MEKEM RERE LONG TAMBU KAKAE
JISAS KRAES hem i kam long yumi long Tambu Kakae.
Hem i givim bodi blong hem we hem i bin letem from yumi,
mo blad blong hem we i ron from yumi.
Hem i givim laef blong hem
olsem kakae blong spirit blong yumi,
mo blong mekem bodi blong yumi i strong.
TAEM yumi mekem rere blong tekem Jisas long Tambu Kakae
yumi mas tanem tingting blong yumi,
yumi mas kam wetem bilif mo lav.
|
Tanem Tingting
TAMBU Spirit blong God, plis yu halpem mi
blong mi save faenemaot ol sin blong mi,
mo yu mekem mi mi sore tru from.
Yu mas tingbaot fasin blong yu, blong faenemaot ol sin blong yu.
Sipos, yu harem nogud tumas from samfala sin, yu askem pris blong i harem konfes blong yu.
GOD blong mi, mi bin mekem tumas sin agens long yu.
Mi sore tumas
we mi mekem yu yu harem nogud from sin blong mi.
Mi save we Jisas Kraes i ded from mi
blong mekem mi mi fri from sin.
Mi bilif long Jisas we hem i save tekemaot ol sin blong mi,
mo mi askem long yu yu givhan long mi,
blong mi save harem yu
mo mi nomoa save mekem sin bakegen.
|
Repentance |
Bilif
PAPA, mi bilif we yu bin senem Pikinini blong yu, Jisas Kraes, i kam blong sevem mi.
Mi bilif we bambae mi tekem hem long Tambu Kakae.
Mi bilif we Jisas i bin wokem olgeta samting blong pembak mi, taem hem i ded long kros,
mo mi mi no mekem wan samting nating blong sevem mi.
|
Faith |
Lav
PAPA, mi lavem yu from we yu bin senem Jisas
blong i ded from mifala,
long taem ya we mifala i stap mekem nogud yet.
Jisas, mi wandem lavem yu tru,
from we yu bin lavem mi fastaem.
Jisas, from we mi lavem yu tumas
mi wandem lavem olgeta brata mo sista blong mi,
mo mi wandem stap oltaem long pis mo lav wetem olgeta.
Jisas, plis yu kam long mi,
yu mekem mi mi laef,
mo yu no letem mi mi lego yu.
|
Love |
PAPA, mifala i no ting se mifala i stret
blong kam long tambu tebel blong yu,
be mifala i bilif long sore blong yu we i bigwan tumas.
Mifala i no naf blong pikemap ol haf kakae
ananit long tebel blong yu.
Be fasin blong yu we oltaem yu stap sore long man.
Jif, we yu gat sore long mifala,
plis yu mekem mifala i kakae bodi blong Jisas Kraes,
Pikinini blong yu we yu lavem hem tumas,
mo dringim blad blong hem,
blong mifala i save stap oltaem long hem,
mo hem i stap long mifala. Amen.
|
Prayer of Humble Access |
MAS
Stanap
+ Long nem blong Papa, mo Pikinini, mo Tambu Spirit. Amen.
|
Olgeta
GOD PAPA, yu gat olgeta paoa,
yu save olgeta tingting blong man,
mo olgeta samting we hem i wandem,
mo olgeta samting we i stap haet i no save haet long yu.
Plis yu klinim tingting blong mifala
long win blong Tambu Spirit blong yu;
blong bambae mifala i naf blong lavem yu tru,
mo blong presem tambu nem blong yu.
Mifala i askem ol samting ya
long nem blong Jisas Kraes, Jif blong mifala. Amen.
Jif, yu sore long mifala.
Jif, yu sore long mifala.
Jif, yu sore long mifala.
Kraes, yu sore long mifala.
Kraes, yu sore long mifala.
Kraes, yu sore long mifala.
Jif, yu sore long mifala.
Jif, yu sore long mifala.
Jif, yu sore long mifala.
|
Collect for Purity |
LEFTEMAP nem blong God long heven antap we antap,
mo long wol ya pis i stap wetem ol man we God i glad long olgeta.
Mifala i presem yu,
mifala i talem gud nem blong yu,
mifala i bodaon long yu,
mifala i leftemap nem blong yu,
mifala i talem tangkyu long yu,
from we fasin blong yu i gud tumas,
God, yu yu Jif, yu King blong heven,
God Papa yu gat olgeta paoa.
Jisas Kraes, yu Jif,
yu yu Pikinini blong hem,
yu wan nomo we hem i gat.
God, yu Jif, yu Lam blong God,
yu Pikinini blong Papa,
yu tekemaot olgeta sin blong wol,
plis yu sore long mifala.
Jif, yu we yu tekemaot olgeta sin blong wol,
plis yu harem prea blong mifala.
Jif, yu we yu sidaon long raet saet blong Papa,
plis yu sore long mifala.
Yu wan nomo we yu tambu,
yu wan nomo we yu Jif,
yu wan nomo, Jisas Kraes, wetem Tambu Spirit,
we yu antap tumas long laet blong God we i Papa. Amen.
|
Gloria |
Yumi prea.
PREA BLONG WIIK
FAS LESEN — sidaon
Stap kwaet smol
GUD NYUS — stanap
Mi prea se Jif i stap wetem yufala.
Mo wetem yu.
| Bifo Gud Nyus |
— Jif, mifala i leftemap nem blong yu. |
| Taem Gud Nyus i finis |
— Kraes, mifala i presem yu. |
PRIJ
|
Collect — Epistle — Gospel — Sermon |
BILIF
YUMI bilif long wan God, Papa we i gat olgeta paoa,
we hem i mekem heven mo wol,
olgeta samting we yumi lukim,
mo olgeta samting we yumi no lukim.
Yumi bilif long wan Jif, Jisas Kraes,
Pikinini blong God i wan nomo we hem i gat.
Hem i stap kamaot long Papa oltaem,
i no gat stat mo i no gat en blong hem.
God we i kamaot long God,
Laet we i kamaot long laet,
Prapa God we i kamaot long prapa God,
Hem i kamaot long God, God i no mekem hem.
Hem wetem Papa i gat wan fasin nomo.
Taem Papa i mekem olgeta samting long wol,
Pikinini tu i joen wetem hem.
Hem i kamaot long heven, i kamdaon from yumi olgeta man blong sevem yumi.
Tambu Spirit i mekem hem i tekem fasin blong yumi man
long bel blong wan gel Mere,
we neva man i bin go long hem,
mo hem i kam man.
Oli nilim hem long kros from yumi
long taem we Ponsus Paelat i kapinan.
Hem i harem nogud, oli berem hem.
Long namba tri de hem i girap bakegen long ded,
olsem oli raetem long Baebol.
Hem i go antap long heven.
Hem i stap sidaon long raet saet blong Papa.
Bambae hem i kambak long wol ya bakegen
wetem ol gudgudfala samting blong hem
blong mekem kot long olgeta man,
olgeta we oli laef wetem olgeta,we oli ded finis.
Paoa blong hem we hem i king i no save finis.
Mo yumi bilif long Tambu Spirit,
hem i Jif, hem i givim laef.
Hem i stap kamaot long Papa mo long Pikinini.
Oli bodaon long hem, oli leftemap nem blong bem wetem Papa mo Pikinini.
Hem i givim tok blong hem long olgeta Profet.
Mo yumi bilif long wan Jyos we i tambu,
we i blong olgeta man,
mo we i stanap long tijing blong olgeta aposol.
Yumi bilif long wan baptaes nomo blong tekemaot ol sin.
Yumi stap wet long olgeta we oli ded bambae oli girap bakegen,
mo long laef blong wol we bambae i kam. Amen.
|
Nicene Creed |
PREA BLONG ASKEM OL SAMTING
Nil daon
YUMI prea from Jyos blong Kraes mo from olgeta samting we i stret blong ol man oli kasem.
God papa, yu gat olgeta paoa,
olsem Tambu Tok blong yu i bin tijim mifala
blong talem tankyu long yu,
mo blong prea from olgeta man,
naoya mifala i talem tangkyu long yu
from olgeta gudgudfala samting
we yu givim long mifala . . . .
Yumi talem gud nem blong Jif.
Tangkyu, God.
Mifala i askem long yu
blong yu tekem prea blong mifala
from Jyos blong Kraes long olgeta ples.
Plis yu fulumap Jyos ya long ol gudfala samting mo pis.
Mekem olgeta we oli bilif long tambu nem blong yu
oli ting se Tambu Tok blong yu i tru
mo oli stap olsem wan famle nomo
long wan tingting mo lav.
Jif, long sore blong yu,
Yu harem prea blong mifala.
Yu fulumap long paoa olgeta we oli stap wok
blong talemaot tok blong yu,
mo blong wokem ol sakramen blong yu,
mo mifala i prea antap moa from ……… ol bisop blong mifala,
mo olgeta pris mo dikin blong daisis ya . . . .
Mekem olgeta ya oli save soemaot
long fasin mo long tijing blong olgeta
ol gudfala samting blong yu,
mo oli save pulum ol man oli kam long yu.
Jif, long sore blong yu,
Yu harem prea blong mifala,
Mifala i prea from ol kapman blong olgeta ples long wol,
antap moa from Kwin Elisabet mo President blong Franis,
mo from olgeta we oli gat paoa blong lukaot long pipol . . . .
Mekem olgeta oli save lukaot gud long olgeta pipol,
oli save jajem olgeta long stret fasin,
mo oli save mekem olgeta oli stap long pis,
Jif, long sore blong yu,
Yu harem prea blong mifala.
Plis yu lidim mo yu halpem olgeta we oli stap wok
blong talemaot gud nyus blong yu long olgeta ples . . . .
mo yu mekem we laet blong Spirit blong yu i saenaot
long olgeta ples blong wok,
olgeta skul mo hospital . , . .
Jif, long sore blong yu,
Yu harem prea blong mifala.
Plis yu givim paoa blong yu we i stap long heven
i kam long olgeta pipol blong yu
long ol narnarfala wok blong olgeta,
antap moa long (. . . . mo long) mifala, ol man blong wok blong yu,
blong mifala i save harem Tambu Tok blong yu
yu, blong mifala i save harem Tambu Tok blong yu
long tingting we i gud mo we i rere blong folem tok ya,
mo blong mifala i save wok gud long yu,
gogo laef blong mifala i finis.
Jif, long sore blong yu,
Yu harem prea blong mifala.
Papa, mifala i askem long yu
we lav blong yu we i bigfala tumas
i save mekem gud mo i halpem tingting blong olgeta
we oli harem nogud, oli stap sore,
oli sot long samting no oli stap sik .. . . . .
Jif, long sore blong yu,
Yu harem prea blong mifala.
Mifala i prea from olgeta man blong yu
we oli bilif mo oli ting hevi long yu,
be naoya oli ded finis . . .
mo mifala i presem nem blong yu
from olgeta tambu man blong yu . .. . . .
Mifala i talem tangkyu from gudfala fasin blong olgeta,
mo mifala i askem long yu se
mifala i save folem gudfala fasin ya,
mo mifala i save go insaet wetem olgeta
long glad blong yu we i no save finis.
Papa we yu tambu,
plis yu harem olgeta prea blong mifala,
sipos oli stret long tingting blong yu we yu wandem.
Mifala i askem ol samting ya long nem blong Jisas Kraes,
Pikinini blong yu, Jif blong mifala. Amen.
|
Intercession |
NARFALA PREA BLONG ASKEM SAMTING
Ansa blong olgeta prea ya:
Jif, yu harem prea blong mifala.
From . . . . . . mifala i talem tangkyu long yu.
Blong olgeta Kristin man oli save kam wan long wan Jyos we i tambu, mifala i prea long yu.
From olgeta bisop, pris mo dikin, mo olgeta narfala man we oli stap wok long Jyos (antap moa . . . . ), mifala i prea long yu.
From olgeta man blong oli save harem mo tekem Tok blong yu (antap moa ...), mifala i prea long yu.
From olgeta hiten man long ol aelan blong mifala (antap moa . . . .) mo from olgeta we oli stap wok long olgeta, mifala i prea long yu.
From pis long olgeta ples long wol (antap moa ….. . .), mifala i prea long yu.
From ol kapman long olgeta ples long wol, blong oli save lukaot long pipol folem tingting blong yu we i tambu, mifala i prea long yu.
From kantri blong mifala mo from Kwin Elisabet mo Presiden blong Franis mo from olgeta we oli lidim pipol (antap moa. . . . ), mifala i prea long yu.
From olgeta man mo woman long laef mo wok blong olgeta evri de (antap moa . . . .), mifala i prea long yu.
From olgeta we oli stap wok long taon mo long plantesen mo long sip, mifala i prea long yu.
From olgeta famle mo ol fren blong mifala, mo from ol papa mo mama mo ol pikinini long olgeta ples, mifala i prea long yu.
From olgeta tija mo olgeta we oli stap skul long ol skul mo kolej blong mifala (antap moa . . . .), mifala i prea long yu.
From olgeta we oli wokabaot long graon mo long sip mo long pien (antap moa . . . .), mifala i prea long yu.
From olgeta pua man, from olgeta we oli no gat kakae mo from olgeta we oli no gat haos, mifala i prea long yu.
From olgeta man we oli wandem wok be oli no save faenem, mifala i prea long yu.
From olgeta we oli no gat fren blong givhan long olge ta mo from olgeta we oli harem nogud from we ol enemi oli ronem olgeta (antap moa ……… ), mifala i prea long yu.
From olgeta enemi blong mifala mo from olgeta we mifala i bin mekem nogud long olgeta, mifala i prea long yu.
From olgeta sik mo from olgeta we oli harem nogud long tingting mo long bodi (antap moa . . . .), mifala i prea long yu.
From olgeta man we klosap oli ded mo from olgeta we oli ded finis (antap moa ……. ), mifala i prea long yu.
Yumi prea kwaet from ol samting we yumi wandem askem blong yumi nomo.
Stap kwaet
Jif, long sore blong yu,
Yu harem prea blong mifala.
PAPA we yu tambu,
plis yu harem olgeta prea blong mifala,
sipos oli stret long tingting blong yu we yu wandem.
Mifala i askem ol samting ya long nem blong Jisas Kraes,
Pikinini blong yu, Jif blong mifala. Amen.
|
Alternative Intercession |
NAO yumi kam wetem sore mo long tru bilif,
yumi talemaot ol sin blong yumi
long Papa blong yumi we i stap long heven.
Stap kwaet
|
Invitation |
TALEMAOT SIN
PAPA, yu gat olgeta paoa, yu stap jajem olgeta man,
mifala i bin mekem i nogud long yu
long tingting mo long toktok
mo long samting we mifala i bin mekem.
Mifala i no bin lavem yu long olgeta bel blong mifala.
Mifala i no bin lavem ol pipol blong yu
olsem mifala bakegen.
Plis yu tekemaot sin blong mifala
from we Pikinini blong yu Jisas Kraes i bin sevem mifala.
Yu halpem mifala blong wok gud blong yu long nyufala laef,
blong mifala i save leftemap nem blong yu. Amen.
TEKEMAOT SlN
GOD PAPA, hem i gat olgeta paoa, hem i stap sore long yumi,
hem i bin promes blong tekemaot sin long olgeta man
we oli harem nogud tru from sin blong olgeta,
oli kambak bakegen long hem wetem bilif,
mo oli stap rere blong fogivim ol sin blong ol narfala man.
Mi prea se hem i sore long yufala,
hem i tekemaot ol sin blong yufala,
hem i mekem yufala i klin from,
hem i mekem yufala i strong long ol gudgudfala samting,
hem i lukaot long yufala long laef we i no save finis.
Mi askem ol samting ya long nem blong Jisas Kraes, Jif blong yumi. Amen.
|
Confession & Absolution |
PUTUM PRESEN BLONG YUMI ANTAP LONG OLTA
Stanap
Mi prea se pis blong Jif i stap oltaem wetem yufala.
Mo wetem yu.
Yumi ya Bodi blong Kraes.
Long baptaes blong yumi, Spirit ya we i wan nomo, hem i joenem yumi evriwan long wan bodi ya finis.
Yufala i mas traehad blong holem fasin ya we Tambu Spirit i stap mekem yufala i kam wan kampani nomo.
Long pis we i stap joenem yumi long wan kampani ya.
Yumi putum bred mo waen antap long olta.
Jif, yu yu hae tumas, yu gat olgeta paoa ano ol gudgudfala samting,
yu yu winim olgeta samting, yu yu King.
Olgeta samting long heven mo long wol ya i blong yu,
mo mifala i givim bak long yu olgeta samting we i blong yu.
|
Offertory |
BIGFALA PREA BLONG TALEM TANGKYU
Leftemap tingting blong yufala.
Mifala i leftemap long Hae God.
Yumi talem tangkyu long Hae God, we i God blong yumi.
Hem i gud, hem i stret, yumi mekem olsem.
I TRU, i gud tumas mo i stret se,
mifala i presem yu,
mifala i leftemap nem blong yu,
mifala i talem tangkyu long yu,
God, Papa we yu stap antap long heven,
from we mifala i joen long Jisas Kraes,
Pikinini blong yu, Jif blong mifala.
From we hem i bin joen wetem yu
long taem we yu bin mekem wol,
mo we yu bin mekem mifala folem fasin blong yu.
Long stret taem we yu yu makem i kamtru,
taem we mifala i bin foldaon finis long sin,
yu bin tekem Jisas ya i joen wetem yu
blong pemaot mifala bakegen.
Yu letem hem i bon i kam long fasin blong man.
Yu letem hem i ded long kros mo hem i laef bakegen
blong sevem mifala.
Yu mekem hem i stap sidaon long laet long raet saet blong yu.
Jisas ya i joen wetem yu bakegen
taem yu givim Tambu Spirit blong yu long mifala,
blong mekem mifala i kam wan tambu pipol,
mo blong fulumap mifala long nyufala laef,
mo blong mekem mifala i bilif se
bambae yu yu mas kam king blong olgeta man.
From olgeta samting ya,
mifala i joen wetem olgeta enjel mo olgeta jif enjel,
mo olgeta we oli stap long laet antap long heven,
mifala i glad tumas blong presem yu se:—
Olgeta
Tambu, tambu, tambu,
Hae God, yu yu gat olgeta paoa,
heven mo wol i fulap long laet blong yu.
Yu we yu stap long heven, yu sevem mifala.
Mifala i talem gud hem we bambae i kam long nem blong God.
Yu we yu stup long heven, yu sevem mifala.
Nil daon
Pris
GOD, Papa we yu stap long heven,
mifala i leftemap nem blong yu
from we yu lavem mifala tumas,
yu letem Jisas Kraes, Pikinini blong yu we i wan nomo we yu gat,
blong olgeta we oli bilif long hem
oli save kasem laef ya we i no save finis.
Papa, mifala i joen long Jisas Kraes,
Pikinini blong yu, Jif blong mifala,
blong mekem prea long yu,
mo blong givem presen long yu blong presem yu.
Plis yu harem prea ya mo yu tekem presen ya,
mo yu senem paoa blong Tambu Spirit blong yu
long bred mo waen ya,
we mifala i givim long yu.
Mekem tufala i kam bodi mo blad blong Jisas long mifala.
Long naet ya bifo Jisas i harem nogud tumas long kros,
hem i tekem bred,
hem i prea blong talem tangkyu long yu from,
hem i brekem bred ya,
mo hem i seraot long ol gudfren blong hem, i talem se:
“Yufala i tekem, yufala i kakae.
Hemya bodi blong mi, we mi letem from yufala.
Bambae yufala i mekem olsem
blong tingbaot mi bakegen long hem,
mo bambae yufala i save nao we mi mi stap wetem yufala.”
Olsem bakegen, taem kakae i finis,
Jisas i tekem kap.
Hem i prea bakegen blong talem tangkyu long yu from,
hem i seraot long ol gudfren blong hem, i talem se:
“Yufala evriwan, yufala i dring long hem,
from we hemya, blad blong mi,
blad blong mekem nyufala promes i stanap.
Blad ya bambae i ron
blong pemaot yufala mo olgeta man from ol sin blong yufala.
Bambae yufala i mekem olsem
long evri taem we yufala i dring long hem,
blong tingbaot mi bakegen long hem,
mo bambae yufala i save nao we mi mi stap wetem yufala.”
Olgeta
Papa, mifala i soemaot ded blong hem,
mifala i talemaot we hem i laef bakegen,
mifala i stap wet long hem bambae hem i kambak bakegen.
Mifala i leftemap nem blong yu, Jif we yu hae tumas.
Pris
Olsem, Papa, mifala i mekem wok ya
olsem Pikinini blong yu i bin talem,
mo mifala i givim presen ya long yu,
bred blong laef mo kap blong blad we i sevem man,
blong presem yu mo blong talem tangkyu long yu.
Mifala i soemaot we hem i ded long kros
blong pemaot ol pipol blong wol from ol sin blong olgeta,
hem i laef bakegen wetem paoa,
mo hem i go antap bakegen long heven.
God, plis yu tukena mifala tu
we mifala i kam long nem blong Jisas,
we i Sevya blong mifala.
Hem i bin givim laef blong hem bakegen long yu
we i nambawan presen we hem i mekem wantaem nomo.
From samting ya,
mifala evriwan ya we bambae mifala i tekem Tambu Kakae ya,
mifala i prea long yu
blong yu mekem mifala i kam wan nomo
long Jyos blong yu we i tambu,
hemya bodi blong Jisas Kraes,
Pikinini blong yu, Jif blong mifala.
Long nem blong hem nomo,
mifala i presem yu,
mo mifala i leftemap nem blong yu,
Papa God, we yu gat olgeta paoa,
wetem Tambu Spirit we i mekem yu trifala i wan God nomo,
i stap oltaem, i no save finis. Amen.
Stap kwaet
Olsem Jif blong mifala hem i bin tijim mifala, mifala i talem se:—
|
The Great Thanksgiving |
PAPA blong mifala, we yu stap long heven,
nem blong yu i tambu.
Mifala i wandem we olgeta man oli ona long yu,
mo we yu yu kam king blong olgeta man,
mo we olgeta man long wol oli mekem olsem we yu yu wandem,
olsem we olgeta long heven oli stap mekem.
Plis yu givim kakae long mifala, i naf blong tede.
Yu fogivim mifala from ol sin blong mifala,
olsem we mifala i stap fogivim ol man
we oli mekem i nogud long mifala.
Yu no letem ol samting oli kam traem mifala tumas,
yu blokem Setan i no kam spolem mifala.
From we yu nomo yu King,
yu nomo yu gat olgeta paoa,
mo ol gudgudfala samting oli blong yu nomo,
gogo i no save finis. Amen.
|
Lord's Prayer |
BREKEM BRED
Bred ya we yumi stap brekem,
taem yumi kakae, yumi kam wan wetem Kraes long bodi blong hem.
Yumi plande,
be from we i gat wan bred nomo i stap,
mo yumi evriwan i kakae bred ya,
nao yumi olsem wan bodi nomo.
Lam blong God, yu tekemaot olgeta sin blong wol,
plis yu sore long mifala.
Lam blong God, yu tekemaot olgeta sin blong wol,
plis yu sore long mifala.
Lam blong God, yu tekemaot olgeta sin blong wol,
plis yu givim pis blong yu long mifala.
|
Breaking of the Bread |
TAMBU KAKAE
Yufala i kam klosap wetem bilif.
Yufala i tekem bodi blong Jisas Kraes, Jif blong yumi,
hem i letem from yumi,
mo blad blong hem, hem i ron from yumi.
Yufala i kakae long tingting blong yufala wetem bilif,
blong yufala i save kasem laef blong hem,
mo yufala i talem tangkyu from.
Taem pris i givim Tambu Kakae, hem i talem se:—
|
Invitation |
Bodi blong Jisas Kraes, Jif blong yumi. Amen.
Blad blong Jisas Kraes, Jif blong yumi. Amen.
* * * * *
Yumi prea
God, gat olgeta paoa, mo yu gat laef we i no save finis,
mifala i talem tangkyu tumas long yu
from we yu givim tambu kakae long mifala,
hemya bodi mo blad blong Jisas Kraes,
Pikinini blong yu, Sevya blong mifala.
Mo mifala i talem tangkyu long yu
from lav blong yu; we yu lukaot long mifala,
yu mekem mifala i joen long hem,
blong mifala i kam ol haf blong bodi blong hem we i laef,
hemya olgeta pipol blong yu we oli stap wan famle blong yu,
mo yu givim long mifala laef ya we i no save finis.
|
Words of Administration |
Olgeta
Olsem, Papa, yu lukaot long mifala long lav blong yu,
blong mifala i save mekem ol gud wok
we yu bin mekem rere finis long mifala.
Naoya mifala i givim mifala bakegen,
spirit mo bodi blong mifala,
olsem presen long yu we i tambu mo i gat laef.
Mifala i askem ol samting ya
long nem blong Jisas Kraes, Jif blong mifala,
mo mifala i presem yu,
mo mifala i leftemap nem blong yu, Papa,
wetem hem mo Tambu Spirit,
we yu stap oltaem, yu no save finis. Amen.
Yufala i goaot wetem pis,
yufala i lavem Jif,
yufala i wok blong hem.
Yufala i fulap long glad long paoa blong Tambu Spirit.
Mo mi askem long God we i gat olgeta paoa,
Papa, Pikinini mo Tambu Spirit,
i blesem yufala, mo is tap wetem yufala,
oltaem, i no save finis. Amen.
|
Blessing |
BLONG TALEM TANGKYU FROM TAMBU KAKAE
Yu talem sloslou samfala prea olsem ol prea ya, mo yu save talem sem prea plande taem.
Jif blong mi mo God blong mi.
Jisas, mi talem tangkyu long yu
from we yu bin kam long mi.
Naoya yu stap long tingting blong mi.
Plis yu jenisim mi blong mi kam olsem yu.
Mi letem mi long yu, bodi mo spirit blong mi,
blong mekem ol wok olsem we yu yu wandem.
Mi talem gud nem blong yu, Jisas Kraes,
mi presem yu,
mo mi holem nem blong yu i tambu,
taem mi tingbaot yu we yu stap
long ol gudgudfala samting blong yu,
mo we yu stap long tambu sakramen blong olta ya,
mo we yu stap long laef blong mi
we i olsem tambu haos blong yu:
Mi goaot naoya wetem yu, Jisas, we yu stap insaet long mi,
blong soemaot lav blong yu long fasin blong mi,
blong lavem olgeta brata mo sista blong mi,
mo blong wok blong givhan long olgeta man.
Yu tingbaot we naoya Jisas i stap insaet long yu oltaem. |
After Communion |
