O LINAI APE
GANAGANA RAVRAV MON LORD,
SI
O PULTUWALE WE RONO.

¶ Si irasei qe maros we la mora o Ganarono, neira gaganag moai ran apena mun i Gagapalag.

¶ Si isei qe toga kiskislag, wa si isei qe linasapur isei, wa si isei qe ge tatas isei, wa ni to tete nomleas apena, i Gagapalag ni gatogoroa nan ni wa la savsavawora o Ganarono.

¶ O sul a vatieqau goro, wa i Gagapalag ni tira, ni vava wa,
 

MAMA avunana, Nasasama ni Rono. Nom o marana ni mule ma. Nom o maros ni lai alalanana tama avunana. Le ma qarig mun kamam o sinaga we tira ape qarig. Ka nomvitag napugamam, tama ikamam we nomvitag napugara. Nipea ukeukeg kamam ilo galeva; Ka lav kamam nan o ganganor. Amen
 

GOD Turmana, o toqai nan we tawala goro nanagoma; Ko we gilala nomam o maros nol; isei tete linarag lai non o nonom rorono naniko; ge matartoga o nonomia nan talo toqamam mun Ko we mapsag ma Nom o Vui we Rono; kamam a tur tape Iniko, a log mava nasasama we rono; mun Christ i Lord kamam. Amen.
 

¶ Nan i Gagapalag tai ate ris sur o sul, ni vava wa,

GOD me log o vavae nan iloke, ti vet wa; Inau i Lord God iniko: nipea nononom apen God we sea nan Nau tuwale.
    Lord, magarosa ikamam; Ka ave natoqamam a kokor o lea vatogoa iloke.
    Nipea tototo moma o totogale, wa o tarape savasava alo tuka avunana, wa alo tano alalanana, wa alo lama ape kerei. Nipea taqtaqalon gorora wa nipea momomogora; ape Nau i Lord God iniko, God we matagisgisgoro o gene we tire ape Nau, Nau we ge kata napugara tamara avunara nature, gai nina o taraniu o vatoliu wa o vavatiu we nustup Inau; wa Nau we magarosa ineira tar we tape Inau, we kokor mok o lea vatogoa nan.
    Lord, magarosa ikamam; Ka ave natoqamam a kokor o lea vatogoa iloke.
    Nipea loglog savsavawora nasasan Lord God iniko; apen i Lord tete veveg-esu isei qe log savsavawora nasasana.
    Lord, magarosa ikamam; Ka ave natoqamam a kokor o lea vatogoa iloke.
    Ka nonom ape Qon Mapsag si a vatapua. O qon laveatea ka mawmawui, ka ge mom o gagapalag nol alolora; wa o qon laveruai o Qon Mapsag mun i Lord God iniko; nipea gege mom o gagapalag alolona, iniko, wa i natuma o mereata we o vavine, wa i gene wol anama o mereata wa o vavine, o qoe napulama, wa o salavano alo mategeara anoma. Wa o qon laveatea i Lord me tin o vunana wa o lalanana, wa o lama, wa o ronronotar nan alolora, wa o qon laveruai Ni me mapsagia alolona: wa o manigiu o ine i Lord me vawia o qon laveruai, Ni me vatapua.
    Lord, magarosa ikamam; Ka ave natoqamam a kokor o lea vatogoa iloke.
    Ida nom mava i tamama tana ravevema, si a ge qoqo naqonima alo vanua i Lord God iniko we la at muniko.
    Lord, magarosa ikamam; Ka ave natoqamam a kokor o lea vatogoa iloke.
    Nipea vusvus nawono o tanun.
    Lord, magarosa ikamam; Ka ave natoqamam a kokor o lea vatogoa iloke.
    Nipea pakapaka.
    Lord, magarosa ikamam; Ka ave natoqamam a kokor o lea vatogoa iloke.
    Nipea palpal.
    Lord, magarosa ikamam; Ka ave natoqamam a kokor o lea vatogoa iloke.
    Nipea gosorag natagvanuama.
Lord, magarosa ikamam; Ka ave natoqamam a kokor o lea vatogoa iloke.
    Nipea ararike ape iman tagvanuama; nipea ararike apen rasoan tagvanuama, wa i gene wol anana o mereata wa o vavine, wa o qoe napulana, wa o savasava nan anona.
    Lord, magarosa ikamam; wa ikamam we tataro muniko, Ka rave siwo Nom o lea vatogoa nan iloke ilo togamam.

[ ¶ Nan si i Gagapalag ta maros, leas o Lea Vatran sanavul, ni te vava qatutui lai tamaike wa,

I LORD inina i Jesus Christ we vava wa, Ka ronotag, Israel; i Lord God inina i Lord tuwale wora. Wa ko te tape i Lord God iniko mun natoqama nol, wa mun naatama nol, wa mun nom o nonomia nol, wa mun nom o tinegaro nol. Iloke o lea o moai nake. Wa o varuei we sasarita apena iloke, Ko te tape i tagvanuama tama iniko kel. Itagai mulan o lea vatran we liwoa nan rara iloke. O Lea nol wa ira Prophet we tako gese ape vavae vatran iloke nirua.
    Lord, magarosa ikamam; Ka ave natoqamam a kokor o lea vatogoa iloke.]

¶ Paso nan ti vava wa,

Inina tataro.

¶ Paso nan ti vasvasogo o Collect wa o takele vavae nirua talo Raverave we rono we tira valval ape Qonnan tape tau; wa alo te vasogo o takele Lea we wia o sul nol te tira raka.

¶ Nan o sul nol ti qale tira, ti vava saratuwale wa,
 

NAU we nomtup God tuwale o Mama Turmana, i Tin o vunana wa o lalanana, wa o gene nan inina we ilo wa o gene nan nina gate ilo.
    Wa i Lord tuwale i Jesus Christ, Natun God wotuwale, Natun Tamana moai ma nan o marama nan; God ma nan God; Maran ma nan Maran; Tur God ma nan Tur God Natun God, gate i gene tin; Rara Tamana o matevui tuwale Me tin o gene nan munia.
    Ni me siwo ma vunana apenina o tanun nan sin vaesu inina; Me wune Ineia mon o Vui we Rono amen o tur Qilowar Mary; Ni me tanun; neira me vatakaua vawo wolowolo apenina lalanan Pontius Pilate; me ronovivtig; me saloa. Alo qon vatoliu Ni me tavaraka kel tama me rave ti; Ni me mule kalo ivunana; Ni we pute alo matuan o Mama. Ni te mule ronoga mulan ma sin veveg ira we esu wa ira me mate veta; Non o marana tete paso lai.
    Nau we nomtup o Vui we Rono; i Lord wa i Vaasa; we rowolue ma nan o Mama wa o Natui; nina we momogo we log-ronoga tuwale Ineia wa o Mama wa o Natui; Ni me vava munra Prophet nan.
   Nau we nomtup o Loglue tuwale val vanua nan nora Sala. Nau we gaganag lue o Vasugrono tuwale ape nomvitag pugai. Nau we toga nerei o ge tavaraka ira mate; wa o esu alo marama te mule ma. Amen.

¶ Nan isei ni taur o alena namora sul, wa i Gagapalag ni vava wa,
 

NOMIU o marmararan ni valawar alo nagora tanun nan si neira a ilo mora momiu o gagapalag we wia, wa a ge ronoga i Tamamiu avunana apena. S. Mat. 5. 16.
    Turpea sogsogon tuwale nomiu o moegene nan alo tano, o rupe wa o waliai te gana mosiu aia, wa o tanun pal we tike sau wa we palu. Pa tur sogon tuwale nomiu o moegene nan avunana, o rupe wa o waliai tete gana mosiu aia, wa o tanun pal tete tike sau, tete palu. S. Mat. 6. 19, 20.
    O val savasava nan kamiu we maros o tanun nan neira ge mun kamiu, tur ge momiu tamaine muneira; ape o ike nake o Lea wa ira Prophet nan. S. Mat. 7. 12.
    Gate val tanun we vetvet munau wa, Lord, Lord, pa te kalo pata lai ilo marana tavunana; nava isei qe ge o maros non Tamak we toga avunana. S. Mat. 7. 21.
    Zacchaeus we tira we vava mun i Lord wa, Ilo, Lord, natavala pulak na we le mun ra masara, wa si na me taur mok som ti ape tila galegale, na we la kel vagavat. S. Luke 19. 8.
    I gene we savur matamotmot o sivui te gorogoro matamotmot mulan; wa i gene we savur alena te gorogoro mulan we alena. Val tanun ni ge tama ni me nom mot veta ti alo toqana apena; nipea tama viviris, si ape me vet ran munia apena; ape God we maros i gene we le mun o nago maskara. 2 Cor. 9. 6, 7.
    I gene we togo tinqoro ni taur pul amen i gene we vatogoa alo savasava nan we wia. Turpea leralera, tete poroporo lai tea God. O manigiu o tanun qe riv siwo o sava, pa ni te gorogoro mulan ilone. Gal. 6. 6, 7.
    Si isei o savasava nan talo marama iloke amaia, wa ni qe matarag i tasina we toga lopsag, pa ni ta ge wonowono natoqana nania, o tape God te toga gaseinia alo ineia? 1 S. John 3. 17.
    Isei qe magarosa o tanun masara, we le galtag mun i Lord; wa te wono kel munia o gene ni me tirag matapuna ti. Vavae Tenegag nan 19. 17.

¶ I Gagapalag te map kalo o som me vile sargag wa o Bread wa o Wine tama we sasarita ape Ganarono, qara vava si,
 

Inina tataro ape Loglue nol anan i Christ qale vagalo iake alalanana.

GOD Turmana, Tur esu galava, Ko me vatran kamam mun na Salama we rono, si kamam a tataro, a logwia Iniko ape tanun nan; kamam we tias aperig Iniko, Ka lav vasgot nomam o [alena wa o] oloolo, wa Ka lav magarosa nomam o tataro; Ka mapsag Nom o Vui we nun ilo Loglue nol anoma, ni pul tuwale, ni vasarawag gegese. Ka ge ira loglog nasasama we rono, neira mawui nol ape Nom o vavae we nun, tete varleasag apena, neira toga pulpul, vartapetape gese. Kamam we tias Iniko, Ka tuan magarosa goro o tanun anama, GEORGE, nomam o King, irasei we liwoa goro ikamam alo sasana, wa ra maranaga nol me taur veta nalinan Christ, neira vatvatran mantag o tanun nan talo vanuara, neira pirin irasei we wia, wa neira gol vatanau ira ganganor.
    Mama avunana, Ka sogov mun ira Bishop nan wa ira Gagapalag Nom o Lea, neira manasag mantag, wa neira tataga Nom o Vavae, neira gagapalag Nom o Sacrament we rono tama Ko me vatran ti. Ka vasoal mun o sul anama nol, wa muneira iake, Nom o sogov tavunana, neira tinqoro aperig, neira taur nompepewu Nom o Vavae we rono; neira toga rono, toga taniniga goro nanagoma val taura.
    Wa ikamam we tias momogoko, Lord, Ka ge masur, Ka tuan irasei we toga lopsag, lolowono, malinsala, gopagopa, mamagarosa . . . . .
    Wa ikamam we logwia nasasama we rono o manigiu o tanun anama nan me tea veta nan o marama iloke mun o nomtupmomogoko . . . . . ; Ka ge ikamam a tataga namakalira we wia, kamam a pul tuwale anaisa alo marana anoma avunana. Vasoal ma o ike nan, Mama, mun Jesus Christ, i Tinanai, i Tataro apen kamam. Amen.

¶ Paso nan i Priest te ate ris sur o sul, te vava mun rasei we maros we la mora o Pultuwale we Rono, wa,

SI kam qe nomleas mantag aneane ape pugamiu; si qe toga lolotape gese amen o tanun nan; si qe maros nun we wurvag nalinamiu, we tataga ape lea vatogoa nan mon God, we mule nan ilokenake alo matesalama we rono; Tur mule nomtup ma; tur la momiu o Sacrament we rono iloke ape varagai kamiu; tur vavaulul apemaragai napugamiu mun God Turmana, mun o vatieqau goroa.

¶ Nan o sul gale vatieqau, a vava saratuwale amen i Gagapalag wa,
 

GOD Turmana, Taman Lord kamam Jesus Christ, Tin gene nan, Veveg tanun nan; kamam we gaganag lue, me wonot kamam ape ganganor wa ape gagagalag kiskislag we tar, kamam me ge wasmata vagaqoqo goro nalenasima, God, mun o nonomia nan, wa mun o vavae nan, wa mun nomam o gagapalag; kamam me vasosoviko Ko te gol, wa Ko te lologagara ikamam apena.
    Kamam we nomleas aneane, kamam we lolowono mantag ape momam o tames nan; natoqamam we matikotiko alo kamam we nomkel apena; napugamam we mavat mate kamam. Mama Tur magarosa, Ka magarosa ikamam, Ka magarosa ikamam; Ka nomvitag o togara we tuai, o manigiu i Natuma i Lord kamam Jesus Christ; Ka ge ikamam a mawmawui muniko nan ilokenake, mun o togara garaqa, tama Ko we maros; kamam a nom mava, a log ronoga nasasama; mun Jesus Christ i Lord kamam. Amen.

¶ I Bishop, si i Priest, ni tavaraka, wa o sul qale vatieqau, wa ni qara vava wa,

GOD Turmana, Tamanina avunana, me ligog magarosa ti o nomvitag pugai nan rasei qe vusiag kel suria mun o toqe nomleas, mun o nomtup maur; Ni magarosa kamiu; Ni lolowia kamiu; Ni ge wasawasa nol kamiu nan napugamiu; Ni vatogar kamiu mun o gene we wia nan; Ni varagai kamiu; Ni lav kamiu ilo esu galava; mun Jesus Christ i Lord inina. Amen.

¶ Nan i Gagapalag ni vava wa,
 

Tur tinqoro o vavae varagai nina i Vaesunina i Christ we vava mun rasei we vusiag nun suria.

RAGAI, kamiu nol we nala wa me gaqisan, tur mule ma surinau, wa Na te ge mapsag sur kamiu. S. Mat. 11. 28.
    God me tape tamaine o marama, wa Ni me ukeg i Natuna o wotuwale, si isei qe nomtupua tete mate, pa te taur mona o esu galava apena. S. John 3. 16.

Tur tinqoro mulan Saint Paul me vet wa,

Iloke o vavae te nomtup ran wa we tira ape nina te la nol, si Christ Jesus me mule ma ilo marama si a vaesura ganganor. 1 Timothy I. 15.

Tur tinqoro mulan Saint John me vet wa,

Si sei qe ganganor, i Tataro mun o Mama ape nina we toga, i Jesus Christ i Taniniga; wa Ineia o tapetape ape nonina ganganor. 1 S. John 2. 1.

¶ Paso nan ti vet wa,

Tur ave kalo natoqamiu.
    Kamam we ave kalo mun Lord.

Inina varean i Lord God nina.
    We wia, we taniniga, we ge tamaine.

¶ I Gagapalag magasena ni vava wa,

WE nun, we wia, we taniniga, o moe gagapalag tamaike, apen kamam valqon, valvanua, te varean Iniko, Lord, Mama we Rono, Turmana, Tur esu galava, God.

¶ Wa iake te vasogo O Vavae Tuan, si we tira ape qon (we qisan alo ulus Line Tataro iloke): ta itagai ni vava taso wa—

O MANIGIU o ine kamam, wa o Angel nan, wa o moe Angel nan, wa o vui nan avunana, a wievavae, a log ronoga nasasama we rono; kamam we logwia Iniko was,
    Rono, Rono, Rono, Lord God Sabaoth, o vunana wa o lalanana we uravag nalenasima: kamam we log ronoga Iniko, Lord i Eleele aneane. Amen.

¶ I Gagapalag ni vatieqau, ni tataro wa,
 

LORD Magarosa, kamam gate nom wasmata si kamam we sar si a mule ma ape tano-ganagana anoma. Kamam gate sov ape linamam wa si taniniga, panava ape Nom o magarosa we poa aneane.
    Kamam gate sar si a vilerag o vainiu alalane tano-ganagana anoma; wa namatevuma, Lord, qale magarosa lava.
    Lord magarosa, Ka sogov ma mun kamam a gana navisogon Natuma meratape i Jesus Christ, a ima nanarana, naturiamam ganganor qara wenewene mun naturiana, wa qara asa naatamam mun nanarana tur rono aneane; kamam a toga galava alo Ineia, wa Ineia ado ikamam. Amen.
 

¶ I Gagapalag tai tavaraka, ni vava wa,

GOD Turmana, Mama avunana, Ko me la magarosa ma Natuma wotuwale Jesus Christ Ni mate vawo wolowolo sin tunkel kamam nia; wa alo Ni me map kelua avunana Ni me oloolo goro Ko vatuwale mun o oloolo ilone we sar mantag, wa me wono mot ape pug marama nol; wa Ni me qeteg wa alo Lea we wia we rono Ni me vatran kamam si a gagapalag vagae o gene ape nomkel ape mateana tur rono aneane, Ni gai kel mulan ma; Mama tur magarosa, kamam we tataro aperig muniko, Ka tinqoro kamam; wa alo ikamam we taur o bread wa o wine iloke Ko me tin ti, tama i Natuma i Vaesumam i Jesus Christ me qeteg rono ti, mun o nomkel ape Ni me mate wa Ni me rono vivtig, Ka ge kamam a taur valval Naturiana wa Nanarana tur wia aneane: wa alo qon ilone me manirinia Ni me [1] taur o bread, wa me wievavae paso, ti [2] tuqe wora, ti la valval mun ra tinqoro, ti vet wa, Taur, gana, [3] iloke Naturiak me le apen kamiu, tur ge tamaike si a nomkel ape Nau nia. Tamaine mulan me paso o ganagana, Ni me [4] taur o lasa, wa me wievavae paso Ni me le muneira, ti vet wa, Tur ima nol iloke, ape [5] iloke Nanarak non o Vatavata we Garaqa me sale apen kamiu tamiu o tanun sul si a ul o ganganor nan kamiu: Tur ge tamaike, alo kamiu we ima iloke mun o nomkel ape, Nau. (Amen.)
 

1 I Priest ni taur kalo o tapera.
2 Nan ti tuqe.
3 Ti tano o bread.
4 Ti taur kalo o lasa.
5 Ti tano val lasa wine te varono.

[ ¶ I Priest ta maros, o “AMEN” iloke te pea, wa ni te vasogo taso tamaike wa,

    O manigiu o ine, Lord Mama avunana, ikamam ira rowrowovag anama we nompepewu, we nonomkel namatean Natuma meratape o gene tun wa Non o ronovivtig, Non o tavaraka kel we vavaka, wa Non o mule kalo kel we lenas, tama Ni me qeteg mona ti, kamam we gagapalag wa we map lue alo Nagoma, Maranaga tur lenas, mun Nom o sogov nan we rono iloke, o nomkeluva ilone tataga Non o maros, we la kalo muniko o varvarean we lava ape sogov alena tar Ni me lav ma mun kamam apena.
    Wa ikamam we tias aperig Iniko, Mama turwia, si Ka taur magarosa o oloolo iloke ape logwia Iniko wa ape varean Iniko. Wa ikamam we tias aperig Iniko, Ka vasoal mun kamam wa mun Nom o Loglue nol, ira nomtup Nanaran Jesus, o ul ganganor, wa o gene nan we wia Natuma Jesus Christ me tun mun kamam mun namateana.
    Lord, ikamam we map kel kamam goro nanagoma iake, na naatamam wa naturiamam, mun o oloolo nom mantag, wa we rono, wa we esu. Wa ikamam we tias aperig Iniko, Ka ge toqo kamam me taur valval o Pultuwale we rono iloke mun Nom o sogov, wa mun Nom o tanov tavunana.
    We nun, kamam gate sar si a map o gene oloolo goro Ko o manigiu napugamam me qoqo; nava ikamam we tias Iniko si Ka taur goro o linai wa o gagapalag iloke ikamam we wono Ko nia; nipea siplag ilo nalinamam si we wia, nava nomvitag nomam o tames nan;
    Mun Jesus Christ i Lord kamam, kamam we nom mava wa we log ronoga Iniko, Mama Turmana, wa o Vui we Rono tuwale amaia, o marama, o ulusui tagai. Amen.

¶ Paso nan o sul te tataro tuwale amen i Priest, O Tataro mon Lord; pa i Priest ni vava amoa wa,

TAMA i Vaesumam i Christ me vareg wa me vatogo ikamam ti apena, kamam we vava apesov wa,

MAMA avunana, Nasasama ni rono. Nom o marana ni mule ma. Nom o maros ni lai alalanana tama avuuana. Le ma qarig mun kamam o sinaga we tira ape qarig. Ka nomvitag napugamam, tama ikamam we nomvitag napugara. Nipea ukeukeg kamam ilo galeva; Ka lav kamam nan o ganganor. Anoma o marana, wa o mana, wa o lenas ti toga ti toga. Amen.

(Tete tataro mulan o Tataro mon Lord iloke alo sul me lav paso mora o Pultuwale we Rono, pa te taso mun o Vavae Varean.)

¶ Nan i Priest te vava wa,

O TAMATA mon God ni toga amen kamiu vagae;

Wa amen naatama.]

¶ I Gagapalag ni gana wa ni ima mona amoa, qara le mun ra Bishop, Priest, wa Deacon, si apena tea; paso nan, ti tirag mun o sul we vatieqau, ilo panera.
 

¶ Wa alo we le munsei o Bread ni vava wa,

NATURIAN Lord inina Jesus Christ, me la apeniko, Ni kokor naturiama wa naatama gai nina ilo esu galava. Taur, gana iloke, mun o nomkel apen i Christ me mate apeniko; ka gana nomtupua alo toqama mun o vareania.

¶ Wa alo ni we le munsei o Lasa ni vava wa,

NANARAN Lord inina Jesus Christ, me sale apeniko, Ni kokor naturiama wa naatama gai nina ilo esu galava. Ima iloke, mun o nomkel ape Naran Christ me sale apeniko, wa mun o vareania.

¶ Nan si o Bread si o Wine tete sar apena, i Gagagalag ni varono mulan, tamaike wa,

[Ape Bread.] I Lord inina Jesus Christ, alo qon ilone me manirinia, me taur o bread . . . . ape Nau nia. Amen.

[Ape Wine.] I Lord inina Jesus Christ, alo qon ilone me manirinia, me paso o ganagana, me taur o lasa . . . . . . nomkel ape Nau. Amen.

¶ O sul me la paso o Pultuwale we Rono, neira tataro tamaike wa,
 

MAMA avunana, Nasasama ni rono. Nom o marana ni mule ma. Nom o maros ni lai alalanana tama avunana. Le ma qarig mun kamam o sinaga we tira ape qarig. Ka nomvitag napugamam, tama ikamam we nomvitag napugara. Nipea ukeukeg kamam ilo galeva; Ka lav kamam nan o ganganor. Anoma o marana, wa o mana, wa o lenas ti toga ti toga. Amen.

¶ Paso nan i Gagapalag te vasogo tuwale nan o vavae tataro nirua iloke, si rara tatarua.

LORD, Mama avunana, ikamam ira tanun nan anama we tias aperig Iniko, Mama turwia, si Ka taur magarosa o oloolo iloke ape logwia Iniko wa ape varean Iniko. Wa ikamam we tias aperig Iniko, Ka vasoal mun kamam wa mun Nom o Loglue nol, ira nomtup nanaran Jesus, o ul ganaanor wa o gene nan we wia Natuma Jesus Christ me tun mun kaman mun namateana.
    Lord, ikamam we map kel kamam goro nanagoma iake, wa naatamam wa naturiamam, mun o oloolo nom mantag, wa we rono, wa we esu. Wa ikamam we tias aperig Iniko, Ka ge toqo kamam me taur valval o Pultuwale we rono iloke mun Nom o sogov, wa mun Nom o tanov tavunana.
    We nun, kamam gate sar si a map o gene oloolo goro Ko a manigiu napugamam me qoqo; nava ikamam we tias Iniko si Ka taur goro o linai wa o gagapalag iloke kamam we wono Ko nia; nipea siplag ilo nalinamam si we wia, nava nomvitag nomam o tames nan, mun Jesus Christ i Lord kamam; kamam we nom mava wa we log ronoga Iniko, Mama Turmana, wa o Vui we Rono tuwale amaia, o marama o ulusui tagai. Amen.

¶ Si o vavae iloke.

GOD Turmana, Tur esu galava, kamam we varean aneane Iniko, apeniko gate vasigtag kamam, wa Ko we vanan kamam we taur kokomatag o Genevagis we rono iloke, mun o sinaga-vui, mun Naturian Natuma i Vaesumam Jesus Christ wa Nanarana turwia aneane.
    Kamam we varean Iniko, apeniko we ge ilo vaglala ikamam nia ape Ko we maros kamam, wa Ko we lolowia ikamam; wa apen kamam ra tur soesoe turian Natuma we vagis, o vavtig tanun nomtup; wa apen kamam te toga anaisa alo Nom o marana ti galava o manigiu Natuma meratape me matewol kamam, me rono vivtig apen kamam.
    Wa ikamam we tataro aperig muniko, Mama avunana, Ka pirin kamam mun Nom o sogov, kamam a pultuwale gese amen o vavtig tanun anama we rono, kamam a ge o gagapalag we wia Ko me nonom ti si kamam a tataga apena; mun Jesus Christ i Lord kamam, kamam we nom mava, we log ronoga Ineia, wa Iniko, wa o Vui we Rono, ti tuai ti tuai. Amen.

¶ Paso nan te vava saratuwale wa,
 

LOG ronoga God vawo tuka, wa ni tamata a marama, o tanun nan neira pulpul wia kel. Kamam we varean Iniko, we log wia Iniko, we wievavae Iniko, we taqalon goro Ko, we log ronoga Iniko ape lenasima liwoa aneane, Lord God, Maranaga tavunana, God Mama Turmana.
    Lord, Natui wotuwale Jesus Christ; Lord God, Lamb non God, Natun Mama, Iniko i lareag napugan marama, Ka magarosa ikamam. I lareag napugan marama, Ka magarosa ikamam. I lareag napugan marama, taur goro nomam o tataro. I pute alo matuan God o Mama, Ka magarosa ikamam.
    Apeniko tuwale we rono; Iniko tuwale i Lord; Iniko tuwale, Christ, wa o Vui we Rono, we eleele aneane alo lenasin God o Mama. Amen.

¶ I Bishop, si i Priest, ni tavaraka, ni ukeg o sul mun o Vavae-vawia iloke wa,
 

O TAMATA mon God, isei tete lolomaran lai apena, ni kokor natoqamiu wa nalolomiu, kamiu ilo vaglala, kamiu tape God wa Natuna Jesus Christ i Lord inina. God Turmana, o Mama, o Natui, o Vui we Rono, vawia kamiu ilokenake wa anaisa tete paso lai. Amen.
 

¶ I Gagapalag qe maros we vasogo pirin o vavae tataro, ni vava tamaike wa,

LORD, Ka tuan magarosa kamam alo ikamam we tiatias, wa we tataro muniko; Ka ge taurmate nalinamam si kamam a la anaisa o esu galava; Ka tur goro togtogoa ikamam, alo ikamam gale toga iake, nan o mateawota nan; mun Jesus Christ i Lord kamam. Amen.

LORD Turmana, God Tur esu galava, kamam we tiasiko, Ka ge taniniga, Ka ge rono, Ka liwoa goro naatamam wa naturiamam alo matesale lea vatogoa nan anoma, wa alo gagapalag Ko me vatran ti; naturiamam wa naatamam a toga wasawasa ilokenake wa ti tuai ti tuai ape Ko we ilogoro mana ikamam; mun i Lord i Vaesumam i Jesus Christ. Amen.

GOD Turmana, kamam we tiasiko, Ka ge o vavae nan kamam me ronotag anaqarig mun naqoromam, a warget ilo lolomam, a uwa o wo-togara we wia, Nasasama ni mava, ni ronoga apena; mun Jesus Christ i Lord kamam. Amen.

LORD, Nom o sogov-alena ni tursalemoa ikamam, Nom o tuan ni mulevag vagae ikamam; kamam a qeteg, a ge vagae, a ge mot momam o gagapalag nol alo Iniko, a ge ronoga nasasama we rono, a nina anaisa o esu galava, apeniko we magarosa ikamam; mun Jesus Christ i Lord kamam. Amen.

GOD Turmana, Iniko o qeteg lolomaran nol, Ko we gilala o gene kamam we maros alo ikamam gate paere tiqa, wa Ko we gilala nomam o lol alo kamam we paere; Kamam we tiasiko, Ka magarosa goro ikamam ira mageregere; Vasoal magarosa ma mun kamam o gene nan kamam we gogolo we paere apena ape kamam gate sasarita, wa kamam gate gilala we paere apena ape kamam we loloqon; mun Natuma we sar leas kamam apena, i Jesus Christ i Lord kamam. Amen.

GOD Turmana, Ko me vatavata ti si Ko te ronotag irasei qe tataro muniko alo sasan Natuma; kamam we tiasiko Ka tinqoro magarosa ikamam we tataro-tias muniko ilokenake; sogov ma mun kamam o gene nan kamam me tataro nomtup apena, tama Ko we maros; nomam o mamagarosa ni tagea nan kamam, wa naroromam ni nanalue apena; mun Jesus Christ i Lord kamam. Amen.

¶ Nan si o sava Bread tea si o sava Wine tea qe qale toga, i Gagapalag tete lareag nan o Ima Tataro, pa te gana wa te ima kokomag apena, alo masaoi ilone ni me gagapalag ti o Ganarono aia.

O VAVAE TUAN NAN.

Alo qon Christmas gai nina Epiphany.

APENIKO me la veta ma Jesus Christ Natuma si a wota apen kamam tama qarig; amon o Vui we Rono me ge Ni tur tanun amen o tur Qilowar Mary ravevena; wa Ni me wota-matartoga si a ge matartoga ikamam nan o ganganor nol. O manigiu o ine kamam . . . . .

Alo qon Epiphany wa o qon lavearua mulan.

MUN Jesus Christ i Lord kamam: ape Ni me nanalue ma nalenasina alo matev visogomam o matea alolona: si Ni lav lai o tanun sul nan o silsiliga ilo Non o marmararan we vagis. O manigiu o ine kamam . . . . .

Alo Thursday amoa nan Easter.

MUN Jesus Christ i Lord kamam: ape Ni me tape ra anana alo marama, Ni me tape neira gai nina o ulusui: wa alo qon amoa nan o ronovivtig, alo Ni me pute amaira tinqoro anana ape ganagana, Ni me qeteg o gene vagis we rono i oke: si kamam a pultuwale amaia alo Non o matev God, ape me tunkel kamam mun namateana, wa me vaesuesu kamam mun Non o tavaraka kel. O manigiu o ine kamam . . . . .

Alo qon Easter gai nina qon Mule Kalo.

WA o moe gene kamam we logwia Iniko ape Natuma Jesus Christ i Lord kamam me tavaraka kel nan o matea; ape Neia o tur Lamb non o Rowolagau me oloolo apen kamam; wa Ni me lareag napugan marama; wa Ni me ge tagea o matea mun namateana, wa Ni me tak kel mun kamam o esu galava mun Non o tavaraka kel ilo esu. O manigiu o ine kamam . . . . .

Ala qon Mule Kalo gai nina Whitsunday.

MUN Natuma meratape Jesus Christ i Lord kamam; ape Ni me tavaraka veta mun o lenas we poa aneane nan o matea, pa Ni me nanalue mun ra Sala nol, wa Ni me mule kalo ivunana alo nagora nol si a ge taurmate o vatine mun kamam, si kamam a mule kalo ilo tanoi Ni we toga aia, wa ikamam a maranaga tuwale amaia aia alo lenasina. O manigiu o ine kamam . . . . . . .

Alo Whitsunday wa o qon laveatea mulan.

MUN Jesus Christ i Lord kamam, ape o Vui we Rono me siwo ma vunana tama qarig, tama Jesus me ligog nun ti, wa o maaviu tam o lan me qeasag gaplot ma vunana, wa o garameav me rowo pute val qatura Sala, si a vatogora, si a ave ineira ilo nun nol; wa Ni me sogov muneira, neira vava raka mun o gato valvanua; wa neira tete gogolo, nava neira la o tinegaro ape we toretore aneane vagae val vanua nan mun o Lea we wia: o manigiu ikamam me toa kel nan o silsiliga wa o linai leralera ilo tur marmararan wa o lolomaran apeniko wa Natuma Jesus Christ. O manigiu o ine kamam . . . . . . .

Si iloke.

MUN Jesus Christ i Lord kamam: alo Ni me mule kalo sage sal o vanua nol, wa me pute alo matuama alo Nom o Tano-Maranaga: tama alo masaoi iloke Ni me vasoal ma vune Loglue val vanua a marama Nom o Vui we Rono i Vaesuesu: si mun Non o mans we lenas o qaraqara tape Lea we wia to galava te gao at alo marama nol: o manigiu kamam me toa kel nan o silsiliga wa o linai leralera ilo tur marmararan wa o lolomaran apeniko wa Natuma i Vaesumam i Jesus Christ. O manigiu o ine kamam . . . . . .

Alo Trinity Sunday gese.

INIKO amen Natuma Wotuwale wa o Vui we Rono, God tuwale, wa Lord tuwale, ira Gene nitol ale matevui tuwale: ape tama kamam we nomtup ape lenasima, Mama, tamaine kamam we nomtup ape lenasin Natuma wa ape lenasin o Vui we Rono, we sasarita gese apena. O manigiu o ine kamam . . . . .

Alo February 2 wa March 25.

APENIKO me la veta Jesus Christ Natuma Wotuwale sin wota ape vaesu kamam: amen o Vui we Rono me ge Neia sin Tur tanun amen o tur Qilowar Mary ravevena: wa Ni me wota matartoga sin ge matartoga kamam nan o ganganor nol. O manigiu o ine kamam . . . . .

Alo August 6.

APE lenasin God alo Jesus me sina lue avune Tauwe we Rono ale nagoratol me iloraka ti si ratol a gaganag we tira ape Non o ronoga: wa Nom o vavae ma vunana me logia i Natuma meratape. O manigiu o ine kamam . . . . .

Alo qonira Rono, wa alo qonira Sala tara Raverave o Lea we Wia, wa naqonin S. John Vasugrono, si o tuara Vavae Tuan gate tira apena.

ALO line taniniga nora Rono anama Ko me la mun kamam o makaliu ape togara we rono, wa alo nor o ronoga me la mun kamam o vaglala we lenas ape nomam o togara anaisa: apenra gaganag we tira nan nane, we sasalev waliog kamam, kamam a rono maul ale we valago momam tama we tira ape kamam si a varvariara tamaike: wa amaira a lav momam lai o vilvilqat lenas tote sagesaru lai. O manigiu o ine kamam .....