¶ Sing-ai singlthgang gushu-īdai gu, nung minister-gas a Gin Lā k’ālung-as t’ich kwunan līdadie lāgung. Waigien itan ashgai dlā ga k’ālung-as il shudie lāgung.

    Nung dā-ung-a gin dā-ung-a il isdaias sta ung-a stilths gien, gin lā il isdasdlu, althandang il kogundā-ashgang.  Ezekiel xviii. 27.
    Di dā-ung-as unsta lth shūgung, waigien gin dā-ung-a lth isdagīni di hang-gu isgīgung.   Psalm li. 3.
    Di dā-ung-as sta lth hung-ung ging-s’al, waigien lth di dā-ung-as wautliwon wau sta gīshu.   Psalm li. 9.
    Nung gudung-ai ai oduts Shanung-itlagadas kwoya-dagung-gung; O shanung-itlagadas, nung gudung-ai ai oduts isgien, nung gudung-ai sti ishin, gum ga dung gwou-ang-ashang.   Psalm li. 17.
    Gudung-ung ai lth otadāū, waigien gin dalung giandas ai tl gum otadang-ū, waigien lth Shalana Itlagidang gwī stilthu; il las gien, tla kalthshint il guduns altha, gum hawīdan il kalthi-yilthdagung-ung-gung, waigien yenki il k’ung-gudung-ung, waigien gum tl tlū-unshkotiē da il gudung-gung-ung-gung.   Joel ii. 13.
    Shalana itil Itlagida gin kalthshint guduns gien, ishin tl dā-ung-as da agung il ging k’eshgīdung, la ga talung gwou-gung-us k’ianan-a; waigien gum Shalana itil Itlagida kilth ging-ān talung edang-gun, king-go-gung itil ga il isdaian ai ishin gum talung istalang-gun.   Daniel ix. 9, 10.
    O Shalana, ging-kilisalang alth swonan lth di tlū-unshkota; kalthi-yildang alth di dung tlū-un-shko-tasdlu, di dung hīlūdāashang.   Jer. x. 24; Psalm vi. 1.
    Gūdung-ung lth stīlthdū, shagai kingdomgai dōng-as altha.   St. Matt. iii. 2.
    Lth kālthūashang, waigien Aung-ung ā lth kaidshang, waigien hin la lth shudāashang, Aung-a, shasi un di dāung-ung, waigien dung hang-gu ishin, waigien gum housen, Di git, hin di dung kyādie un di lā-ung-gung.   St. Luke xv. 18, 19.
    Gum lth gītsadang ging-kilisalung-ung, O Shalana; dung hang-gu gum nung swonshung-hun lā-ans altha.   Psalm cxliii. 2.
    Gum itil dāung-ang-ung talung shūsdlu, talung kodan agung odlougung, waigien gum yenkien gin et itil kālthi ā isang-gung; waigien itil dāung-as unsta talung shusdlu, itil dāung-as da k’eshgadē un yenkien il k’ung-gūdung-ung, waigien gum gin lā-ans wautliwon sta itil il tlishkwunagulthushang.   1 St. John i. 8, 9.

Di tou-ilung kwoyasi, Gin La kālung-as gin dāung-a gut ila et kwon talung isdas unsta talung shougai lang shugīgung-gung; waigien Shanung-itlagadas dugwia-euons itil Aung sha isis hang-gu ung-a talung salgai gum lā-ung-gung; hēt gūdung-ung alth isgien, gudung-ung stilthda alth ishin, unsta talung shougai tlou lāgung; Shanung-itlagadas lā-euons gien kungudung-as itil kalthshint gudung-ai una. Sha-nung-itlagadas hang-gu itil daung-as hēt gūdung-ung alth unsta talung shugigai lagung; gūdā talung isisdlu tlou, ging-an talung shougai wautleg lagung; Shanung-itlagadas gin la kwon itil ga isdas sing la ā killagai un gūdā talung ijung-us altha, la un talung yagudung-ai un ishin, il kil lā-euons talung gudung-ai un ishin, itil lthu isgien itil althandai un ishin gin las da la alth talung kianung-ai un ishin gūdā talung ijung. Althji alth gudung-ai shkwuna alth isgien, gushou hēt et alth ishin, aulthgahung-u las sha isis ā dalung wautliwon adlun isis di alth istgai da dalung alth lth kiānung-gung, hin di dla dalung shougai una;
 

Morning Prayer

Introductory sentences

¶ A GENERAL CONFESSION.

¶ Hin ishin il shougai lāgung,

    O Shalana, itil kwōt lth wau sta dāasu.
   Tl haada. Waigien itil helthi dung ā killā-ashang.
   Liplet. O Shanung-itlagadas, hawīdan lth itil kogundi.
   Tl haada. O Shalana, hawīdan lth itil da tlāad.

¶ Itan tl’ tljudgia-ōdsūs gien, hin nung lipletgas shougai lāgung,

    Nung Aung-as un lth yāgudung-u, Il Git ishin, nun Hants Las ishin;
   Tl haada. Tlidlūgai ging-ānū wētgai ishin ēdung, waigien hetligai gu waiging-ān et swonung-ashang. Amen.
   Liplet. Shalana ā lth kilā-ū.
   Tl haada. Shalana kyē ā talung kilā ashang.

¶ Itan adshi Psalmgai tl’ shudā-ashang ishin ā tl’ kudsoulthing-āgung; Easter-gas-dlu tlou Anthem kulat ā tl kudsu lagung.

VENITE, EXULTEMUS DOMINO. Psalm xcv.

    Ūtlā-ū, Shalana ā talung kutsudsun: nung alth itilgia kogunai dugwīas alth tlika talung gūlā-euondsun.
   Kilā alth la hang-gu talung istaldsun: psalm alth la alth itil gūdung-ai las talung kendadsun.
   Shalana Shanung-itlagada-euon isis altha: waigien tl’ itlagada wautliwon t’elg il king-ga-euon-gung.
   Tliga wautliwon hētligai gu isis il stlai ā ijung: waigien kwau-wong-ai dugwīgai ishin lagia ijung.
   Sīgai lagia ijung, waigien lā-ū tloulthaian: waigien tliga hyilas ishin stlang alth il ēlthgidaian.
   Ūtlā-ū, singlthgang talung gushūdsun, waigien talung tīgūsdlu-wodsun: Shalana itil tloulthalē hang-gu kwolong kudsung alth talung tl’a-u-dsun.
   Shalana ītil ītlagida isis altha, waigien lagia kwulth-kotajai haade itil isgien, lagia lumado-ē ishin itil ījung.
   Aiat, itil kil gudung-ai da dalung gudunsdlu lth gum gudung-ung k’otsadang-u: tliga dā-ung-as gu la dalung ging-kalthi-yilth-daian gien, ishin la dalung isdagudang-an sing-ai ging-ān-a;
   Tlistleu-on dalung aung-alung di isdagudung-gun gien, lthong-gwilie dīna tl keng-gundlu-a.
   Tuda tlāale stunshung adshi gudista kang-gai alth di gudung-ai stigun: tl haada gudung-ang alth gin odlu-a-ū ijung; tliku lth ēdung-us gum un tl’ unshidung-gun altha, waigien hin lth shugun,
   Gum agung shandsudie ai dīna dalung isdsa-ang-ashang, hin tla un di kalthi-yilthdagundlu lth shugun.
   Nung Aung-as un lth yāgudung-u, Il Git ishin, nun Hants Las ishin;
   Tlidlūgai ging-ān ū wētgai ishin ēdung, waigien hetligai gu waiging-ān et swonung-ashang. Amen.

¶ Itan tliku Church laugai shus ging-an, Psalmgai tl shudie lāgung. Waigien tuda shoshgu Psalmgai wautliwon isgien, Benedicite ishin, Benedictus ishin, Magnificat ishin, Nunc Dimittis ishin, tlan elthsdlu, hin tl shudie lagung,

    Nung Aung-as un lth yāgudung-u, Il Git ishin, nun Hants Las ishin;
   Tl haada. Tlidlūgai ging-ān ū wētgai ishin ēdung, waigien hetligai gu wai-ging-ān et swonung-ashang. Amen.

¶ Itan tliku Calendar-gai shus ging-an Old Testament-gai tich kwunan tl lididie lāgung, althji shantlanai un gum gin lā kaling a kulat isansdlu-a; waigien nun lididasdlu, tl wautliwon il kil gudung-ai un ilgiaang-ai lagung. Waigien wau dla Salang, Te Deum Ladamus hin kyas, ā shantlan wautliwon tl kudsue lāgung.
   Gin Lā Kalung-as tl lididie konast, Adshi chapter et lth lidida-ung-kashang, hin nung ministergas shus gien, tlan il lididasdlu, A-u tlan lididie elgung, hin ishin il shougai lāgung.
 

 TE DEUM LAUDAMUS.

    O Sha-nung-itlagadas, dung a talung kil-lā-gung: Salana dung is unsta talung shugung.
   Hēt-tligai shkwau-hun haade dung a singlthgang gushugung-gung; Aung et swonums.
   Angels wautliwon kwunan dung ga kiāgang-gung: shatligai isgien, gin dugwīa wautliwon ai isis ishin.
   Cherubin isgien Seraphin ishin dung ga kiāgang-gī-gung.
   Dung lāgung, Dung lāgung, Dung lāgung: Shalana Sabaoth un itlagadas;
   Shatligai isgien, hēt-tligai ishin, dung un-yāgudung-a-euons alth sta-ū-gagung.
   Ga apostlesgasgai un-yāgudung-as gu-dung althan dung ā kilāgung.
   Ga prophetgasgai las gudung-ai tladsgas gu-dung-althan dung ā kilāgung.
   Ga martyr-gasgai gudung-ai tladsgas gu-dung-althan dung ā kilāgung.
   Church haade las hētligai ashkwau-hun gūt dung unsta shugung.
   Nung Aung-as un-yagudung-a swonuns dung ijung;
Dung Git yiki swonshuns ga gutgadagung;
   Hants Las ishin tl gudung-ai wau ging-shashgitlē ijung;
   O Christ, king yun-yāgudung-ā dung ijung.
   Nung Aung-as Git et swonunts dung ijung.
   Tlistleu-on tl haada kogundie da dung gudang-an-dlu, gum nung dlians agung dulthgidie ga dung gwou-ang-an.
   Tlistleu-on k’otal waugung-ai sta dung gwī kā-alandlu, dung ga yetdasgai wautliwon un shagai kingdomgai dung da-ostlaian.
   Itil ging-kilisalung-ai un dung kātlā-ases talung yetdang.
   Gitsadalung ai-ung kwoyas alth dung dah-gan da dung tlāadai da althji alth dung alth talung kiānung-gung.
   Un-yāgudung-ā swonunts gu lth ga lasgai alth ung-a tl-k’wai-indi.
   O Shalana, tl haada lth ung-a kogundi, waigien lth ung-a tl’ tloulth-ligulth.
   Tl’an lth itlāgada, waigien lth shi ga tl’ isdaswonung.
Sing wautliwon dung ā talung kilāgung.
   Waigien dung kyē ā singlthgang talung gushu-swon-ung-gung.
   O Shalana, aiat gin dā-ung-a sta duman itil dung kang-gai da dung alth talung kiānung-gung.
   O Shalana, itil kalthshint lth gudung: itil kalthshint lth gudung.
   O Shalana, ak’won lth dung k’ung-gudung-as itil ing-gu ung-a isdi: dung talung yetdas ging-ān-a.
   O Shalana, dung lth yetdagun: ak’won lth gum di gudung-ai lthkwidadang.

¶ Itan New Testament-gai tich ishin tl lididie lāgung. Waigien wau dla adshi psalmgai ā tl kudsue lagung.

JUBILATE DEO. Psalm c.

   Shalana ā lth tlika gwulā-u, tligai wautliwon; gudung-ai lā alth Shalana un lth lthong-gwilu, waigien k’utsou alth la hang-gu istlā-u.
   Shalana Shanung-iotlagadas is un lth agung ūnshidu: lā-u itil tloulthaian, waigien gum talung kodan agung tloultha-ang-an; lagia haadgai itil isgien, lagia kwulth-kotajai lumadogai ishin itil ijung.
   Kilā alth k’eu-e ā lang-a istalu, waigien nai ai lth kilā alth lang-a isdsa-u: la ā lth kilā-u, waigien il kyē ā lth kilā-u.
   Shalana k’ung-gudung-as altha, k’ung-gudung-ie lang-a et swonung-gung: waigien yenki gin ets gusilthan lang-a tl giandagung.
   Nung Aung-as un lth yāgudung-u, Il Git ishin, nung Hants Las ishin;
   Tlidlugai ging-ān-u wētgai ishin edung, waigien hētligai gu waiging-ān et swonung-ashang. Amen.

¶ Itan nung minister-gas isgien, tl haada ishin tljugiāsgien, Apostles’ Creed-gai ā tl’ kutsu-e lāgung, ishin tl shudalthing-āgung.
 

¶ Althji dlā, kwolōng kudsung-alth tl’ tl’ou-ōdsūs gien, adshi singlthgang gushue tl shudie lagung; waigien nung minister-gas hin kwunan shu-tlagang-ashang,

Ak’won lth Shalana kwulthgang isdu.
Tl haada. Waigien dung hants alth ishin.
Minister. Singlthgang talung gushudsun.

Shalana, itil kalthshint lth gudung.
Christ, itil kalthshint lth gudung.
Shalana, itil kalthshint lth gudung.

¶ Itan nung minister-gas isgien, tl haada ishin, Shalana gia singlthgang gushue kwunan shudie lagung.
 

¶ Itan nung lipletgas giāas gien, hin il shougai lalung,

    O Shalana, dung k’ung-gudung-as lth ung-a itil kendi.
   Tl haada. Waigien gin alth tl koguns itil ga ung-a isdi.
   Liplet. O Shalana, Queen lth kogundi.
   Tl haada. Waigien itil kalthshint lth gudung-ang-a itil kil gudung, tlistleu-on dung ga talung kiagansdlu-a.
   Liplet. Ministers lth gin lā ung-a giandadi.
   Tli haada. Waigien tl haada dung kenstas lth tlika tligula.
   Liplet. O Shalana, tl haada lth ung-a kogundi.
   Tl haada. Waigien dung ga yetdasgai wautliwon lth gudung-ai tl-lā.
   Liplet. O Shalana, itil gia taim-gai gut lth gudung-ai dlai-a itil ga isdi.
   Tl haada. Gum nung k’ulat itil kalthkāan ailthdā-ansī altha, tlan da swonan, O Shanung-itlagadas.
   Liplet. O Shanung-itlaqgadas, itil kalthi ā itil gu-dung-ai isis lth tlishkwuni.
   Tl haada. Waigien gum Hants-ung Las itil sta lth isdang.

¶ Itan collect lthonulth tl shudie lagung; Communion-gai un nung kalung-as tl shuda-tlagang-ashang; waudla gudung-ai dlaia sing isgien, dugwia sing ishin tl gushue lagung. Waigien sing-ai tl church-gas kialthk tl wautliwon kwolong kudsung alth tlous gien, ashgai sing tl gushue lagung.
 

O Sha-nung-itlagadas, gudung-ai dlaia dung sta ijung-gung, waigien tl haada gudung-ai dlaias dung kwoyadagung-gung; dung un itil unshits alth itil henung-a-swonung-gung, dung-gia lthong-gwilie ga isdasfai yenkien akāanāgung; tlis-tleuon itil telg tl kens itil tilthwondsdlu lth, tla sta duman itil keng, dung gitsadalung gudung-ai hēt ets itil isis altha; duman itil dung keng-ases yenkien talung yetdasdlu, itil hanltha ga estgai dugwīgai ga gum itil lthwauga-ang-ai una, Jesus Christ itil Shalana dugwias agun-an-a. Amen.
 

O Shalana, itil Aung sha isis, nung Dugwīa-euons waigien nung Itlagada et swonuns, wētgai keu duman itil dung keng-gun; Aiat ishin lth gyang dugwīgai alth duman itil keng; itil da lth tlaad, adshi shantlanai gut gum gin dāung-a gwī itil dl-duldung-ungs gien, ishin tliku agung lthanstla et-hun gum talung andung-ung-ai una; gin talung isdas wautliwon un dung itlagadas gien, gin lā dung hang-gu talung isdagīgai una; Jesus Christ til Shalana agunan-a. Amen.

¶ Kudsoulē-alung anā isisdlu, salan ā itan tl kudsūe lāgung.

¶ Itan ashgai singlthgang gushue tlēlth wau dla tl shudie lagung; Litany-gai tl shudasdlu tlou, otgwaugai stung swonan tl shudie lagung.
 

 Nung Queen-gas sing gushue ā ijung.

O Shalana itil Aung sha isis, sha nung ets waigien nung Dugwīa-euons, ga king-gasgai un dung King-gagung, ga shalanasgasgai un dun Shalanagagung, ga prince-gasgai un tlan da swonan itlagadagung, waigien dung-gia aulthgahung-we las sta hēt-tligai hu tl naans wautliwon dung keng-gung-gung; Itil Itilgudsada lā-euon Queen VICTORIA duman dumng kang-gai da yenki gudung-ung alth dung alth talung kianung-gung; dung Hants Las gia ligai alth lth il stāūgāda, waigien tliku dung guduns ging-anil waigīs gien, dung-gia keu-e gut ishin il kāgigai una; sha gin lā ia lth il gianda-kwonda; althin lth laga isda ang-a il tla-ginlthing-a, tlāa il hēnung-gai una; la lth tl-dugwīa, waigien la telg tl kens wautliwon il hīludie una; waigien tlistleu-on il kotulthsdlu, gudung-ai lā et swonung isgien tlika gwūlā ishin il isdie una: Jesus Christ itil Shalana agunana. Amen.
 

Sha-nung-itlagadas Dugwia-euons, gin lā wautliwon dung sta ijung-gung; Albert Edward Prince of Wales isgien, Princess of Wales ishin, nung queen-gas tou-alung wautliwon ishin, dung tl-ligulai da gudung-ai hēt et alth dung alth talung kiān-ung-gung; Hants-ung Las lth tl giandada; sha gin lā dang-a isis alth lth tl tla-ginlthing-a; gin lā wautliwon alth tl gudung-ai tl-lā; waigien kindgom et swonuns ā lth ung-a tla isdang; Jesus Christ itil Shalana agunana. Amen.
 

Nung Dugwīa-euons waigien nung Uitlagada hēnung-a swonuns; tlan da swonan gin unkul-dung-a euonda isdagung-gung; itil un ga bishop-gas isgien, ga minister-gasgai ishin, Church haade wautliwon tla ga dung isdas ishin ing-gu lth dung Hants Las althins het ga isda; waigien kulang-wīduns ging-an lth tl tloulth-ligulai etgīdi, yenkien dung gudaku tl etgai una. Ging-an lth wau, O Shalana, Jesus Christ itil kalthkāan gushoulēgas isgien stagīdlēgas ishin nyagudung-as agunana. Amen.
 

St. Chrysostom gia singlthgang gushu ā ijung.

Tuda shoshgu gut hin sing-ai singlthgang gushuē tlan elgung.