NA KOKOELIULIVUTI NI GONIDILAANA HEGENA HEI.

    Jesus Christ te mai tagua ta na Vanatabu. Gaia te va heu na Hulina te paruha vaniu, me tavelaginia na Narana vaniu. Gaia te va heu na volana ge ke kutia na Tarunagu, me ke va lagalagaa na huligu.
    Ku gonidila ni holaana Jesus ta na Vanatabu ke, ma nigua ge ku logoa na tugulio, na taluutuni ma na dolo.

Tugulio.
    Taruna te Tabu ta God, Ko hanau ge ku rigigi na lei palugu, mo ko neu ge ku nigi dikalio utuni.

(Ko ganaganaa na kaukabumu mo ko kenekenei na lei palumu. Ma ge ke dikalaa na tobamu siki palu ke, mo ko nonia na Manegehegehe ge ke varonohia nimua na togipalu)

    Age, nigua na God, inau tu hahi savugo nanata. Inau tu dikalio sule nanata tu vahagitailigo nia na lei palugu. Inau tu gilalaa Jesus te mate vaniu ge ku tatavahale tana palu. Inau tu varava ta Jesus ta na talukehapalu vaniu; rna nia nimua na hahana, inau tu liona ge ku taonigo mu ku nigi murilio na lei tanotanodika soko.

Taluutuni

    Mama, inau tu taluutunia, To nia vetena mai na Dalemu Jesus Christ ge ke Vavolagu.
    Inau tu taluutunia geku lavia Jesus ta na Vanatabu.
    Inau tu varava ta Jesus, mua itagua inau.

Dolo

    Mama, inau tu dolovigo na pukuna ta na bona tai gahagai mua ta na puni, mo nia vetena mai na Dalemu Jesus Christ ge mai mate vanigami.
    Jesus, inau tu liona na doloviutuniamu, na pukuna to vuivuni ni doloviagu.
    Jesus, ko mai tagua mo ko vaheu na vola, muku bei goi sanigo gea.

MAGUTU, igami tai mua varava ta na liomami tai ganagana te maemane ta na bona tai mai ta nimua na Bela-ni-Vana, mi ta nimua na veiarovi te sule nanata. Igami tai mua kaekage na vahikehaani na vugevuge ruruguna nimua na Bela-ni-Vana, mi Goe, Magutu, Te veiarovi talau. Ko ronovigai ge Magutu ni Veiarovi, nia na sonihalavu ni ganiana na Hulina na Delemu to dolovia, a Jesus Christ, ma na inuviana na Narana, ge kai kabu haia ilokana Gaia, ma Gaia i lokamami. Amen.
 

NA KOKOELIULIVUTI
VANATABU

(Tuguru)

Manegehegehe

    TANA Ahana na Mama, ma na Dale, ma na Taruna te Tabu. Amen.

Manegehegehe ma na vure subo kara bosa:—
 

GOD puku ni Mana, te manadadala na lei toba i tamua, mo gilalaudolui na lei totobo soko te liuloga, me taho siki totobo ke kabu polo vanigo: Ko manatia na lokamami nia nimua na mana ni Taruna te Tabu ge kai doloviutunigo, ma kai tanomana na holohabaana na Ahamu te Tabu; nia Jesus Christ a nimani na Magutu. Amen.

Magutu, arovigami
Magutu, arovigami
Magutu, arovigami

Magutu, arovigami
Magutu, arovigami
Magutu, arovigami
 

NA HOLOHABA.

HOLOHABAA God vuvunana na parako, me ke mabo na maramana vanira tara lio uto. Igami tai bosautogo, tai vautogo, tai nigo sukagi, mai holohabago, igami tai holoutogo nia nimua na lada te haba Magutu God, To haba i kokou, God na Mama puku ni mana.
    Magutu, na Dale Vahusosopa a Jesus Christ; Magutu God, nina Lamb God, Dalena na Mama, To lavikehaa na palu ni maramana, ko arovigami. Magutu, To lavikehaa na palu ni maramana, Ko holatigi nimami na kokoeliulivuti. Magutu, To sopou ta na madolona na Mama, Ko arovigami.
    Igoe vamua to Tabu; Igoe hegemu to Magutu; Igoe hegemu vamua Jesus Christ kolu na Taruna te Tabu, Tohaba nanata koukolu ta na ladana God na Mama. Amen.

Igita ka kokoeliulivuti.
 

Na Bosa Sonikolu.

(Tana raurau 86-264, Bk. K. ni Gela)

Na Gegere. (Sopou na vure subo)

Na Ronorono Uto. (Tuguru na vure subo)

Na Magutu ke kabu i tamiu,
Maia i tamua igoe.

Nagona na Ronorono Uto—
Holoutogo, Igoe Christ.
 

TUTUGU.

TALUUTUNI.

IGITA ta taluutinia God sakai vamua, na Mama Puku ni Mana, Te gonigi na parako ma na pari, ma na lei totobo ta rigigi ma ta mua rigigi.
    Maia ta sakai na Magutu Jesus Christ, Dalena God, Vahusosopa, Te vuhakolu mai tatana na Mama i tualani ge puputu na maramana; God mai ta God; Marara mai ta na Marara; puku ni God mai ta na puku ni God, na Dalena God vamua, Te vuhaa, mua gonia; Te sakaisonikolu na vaivarina tatana na Mama; te pukulagi mai ga lei totobo gogoni; Te horu mai kokou, na vavolaada igita na lei tinoni, Me vuha huli nia na Taruna te Tabu ta na puku ni Samu Mary, me mai Tinoni; tara patokia gua ta na Gaivavala vanigita ruruguna Pontius Pilate; Me vahagitaili gara bekua; me toluni na boni te vagaa tara gerea tua, me dato i kokou me sopou ta na pala madolona na Mama; ke goi nia oli mai so na lada, na deteadira ta ra vola ma ta ra mate tua; Ke mua soko nina kinakabu.
    Mi gita ta taluutunia na Taruna te Tabu, na Magutu, te heveia na Vola; Te mai tatana na Mama ma na Dale; Gaia tatana na Mama ma na Dale ta na sukagi ma na holohaba koukolu; Gaia tara bosai tua na lei tinoni tugunilada.
    Ma ta taluutunia sakai vamua na Holohoru te Tabu taonira te vetenara. Igita ta taluutunia sakai vamua na Vulitabu ni togikehaani lei palu, ma ganagana kasunia na tuguruoli ga na mate, ma na vola ni maramana ke mai. Amen.
 

NA KOKOELIULIVUTI
(Tualagituturu)

    Igita ka kokoeliulivutia a nina Holohoru udolu Christ, ma vanira gua na lei tioni te manana vanira iga na hahana:

GOD puku ni Mama, To taraigi nia na Bosamu te Tabu ge kai holouto ma kai kokoeliulivutira na lei tinoni soko; mi taeni igami tai holoutogo nia nimua na lei vauto udolu . . . .

Gita ka vautoa na Magutu,
Holouto va ta God.

    Igai tai nonigo ge ko holatigi nimami na lei kokoeliulivuti ni Holohoru udolu ta Christ, ge ke vonugia nia lio uto ma na mabo, ma ge ra hei tara taluutunia na Ahamu te Tabu, kara nia lio sakai na Utuni ta na Bosamu te Tabu, ma kara kabu binaboli ni sakaisonikolu ta na Dolo.

Magutu, ta nimua na veiarovi,
Ko ronovia nimami na kokoeliulivuti.

    Vonugira nia nimua na sonihalavu na lei Gehegehe tara ladavagi ta na Bosamu mi ta nimua na lei Sacrament, haba va ra nimua na gairu . . . . nimami na Manevatoga ma rana lei Manegehegehe, ma na Manehahana ni Diocese eni . . . . ma nia na voladira ma didia na tarai kara tuguni tatea na ladamu, ma kara gorora gatu na lei tinoni i tamua.

Magutu, ta nimua na veiarovi,
Ko ronovia nimami na kokoeliulivuti.

    Igai tai kokoeliulivutira tara rigitaoni ta na lei kema, me haba va nimua na tinoni Elizabeth nimami na Vinahogo . . . . , mara hei gua tara logo mana ni rigitaoni . . . , ge kara manaha ma kara nia rigitaoni na dete kaekage ma kara heveia na mabo, ma kara rigitaoni utora lei tinoni soko.

Magutu, ta nimua na veiarovi,
Ko ronovia nimami na kokoeliulivuti.

    Igai tai kokoeliulivuti ge ko hulira moko hanara tara ladavaginia nimua na Ronorono Uto tana lei komu . . . . ma kara holatia va na mararana nimua na Taruna ta na lei komu ni lutu, naunau ma na kisu . . . . .

Magutu, ta nimua na veiarovi,
Ko ronovia nimami na kokoeliulivuti.

    Ko va hera nimua na lei vure soko, ta didira lei sopa halautu to holora nia, nimua na sonihalavu ni kokou, me haba va . . . . ma vanigai igai nimua na gairau, ge igai udolu kai ronovia na Bosamu te Tabu nia na toba magorauto te masake, ma kai lutu utuni vanigo ta na lei boni ni volamami.

Magutu, ta nimua na veiarovi,
Ko ronovia nimami na kokoeliulivuti.

    Mama, igai tai nonigo ge a nimua na dolo te sule me te veiravi ke togoluvura me ke hanara te rusu na tobadira, ma ta ra dikalio, ma ta ra vahagi, maira ra hei te vateiaroviadira.

Magutu, ta nimua na veiarovi,
Ko ronovia nimami na kokoeliulivuti.

    Igai tai kokoeliulivutira nimua na lei kukuti tara tokeha tua ta na vola ni maramana eni, nia nimua na taluutuni ma na kikinima . . . . . mi gai tai bosautogo nia nimua na lei tabu . . . . . mai holoutogo nia didira lei nilabu te uto, tai ganagana gekai taonigi, ma kai nigi ruguhage kolu ta nimua na togotogo ke mua mautu.
    Mama, To Tabu, Ko talani vanigami mai nimami na kokoeliulivuti rani, ke ba liu i liomu, na pukuna na Dalemu, Jesus Christ a nimami na Magutu. Amen.
 

[NA KOKOELIULIVUTI TUGULAGI

(Ke ba mua manana na neani lei sopa noni raini ke, ke sanigi, talukolui, oa ka dolai va, ke vagaa na tinoni te huligi ke ba liu liona.)

(Na bosa tugu ta na sosokona "Igai tai holoutogo" pa "Igai tai kokoeliulivuti vanigo gatu" ke: "Magutu, ronovia nimani na kokeliliuvuti."

    Vania . . . . , igai tai holoutogo;
    Vania na kabu sakaisonikolu-adira lei tinoni udolu ni holohoru te tabu, igai tai kokoeliulivuti vanigo gatu;
    Vanira lei Manevatoga, Manegehegehe, Manehahana, ma na balu tinoni ni lutu ta na Holohoru (haba va . . . . ) igai tai kokoeliulivuti vanigo gatu;
    Vanira lei tinoni soko ge kara rono vakale, ma kara holatia na Bosamu (haba va . . . ) igai tai kokoeliulivuti vanigo gatu;
    Vanira rana voo ni koukomumami (haba va . . . . ), mara hei tara lutu i gobudira, igai tai kokoeliulivuti vanigo gatu;
    Vania na mabo ni maramana udolu (haba va . . . .) igai tai kokoeliulivuti vanigo gatu;
    Vanira lei haba ta na lei kema soko, ge kara rigitaoni kaekage taonia na liomu te tabu, igai tai kokoeliulivuti vanigo gatu;
    Vania na buto ni komumami, ma vania na Vinahogo Elizabeth (ma na Vunagi huhuli ni France) ma na nimami tinoni rigitaoni (haba va . . . . ), igai tai kokoeliulivuti vanigo gatu;
    Vanira na lei mane ma na vaivine, ta na voladira talau, ma didira lutu (haba va . . . . ), igai tai kokoeliulivuti vanigo gatu;
    Vanira tara lutu ta lei komu ni mavitu ma tana lei komu subasuba ma na lei vaka, igai tai kokoeliulivuti vanigo gatu;
    Vanira na lei vinahuhumami ma na lei kulamami, ma vanira lei tamahogoni ma na lei gari ivei mi vei, igai tai kokoeliulivuti vanigo gatu;
    Vanira soko ra hei tara naunau ta nimami lei Sukulu ma na lei Kolesi (haba va . . . . ), igai tai kokoeliulivuti vanigo gatu;
    Ma vanira soko tara vinanoa na pari, tahi ma na oka (haba va . . . .),  igai tai kokoeliulivuti vanigo gatu;
    Vanira tara kosimogo ma tara vitolo, ma gaira tara mua komuga, igai tai kokoeliulivuti vanigo gatu;
     Vanira tara lio ni lutu, igai tai kokoeliulivuti vanigo gatu;
    Vanira tara vateiaroviaga, mara hei tara kabu ligilio tadira rana keha (haba va . . . . ), igai tai kokoeliulivuti vanigo gatu;
    Vanira gamami na levunimate, mara hei tai kanahaginira, igai tai kokoeliulivuti vanigo gatu;
    Vanira tara vahagi, mara vahagitaili ta na liodira ma na hulidira (haba va . . . . ), igai tai kokoeliulivuti vanigo gatu;
    Vanira tara bugoro ni mate, mara hei tara tokeha tua ta na vola eni (haba va . . . . ), igai tai kokoeliulivuti vanigo gatu;

    Igita ka kokoeliulivuti vaovarono ni hanaada hegeda.

TODORE

Magutu, ta nimua na veiarovi.
    Ko ronovia nimami na kokoeliulivuti.

MAMA, To Tabu, Ko talani vanigami mai nimami na kokoeliulivuti raini, ke ba liu i liomu, na pukuna na Dalemu, Jesus Christ a nimami na Magutu. Amen.]
 

NA HOHOLO

MAI gita, ka nia mai na dikalio, ma na puku ni taluutuni, maka tuguni tatei na paluda vania a Tamada i kokou.

TODORE
 

TUGUNITATE

GOD puku ni mana, To detera na lei tinoni, igai tai tanotanodika savugo Igoe ta na hava tai ganaganaa mai bosaa, mai gehetia. Igai tai mua dolovigo nia na puku ni tobamami, mai mua dolovira Nimua na vure vagaa tai dolovigai hegemami. Ko talukehai na palumami na pukuna na Dalemu, na Vavolamami Jesus Christ, moko hanagai gekai lutu vanigo tana kaukabu vaolu, nia na ronoragaana na Ahamu. Amen.

TOGIKEHAPALU

GOD puku ni mana, Tamada te veiarovi; Te nia baubahu rua na talukehaani na paludira ra hei tara tugulio utuni, mara pulohi ni va rigiana nia na taluutuni, mara ganagana ni talukehaani na paludira rana keha; Agaia ke arovigamu, meke liouto vanigamu, meke va ruguhorulaginigau soko ta na lei palumiu, meke nasiligamu ta na lei totobo uto soko, meke kabulaginigau tana maurihali; nia Jesus Christ a dida na Magutu. Amen.
 

HEVEILEE.

(Tuguru)

A Nina na Mabo na Magutu ke kabu haia i tamua,
    Maia i tamua igoe.

Igita ta Hulina Christ,
    Igita ta Vulitabu ta sakai na Huli, nia sakai na Taruna.

Lavilaga na panotiana na sakaisonikoluana na Taruna.
    Tana alo ni mabo.

TETE (Na Gehegehe ke tanomana geke vilia siki tete keha)

NIMIU na marara ke hinarira na lei tinoni ge kara rigigi nimiu lei gehegehe te uto, ma kara holohabaa Tamamiu i Kokou. St. Matt. 5. 16.
    Kau taludatora vania God nimiu na holouto, ma kau nea vania Gaia te Habavule na hava tau nia baubahui.
    Kau nei vanira na lei tinoni na hava tau lioni kara nei vanigau, a eni na ganagana i lokana na vetena ma didira na tarai rana tinoni tugunilada. St. Matt. 7. 12.
    Na Tarunadira rana maemane tana limana God, me taho siki gunaguna ke goi higilira gua.
    Na Magutu te ronoraga ta Nina lei Tabu; kau mai ma ka holohabaa.

(Gonidila sokoi na vatei sukagi ge ke bosa na:)

Manegehegehe

    Igoe, Magutu, nimua na ronoraga, ma na Mana, ma na lada, ma na lagavule, ma na Male-Malagai.

Vure Subo:

    Na lei totobo soko ta na parako ma na pari a Nimua, na Nimua hegemu tai va hego gatu.
 

NA HOLOUTO SULE NANATA

Kau talugalagai na tobamiu,
    Igai tai talugalagai vania na Magutu.

Igita ka holoutoa na Magutuda God.
    E uto me te manana na neana te vagaa.

E uto me te manana ge igami kai hego na lei holohabaa, ma na ronoraga, ma na holouto, Mama i Kokou, nia Jesus Christ na Dalemu, nimami na Magatu, na pukuna Agaia ge O gonigi na lei totobo soko ta na vuivuni, Mo gonitaonigai nia na Maremu; Agaia, ta na bona ni padalagi ge O huioligai ta na tanotanodika tai kutu i ga. Mo nea ge vuha tinoni, me mate ta na Gaivavala, me tuguruoli vanigai, mo kabulaginia ta na pala madolomu. Igoe to hegai Nimua na Taruna te Tabu, ke negai ge kai taba-ni-vure tabu, ke vonugigai nia na vola vaolu, meke hegai na ganaganadilaana na maiana nimua na Kinakabu.

ME vagaa vanira gua lei Taruna ma rana Taruna Vetena kamanago ma na ovu maurihali udolu ni Kokou, tai togotogo mai holohabago Igoe mai gagua:—

    Tabu, Tabu, Tabu, Magutu God To habavulera na lei ovu; na parako ma na pari te vonugia na ladamu; holohaba gatu i tamua Magutu, To haba nanata.
    Holoutoa Agaia te mai ta na Ahana na Magutu.
    Hosanna ta na parako.

Tualagituturu

MAMA i kokou, na ronoraga udolu ke kabu i tamua, ma nia Nimua na Dolo ni veiarovi Go nia hevei na Dalemu, Vahusosopa, Jesus Christ, ge gaira udolu tara taluutunia kara logoa na maurihali.
    Mama, Ko ronovigai mai ta Dalemu Jesus Christ nimami na Magutu; I tatana Gaia, Ko holatigi nimami na sukagi ni Holouto, ma nia na manana Nimua na Taruna te Tabu, na hevei ni Vana ma na Wine raini ke Hulina meke Narana vanigai.
    Te boni nagona na Boni te vahagitaili kouna na Gaivavala, Te holatia na Vana, Me holoutogo Nia, Ge nitia, me sopa va hera Nina Manevetena me gagua, “Holaa, gania, A ENI NA HULIGU TU VA HEGAU GATU TUA, KAU NEA ENI NIA NA GANAGANAOLIAGU, MA KAU GILALA I NAU I TAMIU”.
    Te vagaa gua te soko na Vana, Ge holatia na Seu, Me holoutogo nia, Ge va hera me gagua, “Kau inuvia eni, Igau udolu, NA PUKUNA A ENI NA NARAGU, NA VATEI BAUBAHU VAOLU TE TAVE VANIGAU, MA VANIRA TARA SUBO, NA VATEI TOGIKEHAPALU; KAU NEA ENI HAIA TA KAU INUVIA NIA NA GANAGANAOLIAGU, MA KAU GILALA I NAU I TAMIU”.

Na vure subo ke bosa: —

    Mama; na mateana tai talutatea, na tuguruoliana tai ladavaginia, na maiana tai pitudilaa:, holoutogo Igoe, Magutu i Kokou.

Manegehegehe:—

    Mi gami Mama, tai nea eni, te vagaa na Dalemu te kelkengaml ma, mal sukagi gatu vanigo, nia na Vana ni Vola, ma na Seu ni Maurihali, nimami na Sukagi ni holohaba ma na holouto; te tatelaginia na mateana kouna na Gaivavala na pukuna na palu ni maraman, na tuguruoliana te sule nanata, ma na datoana te ronoraga.

    Ko panotigai, i tatana Gaia na Vavolamami, Te nia sukagi a sakai na Sukagi te madala, moko va hegai igai udolu tar lavia na Vanatabu ge kai sakai vamua ta Nimua na Holohoru te Tabu, na Hulina Dalemu Jesus Christ a nimami na Magutu; i tatana Gaia tana sakaisonikolu ni Taruna te Tabu, Mama puku ni mana, na talumava, ma na ronoraga ke kabu i tamua, ke va, me va, Amen.

TODORE

    Te vagaa dida na Magutu te taraigita tua ge ka bosa maka gagua:—
 

MAMA i kokou, ke tabu na Ahamu. Ke mai nimua na kinakabu. Ke tanomana na liomu i pari te vagaa i kokou. Hegami mai taeni na vana te manana i taeni. Moko talukehai na lei palumami, te vagaa igami tai talukehai na lei paludira. Ko bei lubatigami ta na tabotabo, moko lavigami ta na tanotanodika. Nimua na haba, ma na mana, ma na lada, ke va, me va. Amen.
 

NA NITIANA NA VANA

Manegehegehe

    Na Vana ta nitia eni, a mua nia tunuva kolu ta na Hulina Christ?

    Vure Subo:—

    Na pukuna sakai na Vana, ge igita ta subo geka sakai na huli, na pukuna ta nia sopa tunuva sakai na Vana vamua.

Nina Lamb God, To lavikehaa na palu ni maramana,
Ko arovigami.

Nina Lamb God, To lavikehaa na palu ni maramana,
Ko arovigami.

Nina Lamb God, To lavikehaa na palu ni maramana,
Va hegami mai nimua na mabo.

KAU nia mai na taluutuni ma kau holatia na Hulina dida na Magutu Jesus Christ te va hegamu, ma na Narana te tave vanigamu, ma kau kutigau i Tatana ta na tobamiu nia na taluutuni ma na holouto.

(Na Manegehegehe ke tuvalia na Vanatabu geke bosa:—)
 

Na Hulina dida na Magutu Jesus Christ.
Na Narana dida na Magutu Jesus Christ.

(Murina na tagalagi na Manegehegehe ke gagua:—)

Igita ka kokoeliulivuti.
 

GOD puku ni mana puku mi maurihali, igai tai holoutogo nia na tobamami, to kutigai nia na Vanatabu ni Hulina ma na Narana Dalemu, na Vavolamami Jesus Christ. Igami tai holoutogo nia gua Nimua na Dolo ma na rigitaoniamami geo negai gai baebase ni Hulina te Vola, na tamadale ni Nimua lei tinoni soko, mo to va hegai na tunuvamami ta na maurihalikama.

Na vure udolu kara bosa:—

    Mama, te vagaa keri geko rigataonigai ta Nimua na sonihalavu ge kai kalitia na lutu te uto to gonidilaa vanigai tua. Mi gai, eni, tai lubatigai vanigo ta na liomami, mi ta na hulimami na vatei sukagi te tabu me te vola, na pukuna Jesus Christ a nimami na Magutu, Te kabu kolu i tamua mi ta na Taruna te Tabu.Te mava me te ronoraga, ke va, me va. Amen.
 

NA VAUTO

KAU tona tana mabo, dolo rna kau lutu vania na Magutu, ke vonugigau na togotogo nia na Mana ni Taruna te Tabu.
    Ma na Vauto nina God puku ni mana, na Mama, na Dale ma na Taruna te Tabu, ke kabu i tamiu, ke va, me va. Amen.

BOSA NI HOLOUTO HEGENA HEI

Kiki moko bosai na balu bosa kokoeliulivuti vagai raini:--

Nigua Magutu na nigua na God,
Holoutogo Igoe Magutu Jesus to mai, hugu itagua inau.
I taeni inau tu logogo ta na tobagu.
Ko kiliuu muku tanomana geku vagago.

    Inau tu lubatiu vanigo gatu tana huli, vola mi tana taruna, geku nea vanigo na hava tana liomu te tabu.

    Va Tabua, holohabaa, ma na Mana ta Jesus ta na belanana te ronoragaga ta na Sacrament te Tabu nanata, tana BELA-NI-VANA, maia i lokana na vale ni tobagu.

Ganaganaa haia tana boni udolu, a Jesus te gahaa i lokamu.