¶ Me haere mai te Wahine ki roto ki te Whare, ua ora ake ia i te Whanautanga, kia pai ano hoki he kakahu, me koropiko hoki ki te mahi i whakaritea: ka mea ai te Minita ki a ia.

KUA pai nei te Atua Kaha rawa, he nui no tona atawhai, kia whakaorangia koe i te mate nui i a koe i whanau nei; me whakawhetai atu koe ki te Atua, me mea,

E AROHA ana ahau ki a Ihowa: mona i whakarongo mai ki toku reo, ki aku inoi.
    I tahuri mai tona taringa ki a au: mo reira ka karanga ahau ki a ia i a au nei i te ora.
    I karapotia ahau e nga whakawiringa a te mate, mau pu ahau i nga mamae o te reinga.
    I kite ahau i te pawera, i te pouri; na, ko taku karangatanga atu ki te Ingoa o Ihowa: Tena ra, e Ihowa, whakaorangia toku wairua.
    He atawhai a Ihowa, he tika: ae, he aroha to tatou Atua..
    E tiakina ana e îhowa te hunga kuware: i whakaititia iho ahau, a nana ahau i whakaora.
    Hoki atu, e toku wairua, ki tou okiokinga: kua atawhaitia hoki koe e Ihowa.
    Nau hoki toku wairua i whakaora kei mate: oku kanohi kei whai roimata, oku waewae kei paheke.
    Tera au e haereere ki te aroaro o Ihowa: i te whenua o te ora.
    I whakapono ahau, koia ahau i korero ai: i nui toku whakawhiunga.
    I mea ahau i taku potatutatunga: He teka kau nga tangata katoa.
    He aha taku e whakahoki atu ai ki a Ihowa: mo ana atawhainga katoa ki a au?
    Ka mau ahau ki te kapa o te whakaoranga: ka karanga hoki ki te Ingoa o Ihowa.
    Ka whakamana e ahau aku kupu taurangi ki a Ihowa ki te aroaro o tona iwi katoa: ki nga marae o te whare o Ihowa, ki waenganui ou, e Hiruharama. Whakamoemititia a Ihowa.

    Kia whakakororiatia te Matua, te Tama: me te Wairua Tapu;
    Ko te ritenga ia i te timatanga, a tenei ano inaianei: a ka mau tonu iho, a, ake ake ake. Amine.

¶ Ko tenei ranei.
 

KI te kore e hanga e Ihowa te whare: he maumau mahi ta nga kai hanga.
    Ki te kore e tiakina e Ihowa te pa: maumau mataara noa te kai tiaki.
    He maumau ta koutou ara wawe, ta koutou noho roa i te po, ta koutou kai i te taro o te mauiui: mana nei hoki e homai te moe ki tana e aroha ai.
    Na, he taonga pumau na Ihowa nga tamariki: ko nga hua ano o te kopu tana utu.
    E rite ana ki nga pere i te ringaringa o te tangata kaha: te whanau o te taitamarikitanga.
    Ka hari te tangata kua ki nei tana papa-pere i a ratou: e kore ratou e whakama, engari ka korero ratou ki nga hoa riri i te kuwaha.

    Kia whakakororiatia te Matua, te Tama: me te Wairua Tapu;
    Ko te ritenga ia i te timatanga, a tenei ano inaianei: a ka mau tonu iho, a, ake ake ake. Amine.

¶ Ko reira te Minita mea ai:

Kia inoi tatou.

E Ihowa, tohungia matou.
E te Karaiti, tohungia matou.
E Ihowa, tohungia matou.

E TO matou Matua i te rangi, Kia tapu tou Ingoa. Kia tae mai tou rangatiratanga. Kia meatia tau e pai ai ki runga ki te whenua, kia rite ano ki to te rangi. Homai ki a matou aianei he taro ma matou mo tenei ra. Murua o matou hara, Me matou hoki e muru nei i o te hunga e hara ana ki a matou. Aua hoki matou e kawea kia whakawaia; Engari whakaorangia matou i te kino: Nou hoki te rangatiratanga, Te kaha, me te kororia, Ake ake ake. Amine.

    Te Minita. E Ihowa, whakaorangia tenei pononga au;
    Te Nuinga. E whakawhirinaki atu nei ki a koe.
    Te Minita. Ko koe hei pa kaha mona;
    Te Nuinga. I tona hoa riri.
    Te Minita. E Ihowa, whakarongo mai ki ta matou inoi.
    Te Nuinga. Kia tae atu ki a koe ta matou karanga.
    Te Minita. Kia inoi tatou.

E TE Atua Kaha rawa, tenei matou te whakawhetai atu nei ki a koe, mou i whakaora i tau pononga, i tenei wahipe, i te mamae nui o te Whanautanga tamariki; he inoi hoki tenei na matou ki a koe, e te Matua tohu, kia whakakahangia ia, kia whakapono tonu ai ia ki a koe, kia rite ai te haere ki tau e pai ai i tenei ao; a kia whiwhi ki te kororia mutunga kore i te oranga a mua atu; ko Ihu Karaiti to matou Ariki. Amine.

¶ Me homai e te Wahine e haere mai ana kite Whakawhetai nga mea e tika ana; ki te mea hoki kei te whakatahrtoria te Hapa Tapu, me tango ano ia.

AKA,

HE WHAKAPUAKANGA I TE RIRI A TE ATUA, ME ANA WHAKAHENGA I TE HUNGA HARA;

ME ETAHI INOI HOKI; KIA KOREROTIA, I TE RA TUATAHI O RENETI, I ERA ATU RA HOKI, E WHAKARITEA AI.

¶ Ka mutu nga Inoi o te Ata me te Ritani, we tu te Minita ki te tunga harakia me mea:

E HOA ma, he tikanga pai to te Hahi o mua, i whakawhiua ai, i te timatanga o Reneti, nga tangata i kitea nuitia te haranga; i pakia ai hoki i tenei ao kia ora ai o ratou wairua i te ra o te Ariki; kia akona ai hoki era atu, kia mataku i te hara.
    He oranga ngakau me i whakahoutia ake taua tikanga i enei wa, otiia ka kore noa nei tena, na, kua whakaritea kia kererotia inaianei, i te aroaro o koutou katoa, nga kanga a te Atua mo nga tangata hara e kore nei e ripeneta; he mea kohikohi no roto i a Tiuteronomi, no te rua tekau mawhitu o nga Upoko, no etahi atu wahi hoki o te Karaipiture; kia whakahua ai koutou i te Amine i te mutunga o ia rarangi o ia rarangi: kia mahara ai koutou M te riri nui a te Atua ki nga tangata hara, kia uaua ai ki te ripeneta; kia tupato ai hoki te haere i enei wa e whakaeke tata nei te he; kia rere atu ai koutou i enei hara, e whakaae nei o koutou mangai, e tika ana kia kanga e te Atua.

    Te Minita. Kia kanga te tangata e whakahawea ana ki tona papa, ki tona whaea ranei.
    Te Nuinga. Amine.
    Te Minita. Kia kanga te tangata e neke atu ana i te rohe a tona hoa.
    Te Nuinga. Amine.
    Te Minita. Kia kanga te tangata e whakapohehe ana i te matapo ki te huarahi.
    Te Nuinga. Amine.
    Te Minita. Kia kanga te tangata e whakaputa ke ana i te whakarite whakawa mo te manene, mo te pani, mo te pouaru.
    Te Nuinga. Amine.
    Te Minita. Kia kanga te tangata epatupuku ana i tona hoa.
    Te Nuinga. Amine.
    Te Minita. Kia kanga te tangata e moe ana ki te wahine a tona hoa.
    Te Nuinga. Amine.
    Te Minita. Kia kanga te tangata e tango ana i te utu mo te patunga o te tangata harakore.
    Te Nuinga. Amine.
    Te Minita. Kia kanga tetangata e whakawhirinaki ana ki te tangata, e mea ana i te kikokiko hei ringaringa mona, e kotiti atu ana hoki tona ngakau i a Ihowa.
    Te Nuinga. Amine.
    Te Minita. Kia kanga enei katoa, ara, te iwi e kore e tohu, te hunga moe tahae, te hunga puremu, te hunga apo, te hunga karakia ki nga whakapakoko, te hunga ngau tuara, te hunga haurangi i te inu waina, me te hunga e whakauaua ana ki te moni.
    Te Nuinga. Amine.

¶ Te Minita.

NA, ka kite nei tatou, ka kanga katoatia te hunga e atiti ke ana i a te Atua ture, (ko ta Rawiri poropiti ano hoki tenei i whakaatu nei;) kia mahara tatou ki nga mate mataku e tata nei te rere iho ki runga ki a tatou, ka hoki aiki to tatou Atua, ki a Ihowa, i runga i te ngakau ripeneta, i te ngakau mahaki, me te tangi ano mo o tatou hara, me te whaki atu ano hoki i aua hara, me te whai tonu ano kia whakaputaina nga hua tika o te ripeneta.. Kua pa nei hoki te titaha ki te putake o nga rakau, a ka tuakma, ka maka ki te ahi nga rakau katoa e kore e hua i te hua pai. He mea mataku te taka ki roto ki nga ringaringa o te Atua ora: ka uaina hoki e ia ki runga i te hunga hara, he mahanga, heahi, he whanariki, he awha tuaikerekere; ko te wahi tenei o ta ratou kapa. Tenei ano a Ihowa te haere mai nei i tona wahi, ki te rapu utu mo nga mahi kino a nga tangata katoa o te ao. Otira, ko wai e u i te ra e tae mai ai ia? Ko wai e tu ina puta mai ia? Ko tana kowhiuwhiu kei tona ringaringa, mana e tino whakapai tana patunga witi, a e kohikohia e ia tana witi ki roto ki te whare witi, tena ko te papapa, e tahuna e ia ki te hapura e kore e taea te tinei. E haere mai ana te ra o te Ariki, ano he tahae i te po: i nga tangata e mea ana, He rangimarietanga, he oranga; ko reira pa whakarere ai te mate ki a ratou, pera me te mamae ki te wahine hapu; a e kore ratou e mawhiti atu. Ko reira, ko a te ra rapunga utu, kitea ai te riri a te Atua kua pae nui nei mo ratou i te hunga tohe ki te hara; i a ratou i whakahawea nei ki te whakaaro atawhai, ki te manawanui o te Atua, i a ia e karanga tonu nei ki a ratou kia ripeneta. Ko reira ratou karanga ai ki ahau, (e ai ta Ihowa,) otiia e kore rawa ahau e rongo atu; ka rapu wawe ratou i a au, otiia e kore ahau e kitea e ratou; na ratou hoki i whakarihariha ki te mahara, kihai ano hoki i pai kia wehi ki a Ihowa, mo ratou i whakarere i taku whakaaro, a i whakahihi tonu ki taku riringa atu. Kua taka ke hoki i reira te taima hei patukitukinga ki te tatau, kua kati ra hoki; kua pahemo atu te ra e tangi ai ki te mahi tohu, kua taea ra hoki te taima o te whakarite whakawa. Aue! mau rawa te wehi o te reo e whakapuakina mai ai te mate mo ratou, ina mea mai te Atua, Mawehe atu i a au, e te hunga ka oti nei te kanga, ki te ahi ka tonu, kua ka noa ake nei mo te rewera ratou ko ana anahera. Heoi, e hoa ma, kia mahara rnaianei, i te mea e whiti tonu ana te ra o te ora; tera hoki e tae mai te po, e kore ai e ahei i te tangata te mahi. Engari kia whakapono tatou ki te marama, i te mea kei a tatou te marama, ko te mahi ma tatou, hei ta nga tamariki a te maramatanga; kei maka tatou ki te pouri nui, kei reira nei te tangihanga me te teteatanga o nga niho. Kei maumauria e tatou te atawhai o te Atua e karanga mai nei i a tatou kia ripeneta, e whakaari mai nei hoki i te murunga o nga hara o mua, ki te tapatahi ô tatou ngakau mo te tahuri ki a ia. Ae ra, ahakoa i rite o tatou hara ki te mea ngangana, ka pera ano me te hukarere te ma; ahakoa i whero me te mea whakawhero, ka rite ano ki te huruhuru hipi. Tahuri mai hoki i o koutou he katoa, e ai ta Ihowa, a e kore te he e waiho hei whakataka mo koutou. Maka atu, kia matara atu i a koutou, a koutou he katoa i he ai. koutou; mahia hoki he ngakau hou, he wairua hou, mo koutou: kia mate hoki koutou hei aha, e te whare o Iharaira? Kahore hoki au e ahuareka atu ki te matenga o te tangata e mate ana, e ai ta te Ariki, ta Ihowa: na, tahuri mai, a ka ora koutou. Ahakoa kua hara tatou, he Kai korero mo tatou kei te Matua, ko Ihu Karaiti, ko te tika; ko ia ano te whakamarietanga mo o tatou hara. I weroha ia mo o tatou hara, i tukitukia mo a tatou he. Heoi, kia hoki tatou ki a ia, ki te Atua atawhai, e manako mai nei ki nga tangata hara katoa e ripeneta pono ana; me te mohio ano tatou ki tenei, ara, kei te manako tonu mai ia ki a tatou, kei te pai tonu ki te muru i o tatou hara, ki te haere atu tatou ki a ia i runga i te ripeneta pono; ki te rongo tatou ki a ia, me te haere tonu i ana ara; ki te pai tatou ki te tango i tana ioka ngawari, i tana wahanga mama, ki te haere i muri i a ia me te ngakau iti, me te manawanui, me te aroha, ki te pai hoki kia tohutohungia e tona Wairua Tapu; me te whakakororia i a ia, me te mahi tonu ki a ia i runga i te whakawhetai. Ki te penei tatou, ka whakaorangia tatou e te Karaiti i te kanga a te ture, i te kanga nui whakaharahara hoki e tau iho ki te hunga e whakaturia e ia ki te ringa maui; ka whakanohoia tatou ki tona ringa matau, ka whakawhiwhia mai hoki tatou ki te manaakitanga a tona Matua, kia riro mai i a tatou tona rangatiratanga kororia. Mana tatou katoa e whakatutuki atu ki reira, he nui hoki tana mahi tohu. Amine.
 

¶ Hei konei ka koropiko katoa nga tangata, me koropiko hoki te Minita mu ona haa, ki te wahi e korerotia ai te Ritani, me whakahua i tenei Waiata:

Waiata li.

TOHUNGIA ahau, e te Atua, kia rite ki tou atawhai: kia rite ki tou aroha nui te murunga o oku hara.
    Horoia rawatia taku kino: kia ma hoki toku hara.
    E whaki ana hoki ahau i aku mahi tutu: kei toku aroaro tonu toku hara.
    He hara ki a koe, ki a koe anake toku; i meatia ano tenei he ki tou aroaro: i tika ai koe i to korerotanga, i ma ai koki i to whakaritenga whakawa.
    Na, i whakaahuatia ahau i roto i te kino: i runga ano i te hara toku whakahaputanga ki roto ki toku whaea.
    Na, ko tau e mate nui ai, ko te pono i nga wahi o roto: a ka whakaakona oku wahi ngaro e koe ki te whakaaro nui.
    Purea ahau ki te hihopa, a ka ma ahau: horoia ahau, a ka ma ke atu i te hukarere.
    Kia rongo ahau i te hari, i te koa: a ka whakamanamana nga iwi i whatiia nei e koe.
    Huna tou mata ki oku hara: a murua katoatia aku kino.
    Hanga, e te Atua, he ngakau ma ki roto ki a au; whakahoutia hoki ki roto ki a au he wairua tika.
    Kaua ahau e maka atu i tou aroaro: kaua hoki tou Wairua tapu e tangohia i a au.
    Whakahokia mai ki a au te hari o tau whakaoranga: tautokona ake hoki ahau ki tou wairua kakama.
    Ko reira ahau whakaako ai i ou ara ki te hunga tutu: a ka tahuri mai te hunga hara ki a koe.
    Whakaorangia ahau i te hara toto, e te Atua, e te Atua o toku whakaoranga: a ka waiatatia au mahi tika e toku arero.
    Whakatuwheratia oku ngutu, e te Ariki: a ka puaki i toku mangai te whakamoemiti ki a koe.
    Kahore nei hoki koe e aro ki te patunga tapu; penei kua hoatu e ahau: kahore koe e whakaahuaieka ki te tahunga tinana.
    Nga patunga tapu ma te Atua, he wairua maru: e kore koe e whakahawea, e te Atua, ki te ngakau maru, ki te ngakau iro.
    Kia pai tau e mea ai, kia manako hoki koe ki Hiona: hanga nga taiepa o Hiruharama.
    Ko reira koe pai ai ki nga patunga tapu o te tika, ki nga tahunga tinana, he mea whakaeke katoa: ko reira ratou whakaeke ai nga puru ki runga ki to aata.
    Kia whakakororiatia te Matua, te Tama: me te Wairua Tapu;
    Ko te ritenga ia i te timatanga, a tenei ano inaianei: a ka mau tonu iho, a, ake ake ake. Amine.
    E Ihowa, tohungia matou. Ete Karaiti, tohungiamatou. E Ihowa, tohungia matou.

ETO matou Matua i te rangi, Kia tapu tou Ingoa. Kia tae mai tou rangatiratanga. Kia meatia tau e pai ai ki runga ki te whenua, kia rite ano ki to te rangi. Homai ki a matou aianei he taro ma matou mo tenei ra. Murua o matou hara, Me matou hoki e muru nei i o te hunga e hara ana ki a matou. Aua hoki matou e kawea kia whakawaia; Engari whakaorangia matou i te kino. Amine.

    Te Minita. E Ihowa whakaorangia au pononga;
    Te Nuinga. E whakawhiri naki atu nei ki a koe.
    Te Minita. Homai he kaha ki a ratou i runga.
    Te Nuinga. Tiakina hoki ratou ake ake ake.
    Te Minita. Awhinatia ma matou, e te Atua, e to matou Kai whakaora.
    Te Nuinga. Whakaorangia hoki matou kia whakakororia tia ai tou Ingoa; Tohungia matou, te hunga hara nei, kia mahara hoki ki tou Ingoa.
    Te Minita. E Ihowa, whaka rongo mai ki ta matou inoi
    Te Nuinga. Kia tae atu ki a koe ta matou karanga.
    Te Minita. Kia inoi tatou.

E IHOWA, whakarongo atawhai mai ki a matou inoi, tohungia te hunga katoa e whaki atu ana i o ratou hara ki a koe; kia mama ai te hunga e taimaha nei te hinengaro i te hara, i a koe, e te Atua tohu e hohou nei i taurongo ki a ratou mo nga mahi a te Karaiti, a to matou Ariki. Amine.

E TE Atua tino kaha, e te Matua tohu, e aroha nei ki nga tangata katoa, e kore nei e whakarihariha ki tetahi mea i hanga e koe; kahore nei hoki e pai kia mate te tangata hara, engari kia tahuri ke ia i ana hara, kia whakaorangia; Atawhaitia matou, e te Atua, murua o matou hara; kia manako mai koe ki a matou, whakamarietia hoki matou e pouri nei, e ruwha nei i te taimaha o o matou hara. He mahi nau te tohu tonu; mau anake e muru te hara. Tohungia matou, e te Ariki pai, tohungia au tangata kua hokoa nei e koe; aua ra e anga e whakawa i au pononga, he puehu kau nei hoki, he hunga mate rawa i te hara; engari whakaangaa ketia tau riri i a matou, e whaki nei i a matou mahi whakarihariha, e ripeneta pono nei ki a matou mahi he; hohoro mai koe ki te awhina i a matou i tenei ao, kia noho ora ai matou ki a koe ki tera ao atu; mo nga mahi hoki a te Karaiti a to matou Ariki. Amine.

¶ Ko reira whakahuatia ai tenei e nga tangata i muri i te Minita:

WHAKATAHURITIA matou, e te Ariki pai, a ka tahuri matou. Kia manako mai, e Ihowa, Kia manako mai ki au tangata, E tahuri atu nei ki a koe me te tangi, me te nohopuku, me te inoi. He Atua tohu hoki koe, E ki ana i te aroha, E puhoi ana ki te riri, he nui ano hoki tou atawhai. E tohu ana koe i te wa e tika ai kia mate matou, I te wa hoki o te riri e whakaaro ana koe ki te mahi tohu. E te Ariki pai, tohungia au tangata, Aua ra tou kainga e tukua kia kahore ke. Whakarongo mai ki a matou, e Ihowa, He nui nei hoki au mahi tohu, Titiro mai ki a matou, Kia rite ki te nui o au mahi atawhai; Kia whakaaro hoki ki nga mahi pai, me te mahi wawao, a tau Tama pai rawa, a to matou Ariki, a Ihu Karaiti. Amine.

¶ Ko reira ka meinga atu e te Minita anake:

MA Ihowa tatou e manaaki, mana tatou e tiaki; ma Ihowa e mea kia ara ake te maramatanga o ona kanohi ki runga ki a tatou, mana ano e tuku iho te rangimarie ki a tatou aianei, a, ake tonu atu. Amine.