O COLLECT NAN,
WA O RAPAI NAN
ape Raverave we Rono nan wa o Lea we Wia nan
WE TIRA TASO APE VALVAL TAU.

O Sunday o moai alo Advent.

GOD Turmana, Ka ge kamam a savrag reag o gagapalag tale silsiliga, a saru leas o renren marmararan; ilokenake alo ikamam we toga ale marama iloke o matea alolona i Jesus Christ Natuma me vaatev kamam ma ti mun o ge pepewu kelua aia; wa alo Ni to kel mulan ma ale paspasoane qon mun o lenas wa o mana we poa aneane si a veveg ra we esu wa me mate veta, kamam a tavaraka suar o esu, tagtagai o matea alolona; mun Neia we esu we maranaga amaiko wa o Vui we Rono, ilokenake wa ti tuai ti tuai. Amen.

¶ Vasogo iloke vagae ape kule Collect val qon alo Advent.

Rome 13. 8. S. Matthew 21. 1-13.

Advent 2.

LORD Turwia, Ko me ge irasei neira rave o Raverave nan we Rono si a ge lolomaran kamam nia; Ka ge kamam a ronotag lai o Raverave nan ilone, a vasvasogo, a ilo vaglala, a gilala wurvag, a monog rorono apena; kamam a toga apesov, a toga masur ape Nom o Vavae we Reno; wa kamam a maros nerei tasovule, a taur varaget o esu galava, Ko me vasoal ma mun kamam ale i Jesus Christ i Vaesumam. Amen.

Rome 15. 4-13. S. Luke 21. 25-33.

Advent 3.

LORD Jesus Christ, alo Ko me va ma we tuai Ko me vatran nasalama si a wurvag namatesalama muniko; Ka ge ira Gagapalag Nom o Lea wa we ilogoro nalinama we vagis, neira wurvag taurmate ilokenake namatesalama tama ni me ge ti; neira wilris kel natoqara we siriga neira menaro kel, neira toga manas; wa anaisa alo Ko te kel mulan ma si a veveg o marama, Ko te ilo suar kamam o sul we wia ale nagoma, Ko we esu amen o Mama wa o Vui we Rono, God tuwale ran, o ulusui tagai. Amen.

1 Corinth 4. 1-5. S. Matthew 11. 2-10.

Advent 4.

LORD, kamam we tataro muniko, la raka Nom o mana, van ma sur kamam, pirin maremare kamam; wa ape pugamam we mavat aneane kamam, wa nomam o ganganor we ge goro vagagogo kamam nan wa valago lai tama me vet si kamam a varvariara iake, Ka magarosa alena ikamam, Ka sogov pirin ma, wa Ka vaesu togtogoa kamam; mun i Natuma i Lord kamam we sar leas kamam, kamam we wievavae we log ronoga Ineia amaiko wa o Vui we Rono, ti tuai ti tuai. Amen.

Philippi 4. 4-7. S. John 1. 19-28.

O QON CHRISTMAS.
December 25.

GOD Turmana, Ko me vasoal ma mun kamam Natuma tuwale wora Ni la mona o matev tanun, Ni wota ma tama qarig amen o tur Qilowar; Ko me ge wota mulan kamam wa Ko me ramo alma kamam munra mermereima; Ka ge garaqa valqon kamam mun Nom o Vui we Rono; mun Neia gins i Jesus Christ i Lord kamam, we esu amaiko wa o Vui we Rono, God tuwale, ti tuai ti tuai. Amen.

Hebrew 1. 1-11. S. John 1. 1-14.
 

Saint Stephen.
December 26.

LORD, Ka sogov ma mun kamam, si alo ikamam qe ronovivtig lai iake alalanana alo we gaganag we tira ape linama we nun, kamam a sagarag matapaparau ivunana, wa we ilo mun o nomtup o lenas te nanalue ma anaisa; wa si kamam mulan a liwatvag o Vui we Rono, te vatogo kamam si a tape lai rasei qe gage kamam, wa si a wievavae neira tataga namakalin i Martyr anama o moai i Stephen, me tataro muniko, Jesus turwia, apen ragai we ge mate nawonoa, Ko qale tira ape matuan God si Ka pirin valrasei qe ronovivtig apeniko, i Tinanai tuwale wora, i Tataro apen kamam. Amen.

¶ Vasogo pirin o Collect ape Christmas gai nina o ulus tau.

Gag. 7. 55. S. Matthew 23. 34.

Saint John i Raverave o Lea we Wia.
December 27.

LORD magarosa, kamam we tataro muniko si Ka valawar Nom o Loglue mun nasinosinoma we marmararan, sin lolomaran mantag lai mun nalinan i Salama turwia i John, i Raverave o Lea we Wia; wa sin mulemule taso ale maran tape linama nun, si a nina lai at anaisa o maran talo esu galava; mun Jesus Christ i Lord kamam. Amen.

1 S. John 1. S. John 21. 19a.

Ira Tete nan we Rono.
December 28.

GOD Turmana, ale valara natmera tara tote nan ape sus Ko me vilit o vavakae, wa ale gate vava tiqa me ge neira si a ge ronoga Iniko mun namateara; Ka ge mate alo ikamam o sale ganganor nan; wa Ka varagai kamam mun Nom o sogov, si kamam mulan a ge ronoga Iniko mun nomam o togara vatawasai, wa mun nomam o nomtup to qale netenete gai mateamain; mun Jesus Christ i Lord kamam. Amen.

Nanalue 14. 1-5. S. Matthew 2. 13-18.

O Sunday ape kule Christmas.
O Collect ape qon Christmas.
Galatia 4. 1-7. S. Matthew 1. 18.

O Tevevaglala.
January 1.

GOD Turmana, Ko me ukeg Natuma turwia aneane si me tevevaglala Ineia, sin manas goro o Lea apen kamam; Ka vasoal ma mun kamam o tur tevevaglala vui; tamaine me ge mate veta nan natogamam wa nan nasoesoemam o toroniva nol talo marama wa tale visogoi, qara manas goro Nom o maros turwia alo savasava nol: mun Neia gina i Natuma i Jesus Christ i Lord kamam. Amen.

LORD God, Tur esu galava, Ko me lav wasawasa ira tanun anama nan gai nina o tau we garaqa iloke; Kamam we tias aperig Iniko Ka nomvitag o tamtames nan kamam me gage ti goro Nom o Lea, wa Ka toga lolowia amen kamam valqonimam gale toga ti; mun Jesus Christ i Lord kamam. Amen.

Rome 4. 8-14; si Ephesus 2. 11-15. S. Luke 2. 15-21.

O Sunday o varuei ape kule Christmas.

¶ O Collect, o Raverave, wa o Lea we wia iloke we sar ape val qon nan o
Tevevaglala gai nina o Epiphany.

GOD Turmana, mun o vasasa Ko me tin o tanun nan alo matevuma, wa mun o vasasa we lava sal Ko me tunkelura ti; Kamam we tiasiko Ka vasoal ma, si tama i Jesus Christ i Lord kamam me lav namatev visogomam, kamam a pultuwale lai amaia alo Non o matev God; mun Neia gina i Natuma, we esu wa we riga goro amaiko wa o Vui we Rono, God Tuwalo, o marama tote paso lai. Amen.

2 Corinth 8. g. 9 vires. S. John 1. 14-18
 

O QON NANALUE (EPIPHANY).
January 6.

GOD, Ko me ge nanalue Natuma tuwale wora mun o val sul nan mun o vitu me tursalemoa apena; Ka ge kamam we gilala Iniko ilokenake mun o nomtup, kamam a ilo momam anaisa namatev lenasima; mun Jesus Christ i Lord kamam. Amen.

Ephesus 3. 1-12. S. Matthew 2. 1-12.

O Sunday o moai ape kule Epiphany.

LORD, kamam we tiasiko Ka lav magarosa o tataro mor o tanun nan anama we log kaloko; wa Ka vasoal ma mun kamam, si kamam a ilo vaglala o gene nan Ko me vet ti si kamam a gagapalag apena; wa si kamam mulan a mana lai mun Nom o sogov si a gagapalag kokomag tataga; mun Jesus Christ i Lord kamam. Amen.

Rome 12. 1-5. S. Luke 2. 41.

Epiphany 2.

GOD Turmana, Tur esu galava, Ko we riga goro o gene nan avunana wa alalanana; Ka ronotag magarosa ikamam o tanun nan anama we tataro muniko. Vasoal ma mun kamam Nom o tamata ni toga galava amen kamam valqonimam; mun Jesus Christ i Lord kamam. Amen.

Rome 12. 6-16a. S. John 2. 1-11.

Epiphany 3.

GOD Turmana, Tur esu galava, Ka sagarag magarosa ma ikamam we mageregere; Ka sigag napanema o matua si a pirin kamam alo we toga lopsag, wa si a tur goro ikamam nan o mala gene nan; mun Jesus Christ i Lord kamam. Amen.

Rome 12. 16a. S. Matthew 8. 1-13.

Epiphany 4.

GOD, Ko we gilala apen kamam we toga alo vatitne mala gene nan we qoqo wa we mava, kamam gate tira taniniga vagae lai apena, o manigiu namatevumam we mageregere; Ka varagai ikamam, Ka turgoro kamam; kamam a tira netenete lai ado vatitne mala gene nan, a rowolue wasawasa lai nan o galava nan; mun Jesus Christ i Lord kamam. Amen.

Rome 13. 1-7. S. Matthew 8. 23.

Epiphany 5.

LORD, kamam we tataro muniko si Ka ilogoro ra mermereima o Loglue neira taur tasovule nalinama iloke we nun; Ka turgoro vagae mun Nom o mana liwoa ikamam we toga nerei wa we matueg vires avune sogov tavunana anoma; mun Jesus Christ i Lord kamam. Amen.

Colose 3. 12-17. S. Matthew 13. 24a-30.

Epiphany 6.

GOD, Natuma tuwale wora me nanalue veta ma, o manigiu sin ge tagea o gagapalag mon Satan, sin ramo ikamam ma mun mereima, wa mun leles esu galava; kamam we tataro muniko si kamam we maros nerei tamaine a ge matartoga kel kamam tama Ineia we matartoga ran ma; wa si anaisa, alo Ni te nanalue mulan ma mun o mana wa o lenas liwoa, kamam a sasarita lai amaia alo Non o marana we lenas ti galava; Ni we esu aia wa we maranaga amaiko, Mama, wa amaiko mulan Vui we Rono, God tuwale ran ti tuai ti tuai. Amen.

1 S. John 3. 1-8. S. Matthew 24. 23-31.

Septuagesima.

LORD, kamam we tataro muniko Ka ronotag maukeg o sul anama we tataro muniko; Ka ge rowolue magarosa kamam nan o togara lolowono we sar ape pugamam, o manigiu nasasama we lenas; mun Jesus Christ i Vaesumam, we esu we liwoa goro amaiko wa o Vui we Rono, God tuwale, o ulusui tagai. Amen.

1 Corinth 9. 24. S. Matthew 20. 1-16.

Sexagesima.

LORD God, Ko we gilala apen kamam gate matueg avunamam si kamam te ge lai matapumam o sava; Ka tur goro magarosa kamam mun Nom o mana nan o sava gene nan we ge goro kamam; mun Jesus Christ i Lord kamam. Amen.

2 Corinth 11. 19-31. S. Luke 8. 4-15.

Quinquagesima.

LORD, Ko me vatogo kamam wa si o line tapeva ta tete toga amen kamam, nomam o manasia te one wora gese; Ka suware ma Nom o Vui we Rono, Ka lin siwo ilo lolomam o line tapeva, o moe sogov we wia aneane, o tur ga-tamata, wa o vivis tuwale o matevui we wia nan; wa si isei qe tete tape, ni ta qale toga, pa me mate veta alo nagoma. Vasoal ma o ike mun kamam, o manigiu i Natuma tuwale wora, i Jesus Christ. Amen.

1 Corinth 13. S. Luke 18. 31.
 

ASH WEDNESDAY.

O Qon o moai alo Lent.

GOD Turmana, Tur esu galava, Ko gate sonus o gene Ko me tin ti, Ko we nomvitag napugarasei qe nomleas; Ka tin mun kamam, Ka ge alo ikamam o toqai we garaqa wa we manoanoa, kamam a lolowono sar ape pugamam, a gaganag lue ape nomam o togara we mamagarosa, kamam qara la naniko, God tur magarosa, o ulsavrag wa o nomvitag pugai nol; mun Jesus Christ i Lord kamam. Amen.

¶ Vasogo iloke vagae ape kule Collect val qon alo Lent.

Joel 2. 12-17. S. Matthew 6. 16-21.

O Sunday o moai alo Lent.

LORD, Ko me gargara mamasa apen kamam o qon sanavul vat; Ka ge kamam a ora goro kel kamam nan o gene nan we ge goro o vui nan wa mana o visogoi; kamam a tataga vagae o nonomia nan we wia Ko we map ado lolomam, mun o togara we taniniga wa we rono nasasama ni mava apena, wa kamam a varean Iniko, Ko we esu wa we maranaga tuwale amen o Mama wa o Vui we Rono, God tuwale, ti tuai ti tuai. Amen.

Lent 2.

GOD Turmana, Ko we ilo kamam si kamam gate mana lai matapumam si a pirin kamam; Ka kokomag naturiamam wa nalolomam; Ka tigoro kainam nan val mala sava nan wa qalo naturiamam wa nan val nonomia ganganor nan wa rowo sur we ge tatas naatamam; mun Jesus Christ i Lord kamam. Amen.

1 Thes. 4. 1-7. S. Matthew 15. 21-28.

Lent 3.

GOD Turmana, kamam we tiasiko, Ka sagarag lolowia o sul nompepewu kel anama we maros lava Iniko; Ka sigag namatuama we vavaka si a tigoro kamam nan o tavalalea nan; mun Jesus Christ i Lord kamam. Amen.

Ephesus 5. 1-14. S. Luke 11. 14-28.

Lent 4.

GOD Turmana, kamam we sar gese si Ka veveg qalo kamam ape nomam o gagapalag we malkeke: pa kamam we tataro muniko apena si Ka magarosa kamam, wa Ka go masur kamam mun Nom o sogov; mun Jesus Christ i Lord kamam. Amen.

Galatia 4. 21. S. John 6. 1-14.

Lent 5.

GOD Turmana, ikamam we tiasiko, Ka sagarag magarosa ma avune tanun anama nan; Ka riga goro, Ka kokor vagae naturiamam wa naatamam, o manigiu Nom o lolowia we lava; mun Jesus Christ i Lord kamam. Amen.

Palm Sunday.

GOD Turmana, Tur esu galava, Ko me tape lolomalumlum o tanun nan, Ko me suware ma Natuma, i Vaesumam Jesus Christ, Ni saru goroa mun navisogomam, Ni mate vawo wolowolo, si o tanun nan a nompepewu, tataga Ineia me nompepewu aneanea; Ka vasoal magarosa ma mun kamam, si kamam a toga malumuaga tataga namatevuna, a tavaraka kel amaia me tavaraka kel vets; mun Neia gina i Jesus Christ i Lord kamam. Amen.

Philippi 2. 5-11. S. Matthew 27. 1-54.

Monday amoa nan Easter.
Isaiah 63. S. Mark 14.

Tuesday amoa nan Easter.
Isaiah 50. 5. S. Mark 15. 1-36.

Wednesday amoa nan Easter.
Hebrew 9. 16. S. Luke 22.

Thursday amoa nan Easter.
1 Corinth 11. 17. S. Luke 23. 1-49.
 

GOOD FRIDAY.

GOD Turmana, kamam we tataro tias muniko, Ka sagarag magarosa ira mermereima iloke, apen i Lord kamam Jesus Christ me ukeg matapuna kelua apen kamam mun i manirinia, wa ilo panera ganganor, wa me mate vawo wolowolo; wa ilokenake Ni we esu we maranaga goro amaiko wa o Vui we Rono, God tuwale, o ulusui tagai. Amen.

GOD Turmana, Tur esu galava, Nom o Vui we riga goro we ge rono o turie Loglue nol; Ka tinqoro ikamam we tataro tias muniko ape tanun nan ira soesoe Loglue anama, ineira nol a mawmawui valval tama Ko me logira ma ti apena, mun o toqai we nun wa we rono; mun i Lord i Vaesumam Jesus Christ. Amen.

GOD Magarosa, Ko me tin o tanun nan, Ko gate nustup i gene Ko me tin ti, Ko gate maros isei ganganor ni mate, nava ni vusiag kel nan o ganganor ni esu; Ka magarosa ira ta Israel qale siriga, wa o tanun nan a marama gate gilala Iniko si we nonom valvalil apeniko. Lareag nan neira o qurega, wa o toqai wasvat, wa o tamtames goro Nom o Vavae. Lord turwia, lav kelura mulan ma ilo vavtig sheep anama, neira esu tuwale amaira tur tanun ta Israel; neira vavtigiu tuwale, amen i Altag goro ituwale, i Jesus Christ i Lord kamam, Ni we esu we maranaga goro amaiko wa o Vui we Rono, God tuwale, o ulusui tagai. Amen.

Hebrew 10. 1-25. S. John 19. 1-37.

Saturday amoa nan Easter.

LORD, Ka ge kamam me la veta momam o Vasugrono ilo matean Natuma turwia i Vaesumam i Jesus Christ, si a tavig tuwale kamam amaia mun o ge mate vagae nomam o tortoron kiskislag nan; wa ikamam a vinir lue o qarana wa o mategeara matea ilo tavaraka kel malakalaka; o manigiu Ni me mate, wa me saloa, wa Ni me tavaraka kel apen kamam, i Natuma Jesus Christ i Lord kamam. Amen.

I S. Peter 3. 17. S. Matthew 27. 57.

O QON EASTER.

GOD Turmana, Ko me mana o matea mun Natuma tuwale wora i Jesus Christ, wa Ko me waka mun kamam o mategeara esu galava apena; kamam we tias aperig Iniko Nom o moe sogov ni moai goro natoqamam mun o maros nan we wia, wa Ka pirin vagae kamam si a gagapalag tataga lai; mun Jesus Christ i Lord kamam, Ni we esu wa we maranaga goro amaiko wa o Vui we Rono, God tuwale ran, o ulusui tagai apena. Amen.

Colose 3. 1-7, S. John 20, 1-10.

Monday ape kule Easter.
Gag. 10. 34-43. S. Luke 24. 13-35.

Tuesday ape kule Easter.
Gag. 13. 26-41. S. Luke 24. 36-48.

O Sunday o moai ape kule Easter.

MAMA Turmana, Ko me la ma Natuma wotuwale sin mate ape nomvitag napugamam, sin tavaraka kel ape ge taniniga kamam; Ka vasoal ma mun kamam, kamam a mapvitag o leaven talo lologona wa o ganganor; kamam a mawmawui vagae muniko mun o togara we matartoga, wa mun o linai we nun, mun Natuma i gagapalag sar goro napugamam, i Jesus Christ i Lord kamam. Amen.

1 S. John 5. 4-12. S. John 20. 19-23.

Easter 2.

GOD Turmana, Ko we la ma Natuma tuwale wora, sin oloolo ape pugamam, wa sin map mulan namakalina mun kamam ape togara we rono; Ka vasoal ma mun kamam a la varean o moe sogov ilone we poa sal nomam o nonomia, wa a vasosov kel kamam valqon si a tataga namalekana turwia ape Non o togara tur rono; mun Neia gina, i Jesus Christ, i Lord kamam. Amen.

1 S. Peter 2. 19. S. John 10. 11-16.

Easter 3.

GOD Turmana, Ko we valawar irasei to leralera ti mun Nom o vavae we nun, si neira a vusiag kel ilo matesale taniniga; Ka vasoal munrasei nol Ko me lav pata veta ineira si a pul tuwale amera soesoen Christ, neira tikula o gene nan we sea nan o linai neira me vatavata veta ti apena; neira tataga o gene nan we tira ape linai ilone; mun i Lord ikamam i Jesus Christ. Amen.

1 S. Peter 2. 11-17. S. John 16. 16-22.

Easter 4.

GOD Turmana, Iniko tuwale we ave lai nalolora tanun ganganor nan, nan wa ronoleasag, nan wa maros popolotag o gene nan; Ka vasoal mun o sul anama, kamam a tape o gene nan Ko we vatran, a maros o gene nan Ko me ligog ti apena; wa alo kamam qale toga iake ale vatitne gene nan we varvarleas, wa we sagesaru, nalolomam a kata maremare ape linai ilone we tira ape tur malakalaka galava; mun Jesus Christ i Lord kamam. Amen.

S. James 1. 17-21. S. John 16. 5-15.

Easter 5.

LORD, Qeteg gene we wia nan; Ka mapsag ma ilo toqara tanun aperig anama o nonomia nan we wia; Ka ave magarosa ikamam si a gagapalag tataga; mun Lord ikamam, i Jesus Christ. Amen.

S. James 1. 22. S. John 16. 23a.
 

O QON MULE KALO. Ascension Day.

GOD Turmana, kamam we nomtup apen Jesus Christ, Natuma wotuwale, i Lord kamam, me mule kalo ivunana; Ka ge kamam mulan a mule kalo aia alo lolomam mun nomam o nonomia nan, si kamam a goara tasovule amaia; Ni we esu wa we maranaga amaiko wa o Vui we Rono, God tuwale, o ulusui tagai. Amen.

Gag. 1. 1-11. S. Mark 16. 14.

Sunday ape kule Qon Mule Kalo.

GOD, Maranaga lenas, Ko me sau kale Natuma tuwale word i Jesus Christ mun o rororov wa o lakalaka we poa ilo marana anoma avunana; kamam we tias Iniko, nipea tivtag kamam si a manua nan; pa suware Nom o Vui we Rono ma, Ni varagai kamam; wa Ni sau kale kamam ilo vatine i Vaesumam i Christ me va moai veta aia; Ni we esu wa we maranaga tuwale amaiko wa o Vui we Rono, o ulusui tagai. Amen.

1 S. Peter 4. 7-11, S. John 15. 26-16. 4a.

WHITSUNDAY. O Qon Pentecost.

GOD, Ko we vatogo tama qarig natoqara sul anama we nomtup, mun o suware at muneira o valawar Vui we Rono; Ka vasoal ma mun kamam o Vui ilone, kamam a nom mot qale ape savasava nan, wa a toga lolovatawasai galava mun Non o varagai we rono; mun Jesus Christ i Vaesumam me gagapalag sar apen kamam, wa we esu we maranaga amaiko wa o Vui ale matev God tuwale, o ulusui tagai. Amen.

Gag. 2. 1-12. S. John 14. 15-31a.

Monday ape kule Whitsunday.
Gag. 10. 34. S. John 3. 16-21.

Tuesday ape kule Whitsunday.
Gag. 8. 14-17. S. John 10. 1-10.

TRINITY SUNDAY.

GOD Turmana, Tur esu galava; Ko me sogov ma mun kamam e tanun nan anama, si kamam a nomtup nun, wa si a manasag nalenasin Mama, wa o Natui, wa o Vui we Rono, mun o taqalon momogo goro God tuwale wora we mana maranaga; kamam we tiasiko si kamam we nomtup netenete galava tamaike, Ka turgoro vagae kamam nan o mala gene nan; Ko we esu we maranaga, God tuwale, o ulusui tagai. Amen.

Nanalue 4. S. John 3. 1-15.

O Qon we varean God alolona
ape Ni me qeteg munina o Line Ganarono.
(“Corpus Christi.”)

Thursday ape kule Trinity Sunday.

LORD, Ko me ge si alo Sacrament we Rono iloke, Ko we vaglala mun kamam Nom o Ronovivtig alolona; Ka ge si kamam a nomtup momogo o gene vagis nan we Rono tape Turiama wa Nanarama, si kamam a ronotag suar ale lolomam vagae o mana esuva tapena; Ko we esu wa we maranaga amen o Mama alo pultuwale mon o Vui we Rono, God Tuwale, o marama o ulusui tagai. Amen.

1 Corinth 11. 23a-28. S. John 6. 53-63.

O Sunday o moai ape kule Trinity.

GOD, varagai irasei nol we matueg avunama, lav magarosa nomam o tataro. Iniko ta itagai kamam tete ge lai magasemam o gene we wia si ta tuwale, o manigiu namatevumam we mageregere wa o matea alolona; pa Ka tuan kamam mun Nom o sogov, si kamam a nom mot, a tataga ape gene nan Ko te ilo mana, mun o kokor Nom o lea vatran; mun Jesus Christ i Lord kamam. Amen.

1 S. John 4. 7. S. Luke 16. 19.

Trinity 2.

LORD, Ko tete mot o tuan wa o riga goro irasei Ko we vatanaura si a momogo wa si a tape tasovule Iniko; Ka tnatag goro wa Ka kokor goro kamam, wa Ka ge kamam a momogo vagae, wa a tape galava nasasama we rono; mun Jesus Christ i Lord kamam. Amen.

1 S. John 3. 13. S. Luke 14. 16-24.

Trinity 3.

LORD, kamam we tiasiko, si Ka ronotag magarosa ikamam, Ko me le ma mun kamam si kamam a maros lava o tataro muniko; Ka turgoro wa Ka varagai masur kamam alo mateawota nan wa alo mala sava nan we vatriv goro kamam; mun Jesus Christ i Lord kamam. Amen.

1 S. Peter 5. 5a. S. Luke 15. 1-10.

Trinity 4.

GOD, Ko we turgoro irasei we sov apeniko; pa si kamam qe toga asau naniko, tete toga maremare, tete toga rono lai; Ka tuan wa Ka vagaqoqo ma Nom o magarosa mun  kamam; wa Ko we riga goro kamam, wa we tursalemoa kamam, kamam a vinir lue o gene nan we sagesaru, tete ava o gene nan te gale toga galava; Mama avunana, vasoal ma mun kamam o ike, mun Jesus Christ i Lord kamam. Amen.

Rome 8. 18-23. S. Luke 6. 36-42.

Trinity 5.

LORD, kamam we tiasiko, Ka riga goro o gene nan te wotawota ma alo marama iloke, ni toga tamata; Nom o Loglue ni mawmawui malakalaka muniko, ni toga rono, ni toga wasawasa; mun Jesus Christ i Lord kamam. Amen.

1 S. Peter 3. 8-15. S. Luke 5. 1-11.
 

Trinity 6.

GOD, Ko me ge taurmate munrasei we tape Ko o gene nan, we wia, isei tete nonom galo lai apena; Ka lin siwo ilo lolomam o tur tape Iniko; kamam a tape aneane Ko nan o savasava nan, qara la lai o gene nan Ko me ligog ti apena, pa we wia sal nomam o toroniva; mun Jesus Christ i Lord kamam. Amen.

Rome 6. 3-11. S. Matthew 5. 20-26.

Trinity 7.

LORD, Qeteg mana wa vavakae; Ko me tin wa Ko we vasoal ma o gene nan we wia; Ka sou alo lolomam o tape nasasama: Ka ge lul alo ikamam naturlinama; Ka tokos kamam mun o moe gene nan; Ka matagisgis goro magarosa kamam, nan wa sipa wia anaisa; mun Jesus Christ i Lord kamam. Amen.

Rome 6. 19. S. Mark 8. 1-9.

Trinity 8.

GOD, Ko gate mot o riga goro o gene nan avunana wa alalanana; kamam we tias aperig Iniko, Ka mapvitag nan kamam o gene nan te ge tatas kamam, Ka vasoal ma mun kamam o gene nan te ge wia kamam; mun Jesus Christ i Lord kamam. Amen.

Rome 8. 12-17. S. Matthew 7. 15-21.

Trinity 9.

LORD, kamam we tiasiko, Ka sogov ma mun kamam o matevui we wia si kamam a nonom vagae, wa a gagapalag vagae o gene nan we taniniga. Kamam qe asau naniko, tete ge lai o gene we wia, si ta tuwale; pa Ka manag kamam si a toga tataga Nom o maros; mun Jesus Christ i Lord kamam. Amen.

1 Corinth 10. 1-13. S. Luke 16. 1-9.

Trinity 10.

LORD, Ka ti tawala magarosa naqoroma munra tanun aperig anama we tataro muniko; Ka ge kamam a paere o gene nan Ko we maros, si kamam a taur qalo lai o gene nan we tataro apena; mun Jesus Christ i Lord kamam. Amen.

1 Corinth 12. 1.11. S. Luke 10, 41-47a.

Trinity 11.

GOD, Ko we gaganag lue Ko raka sage si we turmana anoane, mun o magarosa wa o lolotape kamam; Ka tirag magarosa ma mun kamam o sogov, kamam a valago ale matesale Lea anoma, qara la lai o gene nan Ko me ligog matapuma ti apena; qara taur saratuwale amaiko Nom o moe gene nan avunana; mun Jesus Christ i Lord kamam. Amen.

1 Corinth 15. 1-11. S. Luke 18. 9-14.

Trinity 12.

GOD Turmana, Tur esu galava, Ko we togtogoa vagae ape ronotag nan kamam ape tataro; Ko we la ma mun kamam we poa nan kamam we maros, si we sar apena; Ka lin siwo avunamam Nom o sale magarosa nan; Ka nomvitag o gene nan nalolomam we nomkel momogo apena; Ka le ma mun kamam o gene nan we wia, kamam gate sar matapumam si a tataro apena, pa we sar gina mun Natuma i Jesus Christ i Lord kamam, i Tinanai, i Gagapalag sar apen kamam. Amen.

2 Corinth 3. 4-9. S. Mark 7. 31.

Trinity 13.

GOD Turmana, Tur magarosa, Ko ta sogov ma, o tanun matanur anama nan qara mawmawui muniko mun o linai we nun, Ko te vareanira apena; kamam we tataro muniko, Ka ge kamam a mawmawui matanur muniko iake alalanana, si kamam a la qalo lai anaisa o gene nan tavunana Ko me ligog ti apena mun Jesus Christ i Lord kamam, me gagapalag sar apen kamam. Amen.

Galatia 3. 16-22; si Hebrew 13. 1-6, S. Luke 10. 23a-37.

Trinity 14.

GOD Turmana, Tur esu galava, Ka vasoal tuan ma mun kamam o nomtup, wa o maros nerei, wa o tapeva; Ka ge kamam a tape o gene nan Ko we vatran apena; kamam qara la lai o gene nan Ko me ligog ti apena; mun Jesus Christ i Lord kamam. Amen.

Galatia 5. 16-24. S. Luke 17. 11-19.

Trinity 15.

LORD, kamam we tiasiko, Ka ilogoro Nom o Loglue mun o magarosa tasovulea. Si qe toga asau naniko, kamam to masu gaplot, ape matevumam we mageregere. O manigiu o ine, Ka kokomatag goro kamam nan o sava tea wa ge manaras kamam; Ka tursalemoa lai kamam, si a nina o gene nan we tira ape esu galava; mun Jesus Christ i Lord kamam. Amen.

Galatia 6. 11. S. Matthew 6. 24.
 

Trinity 16.

LORD, kamam we tiasiko, Ka ge wenewene, Ka turgoro Nom o Loglue mun o magarosa tasovulea: Ka matag goroa vagae mun o tuania, wa mun o lolowia; ape ni tete goara wasawasa si Ko qe tete pirinia; mun Jesus Christ i Lord kamam. Amen.

Ephesus 3. 13. S. Luke 7. 11-17.

Trinity 17.

LORD, kamam we tataro muniko, Nom o sogov ni moai goro, ni tataga kamam; kamam a rowogis vagae ape gagapalag nan we wia; mun Jesus Christ i Lord kamam. Amen.

Ephesus 4. 1-6. S. Luke 14. 1-11.

Trinity 18.

LORD, kamam we tataro muniko, Ka sogov ma mun o tanun nan anama, kamam a gintag goro lai o galeve marama, wa o visogoi, wa i Satan; kamam a tataga Iniko, tur God tuwale, mun o toqai wa o nonomia we matartoga; mun Jesus Christ i Lord kamam. Amen.

1 Corinth 1. 4-8. S. Matthew 22. 34.

Trinity 19.

GOD, kamam qe asau naniko, tete ge lai magasemam o gene nan Ko we maros. Ka vasoal magarosa ma mun kamam Nom o Vui we Rono, Ni ave vagae, Ni riga goro vagae nalolomam; mun Jesus Christ i Lord kamam. Amen.

Ephesus 4. 17. S. Matthew 9. 1-8.

Trinity 20.

GOD Turmana, Tur magarosa, Ka tigoro kamam, mun namatevuma we wia aneane, nan o gene nan wa ge manaras kamam; naturiamam wa naatamam a togtogoa ape ge taurmate matapura o gene nan iloke Ko me vatran kamam ti apena; mun Jesus Christ i Lord kamam. Amen.

Ephesus 5. 15-20. S. Matthew 22. 1-14.

Trinity 21.

LORD Turmagarosa, kamam we tataro muniko, Ka vasoal munra tanun anama we nomtup o nomvitag-pugai wa o tamata; kamam a wenewene nan napugamam nol, a mawmawui apesov muniko; mun Jesus Christ i Lord kamam. Amen.

Ephesus 6. 10-20. S. John 4. 46a.

Trinity 22.

LORD, ikamam we tiasiko, Ka matagisgis goro ira mereima o Loglue, ni toga rono tasovule; Ka turgoroa nan o malagene nan; ni mawmawui lolotitin muniko, ni gagapalag o gene nan we wia; nasasama we rono ni ronoga apena; mun Jesus Christ i Lord kamam. Amen.

Philippi 1. 3-11. S. Matthew 18. 21.

Trinity 23.

GOD, Iniko i Rurunamam wa nomam o Vavakae, i Qeteg gene nan we wia; Ka ronotag togtogoa Nom o Loglue we tataro lolotitin muniko; kamam a la qalo lai o gene nan kamam we tataro nomtup apena; mun Jesus Christ i Lord kamam. Amen.

Philippi 3. 17. S. Matthew 22. 15-22.

Trinity 24.

LORD, kamam we tataro muniko, Ka ul savrag o ganganor nan a tanun nan anama; Ka lolowia alena ikamam, kamam nol qara vuras lue nan o garotrot, wa si o ganganor, kamam me ge, o manigiu kamam we mageregere. Vasoal ma iloke, Mama avunana, mun o nonom apen Jesus Christ, i Lord turwia, i Vaesumam. Amen.

Colose . 3-12. S. Matthew 9. 18-26.

Trinity 25. O Sunday amoa nan Advant.

LORD, kamam we tataro muniko, Ka vasosov nalolora tanun nan anama we nomtup, si kamam a uwa linlin lai o wo gagapalag we wia nan, Ko to sar alena mun kamam anaisa apena; mun Jesus Christ i Lord kamam. Amen.

¶ Si o Collect nan iloke gate tira ape Sunday nan ape kule Trinity pirin mun o tuan Collect talo Nanalue gate vasogo tiga, pa si qe qoqo sal, lagau o tuaniu; nava vasogo iloke ape Trinity 25 alo Sunday amoa nan o Advent.
 

Saint Andrew.
November 30.

GOD Turmana, Ko me sogov aneane mun nasalama we rono i Andrew o sogov, wa ni me manas goro togtogoa nalinan i Natuma i Jesus Christ me suwarea ti, wa gate maul, pa me tataga Ineia apena. Ka vasoal ma mun kamam nol, si tame me suware veta kamam ma mun Nom o Vavae we Rono, kamam a ukeg gaplot kel kamam si a meremanas tamaine; wa si a gagapalag taso ran Nom o Lea vatran nan we rono; mun Neia gina i Jesus Christ i Lord kamam. Amen.

Rome 10. 9. S. Matthew 4. 18-22.

Saint Thomas.
December 21.

GOD Turmana, Tur osu galava, Ko me ukeg nasalama we rono i Thomas sin nom varuarua ape Natuma me tavaraka kel, o manigiu si a vatira netenete nomam o nomtup apena. Ka vasoal ma mun kamam si kamam nipea nom varuarua ilo, pa si kamam a nomtup mantag i Jesus Christ; o manigiu si tete tames goro lai nomam o nomtup alo nagoma anaisa. Lord, Ka ronotag kamam mun Neia i Jesus Christ; we munia gina, wa muniko, wa mun o Vui we Rono, o ronoga nol we o lenas, ilokenake ti tuai ti tuai. Amen.

Ephesus 2. 19. S. John 20. 24.

S. Paul we nomris.
January 25.

GOD, Ko me ge o sinesine Lea we wia sin valawar val marama, mun o Sala turwia i gene we rono i Paul me toretore apena; kamam we tiasiko si Ka sogov ma mun kamam, si kamam a nomnomkel ape toqana me ris mun o vasasa tamaine; we si kamam a manasag lai nomam o line varean apena, mun o tataga o linai we rono ilone ni me vatogo ti; mun Jesus Christ i Lord kamam. Amen.

Gag. 9. 1-22. S. Matthew 19. 27.

Me lav Jesus ilo Vatine we Rono. O Qon ge Wenewene.
February 2.

GOD Turmana, Tur esu galava, kamam we tataro aperig muniko mun o nonom nalenasima, si, tama me map goro nanagoma, i Natuma wotuwale alo tanoma we rono tama qarig alo matev visogomam, te map kamam mulan tamaine mun natoqamam we wenewene wa we matartoga; mun Neia gina i Natuma i Jesus Christ i Lord kamam. Amen.

Malachi 3. 1-12. S. Luke 2. 22-40.

Saint Matthias.
February 24.

GOD Turmana, Ko me iloraka o rowrowovag kokomag anama i Matthias ilo tanon i manirin i Judas, si a vasogoa amaira Sala sanavul tuwale o numei nirua; Ka sogov ma mun Nom o Loglue sin toga wasawasa galava lai nan o Sala sonson, ira Ilogoro kokomag wa we nun to riga goro vagae wa we ave laia; mun Jesus Christ i Lord kamam. Amen.

Gag. 1. 15. S. Matthew 11. 25.

O Angel me nanalue mun Saint Mary.
March 25.

LORD, kamam we tataro muniko si Ka lin siwo ma Nom o sogov ilo lolomam; wa tamakamam me lolomaran veta ape Natuma Jesus me taur o matev visogoi, mun nalinan o Angel me gaganag ti apena, si Ka lav kamam tamaine mun Non o wolowolo wa o ronovivtig ilo Non o tavaraka kel lenas; mun Neia gina i Lord kamam i Jesus Christ. Amen.

Isaiah 7. 10-16. S. Luke 1. 26-38.

Saint Mark.
April 25.

GOD Turmana, Ko me vatogo Nom o Loglue we rono mun o linai tavunana, amon Mark me rave Nom o Lea we wia apena; Ka sogov ma mun kamam, si kamam nipea tama o natmera nan, o line galegale we sawsawu gap ma te rirvag kelkel lai kamam; nava si Ka vatira netenete kamam alo linai we nun tape Nom o Lea we wia we rono; mun Jesus Christ i Lord kamam. Amen.

Ephesus 4. 7-16. S. John 15. 1-11.

Saint Philip tana Saint James.
May 1.

GOD Turmana, o Esu galava we tira alo we lolomaran Iniko; Ka sogov ma mun kamam si a gilala mantag apen i Natuma Jesus Christ si Neia o Matesala, wa o Nun, wa o Esu; kamam a tataga lai namalekanra Sala anama we rono i Philip tana James, wa a vara netenete alo matesala to rowolue ilo esu galava; mun Neia gina i Natuma i Jesus Christ i Lord kamam. Amen.

S. James 1. 1-12. S. John 14. 1-14.

Saint Barnabas.
June 11.

LORD God Turmana, Ko me saru vagaqoqo ivunan i Sala anama we rono i Barnabas mun o moe sogov Vui we Rono; kamam we paere muniko, nipea tivtag kamam si a toga mamasa nan Nom o sale sogov nan, si nan o mina te pirin kamam si a gagapalag vagae mun o sogov nan ilone, nasasama ni ronoga ni lenas apena; mun Jesus Christ i Lord kamam. Amen.

Gag. 11. 22. S. John 15. 12-16.
 

Saint John i Vasugrono.
June 24.

GOD Turmana, Ko me ge vasarig apen i rowrowovag anama i John i Vasugrono sin wota mun o vasasa, wa me suwarea ma sin wurvag namatesalan i Natuma i Vaesumam mun o toretore o nomleas; Ka ge ikamam a tataga lai nalinana wa non o togara we rono, si kamam a nomleas nun tama ni me toretore ti apena; wa si kamam a tataga namakalina, wa te tira netenete si a vava nun, te wawan lue si a norov goro o togara kiskislag, wa te rono malumuaga si a vatira o line nun; mun Jesus Christ i Lord kamam. Amen.

Isaiah 40. 1-11. S. Luke 1. 57.

Saint Peter.
June 29.

GOD Turmana, Ko me sogov mun nasalama i Peter o moe gene we qoqo, mun i Natuma Jesus Christ, wa Ko me vatran maremare ineia sin vanan pulam o vavtig sheep; kamam we tiasiko, Ka ge ira Bishop nan tara Altag-goro nol, si neira manasag tinegaro Nom o Vavae we rono; wa Ka ge o sul si neira manas goro tataga, neira taur mora o vilvilqat lenas te galava apena; mun Jesus Christ i Lord kamam. Amen.

Gag. 12. 1-12. S. Matthew 16. 13-19.

Saint Mary Magdalen.
July 22.

LORD Jesus Christ, Ko me ge nanalue keluko mun Saint Mary Magdalen alo qon ilone Ko me tavaraka kel; Ka ge si, alo qon tavtavaraka kamam a iloilo laiko nagoi pe nagoi, wa kalo pata lai ilo tanotogatoga nan ilone Ko me ge taurmate ti munrasei we tapeko; Ko we esu wa we maranaga aia amen o Mama wa o Vui we Rono, God tuwale ran ti tuai ti tuai. Amen.

1 S. John 4. 7-11. S. John 20. 11-18.

Saint James.
July 25.

GOD Magarosa, Ka vasoal ma mun kamam, si tama nasalama we rono i James me toavtag i tamana wa pulan o savasava, wa me mawui goro togtogoa nalinan i Natuma Jesus Christ me suwarea ti, wa me tataga ran Ineia; si kamam gina tamaine a tikula momam o tortoron nan talo marama wa talo visogoi, wa a toga taurmate vagae si a tataga Nom o val vavae vatran we rono; mun Jesus Christ i Lord kamam. Amen.

Gag. 11. 27-12. 3. S. Matthew 20. 20-28.

Natarapen Jesus me Lenas.
August 6.

GOD, Iniko me ge nanalue vawo tauwe mun ratol me ilo raka ti si a gaganag we tira apena, i Natuma tuwale wora, natarapena me sea, o gene vagis qa, alo siopa we aqaga les wa we sinasina; Ka vasoal magarosa ma mun kamam si kamam a toga wasawasa lai nan val sava tea talo marama iloke we ge kiria naapemam, wa si namomam anaisa si a sagarag i Maranaga alo matevuna tur lulum; Ineia amaiko, o Mama, wa amen o Vui we Rono, we esu wa we maranaga, God tuwale ran, o marama o ulusui tagai. Amen.

2 S. Peter 1. 13-17. S. Luke 9. 28-36a.
 

Nasasan Jesus.
August 7.

GOD Turmana, mun nasasan Natuma meratape Jesus Christ Ko me ge o vasasa nan mun napanera Sala tara Rono nan; wa Ni me vatavata wa si isei qe tataro muniko alo sasana Ko te ronotagia ran; Ka ronotag ilokenake ikamam we tataro muniko, Ka manag momam o gagapalag, Ka vaesu naatamam wa naturiamam mun Ineia gina Jesus i Lord wa i Vaesumam; Ni we esu wa we maranaga amaiko wa o Vui we Rono, God tuwale wora o ulusui tagai. Amen.

Philippi 2. 1-11. S. Mark 16. 15-18.

Saint Bartholomew.
August 24.

GOD Turmana, Tur esu galava, Ko me sogov mun nasalama i Bartholomew o sogov, sin nomtup nun wa sin manasag Nom o Vavae; kamam we tiasiko Ka vasoal ma mun Nom o Loglue, sin maros lava o Vavae ilone ni me nomtup ti, wa si a manasag wa o taur mulan tamaine; mun Jesus Christ i Lord kamam. Amen.

Gag. 5. 12-16. S. Luke 22. 24-30.
 

O Wolowolo we Rono.
September 14.

MAMA Tur magarosa, Ko me tape tamaine o marama, si Ko me ukeg Natuma meratape Jesus Christ Ni mate vawo Wolowolo apen kamam; Ka ge si kamam a nom mava vagae o vaglala we rono ilone, wa a vagalo maremare alalanana ape kikin Christ, kamam gai nina lai ilo Non o marana, Ni we esu we maranaga aia amaiko wa o Vui we Rono, God tuwale ran ti tuai ti tuai. Amen.

Hebrew 12. 1-3. S. John 3. 14.

Bishop Patteson.
September 20.

GOD Turmana, Ko me nit tuwale ira gene iloraka anama mun o vavtigiu tuwale wa o pulpul tuwale alo turian i Natuma we vagis i Christ i Lord ikamam; Ka vasoal ma mun kamam o sogov, si kamam a tataga lai namakalin i gene anama, John Coleridge Patteson, i Bishop o moai to Melanesia; wa o Martyr, alo val togara we wia tape linan God; wa si kamam a nina lai tamaine o tano lakalaka ilone isei tete gaganag mantag lai apena, pa Ko me ge taurmate veta munrasei we tape vatawasai Iniko; mun Jesus Christ i Lord kamam. Amen.

Gag. 7. 55. S. Matthew 19. 27.

Saint Matthew.
September 21.

GOD Turmana, mun Natuma turwia Ko me log i Matthew nan o tano lele som sin Sala wa sin rave Nom o Lea we wia; Ka vasoal ma mun kamam o sogov, si kamam a mapvitag lai o tortoron nan we ararike wa we mansom; wa si kamam a tataga lai Ineia, i Natuma gina i Jesus Christ, we esu wa we maranaga tuwale amaiko wa o Vui we Rono, God tuwale ran, ti tuai ti tuai. Amen.

2 Corinth 4. 1-6. S. Matthew 9. 9-13.

Saint Michael tara Angel nan.
September 29.

GOD Tur esu galava, Ko me qeteg moma wa me vonog ira Angel nan wa o tanun nan si a gagapalag tapare muniko, kamam we mamakei apena. Ka vasoal magarosa ma si, tama ira Angel nan anama we rowogis vagae muniko avunana, neira pirin wa a tigoro kamam alalanana tamaine, ape Ko te varegira apena; mun Jesus Christ i Lord kamam. Amen.

Nan. 12. 7-12. S. Matthew 18. 1-10.

Saint Luke.
October 18.

GOD Turmana, Ko me log i Luke i Gismana, non o ronoga nave alo Lea we wia, sin rave o Lea ilone, wa sin gismana atai: Ka lolowia kamam, Ka manag moma o vavae vatogo ni we la ma tama o pei vaesu, si kamam a mauka lai nia nan o val gopae te gege naatamam; mun i Natuma we sar leas ikamam i Jesus Christ i Lord kamam. Amen.

2 Timothy 4. 5-15. S. Luke 10. 1-7a.

Saint Simon tana Saint Jude.
October 28.

GOD Turmana, Ko me taur raka Nom o Loglue avune sagerana, ira Sala tara Prophet nane, i Jesus Christ o qat vat tape sigrai apena; Ka vasoal ma mun kamam si kamam a vagarat tamaine alo pultuwale Vui mun nor o line vatvatogo, si kamam mulan a toga o Ima we Rono we tangemarmaros apena; mun Jesus Christ i Lord kamam. Amen.

S. Jude 1-8. S. John 15. 17.

Ira Rono nan.
November 1.

GOD Turmana, Ko me nit tuwale ira gene iloraka anama mun o vavtigiu tuwale wa o pulpul tuwale alo turian i Natuma we vagis i Christ i Lord ikamam; Ka vasoal ma mun kamam o sogov, si kamam a tataga lai ira Rono nan anama, ira gene vawia nane, alo val togara we wia tape linan God; wa si kamam a nina lai tamaine o tano lakalaka ilone isei tete gaganag mantag lai apena, pa Ko me ge taurmate veta munrasei we tape vatawasai Iniko; mun Jesus Christ i Lord kamam. Amen.

Nanalue 7. 2-12. S. Matthew 5. 1-12.

Naatara nol me Nomtup.
November 2.

GOD Turmana, Ko we lav naatarasei qe toa nan o marama iloke alo i Lord, neira esu amaiko; kamam we tataro muniko apen rasei nol me matevag o nomtup i Jesus i Vaesu, si neira a mapsag mantag a Paradise, a nina anaisa ilo qaraqara tavunana, Ko me ge taurmate ti mun rasei qe nomtup wa qe tapeko; munia gina i Tinanai i Tunkel kamam ilokenake wa alo paspasoane qon, Natuma meratape Jesus Christ. Amen.

Nan. 20. 4-6. S. John 14. 1-6.

Irasei we Rono we Seasea.

GOD Turmana, kamam we vareaniko apen i gene we rono anama, . . . . . . . . . . . . Ka ge si kamam a tataga tamaine namakalina we wia, si kamam a nina lai anaisa ilo marana tavunana, Ko we esu wa we maranaga aia, amen o Natui wa o Vui we Rono, tete paso lai. Amen.

Nanalue 7. 13. S. Matthew 18. 1-5.
 

Ape Qon ilone i King GEORGE
me geteg mun Maranaga goro inina.

December 11.

GOD, Ko we ilogoro o tanun nan anama mun Nom o mana, wa we maranaga gorora mun o tapeva, Ka vawia o tanun anama i King, si alalane panena o sul nan anana a toga wasawasa; Nom o Loglue a gagapalag mantag muniko, wa i King ni tapeko mun naatana nol, ni la vagae o tinegaro pe gagapalag nan we wia, ni nina, ape Ko we tursalemoa, ilo Nom o marana tete paso lai; mun Jesus Christ Natuma, i Lord kamam, Ni we esu wa we maranaga amaiko wa o Vui we Rono, God tuwale ti tuai ti tuai, o marama tete paso lai. Amen.

1 S. Peter 2. 11-17. S. Matthew 22. 16-22.

Ape Qon ilone
inina we Varean God alolona ape Gorogoro.

GOD Turmana, Mama Turmagarosa, Ko me tin wa qale ilogoro o marama nol, kamam we vareaniko ape gorogoro we lul Ko me ukeg ma mun kamam; wa ikamam we tataro muniko si alo qon ilone Ko te vatran ra Angel nan ilo gorogoro talo marama iloke, neira te ilo suar kamam o gorogoro we sar ape tano-gorogoro tavunana, amaira Rono tara Angel nan we momogo vagae aia Iniko wa o Natui wa o Vui we Rono, God tuwale wora, ti tuai ti tuai. Amen.

Varue Lea 16. 13-15. S. John 4. 34-38.