NA TATAR TOLO
No ma on sow, no ma matur, nan ino ma mamat kel, sur i Marnag ma rakato.
Da sursur lo na bugond min God nu man surwia.
Tog roroñ
|
Igian dol
God i Tamamam,
kamam ma da na sisat gorok
le dondomia, le le nan le danda.
Kamam ti tambek tia nin na tekwemam dol,
kamam ti tam tia na limbat tandun ñwar kamam kel.
Wo metenarov kamam, kamam nu tatar miniok,
wo da wendwend kamam dan na bugmam
nan wo biriñ kamam be davta le na bugmam dol:
nin Jisas Krais i nomam Marnag. Ñware.
I vevvev
Marnag metenarov, kamam nu tatar miniok
wo le minra noñ tandun nu mateg makeñ
na domvita bug nan na tañwat,
si ge da wendwend giniar dan na sisat dol,
nan si kier ge mogmogi miniok nin na lol malumlum:
nin Jisas Krais i nomam Marnag. Ñware.
Na tatar sa kweteg le kalke
V. Marnag, wo wak na ñusmam.
R. Na valamam sa sur lo na roroñ.
V. God, sambur geme da es kamam.
R. Marnag, sambur geme biriñ kamam.
V. War ronog na Tam, nan na Natluñwer, nan na Vu nu Roñ.
R. Ñwar aran, nan roniake, biti bas le tia. Ñware.
V. Aru war menmen i Marnag.
R. Kamam nu war menmen na sese Marnag.
|
Confession & Forgiveness |
Psalm 95
Aru van me, da rau na as min i Marnag,
gian da rau nin na rorov malaklak min na vat daes giand.
Da van gor na nagon va na lol varian;
da da na liñe as be varavo.
Sur i Marnag na God nu lav,
nan kisian na Marnag gor na god dol.
Na tam nu ror le maram nu tog le liman,
nan na non na gut to vila.
Na non na lam kisian ma tiñ tu,
nan na liman ma tiñ na tan masmas.
Aru van me da takwaloñ nan da mogmog ginia,
nan da vatikwo gor i Marnag i Tiñ igiand;
sur kisian i nond God,
nan igian na sul tale liman nan na sipsip tale navgi na non.
Aru roñtagor na liñan kwarig:
tog ker da kwat marmar na takwami,
ñwar le masai kisian ma da iel kami le vare worvan;
le masai ra tamami ma da ielo si sa mata na sa no sa da,
nan vakan kier ma mata vita na muguk mogmogi,
Na to sañavul vat na lolok ma an gin na tarañi sian;
nan no nu sur si: kier na sul maleler; kier ti valgiar tia na metsalak.
No ma ligog loloan le sasak:
kier biti dioñ le tia le nok tan momsa.
War ronog na Tam, nan na Natluñwer, nan na Vu nu Roñ:
ñwar aran, nan roniake, biti bas le tia, Ñware.
Kalke sa vev le na Revrev. Nan kwara vev na As tuwal dan na As geske:
NA TE DEUM LAUDAMUS
Kamam nu lolwia iniok, God;
kamam nu valgiar si iniok i Marnag.
Na maram dol nu mogmog giniok,
na Tam nu tog tagrand.
Ra eñsel dol nu war lav giniok,
ketket na val sav dol nu man lon;
ira kerubim nan ra serafim nu war tagrand si:
“Nu roñ, nu roñ, nu roñ,
Marnag God nin na navgi ta ketket.
Ketket nan lelañan nu vovor nin na siñarioñ.”
Na navgi sal nu ronog nu war ronog giniok.
Na bultuwal nera sirsirog le nu war ronog giniok.
Na navgi mate ra dondom nwot nu war ronog giniok.
Na Warlo nu roñ val vare dol nu war ronog giniok:
Na Tam, na noñ maran biti vaglal gor le tia;
i tur Natoñ, nu dom wend tuwal wor;
nan na Vu nu roñ i Verge.
Krais, iniok in Marnag nu ronog,
iniok Nat na Tam, nu tog me aran.
Niok ma kweteg rak be da es ra tandun dol,
niok ti tarwa ti mia na tekwe togwaswas.
Niok ma levta na roñmagavia dan na mate,
niok ma wak na maran ta ketket minra domtum.
Niok nu siag le matuan God le sioñsioñ nin na Tam.
Kamam nu domtum si niok sa kel me ñias si sa veveg kamam.
Kamam nu tatar miniok si niok sa biriñ kamam ra tandun na noñ
dol
niok ma wol kel kamam nin na kweskwese darañ.
Wo vev saratuwal kamam mira tandun dol nu roñ le sioñsioñ
ti tog tagrand.
esi
|
|
DA WARWIA I MARNAG GOD TA
ISRAEL
Da warwia i Marnag God ta Israel,
sur kisian ma vatev nan ma wol kel na sul na non.
Nan kisian ma vatrug kai min gland i Daesond
me dan le tarañi tami na non rowrow i Deved.
Kisian ma vatvatu nin na velera sirsirog le na noñ nu roñ
le kwotog maram diañ roniake,
si kisian sa da es igiand dan na tavalele na nond,
dan na lime rase nu mata sisat gin giand.
Kisian ma vatvatu si kisian sa mata metenarov ginra tombond
nan sa da dondovon na noñ vatvat nu roñ,
na vatvat kisian ma da tu min i Ebraham tombond si sa da es igiand,
si sa le lo gin giand dan na nond tavalele,
si gian sa mogmog ginia ti nin na matawutian tia,
nin na togtog nu roñ nan nu tattaniog le nagon le val kwoñ
esond.
Nan iniok, natuk, sa wariok i sirsirog le ne kisian nu ketket magmagav,
kwotogian niok sa tur añwo va le nage Marnag si sa salmat na metsalan,
si ra sul na noñ sa lolmaran si kisian i Daesor,
sur kisian nu domvita na bogor.
Nin na lolmetenarov ne nond God
na maran sa tev mak giand,
si sa sinar irase nu tog le silsiliog nan le lani mate,
si sa av igiand le metsal tambe tanwat.
War ronog na Tam, nan na Natluñwer, nan na Vu nu Roñ:
ñwar aran, nan roniake, biti bas le tia. Ñware.
esi
PSALM 100
Aru rorov malaklak min Marnag, val vare dol:
aru mogmog malaklak min i Marnag,
aru van gor na nagon nin na raurau as.
Aru valgiar i Marnag si kisian God.
Kisian ma tin igiand, nan ti mug igiand tia.
igian ra sul na noñ nan na sipsip tale navgi na non.
Aru kai sar va na varian le metegear na non:
aru van nin na war ronog le tur saran, aru variania, aru warwia na sasan;
sur i Marnag nu wia, na noñ metenarov nu tog tagrand:
kisian nu tur surwia le val tarani dol.
War ronog na Tam, nan na Natluñwer, nan na Vu nu Roñ:
ñwar aran, nan roniake, biti bas le tia. Ñware.
|
Benedictus (Luke 1:68-79) |
NA DOMTUM NERA SAL
Na nu domtum God, na Tam nu man surwia,
ma tiñ ketket nan lelañan.
Nan i Jisas Krais Naton na wot tuwal i nond Marnag;
ma vune nin na Vu nu Roñ,
ma wot me dan na vavian togwaswas surwia Meri;
kisian ma roñ magavia le kwoñ i marnag Ponsas Paelat,
kier ge wos kal ginia mak wolwol,
ti mat, nan kier ge mambo le lia tamat.
Kisian ma sow le tnokw nera tamat.
Le vogtoli kwoñ ti tavrak kel dan na mate,
ti mol kal ketket,
ti siag he matuan God na Tam nu man surwia;
kisian sa kel me vila dan ae
be vaseg rase nu es nan irase nu mat vita.
Na nu domtum na Vu nu Roñ;
na Warlo nu roñ vai vare dol;
na bulbul nera roñ;
na domvita bug;
na tavtavrak kel ne na turi;
nan na es tagrand. Ñware.
I Marnag ti tog mi kami.
Nan miok vita.
Da tatar
Marnag, metenarov kamam.
Krais, metenarov kamam.
Marnag, metenarov kamam.
|
Apostles'Creed |
Mam ketket, kamam nu maros
na sasañ ti roñ,
noñ maran ti van me,
noñ maros ti le,
lalñan ñwar ketket.
Le me kwarig min kamam na gangan nu tatarias ben kwarig.
Wo domvita na bugmam
ñwar kamam nu domvita na bogor kier ma da
min kamam.
Togker kovkovta kamam le ñwergal;
wo le kamam dan na sisat.
Na noñ na maran, nan na man, nan na sioñsioñ,
ti tog tagrand. Ñware.
|
Lord's Prayer |
NA TATAR TAMBE WIK
NA TATAR TAMBE TAÑWAT
God, iniok na kweteg tañwat,
iniok nu maros kamam sa tog saratuwal,
ise mi valgiar giniok sa tor na es tagrand,
ise mi rowrow miniok sa tog wor surwia:
wo turgor kamam ira rowrow na noñ nu roñ malumlum,
le masai na nomam tavalele sa row sur kamam,
si kamam ge mateg surwia makeñ,
biti matawut le tia na man ne na nomam tavalele:
nin na man ne Jisas Krais i nomam Marnag. Ñware.
|
Collect for Peace |
NA TATAR TAMBE SOGSOG
Marnag, i Tamamam ketket,
God nu man surwia, i es tagrand,
niok ma le waswas kamam diañ na tolo ke:
wo turgor kamam kwarig nin na noñ man nu vavakan,
si kamam biti si tia le sisat kwarig,
nan biti rowler le tia le matewot.
Wo av nomam mogmogi dol
si kamam ge da vaga na sav kan nu tattaniog le nagoñ:
nin Jisas Krais i nomam Marnag. Ñware.
|
Collect for Grace |
NA TATAR NE S. KRISOSTOM
God nu man surwia,
niok ma le min kamam na sogsog
si kamam sa tatar saratuwal miniok roniake be sav nu wia min kamam,
nan niok ma vatvat tu
si na tandum iro si toi mi vugtuwal le sasañ
niok sa le na sav kier nu tiasiok ben.
Marnag, wo da tur na nomam dondomia,
ñwar si ti biriñ kamam surwia,
si kamam ge lolmaran be noñ sursurwia le maram ke,
nan kamam sa es tagrand le maram sa van me. Ñware.
Na sogsog mug nomam Marnag Jisas Krais,
nan na tamtam ne God,
nan na bulbul ne na Vu nu Roñ
sa tog mi kamam dol tagrand. Ñware.
|
Prayer of St. Chrysostom |
|
NA TATAR RAVRAV
No sa on sow le tañwat, no sa matur, sur iniok gom, Marnag, nu
matagor waswas gino.
Da sursur lo na bugond min God nu man surwia.
Tog roroñ
|
| Igian dol God i Tamamam,
karnam ma da na sisat gorok
le dondomia, le le nan le danda.
Kamam ti tambek tia nin na tekwemam dol,
kamam ti am tia na limbat tandun ñwar kamam kel.
Wo meten ov kamam, kamam nu tatar miniok,
wo da wendwend kamam dan na bugmam
nan wo biriñ kamam be davta le na bugmam dol:
nin Jisas Krais i nomam Marnag. Ñware.
I vevvev
Marnag metenarov, kamam nu tatar miniok
wo le minra noñ tandun nu mateg makeñ
na domvita bug nan na tañwat,
si ge da wendwend giniar dan na sisat dol,
nan si kier ge mogmogi miniok nin na lol malumlum:
min Jisas Krais i nomam Marnag. Ñware.
Na tatar sa kweteg le kalke
V. Marnag, wo wak na ñusmam.
R. Na valamam sa sur lo na roroñ.
V. God, sambur game da es kamam.
R. Marnag, sambur geme biriñ kamam.
V. War ronog na Tam, nan na Natluñwer, nan na Vu nu Roñ.
R. Ñwar aran, nan roniake, biti bas le tia. Ñware.
V. Aru war menmen i Marnag.
R. Kaman nu war menmen na sese Marnag.
|
Confession & Forgiveness |
NA ESUK NU WAR RONOG I MARNAG
Na esuk nu war ronog i Marnag;
na atak nu ñwaseksek sur God i Daes ino.
Sur kisian ma mata malaklak gin na noñ rowrow,
na vavian tog sursow.
Dan roniake na vai tarañi tandun sa war si no nu roñ nu
wia.
Sur kisian nu man ma da na vasas mino,
nan na sasan nu roñ.
Nan kisian nu metenarov giniar nu mogmog ginia val tarañi dol.
Kisian ma vassem na non vavakan nin na liman;
kisian ma lut salsalañer kan nu sotal kelor le lolor.
Kisian ma rev sarsar ra melawo dan na tanor;
kisian na savut kal ira tog sursow.
Kisian ma vañan lokwlokw ra maleso nin na gangan nu wia;
kisian ma vor vita wor ra matig savsav.
Kisian ma biriñ rav ta Israel ra noñ tandun,
sur kisian ma dondom mila be non metenarov kisian ma vatvat tu:
na vatvat kisian ma sur tu minra tombond,
i Ebraham mira tarañi tamia ti tog tagrand.
War ronog na Tam, nan na Natluñwer, nan na Vu nu Roñ:
ñwar aran, nan roniake, biti bas le tia. Ñware.
Kalke sa vev na Revrev.
|
Magnificat (Luke 1:46) |
MARNAG, RONIAKE
Marnag, roniake na noñ vatvat nu rowlo me,
niok sa kovta noñ tandun le tañwat;
sur na matak ma mata na esoñ
niok ma da salmat le nage ra sul dol:
kisian na maran sa da mamaraniog na val sul dol,
nan na siñare rav ta Israel na sul na noñ.
War ronog na Tam, nan na Natluñwer, nan na Vu nu Roñ:
ñwar aran, nan roniake, biti bas le tia. Ñware.
|
Nunc dimittis (Luke 2:29) |
NA DOMTUM NERA SAL
Na nu domtum God, na Tam nu man surwia,
ma tin ketket nan Ielanan.
Nan i Jisas Krais Naton na wot tuwal i nond Marnag;
ma vune nin na Vu nu Roñ,
ma wot me dan na vavian togwaswas surwia Meri;
kisian ma roñ magavia le kwoñ i marnag Ponsas Paelat,
kier ge wos kal ginia mak wolwol,
ti mat, nan kier ge mambo le lia tamat.
Kisian ma sow le tnokw nera tamat.
Le vogtoli kwoñ ti tavrak kel dan na mate,
ti mol kai ketket,
ti siag matuan God na Tam nu man surwia;
kisian sa kel me vila dan ae
be aseg rase nu es nan irase nu mat vita.
Na nu domtum na Vu nu Roñ;
na Warlo nu roñ vai vare dol;
na bulbul nera roñ;
na domvita bug;
na tavtavrak kel ne na turi;
nan na es tagrand. Ñware.
I Marnag ti tog mi kami.
Nan miok vila.
Da tatar
Marnag, metenarov kamam.
Krais, metenarov kamam.
Marnag, metenarov kamam.
|
Apostles' Creed |
Mam ketket, kamam nu maros
na sasañ ti roñ,
noñ maran ti van me,
non maros ti le,
lalñan ñwar ketket.
Le me kwarig min kamam na gangan nu tatarias ben kwarig.
Wo domvita na bugmam
ñwar kamam nu domvita na bogor kier ma de min kamam.
Togker kovkovta kamam le ñwergal;
wo le kamam dan na sisat.
Na noñ na maran, nan na man, nan na sioñsioñ,
ti tog tagrand. Ñware.
NA TATAR TAMBE WIK
|
Lord's Prayer |
NA TATAR TAMBE TAÑWAT
God, na val marmaros nu roñ,
na val dondomia nu wia
nan na val mogmogi nu tataniog nu van me daniok:
wo sior me minra noñ tandun
na tañwat kan na maram biti le le tia,
si na tekwemam ti netnet
si ti kokor gor noñ le votno dol,
nan mila si kamam go tog beso le tañwat,
biti matawut tia na nomam tavalele dol,
kwotogian iniok nu tur gor kamam.
nin na lolwia ne Jisas Krais i nomam Marnag. Ñware.
|
Collect for Peace |
NA TATAR TAMBE TUMOR MATEWOT
Marnag, kamam nu noñ giniok
wo sinar na nomam silsiliog,
nan nin noñ metenarov
turgor kamam dan na matewot tale kwoñ roniake:
nin Jisas Krais i nomam Marnag. Ñware.
|
Collect for Help against all
Dangers |
NA TATAR NE S. KRISOSTOM
God nu man surwia,
niok ma le min kamam na sogsog
si kamam sa tatar saratuwal miniok roniake
be sav nu wia min kamam,
nan niok ma vatvat tu
si na tandum iro si toi mi vugtuwal le sasañ
niok sa le na sav kier nu tiasiok ben.
Marnag, wo da tur na nomam dondomia,
ñwar si ti biriñ kamam surwia,
si kamam ge lolmaran be noñ sursurwia le maram ke,
nan kamam sa es tagrand le maram sa van me. Ñware.
Na sogsog mug nomam Marnag Jisas Krais,
nan na tamtam ne God,
nan na bulbul ne na Vu nu Roñ
sa tog mi kamam dol tagrand. Ñware. |
Prayer of St. Chrysostom |
