NA
SALSALMAT BE GANGAN NU ROÑ
I Jisas Krais nu van me suro le Gangan nu Roñ. Kisian nu le mino
na turian ma le min kamam, nan na daran ma sal wol kamam. Kisian nu le
me mino na eson si ti vañan na atak nan ge da marmar na turik.
Si na ni salmat be le i Jisas le Gangan nu Roñ, na nu maros na
Domris, na Domtum nan na Tamtam.
Domris
Vu nu Roñ ne God,
wo biriño si na ni mata na nok sisat,
nan wo da si na ni lolwon surwia be buguk dol.
Wo dondom kel sur na noñ togtog si wo von na bogoñ
dol. Si iniok mi roñ nu sat be sav sisat, wo noñ i pris
ti roroñ na noñ sursur lo bug.
Nok God, no ma da na sisat magmagav gorok.
Na nu lolwon surwia sur no ma da magavi giniok nin na buguk.
Na nu valgiar si Jisas Krais nu mat suro si ge da waswas gino dan na sisat.
Na nu mateg mak Jisas si ti domvita mino na buguk, nan nin na noñ
birñiov na nu maros si na ni roñ suriok
nan na ni bas dan na sisat dol.
Domtum
Mam, na nu domtum si iniok ma sor me i Natoñ Jisas si kisian i
Daeso.
Na nu domtum si na sa lia le Gangan na Roñ.
Na nu mateg mak Jisas nan ti mako tia.
Tamtam
Mam, na nu tambek,
sur le masai kamam ma tog tu le sisat taran,
iniok ma sor Jisas me si ti mat sur kamam.
Jisas, na nu maros si na sa tambek surwia,
sur iniok ma tam ino añwo.
Jisas, wo van me suro, nan wo le mino na es,
tog kere kovta no si na ni vara danok.
Marnag, kamam ti dondom sotel tia si kamam ge tatarias
si kamam ge van me be noñ tan-gangan nu roñ.
Kamam ti mateg tia mak liñemam kel si nu tataniog,
nan vakan mak noñ metenarov nu lav.
Kamam ti tatarias tia si sa vial na manmandri gangan lañ noñ
tan-gangan.
Sur na matvoñ na matov metenarov veswe.
Marnag matov metenarov, wo le me min kamam
si ge gan na turi Natoñ i ñwergetam Jisas Krais nan ge sim
na daran,
si kamam ge tog lon kisian, nan kisian lon kamam.
Ñware.
|
NALE
TAMBE GANGAN NU ROÑ
Sa tur
Le sese na Tam, nan na Natluñwer, nan na Vu nu Roñ. Ñware.
Na sul dol
|
God, nu man surwia,
na tokwe dol nu gor tawarer gor na nagoñ;
niok nu valgiar na nomam marmaros dol;
ise biti linra le tia na noñ dondom roroñ danok;
momsa me noñ Vu nu Roñ
nan ti da wendwend na dondomia dol tale tekwemam,
si kamam ge tambek surwia
nan ge war ronog na sasañ nu roñ;
min Jisas Krais nomam Marnag. Ñware.
|
Collect for Purity |
Marnag, metenarov kamam.
Marnag, metenarov kamam.
Marnag, metenarov kamam.
Krais, metenarov kamam.
Krais, metenarov kamam.
Krais, metenarov kamam.
Marnag, metenarov kamam.
Marnag, metenarov kamam.
Marnag, metenarov kamam.
esi
Kyrie eleison
Christe eleison
Kyrie eleison
|
Kyrie |
WAR RONOG GIN GOD kisian le tokw,
nan le maram na tañwat min ra tandun nin na lolwia.
Kamam nu varavok,
nu warwia giniok,
nu mogmog giniok,
nu takwaloñ gorok.
nu varianiok be siñarioñ nu lav magmagav,
God Marnag, Lav gor ketket,
God na Tam nu man surwia.
Marnag, Natluñwer na wot tuwal Jisas Krais:
God Marnag, Lam ne God, Nat Taman,
wo levta na bug maram,
metenarov kamam.
E Marnag, wo levta na bug maram,
tor gor nomam tatar.
E Marnag, wo siag le matuan God na Tam,
metenarov kamam.
Sur iniok gom nu roñ,
iniok gom nu Marnag,
iniok gom, Jisas Krais, nu elel magmagav,
mi na Vu nu Roñ,
le sioñsioñ ne God na Tam. Ñware.
Gian sa tatar
|
Gloria |
NA KOLEK
NA REVREV (sa siag)
NA LE NU WIA (sa tur)
I Marnag ti tog mi kami.
Nan miok vila.
Añwo dan na Le nu wia:
Kamam nu war ronog giniok, Marnag.
Be gatge Le nu wia:
Kamam nu varavok, Krais.
TAÑTAÑWAT
Na Domtum
|
Collect, Epistle & Gospel |
Gian nu domtum God tuwal,
na Tam nu man surwia
ma tiñ ketket nan lelañan,
nan na val sav dol gian nu mata nan ti mata tia.
Gian nu domtum Marnag tuwal Jisas Krais,
Nat God na wot tuwal,
Nat Taman añwo dan na masa dol.
God me dan God,
Maran me dan Maran,
God surwia me dan God surwia;
Nat God surwia, ti tiñ ti mia;
tan Taman na matov tuwal;
ma tiñ na val savsav dol nin kisian.
Kisian ma sow me dan ketket sur igiand ra tandun be daes igiand,
ma vune nin na Vu nu Roñ
me dan na vavian togwaswas surwia i Meri,
nan ti tandun.
Kier ge wos kal ginia mak wolwol sur igiand le kwoñ i marnag Ponsas
Paelat;
kisian ti roñmagavia, kier ge mambo le lia tamat.
Le vogtoli kwoñ ti tavrak kel ñwar na revrev ma sur tu.
Nan ti mol kal ketket;
ti siag le matuan na Tam.
Kisian sa kel me vila va na sioñsioñ
be aseg ra es nan irase nu mat vita;
na noñ maran biti bas le tia.
Gian nu domtum na Vu nu Roñ,
Marnag nan Kweteg es,
ma rowlo me dan na Tam nan na Natluñwer;
nu mogmog ginia nan ge war ronog ginia
mi na Tam nan na Natluñwer;
kisian ma manas lo nin ra sirsirog na le mug God.
Gian nu domtum na Warlo tuwal nu roñ
nera Sal le val vare dol.
Gian nu sur lo be vasugroñ tuwal be domvita bug.
Gian nu tog salmat na tavrak kel nera tamat,
nan na es le maram sa van me.
Ñware.
|
Nicene Creed |
NA TATAR VARVARUS
Vatikwo
Da tatar be Warlo dol ne Krais nan be val sele tandun dol.
God, nu man surwia,
noñ le nu roñ ma votno kamam
si kamam sa varianiok
nan sa tatar be val tandun dol;
nan kamam ge varianiok be noñ sele sogsog dol . . . .
V. Da warwia gin Marnag.
R. Kamam nu varianiok, God.
Kamam nu noñ giniok si wo tor gor nomam tatar
be Warlo dol ne Krais,
si ti vovor nin na Vu nu wia, na Vu tañwat,
nan si irase kan nu domtum na sasañ nu roñ
ge mogi be liñañ surwia nu roñ,
nan ge tog ñwar na vev tuwal nin bulbul nan na tamtam.
V. Marnag, le noñ metenarov
R. Wo roñtag gor nomam tatar.
Wo sogsog min ra mogmogi tambe noñ le nan na sakramen,
ketket sag min ra noñ rowrow . . . . . . . . nomam bisop
nan ra pris nan ra dikin dol tale daisis ke . . . . .
si nin nor togtog nan nor vatvatog kier ge vassam lo na liñasioñ,
nan ge rev me na tandun dol suriok.
V. Marnag, le noñ metenarov
R. Wo roñtag gor nomam tatar,
Kamam nu tatar tami ra mel lawo tale val vare dol, nan ketket, sag tami
noñ rowrow Kwin Elisabet tan Presiden ta Franis,
nan re marnag dol . . . . . .
sal kier ge ñwo gor nin na menar nan na tattaniog, nan ge da tañwat
nan ge matagor na val tandun dol.
V. Marnag, le noñ metenarov
R. Wo roñtag gor nomam tatar.
Kamam nu tatar miniok si wo av nan wo biriñ
rase nu mogmogi si ge sirog na roroñ nu wia le vai vare dol . .
. . . ,
nan wo siñar nin noñ Vu nu Roñ min na val vare mogmogi,
nan na skul nan na eoñw señwan . . . . . . .
V. Marnag, le noñ metenarov
R. Wo roñtag gor nomam tatar.
Le noñ sogsog min ra noñ tandun dol le nor sele mogmogi
niok warer ben, nan ketket sag (min . . . . . . . nan) min kamam ra noñ
rowrow,
si kamam dol ge roroñ na noñ le nu roñ
nin na tekwe nu wia nan nu tengar,
nan ge mogmogi miniok surwia le val kwoñ esmam dol.
V. Marnag, le noñ metenarov
R. Wo roñtag gor nomam tatar.
Mam, kamam nu varusiok
si noñ tamtam nan noñ lolwia nu lav ge da masur nan ge biriñ
val tandun dol nu tog le sisat, lolwon, meleso, nan na señwan .
. . . . . .
V. Marnag, le noñ metenarov
R. Wo roñtag gor nomam tatar,
Katam nu tatar miniok tamira rowrow nu roñ
nu rowlo vita dan na maram ke,
le domtum nan le dondom wend giniok . . . . . . . ,
nan kamam nu varavok mira roñ na noñ dol,
nan kamam nu varianiok be nor togtog nu wia,
nan kamam nu tatar si kamam ge usur le na makler nu wia,
ge kal vivis saratuwal miar le noñ malaklak tagrand.
Mam nu roñ, wo kovta min kamam na ve geske,
si mi tatarias be noñ maros,
min Jisas Krais i Natoñ i nomam Marnag. Ñware.
|
Intercessions |
NA TUAR TATAR VARVARUS
Si i vevvev ni maros, kisian sa row visol le limbat tatar geske,
esi kisian sa mam tuwal le lambatian, esi kisian sa mam nu garakw lambatian.
Le masai i vevvev mi sur la "Kamam nu varianiok" esi
"Kamam nu tatar miniok" ra sul sa val la:
Marnag, roñtag gor nomam tatar.
Be . . . . . . . , kamam nu varianiok;
Be tandun dol ne Krais sa bulbul le Warlo tuwal nu roñ,
kamam nu tatar miniok;
Benra bisop, ra pris, nan ra dikin dol, nan ra rowrow nu
sasa dol tale Warlo (ketketsag . . . . .), kamam nu tatar miniok;
Be val tandun dol si kier ge roroñ nan ge tor gor
noñ le (ketketsag . . . . ) kamam nu tatar miniok;
Benra lolkwoñ dol tale varemam (ketketsag . . . .
) nan irase nu mogmogi le vatitnar, kamam nu tatar miniok;
Be tañwat le maram dol (ketketsag . . . . . ), kamam
nu tatar miniok;
Benra mel lawo gor vai vare dol le maram, si kier ge nwo
gor usur noñ maros nu roñ, kamam nu tatar miniok;
Be varemam dol nan Kwin Elisabet tan Presiden ta Franis
nan ra turturanwo va kamam (ketketsag . . . . . ), kamam nu tatar miniok;
Benra tandun dol le nor togtog nan le nor mogmogi val kwoñ,
(ketketsag . . . . . ), kamam nu tatar miniok;
Benra tandun dol nu mogmogi le taon esi le plantesin esi le siam, kamam
nu tatar miniok;
Bentra tuamam nan ra bulsalamam, nan benra vev nan na tam
nan ra luñluñwer val vare, kamam nu tatar miniok;
Ben rase nu vatog esi nu elial le nomam skul nan na koles
del (ketketsag . . . . .), kamam nu tatar miniok;
Ben rase nu van tale tan esi le lam esi le tañwalle
(ketketsag . . . . ), kamam nu tatar miniok;
Benra ñwosar nan ra maleso nan irase na verar taga
tia, kamam nu tatar miniok;
Ben rase tagat mogor mogmogi nan kier ti von le tia, kamam
nu tatar miniok;
Ben rase nu tog gaser nan rase nu roñmagavia nan
nu da magav giniar, kamam nu tatar miniok;
Benra nomam tavalele, nan rase kamam nu da magav giniar,
kamam nu tatar miniok;
Benra señwan nan benra roñmagavia le atar
nan le turiar (ketketsag . . . . . ), kamam nu tatar miniok;
Ben rase dol nognog sa mat, nan rase nu mat vita dan na
maram ke (ketketsag . . . . . ) kamam nu tatar miniok;
Da tatar roroñ sur na sav gian nu maros min giand
kel.
Tog roroñ
V. Marnag, le noñ metenarov
R. Wo roñtag gor nomam tatar.
Mam nu ron, wo kovta min kamam na ve geske,
si mi tatarias be noñ maros,
min Jisas Krais i Natoñ i nomam Marnag. Ñware.
|
Alternative Intercessions |
NA WARWAR ME
Da van me nin na lolwon nan nin na domtum surwia,
nan da sursur lo na bugond min Tamand ketket.
Tog roroñ
|
Invitation |
NA SURSUR LO BUG
Mam nu man surwia, i Aseg ra tandun dol,
kamam ma da na sisat gorok,
le dondomia, le le nan le danda.
Kamam ti tambek tia nin na tekwemam dol;
kamam ti tam tia ra noñ sul ñwar kamam kel.
Wo domvita min kamam na bugmam
sur Natoñ Jisas Krais i Daes kamam,
nan wo biriñ kamam si ge mogmogi miniok
le togtog garakw mania,
si ge war ronog na sasañ nia. Ñware.
NA DOMVITA BUG
God nu man surwia, Tamand nu lol metenarov,
ma vatvat be domvita bug min ra val tandun kale nu lolwon surwia,
nu domris kel suria nin na domtum,
nan nu tog salmat be domvita na bug rase leas;
ti metenarov gin kami,
ti domvita na bugmi,
ti da es kami dan na sisat dol,
ti verge kami le val sav nu wia,
nan ti kokor gor kami le es tagrand,
min Jisas Krais nond Marnag. Ñware.
|
Confession & Absolution |
SA MAM SALMAT NA OLOL
Sa tur
V. Na tañwat ne Marnag ti tog veswe mi kami.
R. Nan miok vila.
V. Igian na turi Krais;
R. Nin na Vu tuwal ma vasugroñ igiand le turi tuwal.
V. Aru da iel si ge mata gor na bulbul nin na Vu
R. Ge vivis min na tañwat.
Sa olol nin na bred nan na waen, nan ti sur la:
V. Na mogoñ, Marnag, na tane lav, nan na man,
nan na sioñsioñ, nan na lallaket, nan na wuskut.
R. Tagania dol ketket nan le tan na mogoñ,
nan me dan niok gom kamam nu le kel at miniok.
|
Offertory |
NA TATAR VARIAN NU LAV
V. Aru tamban kal na takwami.
R. Kamam nu tanbam kal min Marnag.
V. Da varian i Marnag nond God.
R. Nu wia nan nu tataniog be da da ñware.
Oo, nu wia nan nu tataniog
si kamam sa varavok,
sa war ronog giniok,
nan ge varianiok,
Mam ketket,
nin Jisas Krais i Natoñ, i nomam Marnag;
sur niok ma tiñ na vai sele savsav dol dan na kwetogi nin kisian,
nan ma tiñ kamam usur na totgaleañ;
nun kisian mila, le masai ma vovor,
niok ma wolkel kamam
le masai sian kamam ma so tu le sisat;
niok ma kovtania me si ti wot nin na matov tandun,
si ti mat mak wolwol,
nan ti tavrak kel sur kamam;
wo mambo le siñarioñ le matuañ;
nin kisian mila, niok me le min kamam na noñ Vu nu Roñ,
si ti du kamam si ti sul nu roñ,
ti da vovor gin kamam nin na es garakw,
nan ti le min kamam na maros salmat
be noñ maran si sa van me.
Kwotogian kan,
kamam nan ra eñsel nan ra ñwo eñsel
nan na navgi sioñsioñ ta ketket,
kamam nu war menmeniok nin malaklak surwia nan ge sur si:
Gian dol
Nu roñ, nu roñ, nu roñ,
Marnag God nin na navgi ta ketket!
Ketket nan lelañan an vovor nin na siñarioñ
Kamam nu war ronog giniok, i Marnag nu ketket magmagav.
Aru warwia ginia nu mol me le sese Marnag.
Niok sa da es kamam dan ketket!
Vatikwo
Mam ketket,
kamam nu war menmeniok magmagav
sur niok me le metenarov i Natoñ i ñwergetam i Jisas Krais
si irase dol mi domtumbo sa tor na es tagrand.
Mara, wo roñtag gor kamam,
nin Natoñ Jisas Krais nomam Marnag;
nin kisian, wo tor gor nomam olol be warwia giniok,
nan wo da si nin na man ne na noñ Vu nu Ron
na sogsog geske na bred nan na waen
ti min kamam na turian nan na daran.
Le kwoñ sian kan,
añwo dan kisian ma roñ magavia mak wolwol,
ma tor na bred,
ti varianiok bas,
ti tokw wora,
nan ti le min ra roñroñtag gor na non, ti sur si:
"Aru le at, aru gan,
Keke na turik me le min kami;
aru da ñwarke be domkel gino,
nan aru valgiar si ino mi kami.
Ñware vila, le gatge gangan,
Jisas me le na las,
nan ti varianiok,
ti le miniar nan ti sur si:
“Aru sim ke, kami dol,
sur keke na darak nin na vatvat nu garakw
ma sal sur kami nan na tandun dol be domvita bug;
aru da ñwarke veswe le masai kami nu sim ke be domkel gino,
nan aru valgiar si ino mi kami.”
Gian dol
Man, kamam nu vassam lo na matean,
nu sirog na noñ tavrak kel,
nu salmat be noñ kelkel me vila.
Kamam nu war menmeniok, Marnag ketket magmagav.
Pris
Lakan, Mam, kamam nu da ñwar i Natoñ ma vareg tu,
nan kamam nu mam kal miniok
na bred es nan na las tambe daes,
nin na nomam olol be warwia giniok nan be varianiok,
si ge vassam lo na matean mak wolwol
wol na sisat tale maram,
na noñ tavrak kel nin vavakan
nan na molmol kal kel nu sioñsioñ.
Wo le kamam lon i Jisas i Esmam,
kisian ma le kal na olol tuwal nu salmat,
nan wo le si kamam dol sa tor na gangan ke nu roñ
sa tuwal le noñ Warlo nu roñ,
na turi Natoñ Jisas Krais i nomam Marnag:
Nin kisian, kamam nu dondom wend
nan nu war ronog giniok, Mam nu man surwia,
le bulbul ne na Vu nu Roñ,
ti tog tagrand. Ñware.
Tog roroñ
|
Great Thanksgiving |
Ñwar nomam Marnag ma votno kamam, kaman
nu sur si:
Mam ketket, kamam nu maros
na sasañ ti roñ,
noñ maran ti van me,
noñ maros ti le,
lalñan ñwar ketket
Le me kwarig min kamam na gangan nu tatarias ben kwarig.
Wo domvita na bugmam
ñwar kamam nu domvita na bogor kier ma da min kamam.
Togker kovkovta kamam le ñwergal;
wo le kamam dan na sisat.
Na noñ na maran, nan na man, nan na sioñsioñ,
ti tog tagrand. Ñware.
|
Lord's Prayer |
NA TOKWTOKW WORA BRED
V. Na bred ke gian nu tokw wora
kisian na ve si sa da bulbul igiand le turi Krais.
R. Kwotogian igian an kare,
igian na bred tuwal nan na turi tuwal,
sur igian dol nu tor na mandregiand le bred ke tuwal.
E! Lam ne God, ma levta na bug maram, wo metenarov kamam.
E! Lam ne God, ma levta na bug maram, wo metenarov kamam.
E! Lam ne God, ma levta na bug maram, wo le min kamam noñ tañwat.
|
Breaking of the Bread |
NA GANGAN NU ROÑ
Aru betga me nin na domtum:
aru le na turi na nond Marnag Jisas Krais ma le nin kami;
nan na daran ma sal wol kami;
aru gan domtum ginia le takwami nin na le varian.
I pris ti le na Gangan nu roñ min ra sul, ti
sur si:
Na turi Jisas Krais, nond Marnag. Ñware.
Na dere Jisas Krais, nond Marnag. Ñware.
|
Administration |
************
Da tatar
God nu man surwia, i es tagrand,
kamam nu varianiok magmagav
sur niok ma vañan kamam nin na gangan nu roñ,
na turi nan na dere i Natoñ i Jisas Krais i Daes kamam.
Nan mila, kamam nu varianiok
be noñ tamtam nan noñ lolwia min kamam,
sur niok ma da kamam ge sandi tambe turian nu es, na navgi sul na noñ,
nan niok ma le min kamam na mandremam le es tagrand.
Gian dol
Lakan, Mam, wo matagor kamam nin na noñ sogsog
si kamam ge da na mogmogi nu wia niok ma da salmat min kamam.
Nan kamam nu mam kel kamam gor na nagoñ kalke,
na atamam nan na turimam,
nin na olol nu roñ nan nu es;
nin Jisas Krais na nomam Marnag,
kamam nu dondom wend,
nu war ronog kisian nan iniok
nan na Vu nu Roñ,
ti tog tagrand. Ñware.
|
Prayer of Thanksgiving |
NA VAWIA
Aru rowlo le tañwat,
aru tam, aru mañas gor i Marnag;
aru vovor nin na malaklak le man ne na Vu nu Roñ.
Nan God nu man surwia,
na Tam, na Natluñwer, nan na Vu nu Roñ
sa vawia kami, sa tog mi kami,
ti tog tagrand. Ñware.
|
Blessing |
NA TATAR VARIAN VALSE
SA VEV LE TAMBON
Wo vev malambos, vakkare, na tatar ñwar geske:
Nok Marnag nan nok God.
Na nu varianiok, Jisas i Marnag
sur niok ma van me suro.
Roniake na nu liok le lolok.
Wo da ris ino si no ni kweteg ñwar iniok.
Na nu ilo tambuk miniok,
na turik nan na atak,
si ge da noñ maros nu roñ.
Na nu varavok, nu varianiok, nan nu warwia giniok,
Jisas Krais,
le tan siagsiag i Marnag nu sioñsioñ,
le sakramen nu roñ surwia tambe tan-olol,
nan le eoñw nu roñ, na lolok.
Wo domkel veswe kwarig si Jisas nu tog lon iniok.
|
Prayers after Communion |
