O VAVAE TATARO
TE TATARO NIA
VAL RAVRAV
ALO IMA WE RONO.

¶ I Gagapalag ni vasogo lue o garatigiu me rave sur siwo, ta luwale si ta visa; paso nan, ni vasogo taso o takele vavae mulan.

SI isei ganganor qe vusiag kel nan o ganganor ni me ge ti, ni qe ge o gene we tira ape lea, wa ni qe ge o gene we taniniga, ni te ge esu naatana apena.—Ezekiel 18. 27.
    Nau we ilo vaglala mok o tames nan; wa nok o ganganor qale toga goro nanagok.—Psalm 51. 3.
    Namatevun Lord God inina o matev magarosa wa o nomvitag pugai; nava inina me tamesia, inina gate tinqoro nalinan Lord God inina, si a mule alo Lea amona ni me map goro nanagon ina.—Daniel 9. 10.
    Lord, Ka wurvag nau, panava mun o gilala wurvag, pa nipea mun o lologagara, nau wa tagea ran.—Jeremiah 10. 24; Psalm 6. 1.
    Tur nomleas ape o marana tavunana me rasu ma.—S. Matthew 3. 2.
    Na te tavaraka na te mule kel sur tamak, na te vet munia wa, Mama, na me ganganor goro vunana, wa alo nagoma, wa na gate sar si a log inau natuma.—S. Luke 15. 18, 19.

RA TASIK! o Raverave we rono we vasosov vagaqoqo inina si nina a gaganag lue wa a vavaul ape nonina o ganganor, wa ape matevunina we tatas nan; was nipea galegale, wa nipea monmona goro o ganganor nan nanagon God Turmana i Tamanina avunana; nava a vavaul apena mun o nom mantag, wa o nompepewu, wa o nomleas, wa o gagapalag tataga mon o lea; si nina qara le o nomvitag ganganor, o manigiu non o lolowia wa non o lolomagarosa gate motmot ran ti.
    Wa me vet si nina a vavaul aperig vagae ape puganina alo nagona; wa si a la o tinegaro apena, alo inina we gogorag ma wa we vug tuwale, si a varean God ape gene we wia nan Ni me sogov ma munina, si a manasag lue narorona, si a ronotag mon o Vavae tur rono, si a tataro ape gene nan naturianina wa naatanina te wia apena.
    O manigiu o ine na we tias kamiu nol we vug iake, si nina a van saratuwale ape tano-putepute sogov tavunana, mun o toqai we matartoga wa o linai we malumlum; inina vava wa:
 

¶ O sul neira vatieqau, neira log o Vavaul-ganganor.

MAMA Turmana, Turmagarosa; kamam me sipa, me lera nan namatesalama, tam o sheep me tagea. Kamam me tataga sal vires o gene nan nalolomam me nom vasarig me. tortoron apena. Kamam me sirigavtag Nom o lea vatogoa we rono; kamam gate ge o gene nan Ko me vatran si age; wa kamam me ge o gene nan Ko me gatogoro ti; wa o esu gate toga tea alo ikamam.
    Pa Iniko, Lord, Ka magarosa ikamam ira ganganor we mamagarosa. Ka ukeg kamam we vavaul nomam o ganganor. Ka wurvag kel kamam we nomleas; Tama Ko me ligoligog ti mun o tanun nan alo i Christ Jesus i Lord kamam.
    Mama Turmagarosa, Ka vasoal ma mun kamam, o manigiu Ineia; nan ilokenake kamam a toga wia, toga taniniga, toga mantag; Nasasama we rono ni lenas apena. Amen.

¶ Nan i Priest ni tavaraka, ni vasogo lue o Vavae Ulsavrag ganganor; wa o sul gale vatieqau.

GOD Turmana, Taman Lord nina Jesus Christ, gate maros isei ganganor ni mate tea, nava ni vusiag kel nan non o togara we tatas, ni esu: wa Ni me manag ira Gagapalag mon o lea, wa Ni me vatranira, si neira gaganag wa si neira manasag lue munrasei qe nomleas o Ulsavrag wa o Nomvitag napugara nan neira: Ni we nomvitag wa Ni we ulsavrag napugara nan rasei nol we nomleas nun, wa we nomtup vatawasai mon o Lea we wia we rono.
    O manigiu o ine, inina tiatiasia, Ni vasoal ma munina o nomleas nun, wa non o Vui we Rono; nina a gagapalag ilokenake o gene nan Ni we maros, wa nina a toga matartoga, toga rono valqoninina; wa alo ulusui nina nina o malakalaka galava amaia; mun Jesus Christ i Lord inina. Amen.

¶ Wa si o Priest ta tagai, i Gagapalag te qale vatieqau, te vasogo o vavae tataro iloke leas o Ulsavrag ganganor.

GOD, namatevuma o matev magarosa wa o nomvitag pugai; Ka ronotag lolowia ikamam we tataro nompepewu muniko; Ka ulsavrag nan kamam o ga-ganganor me rot wa me vivis kamam; o manigiu Nom o lolotape wa Nom o magarosa we lava; si kamam a nom mava i Jesus Christ, i Tinanai, i Tataro muniko apen kamam. Amen.

¶ Si o vavae tataro iloke.

LORD, kamam we tiasiko, Ka tinqoro magarosa nomam o tataro; Ka lolowia ikamam we vavaul muniko ape pugamam, Ka ul magarosa nan kamam o ganganor nol we mavat kamam we wonot nalolomam; mun Christ i Lord kamam. Amen.

¶ Paso nan, i Gagapalag ni vatieqau, ni vava lue o Tataro mon Lord; wa o sul a vava tuwale amaia.
 

MAMA avunana, Nasasama ni rono. Nom o marana ni mule ma. Nom o maros ni lai alalanana tama avunana. Le ma qarig mun kamam o sinaga we tira ape qarig. Ka nomvitag napugamam, tama ikamam we nomvitag napugara. Nipea ukeukeg kamam ilo galeva; Ka lav kamam nan o ganganor. Anoma o marana, wa o mana, wa o lenas ti toga ti toga. Amen.

¶ Wa i Gagapalag ni vava wa,

Lord, waka nanusumam.
    Navalamam a manasag lue naroroma.

God, togtogoa ma, vaesu kamam.
    Lord, gogoi ma, pirin kamam.

¶ Neira nol a tavaraka, wa i Gagapalag ni vava wa,

Log ronoga o Mama, wa o Natui: wa o Vui we Rono;
    Tama we tuai, wa ilokenake tete paso lai. Amen.

Tur logwia i Lord.
    Ikamam we logwia nasasan Lord.

¶ Paso nan, a vasogo si a sur o Psalm nan we tira ape valqon. Paso nan, a vasogo lue o takele Raverave we Rono talo Vatavata we Tuai. Paso nan a vasogo si a sur o As iloke.

NAESUK we LOG RONOGA. S. Luke 1. 46.

NAESUK we log ronoga i Lord: wa naatak we masekeseke apen God i Vaesuk.
    Ape Ni me ilo mana: iro gene anana we nompepewu.
    Wa, ilo ma: nan ilokenake o taraniu nan te log inau iro vawia.
    Ape i Mama me ge o vasasa munau: wa nasasana we rono.
    Wa Ni me magarosa galava: ira momogoa val taraniu nan.
    Ni me la lue Non o vavakae mun napanena: Ni me ara salsalena ira nom liwoa kelura alo toqara.
    Ni me rave sur ira liwoa nan natanora: pa Ni me sari kalo ira nompepewu.
    Ni me ge vaworai ira malinsala mun o gene nan we wia: wa Ni me vure malinsala ira meresom.
    Ni me tuan Israel o tanun anana: Ni me nomkel ape vavae Ni me ligog ti mura tupunina.
    Sin te magarosa i Abraham: tara non o veve ti tuai, ti tuai.
    Log ronoga o Mama, wa o Natui: wa o Vui we Rono;
    Tama we tuai, wa ilokenake: tete paso lai. Amen.

¶ Si o Psalm iloke.

TUR SUR O AS WE GARAQA. Psalm 98.

TUR sur o as we garaqa mun Lord: ape Ni me ge o vasasa nan.
    Na tawere pane matuana wa napanena we rono: me gagapalag lai o esu munia.
    I Lord me gaganag lue naesuna: Ni me lil lue non o taniniga alo nagora tawu nan.
    Ni me nomkel ape non o magarosa wa o nun mun o veve Israel: o ulus marama nan me ilo naesun God inina.
    Valvanua nan tur rorov malakalaka mun Lord: log raka, sur poa, sur varean.
    Sur varean mun Lord alo vigo: alo vigo wa o line-as-varean.
    Tur rorov malakalaka alo nagon Lord i Maranaga: mun o tia o tauwe, mun o lamalama o kore.
    O lama ni rororo wa o gene nan alolona: o marama, wa iragai we toga alolona.
    O pei lava nan neira wosa napanera: o tauwe nan neira sur poa saratuwale alo nagon Lord; ape Ni we mule ma si a veveg o marama.
    Ni te veveg o marama mun o taniniga: wa o tanun nan mun o nun.
    Log ronoga o Mama, wa o Natui: wa o Vui we Rono;
Tama we tuai, wa ilokenake: tete paso lai. Amen.
 

¶ Paso nan, ti vasogo lue o takele Raverave we Rono talo Vatavata we
Garaqa, qara sur o As iloke.

LORD, ILOKENAKE KO WE UKEG. S. Luke 2. 29.

LORD, ilokenake Ko we ukeg mamasug o tanun anama: tama Ko me vava ti.
    Ape mataksa: me ilo naesuma.
    Ko me ge taurmate: alo nagora tanun nan.
    O maran te ge marmararan o val sul nan: nalenasira ta Israel o sul anama.
    Log ronoga o Mama, wa o Natui: wa o Vui we Rono;
    Tama we tuai, wa ilokenake: tote paso lai. Amen.

¶ Si o Psalm iloke.

GOD KA LOLOWIA IKAMAM. Psalm 67.

GOD Ka lolowia ikamam, Ka vawia ikamam: Ka vasinar nanagoma goro ikamam.
    Namatesalama qara nanalue a marama: naesuma amaira sul nan.
    O tanun nan wievavae Iniko, Lord: o tanun nan wievavae nol Iniko.
    Valvanua nan malakalaka, rororov: ape Ko te veveg mantag o tanun nan, Ko te tursalemoa valvanua nan a marama.
    O tanun nan wievavae Iniko, Lord: o tanun nan wievavae nol Iniko.
    Nan o tano te ge wota o sinaga tar: God, God inina, te tur vawia inina.
    God te vawia inina: wa o tavala marama te momogo taso Ineia.
    Log ronoga o Mama, wa o Natui: wa o Vui we Rono;
    Tama we tuai, wa ilokenake: tete paso lai. Amen.

¶ Paso nan, i Gagapalag tar o sul a tira, a vasogo tuwale o Nomtup nora Sala.
 

INAU we nomtup God o Mama i Turmana, i Tin o vunana wa o lalanana.
    Wa i Jesus Christ Natuna tuwale wora Lord inina; me wune Ineia anion o Vui we Rono; me wota amen o tur Qilowar Mary; Ni me toga mamagarosa lalanan Pontius Pilate; neira me woso teterpania; Ni me mate; neira me saloa; Ni me vano i Panoi; o qon vatoliu Ni me tavaraka kel nan o matea; Ni me mule kalo ivunana; Ni we pute alo matuan God o Mama i Turmana; Ni to siwo ma anaisa si a veveg ira we esu wa ira me mate veta.
    Inau we nomtup o Vui we Rono; o Loglue we rono valvanua nan; o Pultuwale nora rono; o ul ganganor; o turiai to tavaraka kel; wa o esu galava. Amen.

¶ Paso nan, i Gagapalag ni vava wa,

I Lord Ni toga amen kamiu.
Wa amen naatama.

¶ Nan i Gagapalag ni vava wa,

Inina tataro.

¶ Wa neira qara vatiegau, i Gagapalag ni vava wa,

Lord, magarosa ikamam.
    Christ, magarosa ikamam.
Lord, magarosa ikamam.

¶ Wa neira a vava o Tataro mot Lord mun o linai we poa.
 

MAMA avunana, Nasasama ni Rono. Nom o marana ni mule ma. Nom o maros ni lai alalanana tama avunana. Le ma qarig mun kamam o sinaga we tira ape prig. Ka nomvitag napugamam, tama ikamam we nomvitag napugara. Nipea ukeukeg kamam ilo galava; Ka lav kamam nan o ganganor. Amen.

¶ Wa i Priest ni tavaraka, ni vava wa,

Lord, la lue ma Nom o magarosa mun kamam.
    Vasoal ma mum kamam naesuma.

Lord, vaesu ira maranaga nan.
    Ronotag magarosa ikamam we log kaloko.

Ka saru goro ra gagapalag anama mun o line taniniga.
    Ka ge malakalaka o sul anama Ko me iloraka veta ineira.

Lord, vaesu o sul anama.
    Vawia ira mermereima.

Lord, tamata goro nataumam.
    Apensei we sea tete tuan lai kamam; vava Iniko magasema, God.

God, Ka ge wenewene natogamar.
    Nipea lala reag nom o Vui we Rono nan kamam.

¶ Wa i Gagapalag ni vasogo o Collect, wa o Tataro nirua mulan te vasogo segao valqon.
 

O TATARO O VARUEI.

GOD, i tur qeteg tortoron we rono nan, wa o nom mot we wia nan, wa o gagapalag nan we taniniga; Vasoal ma mun o tanun nan anama o tamata iloke o marama tete la lai; natoqamam qara netenete ape manas goro nom o lea vatogoa nan, wa ikamam qara toga apesov toga tamata, tete gogolo tea o tavalalea, o man igiu Iniko we tur goro ikamam; mun Jesus Christ i Vaesumam, i gagapalag sar goro napugamam. Amen.
 

O TATARO O VATOLIU.

LORD, kamam we tiasiko, valawar nomam o silsiliga; tur goro magarosa ikamam nan o mateawota man talo qon nake iloke; o manigiu o tapeva non Natuma tuwale-wora, i Vaesumam, i Jesus Christ. Amen.

¶ Wa neira a tavaraka, a sur o As; paso nan, qara vatieqau mulan ape tataro.

LORD Turmana, God Tur esu galava, Iniko magasema we ge o vasasa nan; Suware sur ma Nom o Vui, i sogov esu ma, avunara Bishop nan tara Ilogoro wa avune Loglue nol; Liwo vagae ivunara Nom o mewu-vawia, neira qara ge nun Nom o maros. Lord, vasoal ma iloke, manig nom mava i Jesus Christ, i Tataro apen kamam, i Tinanai. Amen.
 

O TATARO AMON S. CHRYSOSTOM.

GOD Turmana, Ko me sogov ma mun kamam si kamam nol a tataro saratuwale muniko ilokenake; wa Ko me ligog ti wa si o tanun nirua si nitol qe vug nonom nasasama, Ko to la o gene me tias apena; Lord, Ka ge qalo qarig nomam o maros, wa nomam o tataro to tira ape tur pirinimam; le ma mun kamam o lolomaran ape Nom o nun alo marama iloke, wa o esu galava alo marama iloneia. Amen.

2 Corinth 13. 14.

O SOGOV mon Lord kamam Jesus Christ, wa o tapeva mon God, wa o pulpul mon o Vui we Rono, toga amen kamam nol ti tuai ti tuai. Amen.

¶ Nan alo tuan qon nan te vasogo lai o Line Tataro we qatutui iloke.

¶ O Line Tataro we qatutui iloke gate tira pe vasogo alo Sunday nan si alo Qon nan we Rono.
 

O VAVAE TATARO WE QATUTUI
APE RAVRAV

¶ Te sur o Hymn, paso nan I Gagapalag ni vava wa,

NA te risa tamata siwo, wa te maturu: apeniko, Lord, magasema we ge inau si na toga wasawasa.—Psalm 4.8

ININA vavaulul napuganina mun God Turmana.

¶ O sul neira vatieqau, neira log o Vavaul-ganganor.
 

NAU we gaganag lua napugak nan mun God o Mama, God o Natui, wa mun God o Vui we Rono, wa alo nagora Angel tara Rono nan, wa si nau me ava alo nonomia nan, wa alo vavae nan, wa alo nok o gagapalag nan. O manigiu ilone nau we tias God o Mama, o Natui wa o Vui we Rono si a nomvitag munau napugak nol, o manigiu i Jesus Christ i Lord inau. Amen.

¶ Nan i Gagapalag ni vava wa,

LORD Turmagarosa, kamam we tataro muniko, Ka vasoal munra tanun aname we nomtup, o nomvitag pugai wa o tamata; kamam a wenewene nan napugamam nol, a mawmawui apesov muniko; mun Jesus Christ i Lord kamam. Amen.

Lord, waka nanusumam.
    Navalamam a manasag lue naroroma.

God, togtogoa ma, vaesu kamam.
    Lord, gogoi ma, pirin kamam.

¶ Neira nol a tavaraka, wa i Gagapalag ni vava wa,

Log ronoga o Mama, wa o Natui: wa o Vui we Rono
    Tama, we tuai, wa ilokenake: tete paso lai. Amen.

Tur logwia i Lord.
    Ikamam we logwia nasasan Lord.

NAESUK WE LOG RONOGA. S. Luke 1. 46.

NAESUK we log ronoga i Lord: wa naatak we masekeseke apen God i Vaesuk.
    Ape Ni me ilo many: iro gene anana we nompepewu.
    Wa, ilo ma: nan ilokenake o taraniu nan te log inau iro vawia.
    Ape i Mana me ge o vasasa munau: wa nasasana we rono.
    Wa Ni me magarosa galava: ira momogoa val taraniu nan.
    Ni me la lue Non o vavakae mun napanena: Ni me ara salsalena ira nom liwoa kelura alo toqara.
    Ni me rave sur ira liwoa nan natanora: pa Ni me sau kalo ira nompepewu.
    Ni me ge vaworai ira malinsala mun o gene nan we wia: wa Ni me vure malinsala ira meresom.
    Ni me tuan Israel o tanun anana: Ni me nomkel ape vavae Ni me ligog ti mura tupunina.
    Sin te magarosa i Abraham: tara non o veve ti tuai, ti tuai.
    Log ronoga o Mama, wa o Natui: wa o Vui we Rono;
    Tama we tuai, wa ilokenake: tete paso lai. Amen.

¶ Paso nan ti vasogo o takele Raverave we Rono, qara sur o As iloke.

LORD, ILOKENAKE KO WE UKEG. S. Luke 2. 29.

LORD, ilokenake Ko we ukeg mamasug o tanun anama: tama Ko me vava ti.
    Ape mataksa: me ilo naesuma.
    Ko me ge taurmate: alo nagora tanun nan.
    O maran te ge marmararan o val sul nan: nalenasira ta Israel o sul anama.
    Log ronoga o Mama, wa o Natui: wa o Vui we Rono;
    Tama we tuai, wa ilokenake: tote paso lai. Amen.

¶ Neira qale tira qara vava saratuwale wa,

NAU we nomtup God o Mama, me tin inau wa o gene nan.
    Nau we nomtup God o Natui, me tunkel nau wa o tanun nan.
    Nau we nomtup God o Vui we Rono, we ge rono inau wa irasei nol God we iloraka ineira. Amen.

¶ Paso nan, i Gagapalag ni vava wa,

I Lord Ni toga amen kamiu;
    Wa amen naatama.

¶ Nan i Gagapalag ni vava wa,

Inina tataro.

¶ Wa ineira a vatieqau, a vava tataga i Gagapalag,
 

MAMA avunana, Nasasama ni Rono. Nom o marana ni mule ma. Nom o maros ni lai alalanana tama avunana. Le ma qarig mun kamam o sinaga we tira ape prig. Ka nomvitag napugamam, tama ikamam we nomvitag napugara. Nipea ukeukeg kamam ilo galava; Ka lav kamam nan o ganganor. Amen.

¶ Wa i Gagapalag ni vasogo o Collect we sar ape qon, wa paso nan ni vasogo taso tamaike wa,
 

LORD, kamam we tiasiko, valawar nomam o silsiliga; tur goro magarosa ikamam nan o mateawota man talo qon nake iloke; o manigiu o tapeva non Natuma tuwale-wora, i Vaesumam, i Jesus Christ. Amen.

LORD Turmana, God Tur esu galava, Iniko magasema we ge o vasasa nan; Suware sur ma Nom o Vui, i sogov esu ma, avunara Bishop nan tara Ilogoro wa avune Loglue nol; Liwo vagae ivunara Nom o mewu-vawia, neira qara ge nun Nom o maros. Lord, vasoal ma iloke, manig nom mava i Jesus Christ, i Tataro apen kamam, i Tinanai. Amen.

Apen ra Loloqon.

GOD Turmana, Ka magarosa iragai nan qale loloqon naniko, qale toga alo silsiliga, wa alo malumalu matea. Ka suware at o Vui we Rono, Ni gagapalag maremare alo togara, neira ilo vaglala ape nor o ganganor, neira ronotag nomtup o vavae apen Jesus i Vaesu, neira taur malakalaka o lea we garaqa we tira ape esu galava; mun Jesus Christ i Lord kamam. Amen.
 

O TATARO AMON S. CHRYSOSTOM.

GOD Turmana, Ko me sogov ma mun kamam si kamam nol a tataro saratuwale muniko ilokenake; wa Ko me ligog ti wa si o tanun nirua si nitol qe vug nonom nasasama, Ka te la o gene me tias apena; Lord, Ka ge qalo qarig nomam o maros, wa nomam o tataro te tira ape tur pirinimam; le ma mun kamam o lolomaran ape Nom o nun alo marama iloke, wa o esu galava alo marama iloneia. Amen.

2 Corinth 13. 14.

O SOGOV mon Lord kamam Jesus Christ, wa o tapeva mon God, wa o pulpul mon o Vui we Rono, toga amen kamam nol ti tuai ti tuai. Amen.