Ordo in Matutinis et Vesperis

QUOTIDIE PER TOTUM ANNUM DICENDIS.

MATUTINÆ et Vesperæ dicantur in partibus Ecclesiarum, Capellarum, et Chororum, consuetis. nisi aliter Ordinario Loci visum fuerit. Chori etiam ita maneant quemadmodum in tempore præterito fuere.
    Et hic notandum est, quod ea tum Ecclesiæ tum Ministrorum ejus, in omni Ministratione sua Ornamenta in usu sunt retinenda, quæ, auctoritate Parliamenti, in anno secundo Regis Edvardi Sexti, in hac Ecclesia Anglicana exstitere.

Ordo Matutinarum

QUOTIDIE PER TOTUM ANNUM OBSERVANDUS.

In principio Matutinarum Minister clara voce legat unam aliquam sive plures ex Sacræ Scripturæ Sententiis quæ consequuntur. Et postea dicat quod infra has Sententias scriptum est.

CUM averterit se impius ab impietate sua quam operatus est, et fecerit judicium et justitiam, ipse animam suam vivificabit. Ezech xviii. 27.
    Iniquitatem meam ego cognosco, et peccatum meum contra me est semper Ps. li. 5.
    Averte faciem tuam a peccatis meis, et omnes iniquitates meas dele. Ps. li. 11.
    Sacrificium Deo spiritus contribulatus: cor contritum et humiliatum, Deus, non despicies. Ps. li. 19.
    Scindite corda vestra, et non vestimenta vestra, et convertimini ad Dominum Deum vestrum: quia benignus et misericors est, patiens, et multæ misericordiæ, et præstabilis super malitia. Joel ii. 13.
    Tibi autem Domino Deo nostro misericordia et propitiatio, quia recessimus a te: et non audivimus vocem Domini Dei nostri, ut ambularemus in lege ejus quam posuit nobis. Dan. ix. 9, 10.
    Corripe me, Domine, verumtamen in judicio; et non in furore tuo, ne forte ad nihilum redigas me. Jer. x. 24; Ps. vi. 2.
    Pœnitentiam agite; appropinquavit enim regnum cœlorum. S. Matt. iii.
    Surgam, et ibo ad patrem meum, et dicam ei, Pater, peccavi in cœlum, et coram te: jam non sum dignus vocari filius tuus. S. Luc. xv. 18, 19.
    Non intres in judicium cum servo tuo, Domine: quia non justificabitur in conspectu tuo omnis vivens. Ps. cxliii. 2.
    Si dixerimus quoniam peccatum non habemus, ipsi nos seducimus et veritas in nobis non est: si confiteamur peccata nostra, fidelis est et justus, ut remittat nobis peccata nostra, et emundet nos ab omni iniquitate. S. Joan. i. 8, 9.

DILECTISSIMI fratres, Sacra Scriptura multis in locis nos commonefacit, ut multiplicia peccata nostra et iniquitatem nostram agnoscamus et confiteamur; nec ea in conspectu Dei Omnipotentis, Patris nostri cœlestis, audeamus dissimulare; sed animo demisso, humili, contrito, et obedienti confiteamur; quatenus, per infinitam bonitatem et misericordiam ejus, indulgentiam consequamur. Et quanquam in omni tempore peccata nostra coram Deo humiliter agnoscenda sunt, tunc tamen præcipue hoc agendum est cum in publicum cœtum ideo convocati sumus, ut pro magnis ab eo collatis beneficiis gratias referamus, ut ejus laudes dignas annuntiemus, et sanctissimum ejus Verbum audiamus, et ut quicquid animorum status aut corporis requirit ab eo postulemus. Quapropter vos omnes, qui adestis, rogo et obsecro ut, puro corde, et voce humili, ad thronum gratiæ cœlestis mecum accedatis, ita me præeunte dicentes:
 

Morning Prayer

Confessio. Generalis ab universa Congregatione, Ministro præcunte, dicenda, genibus flexis.

OMNIPOTENS et clementissime Pater; Peccavimus, et a viis tuis erravimus sicut oves quæ perierunt. Inventis et concupiscentiis cordis nostri nimium indulsimus. Sacrosanctas leges tuas violavimus. Quæ facienda erant omisimus: Et quæ facienda non erant admisimus; Et in nobis nulla est salus. Tu autem, Domine, miserere nostri, miserorum peccatorum. Parce, Deus, peccata confitentibus. Pœnitentes restitue; Secundum promissiones tuas humano generi in Christo Jesu Domino nostro declaratas. Propter quem concede, clementissime Pater; Ut posthac pie, juste, sobrieque vivamus, Ad gloriam sancti Nominis Tui. Amen.
 

Confession

Absolutio, sive Remissio Peccatorum, a Sacerdote solo pronuntianda, ipso stante; populo, ut antea, genuflexo.

OMNIPOTENS Deus, Pater Domini nostri Jesu Christi, qui non vult mortem peccatoris, sed potius ut se ab impietate sua avertat, et vivat; quique Ministris suis potestatem dedit, immo præcepit, ut populo suo pœnitenti Absolutionem Remissionem que peccatorum eorum declarent et pronuntient: Ipse singulis vere pœnitentibus, et sacrosanctum Evangelium suum sincere credentibus, indulgentiam concedit et absolutionem. Quapropter veram pœnitentiam et Spiritum Sanctum ejus ab eo postulemus, quò hæc ei complaceant quæ nunc agimus, et vitam reliquam pure sancteque peragamus, et ita tandem ad æterna ejus gaudia perveniamus; per Jesum Christum Dominum nostrum.

Hic, et ad finem omnium orationum, populus respondeat, Amen.

Tunc Minister, genibus flexis, Orationem Dominicam alta voce dicat; populo etiam, genibus flexis, cum illo eandem, et hic, et ubicunque in Officio Divino dicenda sit, recitante.
 

Absolution

PATER noster, qui es in cœlis, Sanctificetur Nomen tuum. Adveniat regnum tuum. Fiat voluntas tua, Sicut in cœlo, et in terra. Panem nostrum quotidianum da nobis hodie. Et dimitte nobis debita nostra, Sicut et nos dimittimus debitoribus nostris. Et ne nos inducas in tentationem; Sed libera, nos a malo: Quia tuum est regnum, Potentia, et gloria, In sæcula sæculorum. Amen.

Postea dicat etiam.

    Domine, labia nostra aperies.
    Resp. Et os nostrum annuntiabit laudem tuam.
    Sacerdos. Deus, in adjutorium nostrum intende.
    Resp. Domine, ad adjuvandum nos festina.

Hic, omnibus sese erigentibus, dicat Sacerdos.

    Gloria Patri, et Filio: et Spiritui Sancto;
    Resp. Sicut erat in principio, et nunc, et semper : et in sæcula sæculorum. Amen.
    Sacerdos. Laudate Dominum.
    Resp. Sit Nomen Domini benedictum.

Tunc dicatur vel cantetur Psalmus hic sequens nisi in Die Sancto Paschæ, cui alia assignatur Antiphona. Item in die undevicesimo cujusque mensis non hoc loco, sed in ordinario Psalmorum cursu, est legendus.
 

Lord's Prayer

Venite exultemus Deo.
Psal. xcv.

VENITE, exultemus Domino : jubilemus Deo salutari nostro.
    Præoccupemus faciem ejus in confessione : et in psalmis jubilemus ei.
    Quoniam Deus magnus Dominus : et rex magnus super omnes deos.
    Quia in manu ejus sunt omnes fines terræ : et altitudines montium ipsius sunt.
    Quoniam ipsius est mare, et ipse fecit illud : et siccam manus ejus formaverunt.
    Venite adoremus et procidamus et ploremus ante Dominum qui fecit nos : quia ipse est Dominus Deus noster:
    Et nos populus pascuæ ejus : et oves manus ejus.
    Hodie si vocem ejus audieritis nolite obdurare corda vestra;
    Sicut in irritatione : secundum diem tentationis in deserto.
    Ubi tentaverunt me patres vestri : probaverunt me, et viderunt opera mea.
    Quadraginta annis offensus fui generationi illi : et dixi, Semper hi errant corde.
    Et isti non cognoverunt vias meas : ut juravi in ira mea, Si introibunt in requiem meam.
    Gloria Patri, et Filio : et Spiritui Sancto;
    Sicut erat in principio, et nunc, et semper : et im sæcula sæculorum. Amen.

Tunc sequantur Psalmi eo in ordine quo sunt præscripti. Et ad finem cujusque Psalmi per annum, necnon ad finem Canticorum Benedicite, Benedictus, Magnificat, et Nunc dimittis, recitetur,

    Gloria Patri, et Filio: et Spiritui Sancto;
    Resp. Sicut erat in principio, et nunc, et semper: et in sæcula sæculorum. Amen.

Post Psalmos distincte et clara voce legatur Lectio Prima ex Veteri Testamento desumpta, ut in Kalendario proponitur, nisi diei assignatæ fuerint propriæ Lectiones : Qui autem legit eo modo versa facie stet quo commodius a præsentibus audiri possit.

Postea dicatur aut cantetur [Anglice] hymnus quem vocant Te Deum Laudamus, quotidie per totum annum.

Et sciendum est, Quod ante singulas Lectiones Minister dicat, Hic incipit hoc vel illud Caput hujusce Libri, vel hic vel ille versus hujusce vel illius Capitis: Et ad finem cujuslibet Lectionis, sic:
    Hic finitur Lectio vel Prima, vel Secunda.
 

Te Deum Laudamus.

TE Deum laudamus : te Dominum confitemur.
    Te æternum Patrem : omnis terra veneratur.
    Tibi omnes Angeli : tibi Cœli et universæ Potestates.
    Tibi Cherubin et Seraphin : incessabili voce proclamant:
    Sanctus, Sanctus, Sanctus : Dominus Deus Sabaoth.
    Pleni sunt cœli et terra : majestatis gloriæ tuæ.
    Te gloriosus : Apostolorum chorus,
    Te Prophetarum : laudabilis numerus,
    Te Martyrum candidatus : laudat exercitus.
    Te per orbem terrarum : sancta confitetur Ecclesia.
    Patrem : immensæ Majestatis.
    Venerandum tuum : verum et unicum Filium;
    Sanctum quoque Paracletum : Spiritum.
    Tu Rex gloriæ : Christe.
    Tu Patris sempiternus : es Filius.
    Tu ad liberandum suscepturus hominem : non horruisti Virginis uterum.
    Tu devicto mortis aculeo : aperuisti credentibus regna cœlorum.
    Tu ad dexteram Dei sedes : in gloria Patris.
    Judex crederis : esse venturus.
    Te ergo quæsumus, famulis tuis subveni : quos pretioso sanguine redemisti.
    Æterna fac cum Sanctis tuis : in gloria numerari.
    Salvum fac populum tuum, Domine : et benedic hæreditati tuæ.
    Et rege eos : et extolle illos usque in æternum.
    Per singulos dies : benedicimus te.
    Et laudamus Nomen tuum in sæculum : et in sæculum sæculi.
    Dignare Domine die isto : sine peccato nos custodire.
    Miserere nostri, Domine : miserere nostri.
    Fiat misericordia tua, Domine super nos : quemadmodum speravimus in te.
    In te, Domine speravi : non confundar in æternum.

Vel hoc Canticum.

Benedicite, omnia opera.

BENEDICITE omnia opera Domini Domino : laudate et superexaltate eum in sæcula.
    Benedicite Angeli Domini Domino : laudate et superexaltate eum in sæcula.
    Benedicite cœli Domino : laudate et superexaltate eum in sæcula.
    Benedicite aquæ omnes, quæ super cœlos sunt Domino : laudate et superexaltate eum in sæcula.
    Benedicite omnes virtutes Domini Domino : laudate et superexaltate eum in sæcula.
    Benedicite sol et luna Domino : laudate et superexaltate eum in sæcula.
    Benedicite stellæ cœli Domino : laudate et superexaltate eum in sæcula.
    Benedicite omnis imber et ros Domino : laudate et superexaltate eum in sæcula.
    Benedicite omnes spiritus Dei Domino : laudate et superexaltate eum in sæcula.
    Benedicite ignis et æstus Domino : laudate et superexaltate eum in sæcula.
    Benedicite frigus et æstas Domino : laudate et superexaltate eum in sæcula.
    Benedicite rores et pruina Domino : laudate et superexaltate eum in sæcula.
    Benedicite gelu et frigus Domino : laudate et superexaltate eum in sæcula.
    Benedicite glacies et nives Domino : laudate et superexaltate eum in sæcula.
    Benedicite noctes et dies Domino : laudate et superexaltate eum in sæcula.
    Benedicite lux et tenebræ Domino : laudate et superexaltate eum in sæcula.
    Benedicite fulgura et nubes Domino : laudate et superexaltate eum in sæcula.
    Benedicat terra Dominum : laudate et superexaltate eum in sæcula.
    Benedicite montes et colles Domino : laudate et superexaltate eum in sæcula.
    Benedicite universa germinantia in terra Domino : laudate et superexaltate eum in sæcula.
    Benedicite fontes Domino : laudate et superexaltate eum in sæcula.
    Benedicite maria et flumina Domino : laudate et superexaltate eum in sæcula.
    Benedicite cete et omnia quæ moventur in aquis Domino : laudate et superexaltate eum in sæcula.
    Benedicite omnes volucres cœli Domino: laudate et superexaltate eum in sæcula.
    Benedicite omnes bestiæ et pecora Domino : laudate et superexaltate eum in sæcula.
    Benedicite filii hominum Domino : laudate et superexaltate eum in sæcula.
    Benedicat Israel Dominum : laudate et superexaltate eum in sæcula.
    Benedicite sacerdotes Domini Domino : laudate et superexaltate eum in sæcula.
    Benedicite servi Domini Domino :laudate et superexaltate eum in sæcula.
    Benedicite spiritus et animæ justorum Domino : laudate et superexaltate eum in sæcula.
    Benedicite sancti et humiles corde Domino : laudate et superexaltate eum in sæcula.
    Benedicite, Anania, Azaria, Misael, Domino : laudate et superexaltate eum in sæcula.
    Gloria Patri, et Filio : et Spiritui Sancto;
    Sicut erat in principio, et nunc, et semper : et in sæcula sæculorum. Amen.
 

Deinde simili modo legatur Lectio Secunda, e Testamento Novo desumpta. Et post eam, hic sequens Hymnus; nisi in Lectione de Die, vel in Evangelio de Festo S. Joannis Baptistæ, legendus occurrerit.

Benedictus.

St Luc. i. 68.

BENEDICTUS Dominus Deus Israel : quia visitavit, et fecit redemptionem plebis suæ;
    Et erexit cornu salutis nobis : in domo David pueri sui;
    Sicut locutus est per os sanctorum : qui a sæculo sunt, Prophetarum ejus;
    Salutem ex inimicis nostris : et de manu omnium qui oderunt nos;
    Ad faciendam misericordiam cum patribus nostris : et memorari Testamenti sui sancti;
    Jusjurandum quod juravit ad Abraham patrem nostrum : daturum se nobis;
    Ut sine timore, de manu inimicorum nostrorum liberati : serviamus illi;
    In sanctitate et justitia coram ipso : omnibus diebus nostris.
    Et tu, puer, Propheta Altissimi vocaberis : præibis enim ante faciem Domini parare vias ejus;
    Ad dandam scientiam salutis plebi ejus : in remissionem peccatorum eorum;
    Per viscera misericordiæ Dei nostri : in quibus visitavit nos Oriens ex alto;
    Illuminare his qui in tenebris et in umbra mortis sedent : ad dirigendos pedes nostros in viam pacis.
    Gloria Patri, et Filio : et Spiritui Sancto;
    Sicut erat in principio, et nunc, et semper : et in sæcula sæculorum. Amen.
 

Vel hic Psalmus,

Jubilate Deo.
Psal. c.

JUBILATE Deo, omnis terra : servite Domino in lætitia.
    Introite in conspectu ejus : in exultatione.
    Scitote quoniam Dominus ipse est Deus : ipse fecit et non ipsi nos.
    Populus ejus, et oves pascuæ ejus, introite portas ejus in confessione: atria ejus in hymnis; confitemini illi.
    Laudate Nomen ejus; quoniam suavis est Dominus; in æternum misericordia ejus : et usque in generationem et generationem veritas ejus.
    Gloria Patri, et Filio : et Spiritui Sancto;
    Sicut erat in principio, et nunc, et semper : et in sæcula sæculorum. Amen.

Deinde cantetur vel dicatur Symbolum Apostolorum a Ministro et Populo, stantibus : nisi in iis tantum diebus in quibus Symbolum Sancti Athanasii est legendum.
 

CREDO in Deum, Patrem Omnipotentem, Creatorem cœli et terræ:
    Et in Jesum Christum, Filium ejus unicum, Dominum nostrum, Qui conceptus est de Spiritu Sancto, Natus ex Maria Virgine, Passus sub Pontio Pilato, Crucifixus, mortuus, et sepultus, Descendit ad inferos; Tertia die resurrexit a mortuis, Ascendit ad cœlos, Sedet ad dexteram Dei Patris Omnipotentis; Inde venturus est judicare vivos et mortuos.
    Credo in Spiritum Sanctum, Sanctam Ecclesiam Catholicam, Sanctorum Communionem, Remissionem peccatorum, Carnis Resurrectionem, Et vitam æternam. Amen.

Et postea, hæ sequentes Preces, omnibus religiose genuflexis ; Ministro primum alta voce pronuntiante,

    Dominus vobiscum.
    Resp. Et cum spiritu tuo.
    Minister. Oremus.
    Kyrie eleison.
    Christe eleison.
    Kyrie eleison.

Deinde Minister, Clerici, et populus alta voce dicant Orationem Dominicam.
 

Apostles' Creed

PATER noster, qui es in cœlis, Santificetur Nomen tuum. Adveniat regnum tuum. Fiat voluntas tua, Sicut in cœlo, et in terra. Panem nostrum quotidianum da nobis hodie. Et dimitte nobis debita nostra, Sicut et nos dimittimus debitoribus nostris. Et ne nos inducas in tentationem; Sed libera nos a malo. Amen.

Deinde erigat se Sacerdos. sic dicens,
    Ostende nobis, Domine, misericordiam tuam.
    Resp. Et salutare tuum da nobis.
    Sacerdos. Domine, salvum fac Regem.
    Resp. Et exaudi nos in die qua invocaverimus te.
    Sacerdos. Sacerdotes tui induantur justitiam.
    Resp. Et sancti tui exultent.
    Sacerdos. Salvum fac populum tuum, Domine.
    Resp. Et benedic hæreditati tuæ.
    Sacerdos. Da pacem, Domine, in diebus nostris.
    Resp. Quia non est alius qui pugnet pro nobis, nisi tu, Deus noster.
    Sacerdos. Cor mundum crea in nobis, Deus.
    Resp. Et Spiritum Sanctum tuum ne auferas a nobis.

Has Preces sequantur tres Orationes; prima de Die, ea scilicet quæ assignatur dicenda ad Communionem; secunda, pro Pace; tertia, pro Gratia ad bene vivendum. Quæ duæ posteriores Orationes nunquam mutentur, sed quotidie per integrum annum ad Matutinas dicantur, ut sequitur; omnibus genuflexis.
 

Lord's Prayer

Secunda Oratio, pro Pace.

DEUS, auctor pacis et amator, quem nosse vivere, cui servire regnare est: Protege ab omnibus impugnationibus supplices tuos; ut qui in tua defensione confidimus, nullius hostilitatis arma timeamus, per potentiam Jesu Christi Domini nostri. Amen.
 

2nd Collect, for Grace

Tertia Oratio, pro Gratia.

DOMINE Sancte, Pater Omnipotens, æterne Deus, qui nos ad principium hujus diei pervenire fecisti; Tua nos hodie salva virtute; et concede ut in hac die ad nullum declinemus peccatum, nec ullum incurramus periculum; sed semper ad tuam justitiam faciendam omnis nostra actio tuo moderamine dirigatur. Per Jesum Christum Dominum nostrum. Amen.

In Choris et Locis ubi Cantores sint, hic sequitur Antiphona.

Deinde quinque Orationes hic sequentes hoc loco legendæ sunt, nisi cum Litania legatur; quo in casu duæ tantum posteriores, sicut ibi etiam assignantur, sunt legendæ.
 

3rd Collect, for Grace

Oratio pro Regia Majestate.

DOMINE, Pater noster cœlestis, qui maximus potentissimusque es Rex regum, Dominus dominantium, et principum unicus Moderator, qui de throno tuo omnes terræ incolas intueris; Supplices te rogamus ut Dominum nostram clementissimum, Regum Georgium, benignus respicias; et eum Sancti tui Spiritus gratia ita adimpleas, ut semper ad tuam voluntatem se inclinet, et in via tua ambulet. Accumula in eum cœlestia tua dona: fac ut diu sanus et salvus vivat; eum ita corrobora ut omnes hostes devincat; et tandem, post hanc vitam, ad æternæ beatitudinis gaudia perveniat. Per Jesum Christum Dominum nostrum. Amen. (1560.*)
 

Prayer for the King's Majesty

Oratio pro Domo Regia.

OMNIPOTENS Deus, fons totius bonitatis, supplices te rogamus, ut clementem Reginam nostram Mariam, Regis Matrem Reginam Alexandram, Edvardum Principem Walliæ, et universam Gentem Regiam, benedicere, Spiritu Sancto tuo adornare, cœlesti gratia ditare, omni felicitate prosperare, et ad regnum tuum cœleste perducere digneris. Per Jesum Christum Dominum nostrum. Amen.
 

Prayer for the Royal Family

Oratio pro Clero et Populo.

OMNIPOTENS sempiterne Deus, qui facis mirabilia magna solus; Prætende super famulos tuos Pontifices nostros, et Parochos, et super cunctos Greges illis commissos, Spiritum gratiæ salutaris; et ut in veritate tibi complaceant, perpetuum eis rorem tuæ benedictionis infunde. Hoc quæsumus Domine, donare digneris, in honorem Advocati et Mediatoris nostri Jesu Christi. Amen.
 

Prayer for the Clergy & People

Oratio Sancti Chrysostomi.

OMNIPOTENS Deus, qui nobis gratiam dedisti, ut hoc tempore concordes te communi supplicatione invocemus; et duobus vel tribus congregatis in Nomine tuo te quod rogaverint daturum polliceris: Vota, quæsumus, Domine, et petitiones famulorum tuorum, jam prout illis maxime expediat, prosequere; nobis in hoc sæculo veritatis tuæ cognitionem et in futuro vitam largiens æternam. Amen.

2 ad Corinthios, cap. xiii.

GRATIA Domini nostri Jesu Christi, et charitas Dei, et communicatio Sancti Spiritus, sit cum omnibus nobis in sæcula sæculorum. Amen.

Finis Ordinis Matutinarum per totum Annum.

Prayer of St. Chrysostom