O LITANY.

GOD Mama, avunana: magarosa ikamam ira ganganor we mamagarosa.
    God Mama, avunana: magarosa ikamam ira ganganor we mamagarosa.

God Natui, i Tunkel marama: magarosa ikamam ira ganganor we mamagarosa.
    God Natui, i Tunkel marama: magarosa ikamam ira ganganor we mamagarosa.

God Vui we Rono, we rowolue nan o Mama wa o Natui: magarosa ikamam ira ganganor we mamagarosa.
    God Vui we Rono, we rowolue nan o Mama wa o Natui: magarosa ikamam ira ganganor we mamagarosa.

Rono, turwia, lenas Nitolwora; Ira gene nitol pa God tuwale: magarosa ikamam ira ganganor we mamagarosa.
    Rono, turwia, lenas Nitolwora; Ira gene nitol pa God tuwale: magarosa ikamam ira ganganor we mamagarosa.

LORD, nipea nomnomkel ape pugamam wa ape pugara tupumam; nipea sarsar mun kamam ape pugamam; Lord turwia, Ka ukeg kamam, Ka ukeg o sul anama, Ko me tunkel kamam mun o moe gene tun nanarama; nipea lologagara galava ikamam.
    Lord turwia, Ka ukeg kamam.

Nan o tatas nol, wa o mateawota nan; nan o ganganor, nan Satan wa sal lai wa rowo sur kamam; nan Nom o lologagara, wa nan o matea galava,
    Lord turwia, lav kamam.

Nan o loloqon; nan o nomliwoa, wa o nomrekereke, wa o togara galegale; nan o loloanu, wa o nustup, wa o lologona, wa nan o linai nol we sea nan o line tapeva,
    Lord turwia, lav kamam.

Nan o pakapaka wa o puge matea nol mulan; nan o galeve marama, wa o visogoi, wa i Satan,
    Lord turwia, lav kamam.

Nan valval line loloqon, wa nan o gagapalag nol tale silsiliga,
    Lord turwia, lav kamam.

Nan o vila, wa o lanvus wa o rir; nan o gopae, wa o gopae solorag wa o maro; nan o vagalo wa o vas nawono, wa nan o mate ganawono,
    Lord turwia, lav kamam.

Nan o vilewora, wa o pute goro pal, wa o rowovatur; nan o lea vatogoa galegale, wa o iloraka gap o lea we sea nan o lea nun, wa o salena; nan o toqe wasvat, wa o nom mataketake Nom o Vavae wa Nom o Lea vatogoa,
    Lord turwia, lav kamam.

MUN o vasasa we vagis wa we rono ilone Ko me Tanun; mun Nom o Wotava we rono wa o Teve vaglala Iniko; mun o Vasugrono Iniko, wa o Matirwora, wa o Gale ilo Ko,
    Lord turwia, vaesu kamam.

Mun o Qisanwono me rakutiko, wa o Lalaisnarama; mun Nom o Wolowolo, wa o Vivtig sage vulevule Ko; mun namateama o gene tun, wa o sale Ko; mun Nom o Tavaraka kel lenas, wa o Mule kale; wa mun o Vui we Rono me siwo ma,
    Lord turwia, vaesu kamam.

Alo ikamam we lolowono; alo ikamam we lolovatawasai alo qon mateamam, wa alo qon veveg kamam,
    Lord turwia, vaesu kamam.
 

LORD God, ikamam ira ganganor we tiasiko, Ka ronotag kamam; Ka riga goro Nom o Loglue we rono valvanua nan alo matesale taniniga;
    Lord turwia, kamam we tataro tias muniko, ronotag kamam.

Ka ge lolomaran ira Bishop tara Priest tara Deacon nan, neira gilala nun, wa neira menaro ape Nom o Vavae; wa neira gaganag lue mun nalinara wa mun nor o togara;
    Lord turwia, kamam we tataro tias muniko, ronotag kamam.

Ka vasoal mun o tanun anama, King GEORGE, nomam o moe maranaga, tarasei nol:we liwoa goro ikamam, neira uravag o sogov, wa o lolomaran, wa o menaro;
    Lord turwia, kamam we tataro tias muniko, ronotag kamam.

Ka vawia, Ka ilogoro ira Veveg; neira veveg taniniga, wa neira taur mana o nun;
    Lord turwia, kamam we tataro tias muniko, ronotag kamam.

Ka vawia, Ka ilogoro o sul anama nol;
    Lord turwia, kamam we tataro tias muniko, ronotag kamam.

Ka vasoal mun o vanua nan, neira pulpul, toga tamata, nom saratuwale;
    Lord turwia, kamam we tataro tias muniko, ronotag kamam.

Ka vasoal ma mun kamam a lolotape Ko, a lolomomogo Ko, a tataga lolotitin Nom o lea vatogoa nan;
    Lord turwia, kamam we tataro tias muniko, ronotag kamam.

Ka sogov tuan mun o sul anama nol, neira ronotag aperig, wa neira la tape matagesegese Nom o Vavae, wa neira uwa tataga o Vui;
    Lord turwia, kamam we tataro tias muniko, ronotag kamam.

Ka sapan kel ira leralera wa irasei i Satan me gale laira ti, neira nug kel ma ilo matesale nun;
    Lord turwia, kamam we tataro tias muniko, ronotag kamam.

Ka ge netenete irasei we tira; Ka ge masur wa Ka pirin ira lolo-varuarua; la raka kelura me mamasu ti; pura savrag i Satan ilalane ranomam;
    Lord turwia, kamam we tataro tias muniko, ronotag kamam.

Ka mule tuan rasei o mateawota nan me qalo seasea ineira; Ka pirin neira tete pirin kelura lai; Ka ge masur irasei we toga mamagarosa;
    Lord turwia, kamam we tataro tias muniko, ronotag kamam.

Ka ilogoro irasei we van to vanua, we gavagava alo maea, si we sua alo lama; wa o tavine nan wa tiana, wa ira gopae nan, wa ira nanatmera nan; Ka magarosa irasei me lav palura ti, si we toga alo ima rotrot nan;
    Lord turwia, kamam we tataro tias muniko, ronotag kamam,

Ka turgoro, Ka tokos o manua nan, wa ira ro naro nan, wa ineira nan we toga valmasale, wa we toga lopsag;
    Lord turwia, kamam we tataro tias muniko, ronotag kamam.

Ka magarosa o tanun nol;
    Lord turwia, kamam we tataro has muniko, ronotag kamam.

Ka nomvitag napugara tavalalea nomam, tara sei qe ge gap kamam, wa qe gosgosorag kamam; Ka wilris kel natoqara;
    Lord turwia, kamam we tataro tias muniko, ronotag kamam.

Ka vasoal gamam o sinaga ma, Ka ilogoro, si, kamam a is malakalaka alo tur vulara;
    Lord turwia, kamam we tataro tias muniko, ronotag kamam.

Ka vasoal ma mun kamam o nomleas nun; Ka nomvitag nomam o ganganor nan, wa o nomlilil, wa o mataqurega; Ka vasoal ma o sogov Vui we Rono anoma, kamam a wurvag nomam o togara tataga Nom o Vavae we Rono;
    Lord turwia, kanzam we tataro tias muniko, ronotag kamam.

Natun God, kamam we tataro tias muniko, ronotag kamam.
    Natun God, kamam we tataro tias muniko, ronotag kamam.

Lamb non God, i lareag napugan marama;
    Vasoal Nom o tamata ma mun kamam.

Lamb non God, i lareag napugan marama;
    Magarosa ikamam.

Christ, ronotag kamam.
    Christ, ronotag kamam.

Lord, magarosa ikamam.
    Lord, magarosa ikamam.

Christ, magarosa ikamam.
    Christ, magarosa ikamam.

Lord, magarosa ikamam.
    Lord, magarosa ikamam.

¶ Paso nan, i Priest tara sul amaia te vava o Tataro mon Lord
 

MAMA avunana, Nasasama ni Rono. Nom o marana ni mule ma. Nom o maros ni lai alalanana tama avunana. Le ma qarig mun kamam o sinaga we tira ape qarig. Ka nomvitag napugamam, tama ikamam we nomvitag napugara. Nipea ukeukeg kamam ilo galeva; Ka lav kamam nan o ganganor. Amen.

¶ I Priest.

Lord, nipea gage kamam we sar ape nomam o lerava naniko.
    Nipea sarsar mun kamam ape nomam o ganganor.

Inina tataro.

GOD, Mama i magarosa, Ka gate surtagtageag irasei we masorsor wa o atai we manoanoa, Ko we tinqoro ira lolowono we tataro muniko; Ka pirin magarosa ikamam we tataro muniko alo ikamam we toga masale wa we toga lopsag Ka tinqoro-alena ikamam, o gene we tatas nan i Satan si o tanun me vet si a ge ikamam nia a tagea ran: ikamam o tanun anama nan a toga wasawasa nan rasei we maros we ge iloilo ikamam, a varean vagae Iniko alo Loglue we rono anoma, mun Jesus Christ i Lord kamam. Amen.

Lord, tavaraka, pirin kamam, lav kamam nan o tavalalea o manigiu Nasasama.

GOD, kamam me tinqoro veta, ira tupumam me gaganag tapare ma mun kamam ape gagapalag nan we mava Ko me ge ti alo taranira, wa alo tau nan we tuai, neira gate wota tiqa.

Lord, tavaraka, pirin kamam, lav kamam nan o tavalalea o manigiu Nom o ronoga.

Log ronoga o Mama, wa o Natui: wa o Vui we Rono;
Tama we tuai, wa ilokenake: tete paso lai. Amen.

Christ, Ka tur goro ikamam nan nomam o tavalalea.
Ka sagarag magarosa ma avunamam we toga lopsag.

Ka sagarag magarosa ikamam we lolowono.
Ka nomvitag magarosa napugara o sul anama.

Ka tinqoro magarosa ikamam we tataro.
Natun David, magarosa ikamam.

Christ, Ka tinqoro ikamam ilokenake wa valqon.
Christ, Ka tinqoro magarosa ikamam; Lord Christ, Ka tinqoro magarosa ikamam.

Lord, Ka lue ma Nom o magarosa mun kamam.
Ape kamam we sov apeniko.

Inina tataro.

MAMA, ikamam we tias aperig Iniko, Ka sagarag magarosa ikamam we mageregere; Ka ge sipa nan kamam o gene nan we tatas we sar ape pugamam; wa Ka vasoal ma mun kamam si kamam a sov wa a matueg vunama magesema, i tur magarosa, alo ikamam we toga lopsag; wa ikamam a mawmawui vagae muniko mun o togara we rono wa we matartoga, naroroma wa nalenasima ni gao apena; mun Jesus Christ i Lord kamam, Ineia tuwale i Tinanai, i Tataro apen kamam. Amen.
 

O TATARO AMON S. CHRYSOSTOM.

GOD Turmana, Ko me sogov ma mun kamam si kamam nol a tataro saratuwale muniko ilokenake; wa Ko me ligog ti wa si o tanun nirua si nitol qe vug nonom nasasama, Ko to la o gene me tias apena; Lord, Ka ge qalo qarig nomam o maros, wa nomam o tataro to tira ape tur pirinimam; le ma mun kamam o lolomaran ape Nom o nun alo marama iloke, wa o esu galava alo marama iloneia. Amen.

2 Corinth 13. 14.

O SOGOV mon Lord kamam Jesus Christ, wa o tapeva mon God, wa o pulpul mon o Vui we Rono, toga amen kamam nol ti tuai ti tuai. Amen.
 

AO TUAN VAVAE TATARO NAN.

Apen i King.

GOD Turmana, Nom o marana ti galava, wa Nom o mana tete tingoro lai; Ka magarosa o Loglue nol; wa Ka manag goro natoqan i Rowrowovag iloraka anama GEORGE, nomam o Maranaga wa o Governor, si neia, mun o nonom ape neia i gagapalag anama, a la tinegaro si a nom mava wa si a ge ronoga Iniko: wa si kamam, wa ira gene anama nol, o manigiu Ko we managia, a gagapalag kokomag munia, a nom mava, wa, a manas goroa, alo Iniko wa o manigiu Iniko, tama Nom o Vavae wa nalinama we vareg apena; mun Jesus Christ i Lord kamam, Ni we esu wa we maranaga tuwale amaiko wa o Vui we Rono, God tuwale wora, o ulusui tagai. Amen.

Apen i Bishop.

MAMA Turmagarosa, kamam we tataro muniko, Ka lin siwo ma Nom o sogov tavunana avune tanun anama, . . . . . . ., i Bishop; wa Ka managia mun Nom o Vui we Rono, si ni manasag mantag lai Nom o Vavae, ni la o tinegaro ape vasosov, ape tiatias, wa ape gol vatanau mun o ronomalumuaga wa o lolomaran. Ka pirin mulan ineia si ni map o makaliu we wia mun rasei we nomtup, mun o vavae, mun o togara, mun o tapeva, mun o nomtup wa mun o toqai we matartoga wa we wenewene; wa alo ni me gagapalag mantag paso, Ka ge si ni lav alo paspasoane qon o vilvilqat pe taniniga me taurmate munia amen i Lord i Veveg we taniniga, Ineia nave we esu wa we maranaga, God tuwale wora, amen o Mama wa o Vui we Rono, o marama o ulusui tagai. Amen.

Apen ra Tasinina avune Akanina.

LORD Jesus Christ, we tuai Ko me varavara avune qilo to Galilee we ge taro kel o rep nan tapena, wa me vantak wasawasa ira tinqoro nan anama ilo ruruna neira we sua aia; kamam we tins aperig Iniko si Ka vawia ra tasimam we togatoga avune akamam, Ka vareg ira angel anama neira kokomatag gorora alo matesalara nan; Ka vilit mor o gagapalag ape we manasag Nom o Lea we wia alo vanua mot nan, wa Ka ge tira momam o tataro nan ape neira si neira a toga wasawasa alo nor o vanoga nan, si kamam a log ronoga nasasama apena, Ko we esu wa we maranaga tuwale men o Mama wa o Vui we Rono, God tuwale ran ti tuai ti tuai. Amen.

Si iloke.

GOD Turmana, Ko me tin wa qale ilogoro o lama, wa o lan, wa o vila: Ka ilogoro i Bishop tarasei we suasua amaia. Ka gatogoro o lanvus wa o rep wa vus qalo ineira. Ka vaesura nan o av, wa o vila; wa nan o aka wa pute avawo vat; wa nan neira we va suar o gopae wa o mateawota nan tea. (Ka tur gorora alo ineira we sua i salilina alo vanua nan we loloqon, nan rasei wa venevene ineira, si nan wa gol gap amaira.) Ka ge qalo nor o maros, Ka manag nor o vavae, ira loloqon tara sul nol a ronotag Nom o roro lea we wia. Ka lav kel wasawasa ineira mulan ma, si kamam nol a vug saratuwale mulan mun o varean vagae Iniko; mun Lord kamam i Jesus Christ. Amen.

Ape Gagapalag nol a Melanesia.

GOD Turmana, o vanua mot nan ti nernerei Iniko, Ka suware sur ma Nom o vawia ivunan i Bishop tara Ilogoro nol alo gagapalag iloke a Melanesia, wa ivunarasei nol we vatvatogo wa we tintinqoro alo school nan tapena, si kamam a manasag nasasama a marama, naesuma amera sul nan. Ka ge masur kamam, Lord, alo kamam ti lolowono; Ka tur goro kamam alo kamam ti tatu goro o mateawota; Ka varagai kamam alo val meregaleva, wa Ka ukeg mun kamam o lolomatmatueg avunama, si kamam a gagapalag apesov muniko. Lord, Tag-gorogoro, Ka vatran ma ira mawmawuitag anama ilo Nom o gorogoro; Ka ave mun Nom o Vui we Rono irasei namatevura we sartag o gagapalag iloke, si neira a ukeg kelura matapura muniko, wa Ka managira si a manasag lue nalenasima; mun Jesus Christ i Lord kamam. Amen.

Apen ra Meratape we asau.

LORD God kamam, Ko we toga valval, o vanua wa o lama tete vilewora lai kamam naniko. Kamam we gilala si rasei we toga asau nan rasogora gale goara amaiko. O manigiu o ine kamam we tiasiko si Ka kokor goro ra meratape anamam we vilewora nan kamam ilokenake. Sa si kamam tara pulsalamam alo we rasu peteniko a varpeten momam tamaine, me nit tuwale gina mun o ga-tapeva anoma alo line pulpul mun o Vui, o pulpul turwia nora rono anama.
    Tamaine, si kamam a varilo kel mulan iake alo marama iloke, si tagai (tama we wia alo nagoma, Maranaga galava), kamam a varilo ran alo tavaraka kel nora taniniga, wa a van pata saratuwale ilo imama ti galava, o nin we tar alolona, Ko me ge taurmate mun rasei we tape vatawasai Iniko; mun Jesus Christ i Lord kamam. Amen.

Apen rasei we sike o Vasugrono.

GOD Turmana, Turmagarosa, Ko me qeteg o Vasugrono mun Jesus Christ Natuma si a vasugvitag ganganor nia, wa si a waka o mategeare esu nia munrasei qe nomleas nun wa we taur nomtup Nom o Lea. Ka tinqoro magarosa ikamam apen ra tasimam, . . . . . . , we sike ilokenake si a van suriko mun o Pei wa o Vui we Rono, Ka vasoal ma muneira o Vui we Rono nane, Ni ge wota mulan ineira nan o matevui gate wia ilone, neira me wotavag ti, wa nan o ganganor nol.
    Ka pirinira neira vatavata mantag muniko ape neira to irvitag i Satan wa non o gagapalag nol, wa o marama wa o visogoi; ape nomtup nalinan Christ, wa ape matagisgis goro Nom o Lea vatran.
    Ka ge taurmate neira si a la kokomatag o Sacrament iloko mun o nomleas, wa mun o nomtup: neira qara soesoen Christ, qara mereima, qara nat marana tavunana; mun Jesus Christ i Lord i Vaesumam. Amen.
 

Apen rasei we sike o Varagai.

MAMA Turmagarosa, kamam we tataro muniko apen ra tasimam, . . . . . ,  Ko me vaesura ti mun o Vasugrono, wa me ave nalolora ilokenake si a sike o tur piriniva tavunana mun o Varagai. Ka ge neira si neira a nomleas nun, a nomtup maremare; o Vui we Rono Ni siwo ma avunana, Ni varagaira neira a toga ra tanun anama val qonira wa ilo Esu galava. Kamam we tataro tamaike mun Jesus Christ i Lord kamam. Amen.

Alo we ronovivtig ape Maro.

LORD, Ka magarosa ikamam we toga mamagarosa ape maro liwoa me qalo kamam; Ka vatran ma mun kamam o sinaga we sar ape turiamam, si kamam a gagapalag mantag lai nalinama we rono; mun Jesus Christ i Lord kamam. Amen.

Si o sul anan Christ a nom saratuwale.

LORD Jesus Christ, Ko me vava munra Sala we rono anama wa, O Tamata Nau we le at mun kamiu, Mole o Tamata Nau we ukeg mun kamiu. Nipea nonomkel ape pugamam, panava ape Nom o Loglue we nomtup, wa Ka le at mun kamam o Tamata wa o pultuwale tama Ko we maros; Ko we esu we maranaga amen o Mama wa o Vui we Rono, God tuwale ran; ti tuai ti tuai. Amen.

Ape Tamata a Marama.

GOD Turmana, i qeteg nonomie nun wa o nonomie tamata: Ka tiu alo lolora tanun nan o tur marosiva o line tamata; wa Ka ave mun Nom o Vui we Rono we matanur irasei we ave wa we tursalemoa o veve sul nan a marama; si Nom o marana a taso vag o taniniga wa o lolowia, o marama gai ura vag o gilaglala Nom o tapeva; mun Jesus Christ i Lord kamam. Amen.

Ape Wena.

GOD Turmana, Ko me tin wa Ko gale ilogoro o marama nol wa o gene nan alolona; Ka magarosa ikamam, ape marou me qalo ikamam; Ka vasoal ma o wena, o sinaga ni lul apena, wa ikamam a varean malakalaka nasasama we rono; mun Jesus Christ i Lord kamam. Amen.

Ape Loa.

GOD Turmana, Ko me tin wa Ko qale ilogoro o marama nol wa o gene nan alolona; Ka magarosa ikamam, ape wena gilgil valqon me qalo kamam; Ka vasoal ma o loa, o sinaga ni lul apena, wa ikamam a varean malakalaka nasasama we rono; mun Jesus Christ i Lord kamam. Amen.

Ale we gopagopa.

GOD Turmana, Ko me liwoa goro o esu wa o matea; kamam we gaganag lue muniko ape pugamam, wa ape Ko we meregale ikamam ilokenake we sar ape pugamam. Wa ikamam we tataro muniko, mun o nonom vagae ape matevuma we magarosa lava. Lord, Ko to maros, Ka lareag nan kamam o gopae iloke; Lord, vaesu in, gopae; wa Ka gatogoro o gopae nan rasei qale wia; la kel mulan ma o toga esu, wa o toga malakalaka; si kamam a nomtup Iniko, wa a marosiko nan amoa, mun o log ronoga vagae nasasama; mun Jesus Christ i Lord, i Vaesumam. Amen.

Ape neira, te tanovira val vanua nan mun Deacon wa mun Priest.

GOD Turmana, Mama avunana, Ko me tun o Loglue valvanua nan a marama mun napulama mun o moe gene tun nanaran Natuma o meratape: Ka ilo magarosa ma Nom o Loglue; wa ilokenake Ka ave wa Ka mana nalolora tanun nan anama o Bishop nan, ira Altag goro pulam o sheep nan, nan neira wa tanov savsavawora isei, nava ineira a iloraka menaro irasei we sar ape gagapalag o linai we rono alo Nom o Loglue. Wa Ka vasoal Nom o sogov tavunana murasei te tanovira ape val gagapalag; neira ge nanalue nalenasima mun nor o togara, wa mun nor o vavae vatogo, wa ineira pirin o tanun nan, si ineira la mora o esu; mun Jesus Christ i Lord kamam. Amen.

Si iloke.

GOD Turmana, Ko we la ma mun kamam o gene nan we wia: Ko me iloraka Nom o Loglue mun o qeteg tano gagapalag we seasea alolona; kamam we tias aperig Iniko, Ka vasoal Nom o sogov murasei nol Ko me log raka veta ineira si neira gagapalag o linai we rono alo Loglue. Ka ge ineira a lolomaran mantag ape Nom o lea we nun, neira toga asasau ran nan o ganganor nol, si neira gagapalag nun alo nagoma, nasasama we mava ni lenas, wa Nom o Loglue we rono ni wia apena; mun Jesus Christ i Lord kamam. Amen.

Ape ra tasinina we toga amairasei avea avea.

GOD Turmana, Ka ilogoro o tanun anama nan, Ko me log raka ineira, si neira gagapalag Nom o lea amaira a . . . . .  Ka pirin vagae ineira mun o Vui we Rono, neira Iolomaran morn ape Nom o vavae, wa ineira tataga tasovule apena; Ka tuanira, neira vatogo mantag o sul nol, wa ineira rapai nor o vavae mun o togara we sasarita apena. Ka ilogorora nan o gopae, wa nan o mateawota nan tea. Ka manag mor o gagapalag nol, nasasama ni gao apena; mun Jesus Christ i Lord kamam. Amen.

Apen ra Loloqon.

GOD Turmana, Ka magarosa iragai nan qale loloqon naniko, qale toga alo silsiliga, wa alo malumalu matea. Ka suware at o Vui we Rono, Ni gagapalag maremare alo togara, neira ilo vaglala ape nor o ganganor, neira ronotag nomtup o vavae apen Jesus i Vaesu, neira taur malakalaka o lea we garaqa we tira ape esu galava; mun Jesus Christ i Lord kamam. Amen.
 

Si iloke.

LORD Jesus Christ, Ko me vatran ra Salama we Rono si a manasag o Lea we wia mun o val sul; kamam we tiasiko si Ka vawia o val gagapalag tape Nom o Loglue amaira loloqon: Ka ukeg mun rasei we toga apena val sava tea we wia ape tur pirinira, wa Ka ge si nor o gagapalag nol a vagisgis; Ka tigoro, Ka ave, wa Ka vawia ira tanun gagapalag nol Ko me suwarera at si a gagapalag val vanua; wa Ka suware pirin ma irasei mulan we tira apena, si irasei we matemate alo ganganor a taur mora o esu, si Nom o ronoga te liwoa apena a marama; Ko we esu amen o Mama wa o Vui we Rono, God tuwale, ti tuai ti tuai. Amen.

Ape Vanuanina.

GOD Turmana, Ka sagarag lolowia ikamam we vug tuwale iake. Ka ilogoro o vanua iloke nan o gopae, wa o maro, wa o av, wa o lanvus, wa o rir, wa o mateawota nan. Wa o moe gene, Ka pirin kamam nol, si o tuaniu a vatogo mantag, wa o tuaniu a ronotag mantag; wa ikamam nol a toga mantag, mun o varean Iniko ape Ko me ge lolomaran veta ikamam, wa mun o nonom vagae ape neira tale vanuamam qale toga loloqon; mun Jesus Christ i Lord kamam. Amen.

O Tataro ape val matev Tanun nol.

GOD, Ko me tin wa qale ilogoro o tanun nan, kamam we tias nompepewu Iniko ape val matev tanun nol; si Ka gaganag lue namatesalama muneira, wa naesuma mun o sul man. [Wa ikamam we tataro raka sage ape neira talo vanua nan qale toga loloqon.] Wa o moe gene, kamam we tataro ape togare Loglue nol a marama, ni wia; Nom o Vui we wia Ni avea wa Ni mana goroa, sin lav irasei we vet si neira ra Christ ilo matesale nun, neira taur o nomtup mun o nom saratuwale, wa mun o ga-tamata, wa mun o togara we taniniga. Wa kamam we tataro muniko, Mama turwia, apen ra lolowono, tara gopae, wa ira mamagarosa; [wa kamam we tataro raka sage apen . . . . . . . we gopa iake amen kamam,] amoma te go masur wa te tuan seasea ineira ape gene nan me qalo valura, ineira toga sov alo tine gopae, wa ineira rowolue wasawasa anaisa nan nor o togara mamagarosa tea. Kamam we tataro tamaike, o manigiu i Jesus Christ. Amen.

Sunday.

GOD Turmana, kamam we vareaniko apen Jesus Christ me tavaraka kel nan o maea tama anaqarig, wa ape Vui we Rono me siwo taqai ma avunara Sala tama anaqarig mulan.
    Wa ikamam we tataro muniko ape matean Jesus, Ni ge mate o ganganor nan kamam; wa ape Non o tavaraka, Ni ge tavaraka kamam si a toga garaqa. Wa ikamam we tataro muniko ape Vui we Rono, Ni goara galava alo ikamam, Ni ge ilo vaglala ikamam ape ganganor, kamam a nomleas apena; wa Ni ge ilo vaglala kamam apen i Jesus i Taniniga, kamam a nomtupua; wa Ni ge ilo vaglala kamam ape me veveg i Satan, si kamam a lalakete lai nania; kamam a tataga tasovule ape togare vui iake alalanana, wa alo qon veveg, a tavaraka suar o esu galava; mun Jesus Christ i Lord kamam. Amen.

Monday.

MAMA Turmana, Ka ge kamam a nomtup i Natuma i Jesus Christ me wota amen o Tur Qilowar, si a ge wota mulan kamam nan o ganganor, wan an o matea galava, Ka ge kamam me taur veta o Vasugrono, kamam qale goara tasovule we sar ape ra soesoen Christ, wa ira mermereima, wa ira nat marana tavunana; kamam a mule taniniga alo matesale Lea Vatogoa anoma, tete sipa nan, tete tutuag, nava a mule taniniga gese; mun Jesus Christ i Tur taniniga, me mate apen kamam, wa me tavaraka kel, wa me mule kalo kel, qale pute galava alo matuama, i Vaesumam, i Lord kamam. Amen.

Tuesday.

GOD Turmana, Ko me valawar o sul me toga loloqon mun Jesus Christ, i tur marmararan; Ka ara o siliga nan natoqamam mun Nom o Vavae, wa mun Nom o Vui; Ka sinar iragai talo anuamam mun o marmararan tape esu galava; neira ilo vaglala ape nor o ganganor o loloqon Iniko; neira nomtup i Jesus i Vaesumam nol; neira la mora o line tapeva wa o tamata; o vagalo wa o togara loloqon a pea ran nan neira neira qet ma suriko mun o nomleas wa o nomtup, wa o tataga tinegaro ape Nom o Lea; mun Jesus Christ i Lord kamam. Amen.

Wednesday.

LORD Jesus! Ka ge kamam a nomkel vagae ape Ko me tanun worawora apen kamam, wa me toga mamagarosa wa me ukeg keluko ilo panen i maniriniko, wa ilo panera ganganor me vatvatowoliniko, wa me towosiko, wa me ge mateiko. Lord, Ka ge kamam a tape lava Iniko mun o nomkel ape Ko me ronovivtig tamaine, o manigiu kamam a rowolue kel nan Satan wa o matea galava nia. Wa Ka ge kamam a tataga namakalima we wia, kamam tete golgol amensei, tete nornor ape pug talo we tuai, tete nusnustip o tavalalea; nava kamam a toga tapeto, toga rorono gese; tama Iniko me ge moma ti, kamam a mule nonom namatevuma we lolowia aneane, mun o maros lava o pul galava amaiko avunana, Ko we toga aia amen o Mama wa o Vui we Rono, God tuwale, ti tuai ti tuai. Amen.

Thursday.

LORD Jesus! Ko me mule kalo kel ivunana, Ko we pute galava alo matuan God o Mama; Ka ave kalo nalolomam a nonom vagae ape gene nan amaiko tavunana, a mule nonom malakalaka o togara lenas amaiko anaisa; nan Iniko gina me tunkel kamam nan o matea, wa Ko me la ma mun kamam o esu galava; wa kamam we logwia Iniko, wa o mama, wa o Vui we Rono, God tuwale, ti tuai ti tuai. Amen.

LORD, Ko we liwoa goro o savasava nan avunana wa alalanana; Ka wurvag taurmate mun kamam, ira tinqoroko, o vanua we wia avunana, tama Ko me ligog ti apena, kamam a toga galava anaisa amiko aia, mun o log ronoga vagae Iniko wa o Mama wa o Vui we Rono, God tuwale, ti tuai ti tuai. Amen.

Friday.

GOD Turmagarosa, ka ge kamam a nom apesov ape Ko me ukeg i Jesus Christ, sin mate tama qarig apen kamam, sin lareag o ganganor nan kamam we nomtupua; sin tun mum kamam o tavaraka ken nan o matea, wa o esu galava. Mama, Ka pirin kamam mun Nom o Vui, kamam a nomkel vagae ape Nom o magarosa we lava; kamam a tape tinegaro Iniko, a kokor mantag Nom o Lea; mun Jesus Christ, i gagapalag sar apen kamam, i Vaesumam, i Tinanai, i Matewol kamam, pa me tavaraka kel, wa me mule kalo kel, wa we toga amaiko wa o Vui we Rono, God tuwale, ti tuai ti tuai. Amen.

Saturday.

LORD Jesus! Ko me tate apen kamam, wa naturiama me risa alo qurana, wa naatama me toga a Paradise, amen naatara o sul me nomtup we tuai ape Ko te wota ma, wa Ko te mana o matea. Ka tavig tagea nan kamam nomam o ganganor; Ka ge ikamam a toga kokomatag iake mun o nonom vagae ape qon mateamam, wa ape qon ilone Ko te veveg kamam nol alolona; wa alo kamam te toa nan o marama iloke, Ka lav naatamam a toga galtag, a toga mapsag amaiko a Paradise; wa alo paspasoane qon Ka sar goro naatamam mun o turiai Vui me ris matev lenas nia, tete naru mulan, kamam a mule kalo suriko, a toga galava abunana amaiko wa o Mama, wa o Vui we Rono, God tuwale, ti tuai ti tuai. Amen.

MAMA Turmagarosa! Ko me ilogoro mantag kamam me nina mulan o ulus masao qon lavearua. Ka ge kamam a nunug kel ape nomam o togara, a nomleas ape pugamam, a ge taurmate ilo natoqamam, si a vasosov kel kamam, kamam mule togtogoa, mule matagoro alo matesalama, a nina anaisa o tano mapsag amaiko avunana; mun Jesus Christ i Lord kamam. Amen.
 

O TUAN VAVAE VAREAN.

Alo isei qe maros we varean God ape lava piriniva tea.

GOD Turmana, Mama Turmagarosa, ikamam ira tanun nazi anama gate sar, pa kamam we varean nompepewu, wa we varean tinegaro Iniko, ape Ko we lolowia wa we lolotape kamam wa o tanun nan; [wa ape Ko me ilogoro wasawasa ineira iake we maros we vareaniko apena.] Kamam we wievavaeko apeniko me tin kamam, wa we ilogoro ikamam, wa we le ma mun kamam o gene nan we tira ape togara iake. Wa ikamam we wievavaeko raka sage, ape Ko me tunkel a marama, o manigiu Nom o lolotape we poa aneane, mun Lord kamam Jesus Christ; wa ape Ko me qeteg o tuan linai kamam to la Nom o sogov nia; wa apen kamam we toga nerei o togara lenas anaisa.
Wa ikamam we tiasiko, Ka vasoal ma mun kamam, a gilala wurvag ape Nom o matev lolowia nol; natoqamam a varean nun Iniko, kamam tete manasag naroroma mun nanusumam vires, panava mun nomarn o togara gina; kamam a maros matapumam o mawmawui muniko, kamam a mule rono, mule taniniga alo nagoma valqonimam; mun Jesus Christ i Lord kamam, kamam we nom mava we log lenas Ineia wa Iniko wa o Vui we Rono, o ulusui tagai. Amen.

Ape Wena.

GOD, Mama avunana, namoma we vareg sogov ma o wena si o tano ni ukeg ma o sinaga gar o tanun nan; kamam we varean nompepewu Iniko ape Ko me lolowia ikamam alo maran raravea iloke, wa me varean ma avune Nom o marana o wena, kamam we qaraqara apena, wa me ge mulemule o tano me mamasaiga ti, kamam ira tanun anama nan gate sar pa we lolomasur apena, wa nasasama we rono we ronoga apena; o manigiu Nom o lolomagarosa alo Jesus Christ i Lord kamam. Amen.

Ape Loa.

LORD, Ko me sar ti mun kamam wa me ge sur siwo kamam mun o wena wa o pei nan me gege segao kamam, pa ilokenake Ko me magarosa ikamam wa me ge mot o wena, nalolomam we masur apena; kamam we log ronoga nasasama we rono ape Nom o magarosa iloke, wa to manasag lue Nom o lolotapetape val taraniu nan; mun Jesus Christ i Lord kamam. Amen.

Ape we vaesu nina nan o Gopae Solorag.

LORD God, Ko me gege kamam o manigiu napugamam, wa me gol vatanau kamam ape momam o tamtames nan, mun o gopae solorag ilone me qalo ikamam ti; wa ilokenake alo we veveg qalo, Ko me magarosa ikamam wa Ko me vaesu kamam nan o matea; kamam we ukeg kamam suriko, Mama lolomagarosa, naatamam wa naturiamam Ko me vaesu ti, o oloolo we esu; wa ikamam we varean vagae wa we ge ronoga Nom o matev magarosa alo vatitne Loglue anoma; mun Jesus Christ i Lord kamam. Amen.

Ape me vagaus ma o Loglue.

MAMA Turmagarosa, kamam we varean aneane Iniko ape Ko me gigir vasosov Nom o Loglue si a manasag matakalava Nom o Lea we wia amaira val sul nan; kamam we vareaniko apen rasei me rowolue si a rowrowovag muniko alo vanua nan we toga aras, wa ape Nom o vawia valenalena avawo mor o gagapalag nan; kamam we wievavaeko apen rasei val vanua me nomtupuko o manigiu nor o vavae manmansag; ape neira me valakas lai tamaine o line vatogo nanoma alo savasava nan; wa o manigiu ira vatvatogo wa ira gagapalag nan amaira tagvanuara iloke me manasag mora Nom o vavae esu; ikamam we vawia nasasama we rono apenra rowrowovag nan anama gate nom mava ran tea naesura pa me toga kokomag gai mate we manmanasag Nom o Lea si neira a ge paso vunvun malakalaka mor o muleva; wa ikamam we tiasiko si Ka ukeg mun kamam Nom o sogov, si kamam a tataga lai namakalira we wia, kamam a pul tuwale anaisa alo marana anoma avunana; mun Jesus Christ i Lord kamam. Amen.

Ape qon nan nina we nonomkel apensei i tasinina me mate ti alolona.

LORD, kamam we vareaniko ape tasimam iloke, . . . . . . . we toa veta nan o marama iloke we sagesaru; Ka nomvitag napugana nol, wa Ka lav ineia, wa ikamam, ilo Esu galava; mun Jesus Christ, i Tinanai, i Tataro apen kamam. Amen.