Liber Precum Publicarum:
The Book of Common Prayer in Latin (1662)

Gratiarum Actio

PRO MULIERIBUS POST PARTUM.
 

Mulier, usitato tempore post partum, in Ecclesiam decenter induta veniat, et ibi genua flectat in loco commodo, prout aut usitatum sit, aut visum fuerit Ordinario. Deinde et dicat Sacerdos,

QUONIAM Deus Omni potens dignatus est pro bonitate sua te in partu conservare, et in magno pariendi periculo custodire, decet te Deo ex animo gratias agere, et dicere,
 

The Thanksgiving of Women after Child-birth, commonly called
The Churching of Women

Deinde Sacerdos dicat Psalmum cxvi.

DILEXI, quoniam exaudiet Dominus : vocem orationis meæ :
    Quia inclinavit aurem suam mihi : et in diebus meis invocabo.
    Circumdederunt me dolores mortis : et pericula inferni invenerunt me.
    Tribulationem et dolorem inveni : et nomen Domini invocavi.
    O Domine, libera animam meam; misericors Dominus, et justus : et Deus noster miseretur ;
    Custodiens parvulos Dominus: humiliatus sum, et liberavit me.
    Convertere anima mea in requiem tuam : quia Dominus benefecit tibi.
    Quia eripuit animam meam de morte : oculos meos a lacrymis, pedes meos a lapsu.
    Placebo Domino : in regione vivorum.
    Credidi, propter quod locutus sum : ego autem humiliatus sum nimis.
    Ego dixi in excessu meo : Omnis homo mendax.
    Quid retribuam Domino : pro omnibus, quæ retribuit mihi?
    Calicem salutaris accipiam : et nomen Domini invocabo.
    Vota mea Domino reddam in conspectu omnis populi ejus : in atriis domus Domini, in medio tui Jerusalem. Alleluia.
    Gloria Patri, et Filio : et Spiritui Sancto
    Sicut erat in principio, et nunc, et semper; et in sæcula sæculorum. Amen.
 

Psalm 116

Sive Psalmum cxxvii.

NISI Dominus ædificaverit domum: in vanum laboraverunt qui ædificant eam.
    Nisi Dominus custodierit civitatem : frustra vigilat qui custodit eam.
    Vanum est vobis ante lucem surgere : surgite postquam sederitis, qui manducatis panem doloris.
    Cum dederit dilectis suis somnum : ecce hereditas Domini filii; merces, fructus ventris.
    Sicut sagittæ in manu potentis : ita filii excussorum.
    Beatus vir qui implevit desiderium suum ex ipsis : non confundetur cum loquetur inimicis suis in porta.
    Gloria Patri, et Filio : et Spiritui Sancto;
    Sicut erat in principio, et nunc, et semper : et in sæcula sæculorum. Amen.

Deinde dicat Sacerdos,

Oremus.

    Kyrie eleison.
    Christe eleison.
    Kyrie eleison.
 

Psalm 127

PATER noster, qui es in cœlis, Sanctificetur Nomen tuum. Adveniat regnum tuum. Fiat voluntas tua, Sicut in cœlo, et in terra. Panem nostrum quotidianum da nobis hodie. Et dimitte nobis debita nostra, Sicut et nos dimittimus debitoribus nostris. Et ne nos inducas in tentationem; Sed libera nos a malo. Quia tuum est regnum, Potentia, et gloria, In sæcula sæculorum. Amen.
     Minister. Salvam fac istam ancillam tuam.
     Resp. Domine, sperantem in te.
     Minister. Esto ei, Domine, turris fortitudinis.
     Resp. A facie inimici.
     Minister. Domine, exaudi orationem nostram.
     Resp. Et clamor noster ad te veniat.

Minister. Oremus.

OMNIPOTENS Deus, gratias tibi ex animo referimus, quia hanc famulam tuam de magno pariendi dolore et periculo liberare dignatus es: Concede, quæsumus, Pater misericors, ut te adjuvante, temporali cursu fideliter et secundum te peracto, sempiternam gloriam in vita futura possideat; per Jesum Christum Dominum nostrum. Amen.

Mulier quæ venit ad gratiarum actionem oblationes usitatas facere debet. Et si Communio administranda sit, convenit eam Sacræ Communionis fieri participem.

Lord's Prayer

Comminatio,

SEU DENUNTIATIO IRÆ JUDICIORUMQUE DEI CONTRA PECCATORES,

CUM QUIBUSDAM ORATIONIBUS, IN PRIMO DIE QUADRAGESIMÆ. ET ALIIS TEMPORIBUS, PROUT ORDINARIO VISUM FUERIT, FACIENDA.

Post Matutinas, Litania more consueto finita, dicat Sacerdos, in loco ubi Officium legit, aut in Pulpito,

FRATRES, in Ecclesia primitiva pia erat disciplina, secundum quam initio Quadragesimæ, rei manifestorum criminum, injuncta publica pœnitentia, in hoc sæculo puniebantur, ut spiritus salvi essent in Die Domini, et alii eorum exemplo admoniti minus auderent peccare.
    Cujus loco disciplinæ, donec restitui potuerit, (quod valde optandum est), visum est ut hoc tempore coram vobis omnibus legantur generales sententiæ divinæ maledictionis in peccatores obstinatos, e vicesimo septimo capite Deuteronomii, et aliis Scripturæ locis, desumptæ, et vos ad singulas sententias respondeatis, Amen: quo magis, de gravi indignatione Dei contra peccatores admoniti, ad veram seriamque pœnitentiam excitemini, et in hisce diebus periculosis cautius ambulantes, illa vitia devitetis quæ divina maledictione digna esse proprio ore affirmatis.

MALEDICTUS homo qui facit sculptile et conflatile, ut adoret illud.
     Respondeat populus, Amen.
     Minister. Maledictus qui maledixerit patri vel matri.
     Resp. Amen.
     Minister. Maledictus qui transfert terminos proximi sui.
     Resp. Amen.
     Minister. Maledictus qui errare facit cæcum in itinere.
     Resp. Amen.
     Minister. Maledictus qui pervertit judicium ad venæ, pupilli, et viduæ.
     Resp. Amen.
     Minister. Maledictus qui clam percusserit proximum suum.
     Resp. Amen.
     Minister. Maledictus qui dormit cum uxore proximi sui.
     Resp. Amen.
     Minister. Maledictus qui accipit munera, ut percutiat animam sanguinis innocentis.
     Resp. Amen.
     Minister. Maledictus homo qui confidit in homine, et ponit carnem brachium suum, et a Domino recedit cor ejus.
     Resp. Amen.
     Minister. Maledicti immisericordes, scortatores, adulteri avari, idololatræ, calumniatores, ebriosi, raptores.
     Resp. Amen.

Minister.

NOS igitur, cum, teste David Propheta, maledicti sint omnes, qui declinant mandatis Dei, tremendum illud judicium nobis imminens et nunquam non instans recordemur; ad Dominum Deum nostrum omni cordis contritione et humilitate revertamur; præteritæ vitæ culpas defleamus, peccata confiteamur, et fructus dignos pœnitentiæ facere studeamus. Jam enim securis ad radicem arborum posita est: omnis ergo arbor quæ non facit bonum fructum excidetur, et in ignem mittetur. Horrendum est incidere in manus Dei viventis. Pluet super peccatores laqueos; ignis et sulphur et spiritus procellarum pars calicis eorum. Ecce enim Dominus egredietur de loco suo, ut visitet iniquitatem habitatoris terræ contra eum. Et quis poterit cogitare diem adventus ejus, et quis stabit ad videndum eum? Cujus ventilabrum in manu sua, et permundabit aream suam, et congregabit triticum suum in horreum, paleas autem comburet igne inexstinguibili. Dies Domini, sicut fur in nocte, ita veniet: cum enim dixerint, Pax et securitas, tunc repentinus eis superveniet interitus, sicut dolor in utero habenti, et non effugient. Tunc apparebit ira illa Dei in die vindictæ, quam peccatores obstinati secundum duritiam suam et impœnitens cor sibi thesaurizaverunt; qui contemnebant bonitatem et patientiam et longanimitatem Dei in pœnitentiam jugiter se vocantis. Tunc invocabunt me, inquit Dominus, et non exaudiam: mane consurgent, et non invenient me: eo quod exosam habuerint disciplinam, et timorem Domini non susceperint, nec acquieverint consilio meo, et detraxerint universæ correptioni meæ. Tunc nimis sero pulsabunt post clausam januam, et in tempore judicii misericordiam implorabunt. O vox terribilis justissimi judicii contra eos pronuntiandi, cum eis dicetur, Discedite, maledicti, in ignem æternum, qui paratus est diabolo et angelis ejus. Igitur, fratres, mature attendamus nobis, dum dies est salutis: venit enim nox, quando nemo potest operari. Nos autem, dum lucem habemus, credamus in lucem, et tanquam filii lucis ambulemus; ne ejiciamur in tenebras exteriores, ubi erit fletus et stridor dentium. Ne abutamur bonitate Dei, qui ad pœnitentiam nos benignus invitat, et pro infinita misericordia sua nobis, ad se in corde perfecto reversis, præteritorum indulgentiam pollicetur. Si fuerint peccata nostra ut coccinum, quasi nix dealbabuntur: et si fuerint rubra quasi vermiculus, velut lana alba erunt. Convertimini, ait Dominus, ab omnibus iniquitatibus vestris, et non erit vobis in ruinam iniquitas. Projicite a vobis omnes prævaricationes vestras, in quibus prævaricati estis, et facite vobis cor novum et spiritum novum: et quare moriemini, domus Israel? Quia nolo mortem morientis, dicit Dominus Deus, revertimini, et vivite. Quamquam peccavimus, Advocatum habemus apud Patrem, Jesum Christum justum: et ipse est propitiatio pro peccatis nostris. Ipse enim vulneratus est propter iniquitates nostras, attritus est propter scelera. Ad eum ergo revertamur, qui omnes pœnitentes benigne suscipit: nec dubitemus quin adsit nos suscepturus, et paratus ad ignoscendum, modo ad eum fideli pœnitentia accedamus, ei nos subjiciamus, in ejus viis posthac ambulemus, jugum ejus suave et onus leve super nos tollamus, quatenus eum in humilitate, patientia, et charitate sequentes, a Sancto ejus Spiritu gubenemur, gloriam ejus semper quæramus, et ei in vocatione nostra, prout nos oportet, cum gratiarum actione serviamus. Quod si fecerimus, Christus nos redimet de maledicto legis, et de gravissima illa maledictione quæ in eos incidet, qui a sinistris statuentur: immo nos a dextris statuet, et dabit nobis benignam Patris sui benedictionem, jubens nos gloriosum suum regnum possidere: ad quos nos omnes pro infinita sua misericordia perducere dignetur. Amen.
 

A Commination
or Denouncing of God's Anger and Judgemwnts against Sinners

Deinde, omnibus genuflexis, Sacerdos et Clerici (in loco ubi Litaniam dicere solent) genuflexi hunc Psalmum dicant.

Psalmus li.

MISERERE mei Deus : secundum magnam misericordiam tuam.
    Et secundum multitudinem miserationum tuarum : dele iniquitatem meam.
    Amplius lava me ab iniquitate mea : et a peccato meo munda me.
    Quoniam iniquitatem meam ego cognosco : et peccatum meum contra me est semper.
    Tibi soli peccavi, et malum coram te feci : ut justificeris in sermonibus tuis, et vincas cum judicaris.
    Ecce enim in iniquitafibus conceptus sum : et in peccatis concepit me mater mea.
    Ecce enim veritatem dilexisti : incerta et occulta sapientiæ tuæ manifestasti mihi.
    Asperges me hyssopo, et mundabor : lavabis me, et super nivem dealbabor.
    Auditui meo dabis gaudium et lætitiam : et exsultabunt ossa humiliata.
    Averte faciem tuam a peccatis meis : et omnes iniquitates meas dele.
    Cor mundum crea in me, Deus : et spiritum rectum innova in visceribus meis.
    Ne projicias me a facie tua : et Spiritum Sanctum tuum ne auferas a me.
    Redde mihi lætitiam salutaris tui : et Spiritu principali confirma me.
    Docebo iniquos vias tuas : et impii ad te convertentur.
    Libera me de sanguinibus Deus, Deus salutis meæ : et exsultabit lingua mea justitiam tuam.
    Domine, labia mea aperies et os meum annuntiabit laudem tuam.
    Quoniam si voluisses sacrificium, dedissem utique: holocaustis non delectaberis.
    Sacrificium Deo spiritus contribulatus: cor contritum et humiliatum, Deus, non despicies.
    Benigne fac, Domine, in bona voluntate tua Sion : ut ædificentur muri Jerusalem.
    Tunc acceptabis sacrificium justitiæ, oblationes, et holocausta : tunc imponent super altare tuum vitulos.
    Gloria Patri, et Filio : et Spiritui Sancto
    Sicut erat in principio, et nunc, et semper: et in sæcula sæculorum. Amen.

    Kyrie eleison.
    Christe eleison.
    Kyrie eleison.
 

Psalm 51

PATER noster, qui es in cœlis, Sanctificetur nomen tuum. Adveniat regnum tuum. Fiat voluntas tua, Sicut in cœlo, et in terra. Panem nostrum quotidianum da nobis hodie. Et dimitte nobis debita nostra, Sicut et nos dimittimus debitoribus nostris. Et ne nos inducas in tentationem; Sed libera nos a malo. Amen.

     Minister. Salvos fac servos tuos.
     Resp. Domine, sperantes in te.
     Minister. Mitte eis auxilium desuper.
     Resp. Et semper tuere eos.
     Minister. Adjuva nos, Deus salutaris noster.
     Resp. Et propter gloriam Nominis tui, Domine, libera nos, et propitius esto peccatis nostris propter Nomen tuum.
     Minister. Domine, exaudi orationem nostram.
     Resp. Et clamor noster ad te veniat.

Minister. Oremus.

EXAUDI, Domine, preces nostras, et confitentium tibi parce peccatis : ut quos conscientiæ reatus accusat, indulgentiæ tuæ miseratio absolvat; per Christum Dominum nostrum. Amen.

DEUS potentissime, Pater misericors, qui misereris omnium, et nihil odisti eorum que fecisti; qui dixisti pœnitentiam et salutem te malle peccatoris quam mortem: Dimitte nobis misericors debita nostra; peccatorum nos onere fatigatos, ut suscipias et refoveas deprecamur. Tuum est semper misereri; tui solius est veniam dare delictorum. Parce nobis ergo, Domine, parce populo tuo quem redemisti; non intres in judicium cum nobis, qui vilis terra sumus, et miseri peccatores sed ita iram tuam avertas a nobis, turpitudinem nostram humiliter agnoscentibus, et culpas nostras ex animo deflentibus, et ita in hoc sæculo ad adjuvandum nos festines, ut in futuro tecum semper vivamus; per Jesum Christum Dominum nostrum. Amen.

Deinde populus quod sequitur dicat, præeunte Ministro.

CONVERTE nos, Domine, et convertemur. Propitius esto, Domine, Propitius esto populo tuo, Qui ad te in fletu, in jejunio, et in supplicando convertitur. Tu enim misericors es Deus, Plenus miserationum, Longanimis et miserator. Parcis nobis pœnam merentibus; Et etiam iratus recordaris misericordiam. Parce populo tuo, parce, Domine; Et ne des hæreditatem tuam in opprobrium. Exaudi nos, Domine, quia magna est misericordia tua: Et secundum multitudinem miserationum tuarum respice nos. Propter merita benedicti Filii tui, Mediatoris et Domini nostri, Jesu Christi. Amen.

Deinde solus dicat Minister,

BENEDICAT nobis Dominus, et custodiat nos: convertat Dominus vultum suum super nos, et det nobis pacem nunc et semper. Amen.

Lord's Prayer