Ordo in Matutinis et Vespertinis precibus servandus

MATUTINÆ preces & Vesperinæ celebrabuntur in locis Ecclesiarum, Capellarum & Chororum, consuetis, nisi aliter loci Ordinario visum fuerit. Chorus etiam manebit eadem forma, qua superiorum temporum fuit.
    In principio Matutinarum precum Administrator Sacrorum clara & aperta voce pronunciabit unam aliquam ex sacræ scripturæ sententiis, quæ consequuntur. Post quam subjiciet orationem, quæ Sententiis est apposita. Qui ordo etiam servabitur in exordio precum Vespertinarum.

Sententiæ

SI impius egerit pœnitentiam pro omnibus peccatis suis quæ operatus est, & custodierit omnia præcepta mea, & fecerit judicium & justiciam, vita vivet & non morietur. Omnium iniquitatum ejus quas operatus est, non recordabor: dicit Dominus. Ezech. 18.
   Iniquitatem meam agnosco, & peccatum meum contra me est semper. Psa. 51
   Averte faciem tuam a peccatis meis: & omnes iniquitates meas dele. Psa. 51
   Scindite corda vestra, & non vestimenta vestra, & convertimini ad Dominum Deum vestrum, quia benignus & misericors est, patiens & multæ clementiæ, qui se ab inferendo malo contineat. Jœl 2.
   Tui Domini Dei nostri est misericordia & propiciatio, quia recessimus a te, & non audivimus vocem Domini Dei nostri, ut ambularemus in lege ejus. Daniel.
   Corripe nos, Domine, veruntamen in judicio & non in furore tuo, ne forte ad nihilum redigas nos. Jeremias 10; Psal.
   Pœnitentiam agite; appropinquat enim regnum cœlorum. Math.
   Surgam, & ibo ad patrem meum, & dicam ei: Pater, peccavi in cœlum & coram te. Jam non sum dignus vocari filius tuus. Lucas 15.
   Non intres in judicium cum servo tuo, Domine, quia non justificabitur in conspectu tuo omnis vivens. Psal. 142
   Si nos peccati expertes esse dicimus, fallimus nos ipsos, nec est in nobis veritas. 1 Johan. 1

CHARISSIMI fratres : Sacra scriptura multis in locis nos commonefacit, ut multiplices nostras offensiones & infinita peccata confiteamur & agnoscamus, nec ullam in conspectu Dei dissimulationem adhibeamus, sed errata, quocunque ex genere sint, universa coram Deo denudemus, animo demisso sinceroque contestemur, ut culpæ tam salutaris agnitio veniam ex summa Dei clementia consequatur. Et quanquam peccata nostra semper in oculis Dei collocanda sunt, & nobis lamentabiliter commemoranda ; tamen hoc in publico cœtu precipue fieri debet, in quo primum nos summas gracias agere convenit, propter uberrimam Divini numinis munificentiam, quæ nos omni genere beneficiorum cumulavit. Deinde Dei bonitas excellens prædicanda est, attendendæ sunt sacræ scripturæ : postremo precibus ardentissimis emendicandum est a Deo, quicquid animorum status aut corporis requirit. Quapropter omnes vos, qui præsentes hic adestis, per Dei nomen obtestor, ut intimi sensus vestri, cum meo conjuncti periter, ad cœlestis clementiæ thronum subvolent, & in hunc qui sequitur sermonem succedatur.

Generalis confessio, ab universa congregatione dicenda, genibus flexis.

OMNIPOTENS & clementissime Pater, tanquam oves perditæ peregrinati sumus, & a viis tuis aberravimus. Inventis & concupiscentiis cordis nostri nimium indulsimus : Sacrosanctas leges leges tuas violavimus. Quæ a nobis facienda fuerant omissimus, & quæ facienda non fuerant admisimus. In nobis nulla est salus, quapropter, O Domine, propitius esto nobis miserrimis peccatoribus. Parce, O Deus, peccata sua confitentibus : misericordiam concede resipiscentibus, juxta promissiones tuas humano generi in Christo Jesu Domino nostro benignissime revelatas. Amplius etiam concede nobis, O clementissime Pater, propter Filium tuum & Servatorem nostrum Jesum Christum, ut posthac pie, juste, sobrieque vitam nostram instituamus, ad sanctissimi tui nominis gloriam. Amen.

OMNIPOTENS DEUS, Pater Domini nostri Jesu Christi, qui non vult mortem peccatoris, sed potius ut recedat a malis suis moribus & vivat ; deditque potestatem suis ministris, imo præcipit, ut populo suo pœnitenti absolutionem remissionemque peccatorum suorum plane annunciarent, ipse singulis vere pœnitentibus, & sacrosancto Evangelio haud ficte credentibus, condonat, eosque certissime absolvit. Rogamus ergo, ut ille nobis veram pœnitentiam largiatur, sanctumque suum Spiritum impartiat, ut quod hoc tempore agimus, id illi totum placeat : & reliqua etiam nostra vita, adeo pura sit in hoc mundo, & sancta, ut in futuro gaudium consequamur æternum, per Christum Dominum nostrum. Populus respondebit. Amen.

Tunc Minister ordietur, alta voce, Orationem Dominicam.

PATER noster qui es in cœlis, Sanctificetur nomen tuum. Adveniat regnum tuum. Fiat voluntas tua, sicut in cœlo, & in terra. Panem nostrum quotidiamum da nobis hodie. Et dimitte nobis debita nostra, sicut & nos dimittimus debitoribus nostris. Et ne nos inducas in tentationem. Sed libera nos a malo. Amen. Matt. 6 Lucæ 11.

Deinde Minister dicet.

DOMINE, labia nostra aperies.
Responsio: Et os nostrum annunciabit laudem tuam.
    Minister: Deus, in adjutorium nostrum intende.
   Responsio: Domine, ad adjuvandum nos festina. Gloria Patri et Filio, et Spiritui Sancto : Sicut erat in principio et nunc et semper, et in secula seculorum. Amen. Alleluia.

Tunc canatur Psalmus sequens.

VENITE, exsultemus Domino : jubilemus Deo salutari nostro.
   Præoccupemus faciem ejus in confessione : et in psalmis jubilemus ei:
   Quoniam Deus magnis Dominus : et rex magnus super omnes deos;
   Quia in manu eius sunt omnes fines terræ : et altitudines montium ipsius sunt:
   Quoniam ipsius est mare, et ipse fecit illus : et siccam manus eius formaverunt.
   Venite, adoremus, et procidamus : et ploremus ante Dominum qui fecit nos;
   Quia ipse est Dominus Deus noster : et nos populus pascuæ eius, et oves manus eius.
   Hodie si vocem eius audieritis : nolite obdurare corda vestra sicut in irritatione,
   Secundum diem tentationis in deserto : ubi tentaverunt me patres vestri,
   Probaverunt me: et viderunt opera mea.
   Quadraginta annis offensus fui generationi illi : et dixi, semper hi errant corde.
   Et isti non cognoverunt vias meas: ut juravi in ira mea, si introibunt in requiem meam.
   Gloria Patri et Filio, et Spiritui Sancto : Sicut erat in principio et nunc et semper, et in secula seculorum.

Tunc sequenter Psalmi, ordine præmonstrate in Tabula, nisi diei assignentur proprii Psalmi. Et ad finem uniuscujusque Psalmi repetetur Gloria Patri et Filio . . . &c.
   Post psalmos, duæ Lectiones distincte & clara voce pronuncientur, prior ex Veteri, posterior ex Novo Testamento, ut in Calendario proponuntur, nisi diei assignatæ fuerint lectiones.
    Minister eo modo versa facie stabit, quo commodius audiri possit.
    Et initio cujuslibet lectionis, Librum & Caput novi & veteris Testamenti, unde lectio sumitur, indicabit, hoc modo: Primum, Secundum, Tertium vel quartum. &c. caput Genescos. Exodi. &c. Matthæi, Marci, &c. ut in Calendario præmonetur.
   Et ad finem cujuslibet capitis, sic: Finitur hoc vel illud Caput, talis Libri vel Evangelii.
   Et ut facilius intelligatur, in his locis ubi Musica figuralis cani solet, Lectiones, Epistolæ & Evangelia simpliciter & naturali tono, in modum perpetuæ dictionis, distincte legantur. Post primam lectionem sequetur, per totum Annum:

BENEDICITE omnia opera Domini Domino, laudate et superexaltate eum in secula.
   Benedicite angeli Domini Domino, laudate et superexaltate eum in secula.
   Benedicite cœli Domino, laudate et superexaltate eum in secula.
   Benedicite aquæ omnes quæ super cœlos sunt Domino : laudate et superexaltate eum in secula.
   Benedicite omnes virtutes Domini Domino : laudate et superexaltate eum in secula.
   Benedicite Sol et luna Domino : laudate et superexaltate eum in secula.
   Benedicite stellæ cœli Domino : laudate et superexaltate eum in secula.
   Benedicite omnis imber et ros Domino : laudate et superexaltate eum in secula.
   Benedicite omnis spiritus Dei Domino : laudate et superexaltate eum in secula.
   Benedicite ignis et æstus Domino : laudate et superexaltate eum in secula.
   Benedicite frigus et æstas Domino : laudate et superexaltate eum in secula.
   Benedicite rores et pruina Domino : laudate et superexaltate eum in secula.
   Benedicite gelu et frigus Domino : laudate et superexaltate eum in secula.
   Benedicite glacies et nives Domino : laudate et superexaltate eum in secula.
   Benedicite noctes et dies Domino : laudate et superexaltate eum in secula.
   Benedicite lux et tenebræ Domino : laudate et superexaltate eum in secula.
   Benedicite fulgura et nubes Domino : laudate et superexaltate eum in secula.
   Benedicat terra Dominum : laudet et superexaltet eum in secula.
   Benedicite montes et colles Domino : laudate et superexaltate eum in secula.
   Benedicite universa germinantia in terra Domino : laudate et superexaltate eum in secula.
   Benedicite fontes Domino : laudate et superexaltate eum in secula.
   Benedicite maria et flumina Domino : laudate et superexaltate eum in secula.
   Benedicite cete et omnia quæ moventur in aquis Domino : laudate et super- exaltate eum in secula.
   Benedicite omnes volucres cœli Domino : laudate et superexaltate eum in secula.
   Benedicite omnes bestiæ et pecora Domino : laudate et superexaltate eum in secula.
   Benedicite filii hominum Domino : laudate et superexaltate eum in secula.
   Benedicat Isræl Dominum : laudet et superexaltet eum in secula.
   Benedicite sacerdotes Domini Domino : laudate et superexaltate eum in secula.
   Benedicite servi Domini Domino : laudate et superexaltate eum in secula.
   Benedicite spiritus et animæ justorum Domino : laudate et superexaltate eum in secula.
   Benedicite sancti et humiles corde Domino : laudate et superexaltate eum in secula.
   Benedicite Anania, Azaria, Misæl Domino : laudate et superexaltate eum in secula.
   Gloria Patri, et Filio : et Spiritui Sancto.
   Sicut erat in principio et nunc et semper : et in secula seculorum. Amen.

Dani. 3

Deinde sequatur lectio secunda, qua finita, canatur Hymnus Zachariæ.

BENEDICTUS Dominus Deus Isræl : quia visitavit et fecit redemptionem plebi suæ.
   Et erexit cornu salutis nobis : in domo David pueri sui.
   Sicut locutus est per os sanctorum : qui a seculo sunt prophetarum ejus.
   Salutem ex iminicis nostris : et de manu omnium qui aderunt nos.
   Ad faciendam misericordiam cum patribus nostris : et memorari testamenti sui sancti.
   Jusjurandum quod juriavit ad Abraham patrem nostrum : daturum se nobis.
   Ut sine timore de manu inimicorum nostrorum liberati : serviamus illi.
   In sanctitate et justitia coram ipso : omnibus diebus nostris.
   Et tu puer Propheta Altissimi vocaberis : præibis enim ante faciem Domini, parare vias ejus.
   Ad dandam scientiam salutis plebi ejus : in remissionem peccatorum eorum.
   Per viscera misericordiæ Dei nostri : in quibus visitavit nos oriens ex alto.
   Illuminare his qui in tenebris et in umbra mortis sedent : ad dirigendos pedes nostros in viam pacis.
   Gloria Patri, et Filio, : et Spiritui Sancto.
   Sicut erat in principio, et nunc, et semper : et in secula seculorum. Amen.

Luce. 1.

Aut Psalmus:

Psalmus 100

JUBILATE Deo, omnis terra : servite Domino in lætitia.
   Introite in conspectu eius in exsultatione : scitote quoniam Dominus ipse est Deus.
   Ipse fecit nos, et non ipsi nos : populus eius, et oves pascuæ eius.
   Introite portas eius in confessione : atria eius in hymnis; confitemini illi.
   Laudate nomen eius : quoniam suavis est Dominus.
   In æternum misericordia eius : et usque in generationem et generationem veritas eius.

Deinde dicatur, Ministro et Populo stantibus:

CREDO in Deum Patrem omnipotentem, creatorem cœli et terræ. Et in Jesum Christum Filium ejus unicum Dominum nostrum. Qui conceptus est de Spiritu Sancto, natus ex Maria virgine. Passus sub Pontio Pilato : crucifixus, mortuus, et sepultus, descendit ad inferna. Tertia die resurrexit a mortuis, ascendit ad cœlos, sedet ad dexteram Dei Patris omnipotentis. Inde venturus est judicare vivos et mortuos. Credo in Spiritum Sanctum. Sanctam Ecclesiam Catholicam. Sanctorum communionem. Remissionem peccatorum. Carnis resurrectionem. Et vitam æternam. Amen.

Post hæc sequuntur per totum annum, ad Matutinas et Vespertinas, hæs preces, omnium genibus religiose flexis.

    Minister: Dominus vobiscum.
   Responsio: Et cum spiritu tuo.
   Minister: Oremus. Kyrie eleyson, Christe eleyson, Kyrie eleyson

Deinde a Ministro et tota Ecclesia dicatur alta voce:

PATER noster qui es in cœlis, Sanctificetur nomen tuum. Adveniat regnum tuum. Fiat voluntas tua, sicut in cœlo, & in terra. Panem nostrum quotidiamum da nobis hodie. Et dimitte nobis debita nostra, sicut & nos dimittimus debitoribus nostris. Et ne nos inducas in tentationem. Sed libera nos a malo. Amen. Matt. 6 Lucas 11.

Minister erigens se, dicet:

   Ostende nobis Domine misericordiam tuam

   Responsio: Et salutare tuum da nobis.
   Minister: Domine salvam fac Reginam.
   Responsio: Et exaudi nos cum invocamus te.
   Minister: Sacerdotes tui induanter Justitia.
   Responsio: Et sancti tui exultent.
   Minister: Salvum fac Populum tuum Domine.
   Responsio: Et benedic Hæreditati tuæ.
   Minister: Da pacem Domine in diebus nostris.
   Responsio: Quia non est alius qui pugnet pro nobis, nisi tu Deus noster.
   Minister: Cor mundum crea in nobis, O Deus.
   Responsio: Et Spiritum Sanctum tuum ne auferas a nobis.

Has preces sequentur quotidie tres Collectæ. Prima de Die, ea scilicet quæ assignatur dicenda ad Communionem eo die. Altera pro pace. Tertia pro gratia Dei, perseverantia in Fide, et vera doctrina. Posteriores autem duæ nunquam mutantur, sed per integrum annum dicuntur ad Matutinas et Vesperas.

Collecta pro Pace

Minister:

Oremus

DEUS auctor pacis et amator, quem nosse, vivere; cui servire, regnare est : protege ab omni oppugnatione suppleces tuos, ut qui in tua protectione confidimus, nullius hostilitatis arma timeamus. Per Christum Dominum nostrum. Amen.

DOMINE sancte, Pater omnipotens, æterne Deus, qui nos ad principium hujus diei pervenire fecisti, tua nos hodie serva virtute, ut in hac die ad nullum declinemus mortale peccatum, nec ullam incurramus periculum, sed semper ad tuam justitiam faciendam omnis nostra actio tuo moderamine dirigatur. Per Jesum Christum Dominum nostrum. Amen.

    In festis Natalis Domini, Epiphaniæ, Matthiæ, Paschatis, Ascensionis, Pentecostes, Trinitatis, Joannis Baptistæ, S. Jacobi, S. Bartholomæi, St. Matthæi, Simonis et Judæ, et S. Andreæ, ad Matutinas statim post Benedictus canetur Symbolum Athanasii:

QUICUNQUE vult salvus esse : ante omnis opus est ut teneat Catholicam fidem.
   Quam nisi quisque integram inviolatamque servaverit : absque dubio in æternum peribit.
   Fides autem Catholica hæc ist, ut unum Deum in trinitate, et Trinitatem in unitate veneramur.
   Neque confundentes personas : neque substantiam separantes.
   Alia est enim persona Patris : alia Filii, alia Spiritus Sancti.
   Sed Patris et Filii et Spiritus Sancti una est divinitas : æqualis loria, cœterna majestas.
   Qualis Pater, talis Filius : talis Spiritus Sanctus.
   Increatus Pater, increatus Filius : increatus Spiritus Sanctus.    Immensus Pater, immensus Filius : immensus Spiritus Sanctus.
   Æternus Pater, æternus Filius : æternus Spiritus Sanctus.
   Et tamen non tres æterni : sed unus æternus
   Sicut non tres increati, nec tres immensi : sed unus increatus, et unus immensus.
   Similiter, omnipotens Pater, omnipotens Filius : omnipotens Spiritus Sanctus.
   Et tamen non tres omnipotentes : sed unus omnipotens.
   Ita Deus Pater, Deus Filius : Deus Spiritus Sanctus.
   Et tamen non tres dii : sed unus est Deus.
   Ita Dominus Pater, Dominus Filius : Dominus Spiritus Sanctus.
   Et tamen non tres Domini : sed unus est Dominus.
   Quia sicut singulatim unamquanque personam Deum ac Dominum confiteri Christiana veritate compellimur : ita tres deos aut dominos dicere catholica religione prohibemur.
   Pater a nullo est factus : nec creatus nec genitus.
   Filius a Patre solo est : non factus, nec creatus, sed genitus.
   Spiritus Sanctus a Patre et Filio est : non factus, nec creatus, nec genitus, sed procedens.
   Unus ergo Pater, non tres patres : unus Filius, non tres filii : unus Spiritus Sanctus, non tres spiritus sancti.
   Et in hac Trinitate nihil prius aut posterius : nihil majus aut minus, sed totæ tres Personæ coæternæ sibi sunt et coæquales.
   Ita ut per omnia, sicut jam supra dictum est : et Unitas in Trinitate, et Trinitas in Unitate veneranda sit.
   Qui vult ergo salvus esse : ita de Trinitate sentiat.
   Sed necessarium est ad æternam salutem : ut incarnationem quoque Domini nostri Jesu Christi fideliter credat.
   Est ergo fides recta, ut credamus et confiteamur : quod Dominus noster Jesus Christus, Dei Filius, Deus et homo est.
   Deus est ex substantia Patris ante secula genitus : et homo ex substantia Matris in seculo natus.
   Perfectus Deus, perfectus homo : ex anima rationali et humana carne subsistens.
   Æqualis Patri secundum divinitatem : minor Patre secundum homanitatem.
   Qui licet Deus sit et homo : non duo tamen, sed unus est Christus.
   Unus autem non conversione divinitatis in carnem : sed assumptione humanitatis in Deum.
   Unus omnino non confusione substantiæ : sed unitate personæ.
   Nam sicut anima rationalis et caro unus est homo : ita Deus et homo unus est Christus.
   Qui passus est pro salute nostra : descendit ad inferos, tertia die resurrexit a mortuis.
   Ascendit ad cœlos, sedet ad desteram Dei Patris omnipotentis : inde venturus est judicare vivos et mortuos.
   Ad cujus adventum omnes homines resurgere habent cum corporibus suis : et reddituri sunt de factis propriis rationem.
   Et qui bona egerunt, ibunt in vitam æternam : qui vero mala, in ignem æternum.
   Hæc est fides Catholica, quam nisi quisque fideliter firmiterque crediderit : salvus esse non poterit.
   Gloria Patri, et Filio : et Spiritui Sancto.
   Sicut erat in principio, et nunc et semper : et in secula seculorum. Amen.

Ordo Vesperarum per Totum Annum

____________________

PATER noster qui es in cœlis, Sanctificetur nomen tuum. Adveniat regnum tuum. Fiat voluntas tua, sicut in cœlo, & in terra. Panem nostrum quotidiamum da nobis hodie. Et dimitte nobis debita nostra, sicut & nos dimittimus debitoribus nostris. Et ne nos inducas in tentationem. Sed libera nos a malo. Amen. Matt. 6 Lucas 11.

Alleluia

Postea canuntur Psalmi præmonstrati in Tabula, nisi festum fuerit quod proprios habeat Psalmos. Hos sequitur prima Lectio ex veteri Testamento, nisi fuerint propriæ Lectiones Festi.
 

MAGNIFICAT anima mea Dominum.
   Et exultavit spiritus meus : in Deo salutari meo
   Quia respexit humilitatem ancillæ suæ : ecce enim ex hoc beatam me dicent omnes generationes.
   Quia fecit mihi magna qui potens est : et sanctum nomen ejus.
   Et misericordia ejus a progenie in progenies : timentibus eum.
   Fecit potentiam in brachio suo : dispersit superbos mente cordis sui.
   Deposuit potentes de sede : et exaltavit humiles.
   Esurientes implevit bonis : et divites dimisit inanes.
   Suscepit Isræl puerum suum : recordatus misericordiæ suæ.
   Sicut locutus est ad patres nostros : Abraham et semini ejus in secula.
   Gloria Patri, et Filio : et Spiritui Sancto.
   Sicut erat in principio, et nunc et semper : et in secula seculorum. Amen.

Lucas 1

DOMINUS regnavit : decorem indutus est
    Indutus est Dominus fortitudinem : et præcinxit se.
    Etenim firmavit orbem terræ : qui non commovebitur.
    Parata sedes tua ex tunc : a sæculo tu es.
   Elevaverunt flumina, Domine : elevaverunt flumina vocem suam.
    Elevaverunt flumina fluctus suos : a vocibus aquarum multarum.
    Mirabiles elationes maris : mirabilis in altis Dominus.
    Testimonia tua credibilia facta sunt nimis.
    Domum tuam decet sanctitudo : Domine, in longitudinem dierum.
    Gloria Patri, et Filio : et Spiritui Sancto.
    Sicut erat in principio, et nunc et semper : et in secula seculorum. Amen.

NUNC dimittis servum tuum, Domine : secundum verbum in pace.
   Quia viderunt oculi mei : salutare tuum.
   Quod parasti : ante faciem omnium populorum.
   Lumen ad revelationem Gentium : et gloriam plebis tuæ Isræl.
   Gloria Patri, et Filio : et Spiritui Sancto.
   Sicut erat in principio, et nunc et semper : et in secula seculorum. Amen.

Lucas 2

DEUS miseratur nostri : et benedicat nobis.
   Illuminet vultum suum super nos : et miseratur nostri.
   Ut cognoscamus in terra viam tuam : in omnibus gentibus salutare tuum.
   Confiteamtur tibi populi, Deus : confiteantur tibi populi omnes.
   Lætentur et exsultent gentes, quoniam judicas populos in æquitate : et gentes in terra dirigis.
   Confiteantur tibi populi, Deus : confiteantur tibi populi omnes.
   Terra dedit fructum suum : Benedicat nos Deus, Deus noster!
   Benedicat nos Deus : et metuant eum onnes fines terræ.
   Gloria Patri, et Filio : et Spiritui Sancto.
   Sicut erat in principio, et nunc et semper : et in secula seculorum. Amen.

DEUS, a quo sancta desideria, recta consilia, et just sunt opera, da servis tuis illam quam mundus dare non potest Pacem, ut corda nostra mandatis tuis dedita, et hostium sublata formidine, tempora sint tua protectione tranquilla. Per Jesum Christum Dominus nostrum.

ILLUMINA, quæsumus Domine Deus, tenebras nostras, et totius noctis insidias tu a nobis repelle propicius. Per Dominum nostrum Jesus Christum. Amen.

_______________________

PATER de Cœlis Deus, miserere nobis miseris peccatoribus.

Oremus

DEUS misericors Pater, qui contritorum non despicis gemitum, et mœrentium non spernis affectum, adesto precibus nostris, quas tibi in angoribus nostris effundimus, easque clementer suscipere dignare; ut quicquid contra nos diabolicæ atque humanæ moliuntur adversationes, ad nihilum redigatur, et consilio tuæ pietatis elidatur, ut nos tui servi, nullis infestationibus læsi, in ecclesia tua sancta tibi gratias referamus: Per Jesum Christum Dominum nostrum. Amen.

Exsurge, Domine, adjuva nos, et libera nos propter nomen tuum.

DEUS auribus nostris audivimus, Patres nostri annunciaberunt nobis opera admiranda, quæ operatus es in diebus eorum, et in diebus antiquis.

Oremus

INFIRMITATES nostras, quæsumus Domine, benigne respice, et propter gloriam nominis tui mala omnia, quæ juste pro peccatis nostris meremur, a nobis clementer averte : et præsta, ut in cunctis adversantibus omnem nostram fiduciam collocemus in misericordia tua, et tibi semper in puritate vitæ serviamus, ad gloriam tui nominis : Per unicum mediatorem nostrum et advocantem Jesum Christum Dominum nostrum. Amen.

OMNIPOTENS sempiterne Deus, qui facis mirabilia magna solus, prætende super famulos tuos Pontifices et Ministros, et super cunctas congregationes illis commissas, Spiritum gratiæ sulataris, et ut in veritate tibi complaceant, perpetuum eis rorem tuæ benedictionis infunde, per Advocatus et Mediator nostrum Jesus Christum. Amen.

OMNIPOTENS sempiterne Deus, qui nobis gratiam dedisti ut hoc tempore unanimiter congregati, preces nostras ad te offerremus, quique polliceris, ut ubi duo vel tres congregati fuerint in tuo nomine, te eorum supplicationes clementer exauditurum, petimus, ut vota et preces tuorum famulorum, prout tibi videbitur eorum saluti maxime expedire, perficias, et præsta nobis in hac vita tuæ veritatis cognitionem, et in futura, vitam æternam. Amen.

II Corinth. xiii.

GRATIA Domini nostri Jesu Christi, charitas Dei, et communicatio Sancti Spiritus, sit semper cum omnibus nobis. Amen.

DEUS Pater cœlestis, qui per Filium tuum unigenitum promisisti universis tuum regnum et ejus justitiam quærentibus omnia huic vitæ necessaria, da nobis quæsumus in hac nostra necessitate pluviam et imbres tempestivos, ut terræ fructus, ad corporis nostri consolationem, tui nominis honorem, recipere possimus. Per Jesum Christum Dominum nostrum. Amen.

DOMINE Deus, qui propter peccata hominis semel submersisti mundum universum, octo hominibus solum exceptis, et postea singulari ductus misericordia, promisisti illum nunquam penitus submergendum; supplices te rogamus, etsi ob iniquitates nostras has pluviæ et aquarum inundationes sumus commeriti, digneris tamen nos ad veram pœnitentiam convertere, et talem nobis tribuere cœli serenitatem, ut terræ fructus tempore opportuno recipiamus, tuoque hoc supplicio admoniti, vitam nostram emendare discamus, atque ob tuam in nos clementiam tuas laudes et honores perpetuo celebrare valeamus. Per Jesum Christum Dominum nostrum. Amen.

DEUS Pater cœlestis, cujus beneficio pluvia decidit, terra fit frugifera, animantia crescunt, et pisces multiplicantur : intuere quæsumus afflictiones populi tui, et largire ut hæc penuria caritasque annonæ, quam nunc justissime propter peccata nostra patimur, bonitate misericordiæ tuæ vertatur in copiam et abundantiam. Hæc nobis, clementissime Pater, concede, propter amorem Jesu Christi Domini nostri, cui tecum et Sancto Spiritui laus, honor et gloria in omnem æternitatem. Amen.

OMNIPOTENS Deus, qui tempore Regis David, in ira tua, septuaginta millia hominum interfecisti, et tamen, tuæ misericordiæ memor, conservasti reliquos, miserere nostri miserorum, qui nunc variis morbis et gravi mortalitate affligimur, ut quemadmodum angelis tuis a supplicio inferendo cessare jussisti, ita quoque nunc et hanc pestem a nobis amovere digneris. Per Jesum Christum Dominum nostrum. Amen.

Deus, cui proprium est misereri semper et parcere, suscipe has precationes nostras, ut quos delictorum catena amisere constringit, clementia tuæ
misericordiæ libere absolvat
propter merita Jesu Christi,
nostri mediatoris unici.
Amen.