VAI VAGATAI IHINE GAHEA HURI GANIGOGONA

Jesus Christ mo vomai lobeku lo Ganigogona. Ne mo lai laweau nabetune u sireginie hurieu, ko a daine u hale hurieu.
Ne mo lai laweau na masoana vena vanani na tamateku ko vena turebibi na betuku.
Huri vai vagatai ve nan lai Jesus lo Ganigogona neu nam tarani ni Ladosesei, a Ladohogo ko a Tabeana.
 

LADOSESEI

Vui Gogona noi God, gon buluieu ve nan lehi na noku galegaleasi, ko gon vaieu ve nan lolovono huri.
Gon ladolado huri nomu togaana ve gom hike haqe nomu galegaleasi.
Tare ve gu galegaleasi ulawua, sige a taqanimu mo alealegi, huri nomu galeagaleasi, gon navu lawe priest vena rono huri nomu veve serelue bugugi.

God ineu, nau galegaleasi lawagi gorogo. Neu nam hahagavi lawua huri nam vai garasiginigo gina noku galegaleasi. Nam iloe ve i Jesus u mate hurieu ve nan toga vovohoi dena galegaleasi.

Nam lado talui Jesus ve nan lai lei a ladovohogi bugugi, ko gina nomu buluiana neu nam tarani ve nan dara gorogo ko nan mabu vohogi na galegaleasi doluegi.
 

LADOHOGO

Mama, ineu nam ladohogo ve gu hora vomai i Netumu Jesus vena vagamasoieu.

Nam ladohogo ve nai leie lo Ganigogona.
Nam lado talui Jesus hogosie, ko hatie taluku.
 

TABEANA

Mama, nam tabego, huri gamai gam toga radu lolo galegaleasi, ko gu hora mai Jesus i Netumu ve vin mate huri gamai.

Jesus, nam tarani ve nan tabe hogo ginigo huri gu tabe muegieu.

Jesus, gon vomai meieu ko gon vagamasoieu, ko nan mese vilewahe denigo.
 

Huqe, gamai ga he lado tea loului nomai togaana ve u vovohoi lune gam vomai huri nomu tanoi-gaganie, ne tau huri nomu hahagavi u lawua garagara. Gamai ga he tatarise tea ve gan vile vohogi na mavurigi lovavai nomi tanoi-gaganie. Ne a dominu, huqe, mo hagavi lawua radu. Huqe hagavi, gon hogogi himei lawe gamai ve gan gani na vihigoi Netumu natutabe i Jesus Christ ko gan inu na daine, ve gamai gan toga radu lolo lolona, ko ineie lolo lolomai. Amen.
 

A GANIGOGONA


Lo hei Mama ko i Netui ko i Vui Gogona. Amen.

GIDE DOLUEGI
 

God hava na managi, a taqani teri ram wuwana goro nagomu; gom ilo nomai tarani doluegi; ihine vin he beragi lea tea nona dom rorono denigo; vai renige na domiana teri talo taquanimai gin gom mabuhegi mai nom Vui u Gogona; gamai gain tabe hogo gihigo, gain ware mavagi nahemu u gogona, gi Jesus Christ nomai Huqe. Amen.

Huqe, hagavi gamai.
Huqe, hagavi gamai.
Huqe, hagavi gamai.

Christ, hagavi gamai.
Christ, hagavi gamai.
Christ, hagavi gamai.

Huqe, hagavi gamai.
Huqe, hagavi gamai.
Huqe, hagavi gamai.

Sige

Kyrie eleison
Christe eleison
Kyrie eleison
 

WAREGI ROROI GOD lo ului tuke, ko a tamata lo tano lawera tanaloi ram bulubulu garea taligu. Gamai gam gariginigo, gam waregarea ginigo, gam huduhudu gorogo, gam waregi roroi ginigo, gam vevegarea ginigo huri leleomu lawua garagara, Huqe God, Ratahigi ta eulu, God Mama hava na managi.
Huqe, Netui gategale vohogi Jesus Christ; Huqe God, Lam noi God, Netui mama, gom lai vohogi na bugui ureure, gon hagavi gamai. Huqe, gom lai vohogi na bugui ureure, gon lai vurugegi nomai tataro. Huqe, gom toga lo matuei God a Mama, gon hagavi gamai.
Huri iniko gategale gom gogona, iniko gategale i Huqe, iniko gategale, Jesus Christ, ko i Vui u Gogona, gom hahale garagara lo varavarai God a Mama. Amen.

Gide da tataro.

COLLECT
REVEREVE (toga hivo)
LEO GAREA (maraga)

A Huqa na toga lobemiu,
ko lobemu vage.

TOMUE DENA LEO GAREA

Waregi roroi ginigo Huqe

LO TAGUI LEO GAREA

Gariginigo, Christ.

TORETORE
 

GIDE DAM LADOHOGO gi God gategale, Mama managi, mo tau eulu ko lovavagi, ko a gineu teri gide dam leo ko a gineu teri da he leo tea.

Ko a Huqe gategale i Jesus Christ, Netui God gategale vohogi, Netui Tamana muegi vomai dena ureure teri; God vomai den God, a Ran vomai dena Ran; God hogo omai den God hogo; Netui God, hatie gineu teu; neie mei Tamana a dori gategale; mo tau na gineu teri ginie. Ne u himei eulu huri gide a tanaloi teri vena vagamasoi gide; mo tino ginie gina Vui u Gogona me a Matavono Mary; ne mo tanaloi; nere ram duletaginie lo gai saroutu huri gide lovavai Pontius Pilate; mo rono gagarasi, ram taviginie; lo rani gaitoligi ne mo maraga taligu mere u reve tau; ne mo hage taligu eulu ko mo toga lo matuei Mama; ne in himei taligu mena leleo vena vevegi ra maso ko rau mate veno; non a ute vin he rovo lai tea.

Ko gide dam ladohogo gina Vui Gogona, a Huqe ko i Vagamasoi; mo malue vomai dena Mama ko i Netui; gide dam huduhudu goroe, dam waregi roroi vagategale ginie ko a Mama ko i Netui; ne mo veve ginire tanaloi veve rarai.

Ko gide dam ladohogo gina Warelue gategale u gogona vataha vanue nora Gaihora; gide dam serelue a Garuhigogona gategale huri ladovohogi bugugi; ko igide dam toga tare na maragana taligu nora mate, ko a masoana lo ureure vi vomai.
 

TATARO NAVUNEVU

Igide da tataro huri Warelue doluegi noi Christ ko huri vataha domi tanaloi doluegi.

God, hava na managi, iniko gom huhui gamai gina nomu Leo gogona ve gamai gan vevegarea ginigo, gan tataro huri na tanaloi doluegi, ginie hi gamai gam vevegarea ginigo huri na nomu hogogi doluegi . . . .

Dain waregareagi na Huqe,
Gamai gam vevegareagi God.

Gamai gam navu denigo ve gon lai nomai tataro huri na Warelue doluegi noi Christ, huri ve vinhoro gina vui garea, a vui tamata, ko ve nere doluegi ram ladohogo gina henamu gogona rain dara bubugi ve nomu leo gogona u hogo, ko rain toga bubugi lo bulugategale ko a tabeana.

Huqe, lo nomu hahagavi
Gon ron nomai tataro.

Gon vagahoroni gina nomu hogogi ira lalakogi nomu Leo ko nomu sacrament, hageliu ira nomu tanaloi . . . . ira nomai bishop, ko ira priest meire deacon doluegi talo diocese naha . . . , huri ve gina nora togaana ko nora leo huhui rain serelue na leleomu ko rain reve na tanaloi doluegi lawego.

Huqe, lo nomu hahagavi
Gon ron nomai tataro.

Gamai gam tataro huri ira lawuagoro vataha vanue, hageliu a nomu tanaloi Queen Elizabeth ko i President ta France, ko ira ratahigi doluegi . . . , huri ve rain lawuagoro gina mataisao ko a vovohoigi, ko rain vei tamata ko rain leogoro na sinobu doluegi.

Huqe, lo nomu hahagavi
Gon ron nomai tataro.

Gamai gam navuhigo ve gon dede ko gon bului irahine ram lalakogi huri ahagi na nomu Leo Garea lo vataha vanue . . . , ko gon leleohagi gina nomu Vui vataha tanoi tabanagi, ko a school, ko a vale segeana . . . .

Huqe, lo nomu hahagavi
Gon ron nomai tataro.

Gon bete na nomu hogogi taeulu lawe na nomu sinobu doluegi gu warera huri na halai tabanagi u sao, ko hageliu ( . . . ko) lawe gamai ira nomu tanaloi, huri ve igamai doluegi gain ronhuri na nomu Leo gogona gina lolomai u garea ko a ragahui, ko gain lalakogi hogo lawego vataha bonimai.

Huqe, lo nomu hahagavi
Gon ron nomai tataro.

Mama, gamai gam navuhigo ve nomu tabeana lawua ko nomu lologarea na vaimesurigi, na bului irahine doluegi ram toga hahagavi, lolovono, maruruhi, segesege . . .

Huqe, lo nomu hahagavi
Gon ron nomai tataro.

Gamai gam tataro hurira nomu tanaloi doluegi rau toa beno dena ureure naha gina ladohogo tatabeginigo . . . , ko gam gariginigo hurira nomu Gogona doluegi . . . , gam vevegarea ginigo huri nora togaana garea, ko gam tataro huri ve gamai gan huri na taikerure garea, ko gan aju meire lo nomu havuhevu radu. Mama gogona, gon lai nomai tataro naha, tare ve rau tatarise mena nomu taraniana, lui Netumu Jesus Christ, nomai Huqe. Amen.
 

TATARO NAVUNEVU TUEGI

I vasvasogo vin vile lain a tataro lavasigi dena tataro nere naha ko vin siregi lei lavasigi sige vin weli buluteginire lai sige vin bului gina tataro lavasigi rau garaqa, mene mo tatani.

Lune i vasvasogo mo veve vena, “Gamai gam vevegarea ginigo,” sige “Gamai gam tataro lawego, a sinobu rain duvi vena, “Huqe, gon ron nomai tataro.”

Huri . . . . . , gamai gam vevegarea ginigo.

Huqe, gon ron nomai tataro.

Huri ve ira tanaloi doluegi noi Christ rain bulugategale lo Warelue gategale gogona, gamai gam tataro lawego.
Hurira bishop, ira priest ko ira deacon doluegi, ko ira lalakogi.
Lavasigi talo Warelue (hageliu . . . ), gamai gam tataro lawego.

Hurira tanaloi doluegi va ran rono ko ran lai na nomu leo (hageliu . . . ), gamai gam tataro lawego.
Hurira haroharo doluegi talolo vanuemai (hageliu . . .) ko nere doluegi ram lalakogi meire, gamai gam tataro lawego.
Huri na tamata lolo ureure doluegi (hageliu . . . ), gamai gam tataro lawego.
Hurira ratahigi vataha vanue ve ran lawuagoro huri na nomu taraniana gogona, gamai gam tataro lawego.
Huri na vanuemai, ko huri Queen Elizabeth ko i President ta France, ko huri rahine doluegi ram tomegi gamai (hageliu . . . ), gamai gam tataro lawego.
Hurira mera ko a vavine doluegi lo nora togaana ko nora tabana vataha rani (hageliu ...), gamai gam tataro lawego.
Huri rahine doluegi ram tabana lo town ko lo plantation ko lo aka, gamai gam tataro lawego.
Hurira hawamai ko ira nomai buluana, ko hurira tamai ko ira ide ko ira maresu vataha vanue, gamai gam tataro lawego.
Huri nere doluegi ram huhui sige ram hikehike lo nomai school ko a college (hageliu . . . ), gamain gam tataro lawego.
Huri nere doluegi ram dige lo tano, sige ram walau lolo tahi, sige ram hale na maxe (hageliu . . . ), gamai gam tataro lawego.
Hurira mahogi, ra maruruhi ko irahine a tanora hatie, gamai gam tataro lawego.
Huri rahine ra he haqe lai tea tabana, gamai gam tataro lawego.
Huri rahine ram toga gahera ko irahine hi ram vai esiesiginire (hageliu . . . ), gamai gam tataro lawego.
Huri ra nomai tavalui vuro ko irahine gau vei garasire, gamai gam tataro lawego.
Huri rahine ram sege ko ram gagarasi lo domire ko lo beture (hageliu . . . ), gamai gam tataro lawego.
Huri rahine ram kakarani lobei matena ko irahine ram matebeno (hageliu . . .), gamai gam tataro laweo.
Igide da tataro rorono huri noda taraniana siboda.

TOGA RORONO

Huqe, lo nomu hahagavi
Gon ron nomai tataro.

Mama gogona, gon lai nomai tataro naha, tare ve rau tatarise mena nomu taraniana, lui Netumu Jesus Christ, nomai Huqe. Amen.

A WAREWARE

Siu igide da vomai mena hahagavi ko a ladohogo da rerelue na bugude lawe Tamada eulu.

TOGA RORONO
 

A SERELUE BUGU

Mama hava na managi, Vevegi tanaloi doluegi, gamai gam galegaleasi gorogo gina domiana ko gina leo ko gina nomai lalakoa. Gamai ga he tabego tea gina lolomai doluegi; ga he tave na nomu tanaloi tea mere igamai sibomai. Gon ladovohogi na bugumai, huri Netumu i Vagamasoi gamai, i Jesus Christ, ko gon bului gamai ve gan lalakogi lawego lo togaana garaqa ve, gan waregi roroi na henamu ginie. Amen.

A RIQE VOHOGI BUGU

God, hava na managi, Tamada hava na hahagavi, mo ligogi tau a ladovohogi bugugi den rahine rau ladosesei vurugegi, rau leidori teligu lobena gina ladohogo, ko ram vagatai e ran ladovohogi na bugui rahine wagineu; na hagavi gimiu, na ladovohogi na bugumiu, na vagamasoi gimiu den nomiu galegaleasi doluegi, na vai siaga gimiu gina gineu u garea teri, na leogoro gimiu lo masoana radu. Gi Jesus Christ noda Huqe. Amen.
 

A HOGOGI

A tamata nona Huqe na toga gesegi lobemiu,
Ko lobemu vage.
Igide na betui Christ.
Gina Vui gategale u garuhigogonagi gide doluegi lo betugi gategale.
Nen ragahui huri legoro na bulugategale noi ui lo garoi-ta-mata.

Vin vasogo lai gategale dena leo teri naha, sige vin leowahe lai na leo wagineu.

Nomiu a leleo na varavara lo nagora tanaloi, huri ve inere ran lehi na nomiu lalakogi u garea, ko ran waregareagi Tamaniu eulu huri.

Nen hako hage na nomiu vevegarea lawe God, ko nen vai na hava gineu neu varataugi lawe i Hageliu.

Vataha gineu nem tarani a tanaloi rain vei lawe gimiu, nen vai nomiu merehi lawera; huri hinaha a domiana nona leo hora ko a leo huhui nora tanaloi veve rairai.

A tamatera vovohoi ram toga lo limei God ko a gagarasi vin he hogosire tea vin tuei.

A Huqe mo varavara lure nona tanaloi gogona; da vomai da huduhudu goroe.

Mo hako hage na bread ko a wine.

Anomu, Huqe, a tanoi lawua, ko a managi, ko a varavara, ko a muremure, ko a roroa.

Anomu vataha gineu lo eulu ko lo vavagi, ko gamai gam bete lawego den nomu gesegi.
 

A TATARO VEVEGAREA U LAWUA

Nen tabe hage na taqanimiu.
Gamai gam tabe hage lawe na Huqe.
Gide da vevegareagi na Huqe noda God.
U garea, u vovohoi, ve da vai merehi.

Io, u garea, u vovohoi, ve gan vevegarea, gan waregi roroi ko gan waregarea ginigo, Mama taeulu, gin Jesus Christ i Netumu, nomai Huqe, a vevenagi ginie hi gu teu na gineu doluegi dena vuigi ko gu teu gamai huri na dorimu; ginie hi, lo boni vagasigi u vomai, gu tunteligugi gamai, lune gamai gau soi lo galegaleasi, ginie gu sireginie ve vin vora gi tanaloi, vin mate lo gai.

Saroutu ko vin maraga taligu huri gamai; gu mavue lo leleomu lo matuemu. Ginie hi gu hogogi lawe gamai nomu Vui Gogona ve vin vei gamai gi na sinobu u gogona, vin veihorigi gamai gina, masoana garaqa, ko vin vei gamai ve gan tarantare ve nomu ute na himei.

Gogona, gogona, gogona, a Huqe God nora burigi taeulu, eulu ko lovavagi mo horogi na varavaramu. Gamai gam waregi roroi ginigo, Huqe i hahale garagara.
Nen waregarea ineie mo vomai lo henai Huqe, Hosanna lo ului tuke.

Gamai gamwaregi roroi ginigo, Mama eulu, huri gom lai hagavi himei Netumu gategale Jesus Christ ve irahine doluegi ram ladohogo ginie ran hako nora na masoana radu hurie. Mama, gon ronhuri gamai, gi Netumu Jesus Christ nomai Huqe; ginie hi, gon lai nomai rugurugu huri waregarea ginigo, ko gon vai ve gina muremure nona nomu Vui Gogona a hogogi hinaha, a bread ko a wine, vin vora lawe gamai na betune ko a daine. Ko lo boni muegi siu ne mo rono gagarasi lo gai saroutu, ne mo lai na bread, ko mo vevegarea ginigo vun, mo vise vurivurie, mo lai vatahae lawera rorontagi, mo veve vena, “Hakoe, ganie, hinaha a betuku mo lai huri gimiu; nen vai mere naha vena lado taligu hurieu ginie, ko nen ilo ve ineu lobemiu.” Merehinei vage a gaganie u rovo, ne mo hakovi na laha, ko mo vevegarea ginigo vun, ne mo lai lawera, mo veve vena, “Gimiu doluegi nen inu ninaha, huri naha daiku nona varatau u garaqa, mo hale huri gimiu meire tanaloi doluegi vena riqe na galegaleasi den gimiu. Nen vai merenaha, lune gimiu nen inu naha, gina lado taligu hurieu, ko nen ilo ve ineu lobemiu.”

A sinobu rain veve

Mama, gamai gam serelue na mateanana, gam nasagi na nona maraga taligu,gam rarai na nona vomaiana. Gamai gam waregarea ginigo, Huqe, u hahale garagara.

Huri hinei, Mama, gamai gam vai hinaha mere i Netumu u hora, ko gam hako hage lawego na bread masoana ko a laha vagamasoi gi nomai rugurugu huri waregarea ginigo ko huri vevegarea ginigo, gam serelue nona mateana lo gai saroutu huri bugui ureure, nona maraga taligu u muremure, ko nona mule hage taligu u leleo.

Gon lai vurugegi gamai lui neie i Vagamasoi gamai, u mabu lue na rugurugu gategale u vovohoi vurugegi, ko gon vai ve gamai doluegi gan hako a Ganigogona hinaha gan bulu gategale lo Warelue nomu u gogona, na betui Netumu Jesus Christ nomai Huqe; gamai gam ladomava ko gam waregi roroi ginigo, Mama managi, ko a Vui Gogona gategale meie, vin tuei vin tuei. Amen.

TOGA RORONO

Mere nomai Huqe u huhui gamai huri, gamai gam veve vena.
 

MAMA EULU, na hemu na gogona, Nomu ute na himei. Nomu tarani n alai lolovavagi mere eulu. Lai himei gaqarigi lawe gamai a hinaga mo eno huri gaqarigi. Gon ladovohogi na bugumai, mere gamai gam ladovohogi na bugure. Gon mese siregi gamai lolo galegaleasi; gon lai gamai dena gineu esi. Nomu a ute konomu a muremure ko nomu a varavara, vi eno vi eno. Amen.
 

A VISE VURIVURI NA BREAD

A bread hi dam vise vurivurie, hatie gineu huri vei bulutegi lo betui Christ?

Huri a bread gategale, gide dau sao dam voragi betugi gategale, huri gide doluegi dam bulugategale lo bread gategale.

E! Lamb noi God, i lai vohogi na bugui ureure, gon hagavi gamai.
E! Lamb noi God, i lai vohogi na bugui ureure, gon hagavi gamai.
E! Lamb noi God, i lai vohogi na bugui ureure, hogogi vomai nomu tamata lawe gamai.

A HINAGA GOGONA

Nen hamai gina ladohogo, nen hakovi na betui noda Huqe Jesus Christ mo lai huri gimiu, ko a daine mo hale huri gimiu; nen ganie gina ladohogo lolo taqanimiu ko nen vevegarea ginie.

Lune mo bete na Hinaga Gogona lawe na sinobu, vin veve vena:

A betui noda Huqe Jesus Christ.
A dai noda Huqe Jesus Christ.

* * * * *
 

Gide da tataro.

God, hava na managi, hava na masoana radu, gamai gam vevegarea garagara ginigo, huri gom vanani gamai gina hinaga gogona, a betui Netumu Jesus Christ i Vagamasoi gamai ko a daine. Gamai gam vevegarea ginigo vage huri nomu tabeana ko nomu lologarea lawe gamai huri gu vei gamai ve gam rosorosoi betune u maso, a buri tanaloi anomu, ko huri gom lai lawe gamai na duvigi lo masoana radu.

Gide doluegi

A vevenagi hine, Mama, gon leogoro gamai lo nomu hogogi, huri ve gan vai na lalakogi u garea gu vagatai beno lawe gamai. Ko gamai gam mabu teligugi gamai goro no nagomu hano, a betumai ko a tamatemai, gina rugurugu u gogona ko u maso; lui Jesus Christ nomai Huqe, gamai gam ladomava, gam waregi roroi ginie, ko ginigo, ko gina Vui u Gogona, vin tuei vin tuei. Amen.
 

A VAIGAREA

Nen mule tamata; nen tabe na Huqe, nen tabanagi lawea; nen horo gina havuhevu lo managi noi Vui Gogona.
Ko God managi, a Mama, i Netui ko i Vui Gogona, na vaigareagi gimiu, na toga lobemiu vin teui vin teui.
 

A TATARO VEVEGAREA

Gon vasogo rorono, vagasaosao, a tataro teri mere naha:

Noku Huqe ko noku God.

Nam vevegarea ginigo, Jesus a Huqe, huri gu vomai sulobeku.

Siserinaha nam laigo sulolo taqaniku.

Gon vagadorieu ve nan tauvuigi mereigo.

Ineu nam siregi taligugieu lawego, a betuku, a tamateku, ko a masoaku, ve nan vai na nomu tarani.

Vevegarea, waregarea, garigi i Jesus Christ lo tanoi togatoga varavara, lo Sacrament hava na gogona talo altar, ko lolo vale gogona, a taqaniku hi.

Gon lado taligu a boni doluegi ve i Jesus u bubugi meigo.