Siaana kamii arao igaa ka faiofungifa aera; makui tawogami paania ki ngaia ni aera. Suria na arafanga iamu mana ramwofa mana raaraangamu, ki raorao mwa. Amen.

    Igoo kui wagewage, na Arafa, o God iata emamami,
    Ko araria togo ka fagaakaufinga mana raaraangana akau teefari ka arani mwarao raoraomwa.

    O God, faufugana ramwofa, faufugana tafinga raorao mwa, ki manimanigia maki fagakorofigia. Amen.
 

IGIA kai rangaria tangaa ko God faufugana ramwofa, o Waema, mina Kare, mina Nununa Apuna; ka oraoraga ana igaa ka taakofa, mina woita, mina taanui ana, suri ka agua aera iaka mereaka, makai nongia ko God ki takoigia.

O GOD faufugana ramwofa, ui takoigami, makui fagagumwagami nainigi ka arani ginomami, ui fagaramworigami igaa ka arani korofa, makui toraigami ana wau tangaa ka tafinga mina raorao mwa. Amen.

UI rao mai, mi nongigo, na Arafa, ka finua ka, makui gogofi wau fagatau ka arani tou iana na maeronga; ui fagamarumungainira ka angel apuna iamu kai mai oga afainigami igaa kai ono surigami i na rama, ka fagakorofinga iamu ki wato mai afurigami raorao mwa. Amen.

UI maawesia ka rotorotoaganifa iamami, mi nonigo, na Arafa, mi rarona na faitakoifa rafa iamu, ui manimanigami paania ka arani agua aera mana peerenga igaa na bwongiana ka, suria ka faitakoifa iana Karemu ne tagai, na Fagatafinga iamami, o Jesus Christ. Amen.

IRARONA na faitakoifa iamu, na Arafa, ui ono surigami igaa na marapenga na bwongiana ka, mi nga igami na ani ne fairafurafu afurigami na arani faiorisinga ni inuni, kamii mamaro i pasimu, igoo no maa nui fagaiorisi; tararua o Jesus Christ, na Arafa iamami. Amen.

¶ Taana fagarafenga ki igaa.

    Igami kamii tao kamii mamaro;
    Surigo igoo mwa, na Arafa, ko tanugami kamii apuapu.

Na Arafa ki oga afainigamu.
Mi afainia ka nunumu.

Makai fagakarofia ka Arafa.
Fagakorokoroo tangaa ko God.

NA ARAFA, faufugana ramwofa, faufugana faitakoifa, o Waema, mina Kara, mina Nununa Apuna, ki fagakorofigia maki ono surigia raorao mwa. Amen.

TANA ANI NA FAGARAFENGA.

Kaia nai fagarafe tangaa ka agua ka.

    Ki siaana ka aerafa ni fatarigo;
    Ki siaana ka peerenga ni fafagarangia mai na ruma iamu.

NA ARAFA, Emamami i na wawariaro, mi rafesigo kui manimania ka agua aka paania ka mwarao aera, ka inuni na oga fakufaku ugaa kai raronimwora nainigo, taagara tangago, wotorainia ka faitakoifa iamu, makai arao mai igaa ka arafanga iamu; tararua o Jesus Christ, na Arafa iamami. Amen.

Kaia nai fagarafe tangaa ka Queen mana Government.

Na Arafa a Governor iamami,
Ne akau tefa na Atamu i na arani agua fato.

O GOD faufugana ramwofa, mi rafesigo nui fagakorofia ka Queen iamami, mana High Commissioner, mana Judge, mana District Officer, mana arani inuni igaa na Government i na marau gaa, kai fagaotora ka arani mwarao fagamatafani mana otofani, rai fagaakaufi ana ka Atamu apuna mana korofana tangaa na Atewau iamu; mama arani inuni faiotoi igaa na arani tamasinga faietegi mana taufa getegi ka ki ngaira na inuni igaa kai oga faku igaa, kai faitamanira mereata makai tataagara fakufaku i na afarifaigoa taana mwora; tararua o Jesus Christ, na Arafa iamami, ke arafa igaa ka arafanga na inuni fainigo mana Nununa Apuna, ki raorao mwa. Amen.

Kaia nai fagarafe tangara ka arani inuni ni taagaraanifa.

    A maata fato ke nanaasigo;
    Migoo kui watera ki ta ngaufa na otona mataina.

MI RAFESIGO, na Arafa, ui fagakorofia ki ngaira na tataagarafi mwou mama afuasinga, kamii opari fatafata ka ngaufa ni ano mana ngaufa ni asi; makui fagamarumungainira ka arani mwane fafasi mana mwane ni fagaworinga, mana ani na tageri faka kai na tataagara i na teesini ki kai tawoa ka otomigana na worifa, ki kai fagaakaufigo i na ogafa takena no obwania; tararua o Jesus Christ, na Arafa iamami. Amen.

Kaia nai fagarafe tangaa ka Atewau.

Mui fagarafe tangaa ka ramana i Jerusalem.
Ka koorofa ka ani na obwanigo.

O GOD, faufugana ramwofa, faufugana tafinga raorao mwa, ui tawoa wato mai ka maafatanga ni Nunumu ne taugami apuapu afuria ka Bishop iamami, mana priest, mana deacon, mana fagausuri, mama arani inuni igaa na Atewau iamami; makui meeria afurira taarai na siwona na fagakorofa iamu, kai fagakoro mangatamu mwora. Ui fagamarumungainia ke kaa, na Arafa, rai fagaakaufia na Faitamaninga ana iamami mana ki ngaia na fainakufa iamami, o Jesus Christ. Amen.

Kaia nai fagarafe tangara na afuroto.

    Mui tarofainia ka Atana tangara ka afuroto.
    Mana romana taagaranifa iana tangara ka arani inuni.

O GOD iata na arani waro ni inuni rifurifu, ui takosira ka ani no fagaworaira igaa na marausurifamu maka togou nainia na faitokoifa iamu, makui fagamarumungainira kai riri mai tangago tararura ka fagarafenga mana taagaranifa i na Atewau iamu; tararua ki ngaia no kasia mai rai fagatafigami ana, na Karemu o Jesus Christ, na Arafa iamami. Amen.

Kaia nai fagarafe tangara ke ani na fafagananau rai Maana Apuna ana.

    A inuni maa ni woraworo aporo igaa na wai mana Nununa Apuna,
    Maa ni bwaubwanu na arafanga iana o God.

O GOD, faufugana ramwofa, faufugana faitakoifa, mi rafesigo nui ono mai fai faitakoifa afurira ki ngaira fato na gaaria na Maanu Apuna ana iamu. Ui watera ka aorisinga ni paronga mwora makui tamanira kai rigi ka ginota. Ui fagaramworia ka raronimworafa iata igaa o Karemu o Jesus Christ. Ui tamanira kai giraraa ka faiobwanifa iamu, kai wora aporo i na wai ni Maanu Apuna ana, makai tomanira afainira ka kare mwora iamu, tararua o Jesus Christ, na Arafa iamami. Amen.

Kaia nai fagarafe tangara ka ani na fafagananau rai Fagataubwofi ana.

Na Nunumu faitakoi ki tawora fura;
Rao i na ano ni otootofa.

O GOD, no fagananaura na rongosuriana iamu tangaa ka rao mai ana iana na Nununa Apuna, na Fagaramwofa, tararua ka fagausurifa iana na Karemu, o Jesus Christ; mi nongigo, ui fagananaura ka obwata mana mangatata iata kari iamu, rainira na gaaria na mafataa iana na Nununa Apuna, na mataina ka tararua ka taubwofiana na rima, mana mataina na rao mai fagarangia na aorisi paronga ana mana raronimworafa, ki oga irarota fainia ka wonufanana na ramwofa iana, tararua o Jesus Christ, na Arafa iamami. Amen.
 

Kaia nai fagarafe tangaa ka rama mama fakunga tangaa fato ka arani inuni i na maawetana.

    Ono, na goaku, mwarao ka ke koro mana wagewagefa;
    Rai oga faku ana.

NA ARAFA, o Jesus Christ, no woi tangara ka Kasifaisuri iamu, A rama kau naakaa afainigamu, a ramana iaku kau wategamu: siaana rai ono iana ka ginomami, makui onoia ka raronimwora ana i na Atewau iamu, makui fagamarumungai ka rama mana fakunga ni otomia ka faiobwanifa iamu; no ogaoga mako arafa fainia ko Waema mana Nununa Apuna, God etagaina, ki raorao mwa. Amen.

Kaia nai fagarafe tangara na arani College mana School.

    A maagutainiana na Arafa, ka fagamatafa ana;
    Mana riri paania ana na aerafa, ka aitangifa koro.

NA ARAFA, nui fagakorofi ka taagarafata na College fato mana School fainia ka fagakorofinga iamu, ki ngaira na ani na fafagaraugo iraroni rai fagausurifa mana ani na tawotawo woita, ki kai ngakaa ka faiobwanifa apuna iamu i nagota taarai, kai fagaokera rai girara ana ka mworafa iamu; tararua o Jesus Christ, na Arafa iamami. Amen.

Kaia nai fagarafe tangara ka ani na ape aera mana fafara.

    E fagamarapera ka ani ne abwotabwota na mangatata;
    Make wawatera rai medicine fafagakorora ka ape aera ana iata.

O WAEMA faufugana ramwofa, no maafata rainia ka maurifa mana ramwofa ana ni ape, mi nongigo, kui ono faitakoira ka ani na ape aera mana fafara, ni tefa tangara ka ani gaa nti ani na nongigami kamii fafagarafe tangara; tararua ka fagakorofamu tangara mana ani na taatamanira, ki kai tawo aporo ka ramwofanani na apeta mana mangatata, ki nga wari no obwania takena, ma ki kai fagakorokoro tangago irarona na Atewau apuna iamu; tararua o Jesus Christ, na Arafa iamami. Amen.

Kaia nai fagarafe tangaa ka tangi ni otomia na mataina ka.

    Na Arafa ke fafagawonusia ka fagaobwanifa iata na ani na mamaagutainia;
    Ngaia nikao ke rongora na mataina na angiangi tangaa make taatamanira.

O GOD, o Waema i na wawaiaro, ki igaa o Karemu o Jesus Christ no suru tangara ka ani na gaaria na arafangamu mana otofamu nga inago, na arani mwarao tangai na apeta: mi nongigo, ui wategami mai ka tangi ni otomia na mataina aka, kamii girara tawora ana ka ngaufa i ano ga tangaa ka fagamarapegami ana mana fagaakaufigo ana; tararua o Jesus Christ, na Arafa iama mi. Amen.

Kaia nai fagakorokoroo.

Makai fagakorofia ka Arafa;
Fagakorokoroo tangaa ko God.

O GOD faufugana iamwofa, Emamami, mi fagakorokoroo tangago rainigi ka arani mwarao koro iamu tangagami mi tangara na arani inuni (igaa na mataina, ka mi fagakorokoroo tangago rainia . . . ). Mi fagaakaufigo rai fagaworaigami ana, raa naakagami ana i na ramwofa ana ni ape, inana arani mwarao koro i na maurifamami, ne teefari fato rainia ka romana na faitakoifa igaa no tawo uru puusia ka finua rifurifu rainia tararua na Arafa iamami o Jesus Christ, rai suri ka arani faitamaninga iamu, mana mworana nanaasifa kigaa na ageagemami. Makamii rafesigo kui wategami rai girara ana ka korofanamu, kamii fagakorokoroo mwora tangago, kamii fagaakaufigo siaana mwa kiigaa ka wirifaramami, mii nga ki rarona na maurifamami, rai maafata rainigami ana wau rai taagara ana tangago, maka ogafa apuna mana korofa igaa ka arani tanginii iaka; tararua o Jesus Christ na Arafa iamami, mi fagaakaufia makamii fagatagarainia akau afainigo mana Nununa Apuna, ki raorao mwa. Amen.

    Na nunuta naani na raronimwora ki rarona rimana o God;
    Ki siaana ka agua aera ne fafatarira.

O GOD, faufugana ramwofa, nai fagaakaufia ka Atamu ne apuna tangara ka mwani kari iamu na fagafatongi na maurifata i na raronimworaanifa, mina mataina aka ka mamaro paanigi ka taagaraanifa iata (taatakosia ngaekaa ka kari iamu o St . . . . . ); makamii watego ka apena fagakorokoro ana rainira ka ani na apuna fato iamu, ngaira ka maaweta rai maawesiana na finua i ano ka i na mataini iata; a nagonanga, ka Mary makumaku togo ana na ageage, Enana o Karemu, o Jesus Christ, na Arafa iamami mo God iamami, mana ani na apuna fato bwau i nagona na naanamu rafa, na Kasifaisuri, mana Fagatafa ana, na Fagarangaria ni maefata, and na bwabwai nagomami me emamami i na raronimworaanifa; makamii rafesigo, kui tamanigami kamii arao surira i na tara ni tafinga ki nga igaa na fatona kigami na arani kari iana mwora na Karemu ki nanaakagami i otona, makamii rongoa ka ringiina wagewage ne wowoi, Mui rao mai, kigamu na karena o Emaku, irarona na arafanga na bwani nanaugamu nainia i na bwani fagaanegana ana na finua rifurifu. Ui rongogami, o Waema, tararua o Jesus Christ, na Karemu, na Arafa iamami. Amen.

NA ARAFA, ui taugami akau na arani mataina igaa ka takou ana igaa ka maurifaaka, ke taua ka mataina ne porafu igaa na mamarufa, mana manurafitana ke arao mai, mana arumagata na inuni ke maarape, mans, afunga raorao igaa na tafinga ke fato, mama taagaraanifa iamami ke ofu. Maki ngaa, na Arafa, igaa na faitakoifa iamu, ui wategami ka agua apuapu, mana mamarofa apuna, mana rama igaa ka fatongina; tararua o Jesus Christ, na Arafa iamami. Amen.

NA ARAFA, ui takosia ka mwarao no taanui iraromami, make maarefa ka ani mi araria; suria no onigami rai fagaraugo ana, ui tanugami kamii araria ka onigami ana; tararua o Jesus Christ, na Arafa iamami. Amen.
 

Anima Christi.

NUNUNA o Christ, ke fagaapunariau.
Apena o Christ, ke fagatafiau.
Gapuna o Christ, ke fagamauriau.
Wai paania na rawona o Christ, ke tananiau.
Ape fafara ana iana o Christ, ke fagaramworiau.
O Jesus koro, ui rongoau.
Iraroni na maara iamu, ui punufiau.
Siaana nai guruau paanigo ana,
Paania ka maeronga aera, ui ura puusiau.
Igaa ka mataina nau sugui mae, ui oniau,
Bwai rao wau tangago,
Fainira ka ani na apuna iamu ki bwai fagaakaufigo
Ki raorao mwa, ki raorao mwa. Amen.

Igaa na raronimworafa.

O GOD iaku, inau kau raronimwora nainigo, mama arani mwarao ne fagausuringainigi na Atewau iamu, surigo no woisi, mans, woita iamu ke mwora.

Igaa na mworana nanasifa.

O GOD iaku, inau kau mwora nau nanaasigo, rai tawo ana ka maafata ana mana ageagefa, suria na surufa iamu mana faitakoifa iamu mana ramwofa iamu.

Igaa na faiobwanifa.

O GOD iaku, inau kau obwanigo igaa ka arani obwaku, surigo no koro tefa: mana usurigo igoo, au obwanira na goaku nga takeku mereaku.

Igaa na fagaaitangifa ni gino.

O GOD iaku, inau kau takoiau nainigi ka arani ginoku suri nau fagamamangaringarigo rainigo, makau kasi akau ka mangataku rai ofa marana ana tararua na maafata ana iamu ki siaana bwai oraoraga nikao.

Igaa na wogasifa.

O GOD iaku, inau kau wogasi rainiau tangago, faku afainia ka wogasifa iana o Jesus Christ igaa na Taoworo apuna.

A Fagarafenga iana o St. Richard ni Chichester.

O JESUS apuna,
Auruku faitakoi tefa,
O Goaku me Ewaku,
Bwai girarago taraagani menemenei,
Bwai obwanigo tefa funu,
Bwai gogo fagarangiigo wau.

Na Fagaaksaufana o God.

FAGAAKAUFIA o God.
Fagaakaufia ka Atana ne apuna.
Fagaakaufia o Jesus Christ, mworana God mana mworana na Inuni.
Fagaakaufia ka Atana o Jesus.
Fagaakaufia o Jesus Christ igaa ka Sacrament apuna i na raperape.
Fagaakaufia ka Nununa Apuna, na Fagaramwofa.
Fagaakaufia Kenana o God, ka Mary ne apuna.
Fagaakaufia o God igaa na angel iana mana ani na apuna iana.
Fagaakaufia o God.