O VAVAE TATARO
TE TATARO NIA
VAL MATAVA
ALO IMA WE RONO.

¶ I Gagapalag ni vasogo lue o garatigiu me rave sur siwo, ta luwale si ta visa; paso nan, ni vasogo taso o takele vavae mulan.

SI isei ganganor qe vusiag kel nan o ganganor ni me ge ti, ni qe ge o gene we tira ape lea, wa ni qe ge o gene we taniniga, ni te ge esu naatana apena.—Ezekiel 18. 27.
    Nau we ilo vaglala mok o tames nan; wa nok o ganganor qale toga goro nanagok.—Psalm 51. 3.
    Namatevun Lord God inina o matev magarosa wa o nomvitag pugai; nava inina me tamesia, inina gate tinqoro nalinan Lord God inina, si a mule alo Lea amona ni me map goro nanagon ina.—Daniel 9. 10.
    Lord, Ka wurvag nau, panava mun o gilala wurvag, pa nipea mun o lologagara, nau wa tagea ran.—Jeremiah 10. 24; Psalm 6. 1.
    Tur nomleas ape o marana tavunana me rasu ma.—S. Matthew 3. 2.
    Na te tavaraka na te mule kel sur tamak, na te vet munia wa, Mama, na me ganganor goro vunana, wa alo nagoma, wa na gate sar si a log inau natuma.—S. Luke 15. 18, 19.

RA TASIK! o Raverave we rono we vasosov vagaqoqo inina si nina a gaganag lue wa a vavaul ape nonina o ganganor, wa ape matevunina we tatas nan; was nipea galegale, wa nipea monmona goro o ganganor nan nanagon God Turmana i Tamanina avunana; nava a vavaul apena mun o nom mantag, wa o nompepewu, wa o nomleas, wa o gagapalag tataga mon o lea; si nina qara le o nomvitag ganganor, o manigiu non o lolowia wa non o lolomagarosa gate motmot ran ti.
    Wa me vet si nina a vavaul aperig vagae ape puganina alo nagona; wa si a la o tinegaro apena, alo inina we gogorag ma wa we vug tuwale, si a varean God ape gene we wia nan Ni me sogov ma munina, si a manasag lue narorona, si a ronotag mon o Vavae tur rono, si a tataro ape gene nan naturianina wa naatanina te wia apena.
    O manigiu o ine na we tias kamiu nol we vug iake, si nina a van saratuwale ape tano-putepute sogov tavunana, mun o toqai we matartoga wa o linai we malumlum; inina vava wa:
 

¶ O sul neira vatieqau, neira log o Vavaul-ganganor.

MAMA Turmana, Turmagarosa; kamam me sipa, me lera nan namatesalama, tam o sheep me tagea. Kamam me tataga sal vires o gene nan nalolomam me nom vasarig me. tortoron apena. Kamam me sirigavtag Nom o lea vatogoa we rono; kamam gate ge o gene nan Ko me vatran si age; wa kamam me ge o gene nan Ko me gatogoro ti; wa o esu gate toga tea alo ikamam.
    Pa Iniko, Lord, Ka magarosa ikamam ira ganganor we mamagarosa. Ka ukeg kamam we vavaul nomam o ganganor. Ka wurvag kel kamam we nomleas; Tama Ko me ligoligog ti mun o tanun nan alo i Christ Jesus i Lord kamam.
    Mama Turmagarosa, Ka vasoal ma mun kamam, o manigiu Ineia; nan ilokenake kamam a toga wia, toga taniniga, toga mantag; Nasasama we rono ni lenas apena. Amen.

¶ Nan i Priest ni tavaraka, ni vasogo lue o Vavae Ulsavrag ganganor; wa o sul gale vatieqau.

GOD Turmana, Taman Lord nina Jesus Christ, gate maros isei ganganor ni mate tea, nava ni vusiag kel nan non o togara we tatas, ni esu: wa Ni me manag ira Gagapalag mon o lea, wa Ni me vatranira, si neira gaganag wa si neira manasag lue munrasei qe nomleas o Ulsavrag wa o Nomvitag napugara nan neira: Ni we nomvitag wa Ni we ulsavrag napugara nan rasei nol we nomleas nun, wa we nomtup vatawasai mon o Lea we wia we rono.
    O manigiu o ine, inina tiatiasia, Ni vasoal ma munina o nomleas nun, wa non o Vui we Rono; nina a gagapalag ilokenake o gene nan Ni we maros, wa nina a toga matartoga, toga rono valqoninina; wa alo ulusui nina nina o malakalaka galava amaia; mun Jesus Christ i Lord inina. Amen.

¶ Wa si o Priest ta tagai, i Gagapalag te qale vatieqau, te vasogo o vavae tataro iloke leas o Ulsavrag ganganor.

GOD, namatevuma o matev magarosa wa o nomvitag pugai; Ka ronotag lolowia ikamam we tataro nompepewu muniko; Ka ulsavrag nan kamam o ga-ganganor me rot wa me vivis kamam; o manigiu Nom o lolotape wa Nom o magarosa we lava; si kamam a nom mava i Jesus Christ, i Tinanai, i Tataro muniko apen kamam. Amen.

¶ Si o vavae tataro iloke.

LORD, kamam we tiasiko, Ka tinqoro magarosa nomam o tataro; Ka lolowia ikamam we vavaul muniko ape pugamam, Ka ul magarosa nan kamam o ganganor nol we mavat kamam we wonot nalolomam; mun Christ i Lord kamam. Amen.

¶ Paso nan, i Gagapalag ni vatieqau, ni vava lue o Tataro mon Lord; wa o sul a vava tuwale amaia.
 

MAMA avunana, Nasasama ni rono. Nom o marana ni mule ma. Nom o maros ni lai alalanana tama avunana. Le ma qarig mun kamam o sinaga we tira ape qarig. Ka nomvitag napugamam, tama ikamam we nomvitag napugara. Nipea ukeukeg kamam ilo galeva; Ka lav kamam nan o ganganor. Anoma o marana, wa o mana, wa o lenas ti toga ti toga. Amen.

¶ Wa i Gagapalag ni vava wa,

Lord, waka nanusumam.
    Navalamam a manasag lue naroroma.

God, togtogoa ma, vaesu kamam.
    Lord, gogoi ma, pirin kamam.

¶ Neira nol a tavaraka, wa i Gagapalag ni vava wa,

Log ronoga o Mama, wa o Natui: wa o Vui we Rono;
    Tama we tuai, wa ilokenake tete paso lai. Amen.

Tur logwia i Lord.
    Ikamam we logwia nasasan Lord.

PSALM 95.

NINA sur o as mun Lord: nina sur rorov malakalaka mun o Vat vaesu nina.
    Nina mule wievavae goro nanagona: nina sur rorov malakalaka munia o as.
    Nan i Lord God liwoa: i tur Maranaga avunara vui nan.
    Alo panena o qarana piroro: wa anona o taqan tauwe we toletole.
    Amona o lama ni me tin: wa napanena me gapalag o tanomasa.
    Nina tagalon, rowo taqa nina vatieqau goro i Lord i Tin nina.
    Nan Ineia God inina: wa inina talo tuqena, we o sheep alalane panena.
    Si kam qe ronotag nalinana qarig: turpea waswasvat, tame a Meriba wa a Masa alo maso mot.
    Ira tupumiu me ge ilo inau: me meregale inau, wa me ilo mok o gagapalag.
    O tau sanavul vat nalolok me taveris ape taraniu ilone; pa na me vava was: Ineira o sul lololera, wa ineira gate gilala namatesalak.
    Nan nau me ligog lologagara wa: ineira tote nina ape tano mapsag nok.
    Log ronoga o Mama, wa o Natui: wa o Vui we Rono;
    Tama we tuai, wa ilokenake: tete paso lai. Amen.

¶ Paso nan, a vasogo si a sur o Psalm nan we tira ape valval qon.

¶ Paso nan, a vasogo lue o takele Raverave we Rono talo Vatavata we Tuai.

¶ Paso nan a vasogo si a sur o As iloke.
 

O LOGWIA GOD.

KAMAM we logwia Iniko, God: we gaganag lue Iniko i Lord.
    O marama nol we momogo Ko: o Mama we galava.
    Ira Angel nan we vava eleele muniko: o vunana wa o gene nan we mana alolona.
    Ira Cherubim tara Seraphim: we vava segao wa,
Rono, Rono, Rono: Lord God Sabaoth;
    O vunana wa o lalanana: we uravag nalenasima.

O VAVTIG Sala we ronoga: we logwia Iniko.
O pulpul wia nora Prophet: we logwia Iniko.
    O vavtig Martyr ira nonomot: we logwia Iniko.
    O Loglue we rono val vanua nan: we gaganag lue Iniko;
    Mama, Nom o marana: tete tingoro lai;
    Tur Natuma: nom-mava tuwale wora;
    Wa o Vui we Rono: i Varagai.

CHRIST! Iniko: i Maranaga we ronoga.
Iniko Natun Mama: toga galava ran ma.
    Ko me qeteg raka we ge esu o tanun nan: Ko gate vasigtag o toqe Qilowar.
    Ko me lareag o tangesar nan o matea: Ko me waka o marana tavunana mura nomtup.
    Ko we pute alo matuan God: alo lenasin Mama.
    Kamam we nomtup ape Ko to kel ma anaisa: si a veveg kamam.
    Kamam we tataro muniko apena, Ka pirin kamam o tanun anama nan: Ko me tunkel kamam mun o moe gene tun nanarama.
    Ka vasogo tuwale kamam amera tanun anama nan we rono: alo lenas ti galava.

LORD, Ka vaesu o sul anama: Ka vawia ra mermereima.
    Maranaga goro ikamam: sau kalo galava ikamam.
    Kamam we log val qon Iniko: i Liwoa aneane.
    Wa ikamam we log momogo nasasama: ti tuai, ti tuai, tete paso lai.
    Lord, Ka manag goro ikamam qarig: nan o ganganor nol.
    Lord, magarosa ikamam: magarosa ikamam.
    Lord, Nom o magarosa ni toga avunamam: we matueg avunama.
    Lord, na me matueg avunama: nipea ukeukeg nau si na matmatueg matila.

¶ Si o As iloke.
 

O WIEVAVAE I LORD.

GAGAPALAG nol amen Lord, wievavae i Lord: vareania, ge ronoga Ineia ti tuai ti tuai.
    Ira Angel anan Lord, wievavae i Lord: vareania, ge ronoga Ineia ti tuai ti tuai.

TUKA nan, wievavae i Lord: vareania, ge ronoga Ineia ti tuai ti tuai.
    Pei nan avune Maea, wievavae i Lord: vareania, ge ronoga Ineia ti tuai ti tuai,
    Gene nan we Mama anon Lord, wievavae i Lord: vareania, ge ronoga Ineia ti tuai ti tuai.
    Loa wa Vula, wievavae i Lord: vareania, ge ronoga Ineia ti tuai ti tuai.
    Vitu nan talo Tuka, wievavae i Lord: vareania, ge ronoga Ineia ti tuai ti tuai.
    Wena tiutiu wa Mewu, wievavae i Lord: vareania, ge ronoga Ineia ti tuai ti tuai.
    Lan nol anon God, wievavae i Lord: vareania, ge ronoga Ineia ti tuai ti tuai.
    Av wa Titkeliga, wievavae i Lord: vareania, ge ronoga Ineia ti tuai ti tuai.
    Rara wa Magoto, wievavae i Lord: vareania, ge ronoga Ineia ti tuai ti tuai.
    Mewu nan wa Mewu maremare, wievavae i Lord: vareania, ge ronoga Ineia ti tuai ti tuai.
    Mewu maremare wa Mamarir, wievavae i Lord: vareania, ge ronoga Ineia ti tuai ti tuai.
    Pei maremare wa Wena maremare, wievavae i Lord: vareania, ge ronoga Ineia ti tuai ti tuai.
    Qon nan wa Maran nan, wievavae i Lord: vareania, ge ronoga Ineia ti tuai ti tuai.
    Marmararan wa Silsiliga, wievavae i Lord: vareania, ge ronoga Ineia ti tuai ti tuai.
    Vila nan wa Maligo nan, wievavae i Lord: vareania, ge ronoga Ineia ti tuai ti tuai.

MARAMA nol, wievavae i Lord: we nun, ni vareania, ni ge ronoga Ineia ti tuai ti tuai.
    Tauwe nan wa Warevutvut nan, wievavae i Lord: vareania, ge ronoga Ineia ti tuai ti tuai.
    Gene nol gale maur alo Tana, wievavae i Lord: vareania, ge ronoga Ineia ti tuai ti tuai.
    Qaran pei nan, wievavae i Lord: vareania, ge ronoga Ineia ti tuai ti tuai.
    Lama nan wa Pei liliv nan, wievavae i Lord: vareania, ge ronoga Ineia ti tuai ti tuai.
    Kio nan wa gene nol we gagagao alo Lama nan, wievavae i Lord: vareania, ge ronoga Ineia ti tuai ti tuai.
    Manu nan talo Maea, wievavae i Lord: vareania, ge ronoga Ineia ti tuai ti tuai.
    Sale Qoe nan wa Sale Cow nan, wievavae i Lord: vareania, r ge ronoga Ineia ti tuai ti tuai.
    Ira Nat Tanun nan, tur wievavae i Lord: vareania, ge ronoga Ineia ti tuai ti tuai.

ISRAEL ni wievavae i Lord: vareania, ni ge ronoga Ineia ti tuai ti tuai.
    Ira Priest anan Lord, tur wievavae i Lord: vareania, a ge ronoga Ineia ti tuai ti tuai.
    Ira Rowrowovag anan Lord, tur wievavae i Lord: vareania, a ge ronoga Ineia ti tuai ti tuai.
    Vui wa Atai nan nora Taniniga, tur wievavae i Lord: vareania, a ge ronoga Ineia ti tuai ti tuai.
    Ragai, Tanun we rono wa we lolopepewu, tur wievavae i Lord: vareania, a ge ronoga Ineia ti tuai ti tuai.
    Ananias, Azarias, ragetol Misael, tol wievavae i Lord: vareania, a ge ronoga Ineia ti tuai ti tuai.
    Log ronoga o Mama, wa o Natui: wa o Vui we Rono;
    Tama we tuai, wa ilokenake: tete paso lai. Amen.

¶ Paso nan, ti vasogo lue o takele Raverave we Rono talo Vatavata we Garaqa, gaga sur o As iloke.
 

NINA WIEVAVAE I LORD. S. Luke 1. 68.

NINA wievavae i Lord God Israel: ape Ni me vaatev wa Ni me tunkel o sul anana;
    Wa Ni me vatira o mace esunina: alo veve David o tanun anana;
    (Tama Ni me vava mun navalara prophet we rono anana: alo qeteg marama ma;)
    O vaesunina nan o tavalalea: wa nan napanera nol we nustup nina;
    Sin magarosa ra tupunina: sin nomkel ape mon o vatavata we rono.
    Sin vatira o vavae vagogonag: Ni me ligog ti mun Abraham i tamanina.
    Sin ge rowolue nina nan napanera tavalalea: nina qara mawmawui apesov munia;
    Nina toga rono: toga taniniga alo nagona valqoninina.
    Pa to logiko, tote, o prophet non i Tur Eleele: ape ko to moai goro nanagon Lord, si a wurvag namatesalana.
    Si a na lolomaran o sul anana ape esura: was o nomvitag napugara;
    Mun o lolomagarosa non God inina: o sinosinoi tavunana me vaatev nina apena.
    Si a valawar irasei we pute alo silsiliga wa alo malumalu matea: si a ave taniniga naranonina ilo matesale tamata.
    Log ronoga o Mama, wa o Natui: wa o Vui we Rono;
    Tama we tuai, wa ilokenake: tote paso lai. Amen.

¶ Si o Psalm iloke.

TUR ROROV MASEKESEKE. Psalm 100.

TUR rorov masekeseke mun Lord, vanua nan: tur mawmawui malakalaka mun Lord, mule goro nanagona mun o sur poa o as.
    Tur gilala apen Lord si Ineia God: Ni me tin nina, wa gate monina; nina o sul anana wa o sheep talo tuqena.
    Tur kalo pata varean ilo mategeara anona, tur mule logwia ilo tinesarana: vareania, wievavae nasasana.
    Nan i Lord we wia, Ni we magarosa galava: Ni we nun val taraniu nan.
    Log ronoga o Mama, wa o Natui: wa o Vui we Rono;
    Tama we tuai, wa ilokenake: tote paso lai. Amen.

¶ Paso nan, i Gagapalag tar o sul a tira, a vasogo tuwale o Nomtup nora Sala.
 

INAU we nomtup God o Mama i Turmana, i Tin o vunana wa o lalanana.
    Wa i Jesus Christ Natuna tuwale wora Lord inina; me wune Ineia anion o Vui we Rono; me wota amen o tur Qilowar Mary; Ni me toga mamagarosa lalanan Pontius Pilate; neira me woso teterpania; Ni me mate; neira me saloa; Ni me vano i Panoi; o qon vatoliu Ni me tavaraka kel nan o matea; Ni me mule kalo ivunana; Ni we pute alo matuan God o Mama i Turmana; Ni to siwo ma anaisa si a veveg ira we esu wa ira me mate veta.
    Inau we nomtup o Vui we Rono; o Loglue we rono valvanua nan; o Pultuwale nora rono; o ul ganganor; o turiai to tavaraka kel; wa o esu galava. Amen.

¶ Paso nan, i Gagapalag ni vava wa,

I Lord Ni toga amen kamiu.
Wa amen naatama.

¶ Nan i Gagapalag ni vava wa,

Inina tataro.

¶ Wa neira qara vatiegau, i Gagapalag ni vava wa,

Lord, magarosa ikamam.
    Christ, magarosa ikamam.
Lord, magarosa ikamam.

¶ Wa neira a vava o Tataro mot Lord mun o linai we poa.
 

MAMA avunana, Nasasama ni Rono. Nom o marana ni mule ma. Nom o maros ni lai alalanana tama avunana. Le ma qarig mun kamam o sinaga we tira ape prig. Ka nomvitag napugamam, tama ikamam we nomvitag napugara. Nipea ukeukeg kamam ilo galava; Ka lav kamam nan o ganganor. Amen.

¶ Wa i Priest ni tavaraka, ni vava wa,

Lord, la lue ma Nom o magarosa mun kamam.
    Vasoal ma mum kamam naesuma.

Lord, vaesu ira maranaga nan.
    Ronotag magarosa ikamam we log kaloko.

Ka saru goro ra gagapalag anama mun o line taniniga.
    Ka ge malakalaka o sul anama Ko me iloraka veta ineira.

Lord, vaesu o sul anama.
    Vawia ira mermereima.

Lord, tamata goro nataumam.
    Apensei we sea tete tuan lai kamam; vava Iniko magasema, God.

God, Ka ge wenewene natogamar.
    Nipea lala reag nom o Vui we Rono nan kamam.

¶ Wa i Gagapalag ni vasogo o Collect, wa o Tataro nirua mulan te vasogo segao valqon.
 

O TATARO O VARUEI, APE TAMATA.

GOD, Iniko qeteg tamata, Ko we maros o pul saratuwale; isei qe gilala wurvag Iniko ti esu galava, wa isei qe mawmawui muniko ti toga wasawasa; Tur goro ikamam ira tanun nompepewu anama nan o tavalalea nan wa rowo sur kamam: kamam ira matueg nom mot avunama i turgoro, tete gogolo o vavakae non o tavalalea; o manigiu o vavakae non Jesus Christ i Lord kamam. Amen.
 

O TATARO O VATOLIU, APE SOGOV.

LORD, Mama avunana, God Turmana, Tur esu galava, Ko me tak wasawasa ikamam ma me nina o matava iloke; Tur goro ikamam qarig mun Nom o mana we vavaka; nan kamam wa masu qarig ilo ganganor, nan wa van nompurei tatu goro o mateawota; Ka ave mana momam o gagapalag nol si a ge vagae o gene nan we taniniga alo nagonia; mun Jesus Christ i Lord kamam. Amen.

¶ Wa neira a tavaraka, a sur o As; paso nan, qara vatiegau mulan ape tataro.

LORD Turmana, God Tur esu galava, Iniko magasema we ge o vasasa nan; Suware sur ma Nom o Vui, i sogov esu ma, avunara Bishop nan tara Ilogoro wa avune Loglue nol; Liwo vagae ivunara Nom o mewu-vawia, neira qara ge nun Nom o maros. Lord, vasoal ma iloke, manig nom mava i Jesus Christ, i Tataro apen kamam, i Tinanai. Amen.
 

O TATARO AMON S. CHRYSOSTOM.

GOD Turmana, Ko me sogov ma mun kamam si kamam nol a tataro saratuwale muniko ilokenake; wa Ko me ligog ti wa si o tanun nirua si nitol qe vug nonom nasasama, Ko to la o gene me tias apena; Lord, Ka ge qalo qarig nomam o maros, wa nomam o tataro to tira ape tur pirinimam; le ma mun kamam o lolomaran ape Nom o nun alo marama iloke, wa o esu galava alo marama iloneia. Amen.

2 Corinth 13. 14.

O SOGOV mon Lord kamam Jesus Christ, wa o tapeva mon God, wa o pulpul mon o Vui we Rono, toga amen kamam nol ti tuai ti tuai. Amen.

¶ Nan alo tuan qon nan te vasogo lai o Line Tataro we qatutui iloke.

¶ Panava alo Wednesday wa Friday te vasogo o Litany.

¶ O Line Tataro we qatutui iloke gate tira pe vasogo alo Sunday nan si alo Qon nan we Rono.
 

O VAVAE TATARO WE QATUTUI
APE MATAVA.

¶ Te sur o Hymn, paso nan i Gagapalag ni vava wa,

NA me risa mok siwo me matur ti, na me mamata raka: apen i Lord te qale sapalo inau.—Psalm 3. 5.

ININA vavalul napuganina mun God Turmana.

¶ O sul neira vatieqau, neira log o Vavul-ganganor.
 

NAU we gaganag lua napugak nan mun God o Mama, God o Natui, wa mun God o Vui we Rono, wa alo nagora Angel tara Rono nan, wa si nau me ava alo nonomia nan, wa alo vavae nan, wa alo nok o gagapalag nan. O manigiu ilone nau we tias God o Mama, o Natui wa o Vui we Rono si a nomvitag munau napugak nol, o manigiu i Jesus Christ i Lord inau. Amen.

¶ Nan i Gagapalag ni vava wa,

LORD Turmagarosa, kamam we tataro muniko, Ka vasoal munra tanun aname we nomtup, o nomvitag pugai wa o tamata; kamam a wenewene nan napugamam nol, a mawmawui apesov muniko; mun Jesus Christ i Lord kamam. Amen.

¶ Wa i Gagapalag ni vava wa,

Lord, waka nanusumam.
    Navalamam a manasag lue naroroma.

God, togtogoa ma, vaesu kamam.
    Lord, gogoi ma, pirin kamam.

¶ Neira nol a tavaraka, wa i Gagapalag ni vava wa,

Log ronoga o Mama, wa o Natui: wa o Vui we Rono;
    Tama we tuai, wa ilokenake: tete paso lai. Amen.

Tur logwia i Lord.
    Ikamam we logwia nasasan Lord.

PSALM 95.

NINA sur o as mun Lord: nina sur rorov malakalaka mun o Vat vaesu nina.
    Nina mule wievavae goro nanagona: nina sur rorov malakalaka munia o as.
    Nan i Lord God liwoa: i tur Maranaga avunara vui nan.
    Alo panena o qarana piroro: wa anona o taqan tauwe we toletole.
    Amona o lama ni me tin: wa napanena me gapalag o tanomasa.
    Nina taqalon, rowo taqa: nina vatieqau goro i Lord i Tin nina.
    Log ronoga o Mama, wa o Natui: wa o Vui we Rono;
    Tama we tuai, wa ilokenake: tete paso lai. Amen.

¶ Paso nan ti vasogo o takele Raverave we Rono, gara sur o Psalm iloke.

TUR ROROV MASEKESEKE. Psalm 100.

TUR rorov masekeseke mun Lord, vanua nan: tur mawmawui malakalaka mun Lord, mule goro nanagona mun o sur poa o as.
    Tur gilala apen Lord si Ineia God: Ni me tin nina, wa gate monina; nina o sul anona wa o sheep talo tuqena.
    Tur kalo pata varean ilo mategeara anona, tur mule logwia ilo tinesarana: vareania, wievavae nasasana.
    Nan i Lord we wia, Ni we magarosa galava: Ni we nun val taraniu nan.
    Log ronoga o Mama, wa o Natui: wa o Vui we Rono;
    Tama we tuai, wa ilokenake: tete paso lai. Amen.

¶ Neira qale tira qara vava saratuwale wa,

NAU we nomtup God o Mama, ma tin inau wa o gene nan.
    Nau we nomtup God o Natui, me tunkel nau wa o tanun nan.
    Nau we nomtup God o Vui we Rono, we ge rono inau wa irasei nol God we iloraka ineira. Amen.

¶ Paso nan, i Gagapalag ni vava wa,

I Lord Ni toga amen kamiu;
Wa amen naatama.

¶ Nan i Gagapalag ni vava wa,

Inina tataro.

¶ Wa ineira a vatieqau, a vava tataga i Gagapalag,
 

MAMA avunana, Nasasama ni rono. Nom o marana ni mule ma. Nom o maros ni lai alalanana tama avuuana. Le ma qarig mun kamam o sinaga we tira ape qarig. Ka nomvitag napugamam, tama ikamam we nomvitag napugara. Nipea ukeukeg kamam ilo galeva; Ka lav kamam nan o ganganor. Anoma o marana, wa o mana, wa o lenas ti toga ti toga. Amen.

¶ Wa i Gagapalag ni vasogo o Collect we sar ape qon, wa paso nan ni vasogo taso tamaike wa,
 

LORD, Mama avunana, God Turmana, Tur esu galava, Ko me tak wasawasa ikamam ma me nina o matava iloke; Tur goro ikamam qarig mun Nom o mana we vavaka; nan kamam wa masu qarig ilo ganganor, nan wa van nompurei tatu goro o mateawota; Ka ave mana momam o gagapalag nol si a ge vagae o gene nan we taniniga alo nagonia; mun Jesus Christ i Lord kamam. Amen.

LORD Turmana, God Tur esu galava, Iniko magasema we ge o vasasa nan; Suware sur ma Nom o Vui, i sogov esu ma, avunara Bishop nan tara Ilogoro wa avune Loglue nol; Liwo vagae ivunara Nom o mewu-vawia, neira qara ge nun Nom o maros. Lord, vasoal ma iloke, manig nom mava i Jesus Christ, i Tataro apen kamam, i Tinanai. Amen.

Ape Vanuanina.

GOD Turmana, Ka sagarag lolowia ikamam we vug tuwale iake. Ka ilogoro o vanua iloke nan o gopae, wa o maro, wa o av, wa o lanvus, wa o rir, wa o mateawota nan. Wa o moe gene, Ka pirin kamam nol, si o tuaniu a vatogo mantag, wa o tuaniu a ronotag mantag; wa ikamam nol a toga mantag, mun o varean Iniko ape Ko me ge lolomaran veta ikamam, wa mun o nonom vagae ape neira talo vanuamam qale toga loloqon; mun Jesus Christ i Lord kamam. Amen.
 

O TATARO AMON S. CHRYSOSTOM.

GOD Turmana, Ko me sogov ma mun kamam si kamam nol a tataro saratuwale muniko ilokenake; wa Ko me ligog ti wa si o tanun nirua si nitol qe vug nonom nasasama, Ko to la o gene me tias apena; Lord, Ka ge qalo qarig nomam o maros, wa nomam o tataro to tira ape tur pirinimam; le ma mun kamam o lolomaran ape Nom o nun alo marama iloke, wa o esu galava alo marama iloneia. Amen.

2 Corinth 13. 14.

O SOGOV mon Lord kamam Jesus Christ, wa o tapeva mon God, wa o pulpul mon o Vui we Rono, toga amen kamam nol ti tuai ti tuai. Amen.