A TATARO QILODO HURI ROBONI

AHI.

Nau eno hivo nam maturu vun, nam rada taligu, huri a Huqe mo halovieu (Psalm 3:5)
 

Da serelue na bugude lawe God managi.

Nam serelue na buguku doluegi lawe God a Mama, i Netui ko i Vui Gogona, ko lo nagora Angel meire Gogona, ve ineu nam vai vagasile lo domiana, lo leo ko lo noku lalakogi. A vevenagi hinei neu nam navuhi God a Mama, i Netui ko i Vui Gogona vena ladovohogi laweau na buguku doluegi, a vevenagi i Jesus Christ noku Huqe, Amen.

Huqe, hava na hahagavi, gamai gam tataro lawego, gon wahegi lawera nom tanaloi ladohogo a ladovohogi bugugi ko a tamata; gamai gan masara dena bugumai doluegi, gan tabanagi surigi lawego; gin Jesus Christ nomai Huqe.

Huqe, gon waga na sinomai,
Na wuwamai ran serelue na roromu,
God, siseri himei gon vagamasoi gamai,
Huqe, gon himei na siseri, gon bului gamai,
Waregi roroi Mama, ko i Netui, ko i Vui Gogona.
Mere tuei, ko hibagataha, vin he rovo lai tea. Amen.

Nen waregareagi na Huqe.
Gamai gam waregareagi na henai Huqe.

PSALM 95.

Gide da vomai da huri ahi lawe na Huqe: gide da huri hauheugi lawe na vatu vagamasoi gide.
Gide da vano huri vevegarea goro na nagona: gide da huri rorovi hauheugi lawea na ahi.
Ne a Huqe u God lawua: i Ratahigi hageliure gineu vui doluegi.
Lo limana a walu bue: ko anona vuvuni vusi u qaqaravu.
Nona tahi me u teu: ko a limana mo tabanagi na tano mamaha.
Gide da vomai da huduhudu hivo: da sisiqeu goro a Huqe i Teu Gide.
Waregi roroi Mama, ko i Netui: ko i Vui Gogona.
Mere tuei, ko hibagataha: vin he rovo lai tea.

A REVEREVE

PSALM 100

Nen rorovi havuhevugi lawe na Huqe, vanue teri: nen vai tabana havuhevu lawe na Huqe, nen vano goro na nagona gi huri lawua na ahi.
Nen iloe huri a Huqe ve neie God: ne mo tau gide ko hatie noda siboda; igide nona vao, ko a sheep talo talune.
Nen ahu, nen gareahurie lo mataiara nona: nen vano vevegarea lo sarana; nen gaea hurie, nen vevegarea gina hena.
Ne a Huqe u garea, ne u hahagavi redu: ne u hogo vataha duvigi teri.
Waregi roroi Mama . . . . .
 

A LADOHOGO NORA GAIHORA

NAM LADOHOGO gi God Mama managi, u teu eulu ko lovavagi.
Ko i Jesus Christ Netune gategale vohogi noda Huqe; mo tino ginie gina Vui u Gogona; mo vora me a Matavono Mary; ne mo toga hahagavi lovavai Pontius Pilate; nere ram toto vehavehaginie lo gai saroutu; mo mate; nere ram taviginie; mo vano lo tanora tamate; lo oni gaitoligi ne mo maraga taligu dena mateana; mo hage taligu eulu; mo toga lo matuei God, Mama managi; vin himei teligu tetagaha tea vena veveginire ram maso tau; ko rau mate veno.
Nam ladohogo gi vui u Gogona, a Warelue u gogona vataha vanue; a buluvagategale nora gogona; a riqesi na gineu esi; a betugi vin maraga taligu; ko a masoana radu . . . Amen.

A Huqe na toga lobemiu,
Ko lobemu vage.

Gide da tataro.
 

Mama eulu, na hemu na gogona, Nomu ute na himei. Nomu tarani n alai lolovavagi mere eulu. Lai himei gaqarigi lawe gamai a hinaga mo eno huri gaqarigi. Gon ladovohogi na bugumai, mere gamai gam ladovohogi na bugure. Gon mese siregi gamai lolo galegaleasi; gon lai gamai dena gineu esi. Nomu a ute konomu a muremure ko nomu a varavara, vi eno vi eno. Amen.

A COLLECT
 

God, iniko vui tamata, gom tarani na bulu vagategale; ihine mo ilo vurugeginigo vin maso radu; ko iine mo vai tabana lawego vin toga tabetabegi: gon tu goro gamai ira nomu tanaloi ladobiti dena tavalui vuro va rovo goro gamai; gamai gam lado tau lumu gom tu goro, ga he matagu tea na muremure noi tavalui vuro; huri na muremure noi Jesus Christ a nomai Huqe. Amen.
 

Lord, Mama eulu, God managi, i Maso radu, iniko gom leo goro tabetabegi gamai vomai mo dadari roboni naha; gon tu goro gamai bagataha gina nomu managi; den gamai ga va soi gaqarigi lo gineu esi, ko den gamai ga va hue haro hariesi; gon dede managi nomai lalakoa doluegi, gamai gan vai hogona a gineu vatahae u vovohoi lo nagomu: huri Jesus Christ a nomai Huqe. Amen.

God managi, i Maso radu, iniko gahego gom vai givui; gon hora himei na nomu Vui, i Hogogi masoana, lure bishop meire leogoro ko lo ului Warelue doluegi: gon liwe hogona lure nomu idano veigarea, ram bei vei hogo nomu tarani. Huqe, gahagi himei nenaha, huri Jesus Christ i Tataro huri gamai; i Tuduviduvi. Amen.

Huri na Vanuada

God managi, gon lehi lologarea gi gamai gam sne bulutegi tahinaha. Gon leogoro na vanue naha dena segeana, dena maro, dena avi, dena laniue, dena ruru, dena mateanasi doluegi. Ko a muei gineu gon bului gamai doluegi, ve lavasigi gan huhui vurugegi, ko lavasigi gan ronhuri vurugegi; ko gamai doluegi gan toga vurugegi gi geriginigo huri gu vei iloilogi gamai lavasigi beno, ko gi lado hogona hurire talo vanuemai ram harogo tau; lui Jesus Christ a nomai Huqe. Amen.
 

A Tataro noi S. John Chrysostom

God managi, gu hogogi himei lawe gamai ve gan tataro gi dombulutegi lawego siserinaha; ko gu varataugi teu vena tanaloi gairue sige gaitolu ram sone bulutegi lo henamu, gon masinegi na gineu vatahae ram navu denigo: Huqe, hogogi himei bagataha naha nomai tarani, ko nomai tataro na tatarise huri bului hogosi gamai; lai himei lawe gamai ve gan iloilo huri nomu hogo lolo ure nenaha, ko gan maso radu lobemu lolo ure hinei. Amen.

2 Corinth 13-14

A Hogogi noi noda Huqe i Jesus Christ, ko a tabeana noi God, ko a bulubulu noi Vui u Gogona, na toga radu lobeda doluegi vin teui vin tuei. Amen.
 

A TATARO QILODO HURI REVIREVI

AHI

Nain eno tamata hivo, ko nain maturu, huri niko, Huqe, gahego gon vaieu ve nan toga magumegu. (Psalm 4:8)
 

Da serelue na bugude lawe God managi.

Nam serelue na buguku doluegi lawe God a Mama, i Netui ko i Vui Gogona, ko lo nagora Angel meire Gogona, ve ineu nam vai vagasile lo domiana, lo leo ko lo noku lalakogi. A vevenagi hinei neu nam navuhi God a Mama, i Netui ko i Vui Gogona vena ladovohogi laweau na buguku doluegi, a vevenagi i Jesus Christ noku Huqe, Amen.

Huqe, hava na hahagavi, gamai gam tataro lawego, gon wahegi lawera nom tanaloi ladohogo a ladovohogi bugugi ko a tamata; gamai gan masara dena bugumai doluegi, gan tabanagi surigi lawego; gin Jesus Christ nomai Huqe.

Huqe, gon waga na sinomai,
Na wuwamai ran serelue na roromu,
God, siseri himei gon vagamasoi gamai,
Huqe, gon himei na siseri, gon bului gamai,
Waregi roroi Mama, ko i Netui, ko i Vui Gogona.
Mere tuei, ko hibagataha, vin he rovo lai tea. Amen.
Nen waregareagi na Huqe.
Gamai gam waregareagi na henai Huqe.
 

NA MASOAKU

Na masoaku mo waregi roro na Huqe; ko na tamateku mo havuhevu huri God i Vagamasoieu.
Huri ne mo leo ve u garea: a vavine nona u ladobiti ginie.
Ko leo vomai: den hibagataha a tanaloi teri rain wareau ve nam vaigarea.
Huri i Managi mo vai givui laweau: ko a henana u gogona.
Ko ne mo hahagavi redu: ira tatabeginie vataha duvigi teri.
Ne mo lai lue nona muremure gina limana: ne mo livu vohoginire ram sagea sibora lolo taqanire.
Ne mo reve surire ratahigi dena tanora: ko ne mo hau hage ginire ladobiti.
Ne mo vaire maruruhi ve ran gani na gineu garea hogona: ko ne mo vuro marogagasi vohoginire meraihomu.
Ne mo buluire Israel no tanaloi: ne mo lado taligu huri leo ne mo ligogi tau lawera tubude;
Vin hagavi i Abraham: meire tubune vin tuei vin tuei.
Waregi roroi Mama, ko i Netui: ko i Vui Gogona;
Mere tuei, ko hibagataha: vin he rovo lai tea. Amen.

A REVEREVE
 

HUQE, GON MASINEGI

Huqe, gon masinegi na nomu tanaloi hibagataha: mere gu veve tau,
Huri na mataku: mo lehi na masoamu,
Gom vai vagatai: lo nagora tanaloi doluegi;
A rani in vei leleogi na vao teri: a varavara ira ta Israel nomu vao.
Waregi roroi Mama . . . . . .

NAM LADOHOGO gi God a Mama, u teuteu ko a gineu doluegi.
Nam ladohogo gi God i Netui, u tunteligugieu ko a tanaloi doluegi.
Nam ladohogo gi God i Vui Gogona, ne mo vagagogonagieu ko irahine doluegi God u leo wahera. Amen.

A Huqe na toga lobemiu,
Ko lobemu vage.

Gide da tataro.
 

Mama eulu, na hemu na gogona, Nomu ute na himei. Nomu tarani n alai lolovavagi mere eulu. Lai himei gaqarigi lawe gamai a hinaga mo eno huri gaqarigi. Gon ladovohogi na bugumai, mere gamai gam ladovohogi na bugure. Gon mese siregi gamai lolo galegaleasi; gon lai gamai dena gineu esi. Nomu a ute konomu a muremure ko nomu a varavara, vi eno vi eno. Amen.

A COLLECT
 

God, hava na vui taratarani u gogona vatahae, ko a ladoutu u garea vatahae, ko a lalakoa vatahae u vovohoi; gon gahagi lawe na tanaloi vatahae anomu a tamata hinei a ure vin he lai lei tea, huri ve a taqanimai bei meutu huri masine huri nomu leo huhui, ko igamai gam bei toga taqani toga, toga tamata, gan he matagu tea gina tavalui vuro, huri iniko gon tu goro gamai: huri Jesus Christ i Vagamasoi gamai, i Lalakogi u tatarise goro bugumai. Amen.
 

Huqe, gamai gam navuhigo, gon leleohagi nomai dodo; gon tu goro hagavi gamai dena hariesi lo boni naha; huri na tabeana noi Netumu gategale vohogi i Vagamasoi gamai, i Jesus Christ. Amen.

Ve a Sinobu anoi Christ ran Dombulutegi

Huqe Jesus Christ, gu veve lawera nomu gaihora gogona vena, “A tamata ineu nam lai lawe gimiu, noku tamata nam siregi lawe gimiu.” Gon mese ladotaligu huri bugumai, ne huri nomu Warelue u ladohogo; ko gon lai vomai lawe gamai a tamata ko a bulugategale mere gom tarani. Gom maso, gom ratahigi mei Mama ko i Vui Gogona, God gategale, vin tuei vin tuei. Amen.

Hurire ram Haroharo

God managi, gon hagavire ram haroharo tau, ran toga tau lo dodogi ko lo malumelui mateana. Gon hora vanatu nomu Vui u Gogona, na lalakogi siagagi lolo taqanire, ve ran leo roto huri nora gineu esi; ko ve ran rono ladohogo na lea huri Jesus i Vagamasoire, ko ve ran hako vurugegi na leo u garaqa mo eno huri maso radu; lui Jesus Christ nomai Huqe. Amen.
 

A Tataro noi S. John Chrysostom

God managi, gu hogogi himei lawe gamai ve gan tataro gi dombulutegi lawego siserinaha; ko gu varataugi teu vena tanaloi gairue sige gaitolu ram sone bulutegi lo henamu, gon masinegi na gineu vatahae ram navu denigo: Huqe, hogogi himei bagataha naha nomai tarani, ko nomai tataro na tatarise huri bului hogosi gamai; lai himei lawe gamai ve gan iloilo huri nomu hogo lolo ure nenaha, ko gan maso radu lobemu lolo ure hinei. Amen.

2 Corinth 13-14

A hogogi noi noda Huqe i Jesus Christ, ko a tabeana noi God, ko a bulubulu noi Vui u Gogona, na toga radu lobeda doluegi vin tuei vin tuei. Amen.
 

A LITANY
 

God mama eulu,
Gon hagavi gamai gau esi gam hahagavi.
God Netui, gom tun teligugi na ure,
Gon hagavi gamai gau esi gam hahagavi.
God Vui u Gogona, gom malue vomai den Mama ko den i Netui,
Gon hagavi gamai gau esi gam hahagavi.
Gogona, garea, leleo, ira gineu gaitolu, ne God gategale,
Gon hagavi gamai gau esi gam hahagavi.

Huqe, go mese ladolado bibi huri bugumai ko huri bugui retubumai: go mese soso lawe gamai huri bugumai; Huqe garea, gon siregi gamai, gon siregi na nomu vao, gom tunteligugi gamai gina muei gineu tun a daimu: go mese lologagasi redu gi gamai.
Huqe garea, gon siregi gamai.

Dena asi doluegi ko a mateanasi; dena gineu esi, den Satan vaiteu mo sinesine, vaiteu mo rovohuri gamai; dena nomu lologagasi ko dena mateana radu.
Huqe garea, gon lai gamai.
Dena haroharo; dena domi sagesage, dena garigeri ko a togaana kalikeli; dena lologagasi ko a mamadu ko a loloasi ko dena leo doluegi u wagineu dena leoi tabeana:
Huqe garea, gon lai gamai.
Dena bakabada ko a bugui mateana doluegi vage; dena kalikeli talo ure ko a vihigogi ko i Satan.
Huqe garea, gon lai gamai.
Dena vile ko a laniue; dena segeana ko a segeana asi ko a maro; dena vuro ko a ue nagovono ko a mateana mavolo.
Huqe garea, gon lai gamai.
Dena vilewahe ko a vevehuri ko a gatoasi; dena leo kalikeli ko a leo wagineu dena leo hogo; dena taqani siaga ko a domi mamarae na nomu Revereve ko a nomu Leo huhui,
Huqe garea, gon lai gamai.

Ginie gom vai givui gom voragi Tanaloi; gina nomu voraana u gogona hinei, ko a teve gigileginigo, gina garuhigogona ginigo hinei, ko a golo, ko a kali lehigo,
Huqe garea, gon vagamasoi gamai.
Gina gineu hinei u kuigo mo garasigo, ko a raratonimu a dai; ko gina nomu gai saroutu, ko a gagarasi hinei mo kuigo tau hivo; ko gina nomu mateana hinei a gineu tunu; ko a taviginigo; gina nomu maraga taligu u varavara, ko nomu mule kalo, ko gina Vui Gogona hinei mo himei,
Huqe garea, gon vagamasoi gamai.
Lune gamai gam toga lolovono, lune gamai gam toga havuhevu; lo boni mateamai, ko lo boni vevegi gamai,
Huqe garea, gon vagamasoi gamai.
God a Huqe, gamai gau esi gam navu denigo, gon ronhuri gamai; gon ratahigi goro na nomu Varelue u gogona vataha vanue lo matahala vovohoi,
Huqe garea, gamai gam tataro lawego, gon ronhuri gamai.
Gon vai iloilogi ra bishop meire priest ko ira deacon ve ran iloilo vurugegi ko ran mataisao huri na nomu leo, ko ran laqagi lue gina leora ko gi nora togaana,
Huqe garea, gamai gam tataro lawego, gon ronhuri gamai.
Gon gahagi lawera ratahigi ve ran iloilo ko ran mataisao,
Huqe garea, gamai gam tataro lawego, gon ronhuri gamai.
Gon vaigarea, gon leogoro ra vevegi, ve ran vevegi vovohoi, ko ve ran hako vurugegi na leo hogo,
Huqe garea, gamai gam tataro lawego, gon ronhuri gamai.
Gon va igarea, gon leogoro na nomu vao doluegi,
Huqe garea, gamai gam tataro lawego, gon ronhuri gamai.
Gon gahagi lawe na vanue teri ve ran bulubulu, ran toga tamata, ran domi gategale.
Huqe garea, gamai gam tataro lawego, gon ronhuri gamai.
Gon gahagi himei lawe gamai ve gan lolo tabego, gan lolo maemae ginigo, gan huri lolomamavigi na nomu leo,
Huqe garea, gamai gam tataro lawego, gon ronhuri gamai.
Gon hogogi bului lawe na nomu vao doluegi ve ran rorontagi gina ladobiti ko ran hako tabetabegi na nomu leo, ko ran wai masigi gina wai Vui,
Huqe garea, gamai gam tataro lawego, gon ronhuri gamai.
Gon ware dori taligu lo matahala hogo irahine ran taleva tau ko i Satan mo kali lehire.
Huqe garea, gamai gam tataro lawego, gon ronhuri gamai.
Gon turebili rahine ram labe, gon vai surigi gon buluire ram domie gairue, gon raga taligu ginire rau soi teu ko tetagaha tea gon wahagi vohogi Satan lovavai garumai,
Huqe garea, gamai gam tataro lawego, gon ronhuri gamai.
Gon buluire a mateanasi mo tuire vatahara, gon buluire ra he buluire te sibora lai, gon vai surigi rahine ram toha hahagavi,
Huqe garea, gamai gam tataro lawego, gon ronhuri gamai.
Gon leogoro rahine ram vano lategi lolo vanue sige ram walawalau lolo tahi sige ram hale na mawe; ko a vavine ram tinogi maresu, ko ira segeana, ko ira memeaga, gon hagavire ram lai belure, sige ram vauhire,
Huqe garea, gamai gam tataro lawego, gon ronhuri gamai.
Gon tu goro, gon haweginire madue doluegi, ko naraha ram toga mahogi meire ram toga hahagavi,
Huqe garea, gamai gam tataro lawego, gon ronhuri gamai.
Gon hagavire ram haroharo tau ve ran ladohogo ginigo ko ran hako vurugegi na lea garea,
Huqe garea, gamai gam tataro lawego, gon ronhuri gamai.
Gon hagavire na tanaloi doluegi
Huqe garea, gamai gam tataro lawego, gon ronhuri gamai.
Gon ladovohogi na bugure nomai tavalui vuro, meire rahine ram vai harogi gamai, ko ram gaivutugi gamai; gon dori taligugi na taqanire,
Huqe garea, gamai gam tataro lawego, gon ronhuri gamai.
Gon hogogi himei gamai hinaga gon leogoro, ve gan lai vurugegi lo higaora,
Huqe garea, gamai gam tataro lawego, gon ronhuri gamai.
Gon lai himei lawe gamai a ladowenigi hogo; gon ladovohogi nomai gineu esi doluegi, ko a haroharo; gon gahagi himei na hogogi noi Vui u Gogona anomu, ve gan vai vurugegi nomai togaana huri nomu Leo u gogona,
Huqe garea, gamai gam tataro lawego, gon ronhuri gamai.

Netui God, gamai gam tataro lawego, gon ronhuri gamai.
Netui God, gamai gam tataro lawego, gon ronhuri gamai.

E! Lamb noi God, i lai vohogi na bugui ureure,
Hogogi vomai nomu tamata lawe gamai.
E! Lamb noi God, i lai vohogi na bugui ureure,
Gon hagavi gamai.

Christ, ronhuri gamai.
Christ, ronhuri gamai.

Huqe, hagavi gamai.
Huqe, hagavi gamai.
Christ, hagavi gamai.
Christ, hagavi gamai.
Huqe, hagavi gamai.
Huqe, hagavi gamai.
 

Mama eulu, na hemu na gogona, Nomu ute na himei. Nomu tarani na lai lolovavagi mere eulu. Lai himei gaqarigi lawe gamai a hinaga mo eno huri gaqarigi. Gon ladovohogi na bugumai, mere gamai gam ladovohogi na bugure. Gon mese siregi gamai lolo galegaleasi; gon lai gamai dena gineu esi. Amen.
 

God managi, gu hogogi himei lawe gamai ve gan tataro gi dombulutegi lawego siserinaha; ko gu varataugi teu vena tanaloi gairue sige gaitolu ram sone bulutegi lo henamu, gon masinegi na gineu vatahae ram navu denigo: Huqe hogogi himei bagafaha naha momai tarani, ko nomai tataro na tatarise huri bului hogosi gamai; lai himei lawe gamai ve gan iloilo huri nomu hogo lolo ure nenaha, ko gan maso radu lobemu lolo ure hinei. Amen.

A Hogogi noi noda Huqe i Jesus Christ, ko a tabeana noi God, ko a bulubulu noi Vui a Gogona, na toga radu lobeda doluegi vin tuei vin tuei. Amen.