PREA BLONG SEN KRISOSTOM

GOD, yu gat olgeta paoa,
naoya yu bin givhan long mifala
blong mifala i gat wan tingting
blong askem ol samting long yu blong halpem mifala,
mo yu bin promes se,
taem tu no tri oli prea wantaem long nem blong yu,
bambae yu givim wanem samting oli askem.
Hae God, plis yu givim long mifala naoya
ol samting we mifala i askem,
olsem yu luk we i gud long mifala,
blong mifala i save long trutok blong yu long wol ya,
mo long wol we bambae i kam
bambae mifala i gat laef we i no save finis. Amen.

MIFALA i prea se,
Jisas Kraes, Jif blong mifala,
bambae i stap givhan long mifala evriwan long gladhat blong hem,
God bambae i lavem mifala evriwan tumas,
mo Tambu Spirit bambae i kampani wetem mifala evriwan oltaem.
Amen.
 

PREA BLONG SAVA

+ Long nem blong Papa, mo Pikinini, mo Tambu Spirit. Amen.

Yumi stap kwaet blong tingbaot fasin blong yumi tede, blong yumi save talemaot long God eni samting nogud we yumi bin mekem no eni gud samting we yumi no bin mekem.

Stap kwaet smol
 

GOD, Papa blong mifala,
mifala i bin mekem nogud long yu
long tingting mo long toktok
mo long samfala samting we mifala i bin mekem.
Mifala i no bin lavem yu long olgeta bel blong mifala.
Mifala i no bin lavem ol narfala pipol
olsem mifala bakegen.
Plis yu sore long mifala,
yu mekem mifala i klin bakegen from ol samting nogud ya,
yu halpem mifala blong sakemaot ol rabis samting
long fasin blong mifala.
Mifala i askem long nem blong Jisas Kraes,
Jif blong mifala. Amen.

Rida

GOD, yu gat olgeta paoa,
plis yu sore long mifala,
yu tekemaot ol samting nogud blong mifala,
yu sevem mifala from ol samting nogud,
yu mekem mifala i strong blong wokem ol samting we i gud,
mo yu tekem mifala i kam kasem laef ya we i no save finis.
Mifala i askem long nem blong Jisas Kraes,
Jif blong mifala. Amen.

Hae God, yu openem maot blong mifala.
Nao bambae mifala i presem yu.

God, yu kam kwik blong sevem mifala.
Hae God, yu hariap blong halpem mifala.

Leftemap nem blong Papa mo Pikinini mo Tambu Spirit.
Olsem bifo, mo naoya, mo oltaem, i no save finis. Amen.

Yumi presem Hae God.
Yumi preseni nem blong Hae God.

Oli save singim wan sing long ples ya.
 

LESEN

Naoya ridim wan long olgeta Kantikol we i stat long pej 27 go kasem pej 36.
 

BILIF BLONG OL APOSOL

MI bilif long God,
Papa we i gat olgeta paoa,
hem i mekem heven mo wol.
Mi bilif long Jisas Kraes,
Pikinini blong God i wan nomo we hem i gat,
Jif blong yumi.
Hem i bon long paoa blong Tambu Spirit,
i bon long wan gel Mere,
we neva man i bin go long hem.
Hem i harem nogud tumas
long taem we Ponsus Paelat i kapman.
Oli nilim hem long kros,
hem i ded mo oli berem hem.
Hem i godaon long ples blong ol dedman,
Long namba tri de, nao hem i girap, hem i laef bakegen.
Hem i go antap long heven.
Hem i stap sidaon long raet saat blong God,
Papa we i gat olgeta paoa.
Bambae hem i kambak long wol ya bakegen
blong mekem kot long olgeta man,
olgeta we oli laef wetem olgeta we oli ded finis.
Mi bilif long Tambu Spirit.
Mi bilif long Jyos we i tambu
mo i blong olgeta man.
Mi bilif we olgeta Kristin man long heven mo long wol oli wan famle nomo.
Mi bilif we God i save tekemaot ol sin,
mo we bambae hem i mekem bodi blong ol dedman oli laef bakegen.
Mo mi bilif long lad we i no save finis. Amen.

Mi prea se jif i stap wetem yufala.
Mo wetem yu.

Yumi prea

JIF, yu sore long mifala.
Kraes, yu sore long mifala.
Jif, yu sore long mifala.
 

Papa blong mifala, we yu stap long heven,
nem blong yu i tambu.
Mifala i wandem we olgeta man oli ona long yu,
mo we yu yu kam king blong olgeta man,
mo we olgeta man long wol oli mekem olsem we yu yu wandem,
olsem we olgeta long heven oli stap mekem.
Plis yu givim kakae long mifala, i naf blong tede.
Yu fogivim mifala from ol sin blong mifala,
olsem we mifala i stap fogivim ol man
we oli mekem i nogud long mifala.
Yu no letem ol samting oli kam traem mifala tumas,
yu blokem Setan i no kam spolem mifala.
From we yu nomo yu King,
yu nomo yu gat olgeta paoa,
mo ol gudgudfala samting oli blong yu nomo,
gogo i no save finis. Amen.

Jif, yu sore long mifala.
Yu givim paoa blong yu blong sevem mifala.

Jif, yu sevem olgeta kapman blong mifala.
Plis, yu sore long mifala, yu harem mifala taem mifala i singaot i go long yu.

Yu mekem ol pris blong yu oli stap long fasin we i tambu.
Mo yu mekem olgeta pipol blong yu oli glad blong sing.

Jif, yu sevem olgeta pipol blong yu.
Yu blesem olgeta we oli blong yu.

Jif, yu givim pis long taem blong mifala.
From we yu God, yu wan nomo yu stap rulum wol.

God, yu mekem tingting blong mifala i klin.
Yu no tekemaot Tambu Spirit blong yu long mifala.
 

Naoya yu save ridim prea blong be wik, be long ol tambu de yu ridim prea we i fitim de nomo.
 

PREA BLONG PRIS

GOD, yu nomo yu stap putum ol tingting we i tambu long mifala,
ol gudfala tingting mo ol stret wok oli kamaot long yu nomo.
Plis yu givim long mifala ol man blong yu
pis ya we wol i no save givim.
Mekem ol tingting blong mifala oli strong
blong harem ol lo blong yu,
mo yu lukaot long mifala,
blong mifala i no save fraet long ol enemi blong mifala,
be mifala i save stap kwaet nomo.
Mifala i askem ol samting ya
from we mifala i save we Jisas Kraes, Jif blong mifala,
i gud tumas. Amen.
 

PREA BLONG ASKEM GOD I HALPEM YUMI LONG TRAVOL

HAE God, plis yu letem laet blong yu i saen long mifala long tudak,
mo long bigfala sore blong yu
yu lukaot long mifala long olgeta travol
we oli save kasem mifala long naet ya.
Mifala i askem long nem blong Jisas Kraes, Jif blong mifala. Amen.

Samfala prea moa
 

PREA BLONG SEN KRISOSTOM

GOD, yu gat olgeta paoa,
naoya yu bin givhan long mifala
blong mifala i gat wan tingting
blong askem ol samting long yu blong halpem mifala,
mo yu bin promes se,
taem tu no tri oli prea wantaem long nem blong yu,
bambae yu givim wanem samting oli askem.
Hae God, plis yu givim long mifala naoya
ol samting we mifala i askem,
olsem yu luk we i gud long mifala,
blong mifala i save long trutok blong yu long wol ya,
mo long wol we bambae i kam
bambae mifala i gat laef we i no save finis. Amen.

MIFALA i prea se,
Jisas Kraes, Jif blong mifala,
bambae i stap givhan long mifala evriwan long gladhat blong hem,
God bambae i lavem mifala evriwan tumas,
mo Tambu Spirit bambae i kampani wetem mifala evriwan oltaem.
Amen.
 

OLGETA KANTIKOL

SAM 95 VENITE

YUMI kam, yumi presem Hae God.
Yumi sing, yumi glad long God ya
we hem i strong ples blong sevem yumi.
Yumi kam long fes blong hem,
yumi talem tangkyu long hem.
Yumi sing blong presem hem long singsing blong glad.
From we Hae God ya hem i God we i gat paoa.
Hem i King we i gat paoa i winim olgeta god.
Ol hol we i dip we i dip, oli stap blong hem.
Ol hil we i hae we i hae, oli stap long han blong hem tu.
Solwora i blong hem, hem bin wokem.
Graon tu, han blong hem i bin mekem.
Yumi kam, yumi bodaon, yumi mekem wosip long hem.
Yumi nildaon long fes blong Hae God mekem yumi,
From we hem i God blong yumi.
Yumi ol man blong fenis blong hem.
Yumi ol sipsip we hem i stap lidim yumi.
Leftemap nem blong Papa mo Pikinini mo Tambu Spirit.
Olsem bifo, mo naoya, mo oltaem, i no save finis. Amen.

TE DEUM LAUDAMUS

MIFALA i presem yu we yu God.
Mifala i talemaot yu we yu Jif.
Papa we yu gat laef we i no save finis,
olgeta pipol oli bodaon long yu
Olgeta enjel, olgeta long heven we oli gat paoa,
olgeta kerub me seraf, oli stap singaot oltaem long yu se:
Tambu, Tambu, Tambu,
Hae God blong ol enjel we oli stap long heven.
Heven mo wol i fulap long laet blong yu.
Olgeta aposol we oli stap long laet blong yu,
oli stap presem yu.
Olgeta profet we oli gat nem,
oli stap presem yu
Olgeta we blad blong olgeta i ron from Kraes,
oli stap presem yu.
Long olgeta ples long wol
tambu Jyos blong yu i stap presem yu.
Papa, we paoa trio gudfala samting blong yu i bitim mak,
Stret Pikinini blong yu i wan nomo we yu gat,
hem i gat raet blong mifala i bodaon long hem,
mo Tambu Spirit we i givhan long mifala, mo i lidim mifala.
Kraes, yu yu king blong laet antap,
yu yu Pikinini blong Papa, we yu no save finis.
Taem yu kam man blong mekem mifala i fri,
yu no sem blong yu bon long bel blong yang gel ya Mere,
we neva man i bin go long hem.
Yu yu faet wetem ded, be ded i no save holemtaet yu.
Nao yu openem kingdom blong heven long olgeta we oli bilif long yu.
Yu yu stap sidaon long raet saet blong God
long gudfala samting blong Papa.
Mifala i bilif se bambae yu kambak bakegen
blong mekem kot long mifala.
From ol samting ya, plis yu halpem mifala, ol man blong yu,
we yu bin pemaot mifala long blad blong yu.
Yu tekem mifala i go wetem ol tambu pipol blong yu
long gudfala samting we i no save finis.

BENEDICTUS Luke 1:68-79

YUMI mas leftemap nem blong Hae God
we i God blong yumi man Israel,
from we hem i kam blong givhan long yumi man blong hem,
blong pemaot yumi, yumi fri.
Hem i putumap wan man we i gat paoa
we hem bambae i sevem yumi,
wan man we i kamaot long laen blong David,
man blong wok blong God bifo.
Hemya i olsem tok we God i talemaot finis long yumi,
long tok blong ol tambu profet blong hem bifo.
Hem i promes finis se bambae i sevem yumi
long ol enemi blong yumi,
mo i tekemaot yumi long han blong olgeta
we oli no laekem yumi, oli agens long yumi.
Hem i promes finis se bambae i gat sore yet
long ol bubu blong yumi bifo,
mo i no saye fogetem promes ya we hem i givim long olgeta,
mo olgeta oli agri long hem.
Hem i givim wan strong promes long bubu ya blong yumi Ebraham,
mo i stanemap promes ya long strong tok blong hem.
Hem i promes se bambae i tekemaot yumi
long han blong ol enemi blong yumi,
blong yumi save mekem wok blong hem long fes blong hem
gogo laef blong yumi i finis,
we yumi no moa fraet, yumi tambu, yumi man blong hem,
mo fasin blong yumi i stret.
Yu ya, smol pikinini blong mi,
ol man bambae oli save singaot yu
se profet blong God ya we i antap tumas
From we yu bambae yu go fastaem
blong mekemrere ol rod blong Hae God,
we hem i Jif blong yumi, blong hem bambae i kam biaen.
Yu bambae yu talemaot long ol man
we God bambae i sevem olgeta,
from we hem bambae i tekemaot ol sing blong olgeta.
God blong yumi
hem i kaen tumas mo hem i gat sore long yumi.
Mo bambae hem i tekem wan mun i aot long heven
i kamtru long yumi,
we hem bambae i givim laet long yumi,
olsem san we i kam antap long moning.
Man ya bambae i givim laet long olgeta
we oli stap long tudak,
mo long olgeta ya
we paoa blong ded i kam kavremap olgeta.
Nao hem bambae i lidim yumi long wan rod
we bambae yumi kasem pis long hem.
Leftemap nem blong Papa mo Pikinini mo Tambu Spirit.
Olsem bifo, mo naoya, mo oltaem, i no save finis. Amen.

SAM 100

OLGETA pipol long wol, yufala i sing long Hae God,
yufala i wok blong hem wetem glad,
Yufala i kam long fes blong hem wetem singsing.
Yufala i mas save gud we Hae God ya hem nomo i God.
Hem nomo i bin mekem yumi, i no yumi nomo.
Yumi pipol blong hem.
Yumi ol sipsip blong fenis blong
Yufala i kam insaet long doa blong hem
blong talem tankyu long hem.
Yufala i presem hem long tambu haos blong hem.
Yufala i talem tangkyu long hem,
yufala i talem gud nem blong hem.
From we Hae God ya hem i gud.
Lav blong hem i no save finis.
Hem i holemtaet promes blong bem oltaem,
Letemap nem blong Papa mo Pikinini mo Tambu Spirit.
Olsem bifo, mo naoya, mo oltaem, i no save finis. Amen.
 

SING BLONG KAMPANI BLONG HEVEN
Buk Revelesen 4:8, 5:9-10, 13

TAMBU, tambu, tambu, Hae God we yu gat olgeta paoa.
Yu yu stap oltaem, i no gat stat blong yu.
Yu stap naoya, mo bambae yu stap we yu no save finis.
Yu yu jif mo yu God blong mifala.
Yu gat raet blong mifala i leftemap nem blong yu,
blong mifala i ting hevi long yu,
blong mifala i talemaot paoa blong yu.
From we yu bin mekem olgeta samting,
mo oli gat laef from we yu yu wandem olsem,
Jisas, yu Jif, yu Lam blong God,
yu yu statem samting, yu en blong ol samting,
yu stap laef oltaem.
Oli bin kilim yu yu ded,
mo long ded blong yu yu bin pembak olgeta man long God,
long ol laen, ol toktok, ol ples mo ol pipol.
Yu bin mekem olgeta ya oli kam king
mo oli pris long God blong mifala,
mo bambae oli mas gat paoa long wol ya.
Lam ya we oli bin kilim hem i ded,
hem i gat raet blong tekem paoa
mo ol gudfala samting mo waes,
mo blong oli ting hevi long hem,
oli leftemap nem blong hem,
mo oli talem gud nem blong hem.
Mifala i presem Lam ya
wetem Hae God we i sidaon long heven blong lukaot long wol.
Mifala i talem gud nem blong hem,
mifala i ting hevi long hem,
mifala i talemaot paoa blong hem,
oltaem, i no save finis. Amen.
 

SING BLONG KRAES WE TINGTING BLONG HEM I STAP DAON
Filipai 2:5-11

TINGTING blong yufala i mas kam stret gud
wetem tingting we Kraes i gat.
Fastaem, bifo olgeta, hem i olsem God nomo,
be hem i no ting se i mas holemtaet samting ya,
we hem i sem mak wetem God, no gat.
Hem nomo i lego ol samting ya,
nao i kam olsem boe blong wok nomo.
Hem i bon long wol ya,
i kam olsem man.
Hem i karem fasim blong man,
mo i mekem tingting blong hem i stap daon,
blong obe long God, gogo i ded.
Mo ded ya blong hem,
ol man oli nilim hem long kros,
From samting ya, God i leftemap nem blong hem i go antap olgeta,
i givim nem long hem we i hae moa long ol narfala nem.
Nao olgeta long heven, mo long wol,
mo long ples blong ol dedman,
bambae oli foldaon,
oli ting hevi long nem blong Jisas
mo olgeta man bambae oli talemaot
we Jisas Kraes i Jif blong olgeta,
blong leftemap nem blong God, Papa blong yumi.
 

GOD YU JIF, YU GAT OLGETA PAOA
Buk Revelesen 15:3-4

GOD, yu Jif, yu gat olgeta paoa,
ol wok blong yu oli bigwan tumas, oli hae tumas.
Yu yu king blong olgeta man long evri ples.
Ol fasin blong yu oli stret mo tru.
Hae God, olgeta man oli mas ting hevi long yu,
oli mas presem yu,
from we yu nomo yu tambu.
Olgeta man long olgeta ples bambae oli kam,
oli bodaon long yu,
from we oli bin lukem ol stret wok yu bin wokem.
Leftemap nem blong Papa mo Pikinini mo Tambu Spirit.
Olsem bifo, mo naoya, mo oltaem, i no save finis. Amen.
 

JISAS, YU BIN SEVEM OLGETA MAN LONG WOL

JISAS, yu Jif, yu Pikinini blong God,
yu bin sevem olgeta man long wol,
mifala i askem yu, yu soemaot paoa blong yu,
yu halpem mifala,
Yu bin pembak mifala long kros blong yu mo blad blong yu,
mifala i askem yu, yu sevem mifala, ya halpem mifala.
Yu bin sevem olgeta fren blong yu taem klosap oli ded,
mifala i askem yu, yu harem mifala, yu sevem mifala.
Long sore blong yu we i bigwan tumas
mifala i askem yu, yu lusum sin blong mifala,
Plis yu soemaot we yu yu Sevya blong mifala.
Yu strong man blong mekem mifala i fri.
Mifala i askem yu, yu sevem mifala,
blong mifala i save presem yu.
Yu kamaot long laet blong yu,
yu kam klosap long mifala olsem we yu bin promes,
mifala i askem yu, yu harem mifala,
taem mifala i krae long yu.
Jisas Kraes, yu Jif, plis yu kambak bakegen,
yu stap wetem mifala,
mifala i askem yu, yu stap oltaem wetem mifala.
Mo taem bambae yu kambak bakegen long paoa
mo ol gudfala samting blong yu,
plis yu mekem mifala i kam olsem yu,
long ples we i fulap long laet we yu yu King blong hem.
Jif, mifala i talem tangkyu long yu.
Alleluia. Amen.
 

KANTIKOL BLONG ISTA
1 Korin 5:7-8, 15:20-22. Rom 6:9-11

KRAES we hemi i olsem lam blong yumi blong Pasova,
ol man oli kilim hem finis, nao yumi sef.
From samting ya,
i gud yumi joen blong mekem lafet ya.
Be sipos yumi gat olfala is ya i stap yet long yumi,
we hemya i olsem ol sin mo ol fasin we oli no stret,
bambae yumi no save joen long lafet ya.
Blong mekem lafet ya,
yumi mas folem ol fasin we oli klin gud mo oli tru,
nao bambae yumi olsem bred we i no gat is long hem.
Kraes ya, God i mekem hem i laef bakegen long ded,
Nao bambae hem i no save ded bakegen samtaem.
Ded i no moa gat paoa long hem nao.
From we hem i ded wantaem nomo.
hem i aot finis long paoa blong fasin blong sin.
Mo laef ya blong Kraes we i stap laef long hem naoya,
i blong leftemap nem blong God.
Nao long sem fasin, yufala tu i mas stap tingbaot yufala se,
“Mifala ya i olsem we mifala i ded finis.
Fasin blong sin
hem i no moa gat paoa long mifala nao.
Mifala i stap laef blong leftemap nem blong God,
from we mifala i stap joen long Jisas Kraes,
Jif blong mifala.”
Kraes ya, God i mekem hem i laef bakegen finis long ded.
Long olgeta we oli ded finis,
hem i faswan blong laef bakegen long ded,
hem i olsem fas kakae ya we i rere long garen.
Olsem we ded i wan samting
we wan man i tekem i kamtru long wol,
laef bakegen long ded i olsem,
hem tu i wan samting we wan man i tekem i kamtru,
Olsem we olgeta man oli joen long Adam oli save ded,
long sem fasin, olgeta man oli joen long Kraes,
oli save laef bakegen long ded.
Leftemap nem blong Papa mo Pikinini mo Tambu Spirit.
Olsem bifo, mo naoya, mo oltaem, i no save finis. Amen.
 

MAGNIFICAT
Luk 1:46-55

LONG olgeta laef blong mi, mi stap leftemap nem blong Hae God,
mo long tingting blong mi,
mi harem i gud tumas from God ya we i sevem mi.
From we mi mi daon olgeta,
mi gel blong wok blong hem,
be hem i stap tingbaot mi.
Mo i stat naoya,
bambae olgeta man oli save talemaot we God i blesem mi.
From we God ya we i gat olgeta paoa
hem i mekem i gud tumas long mi,
Nem blong hem i tambu.
Mo hem i save sore long olgeta we oli ting hevi long hem,
i stat long olgeta we oli bon bifo,
gogo i kasem olgeta we oli no bon yet.
Hem i stap soemaot paoa blong hem
long nem blong hem we i strong tumas,
mo i stap ronemaot olgeta
we oli stap flas long tingting blong olgeta.
Hem i stap brekem paoa blong ol king,
blong mekem olgeta oli stap daon,
ano i stap leftemap olgeta we oli stap daon,
blong oli kam hae man.
Olgeta we oli hanggri
hem i stap givim ol gudgudfala kakae long olgeta,
blong oli fulap gud long hem.
Be olgeta we oli rij man
hem i stap sanemaot olgeta oli gowe,
we oli no karem wan samting nating.
Hem i stap holem promes blong hem
long ol bubu blong yumi bifo,
mo i stap givhan long yumi man Israel,
we yumi man blong wok blong hem.
Hem i stap tingbaot Ebraham yet
blong i gat sore long hem,
mo long olgeta we oli stap kamaot long laen blong hem,
gogo i no save finis.
Leftemap nem blong Papa mo Pikinini mo Tambu Spirit.
Olsem bifo, mo naoya, mo oltaem, i no save finis. Amen.

NUNC DIMITTIS
Luke 2:29-32

HAE God, mi mi man blong wok nomo blong yu,
be naoya yu save letem mi mi ded,
we tingting blong mi i stap kwaet,
from we promes blong yu i kamtru finis.
Long ae blong mi nomo
mi mi luk rod blong yu blong sevem man.
Long fes blong ol man blong olgeta ples
yu yu mekem rod ya i rere finis.
Hemya i wan laet blong givim laet long ol hiten man,
mo hem bambae i leftemap nem blong mifala man Israel
we mifala i man blong yu.
Leftemap nem blong papa mo Pikinini mo Tambu Spirit.
Olsem bifo, mo naoya, mo oltaem, i no save finis. Amen.

SAM 123

GOD, mi lukluk antap long yu,
long heven we yu stap rulum ol samting.
Olsem ae blong boe blong wok
i lukem han blong masta blong hem,
ale, ae blong mifala i luk long yu, Hae God,
we yu God blong mifala,
gogo yu yu sore long mifala.
Hae God, plis yu sore long mifala, yu sore long mifala,
from we olgeta oli bin luk daon long mifala long taem tumas.
olgeta we oli stap harem gud
oli bin laf tumas long mifala,
ol praod man ya we oli stap lukluk daon long mifala,
Leftemap nem blong Papa mo Pikinini mo Tambu Spirit.
Olsem bifo, mo naoya, mo oltaem, i no save finis. Amen.

Published by
The Diocese of the New Hebrides
Church of Melanesia
and
Printed by Provincial Press, Honiara
Solomon Islands.