The Book of Common Prayer
United States England Scotland Ireland Wales Canada World

    A Zimshian Version of Portions of the Book of Common Prayer (1882)

 

WILAWAL
GIGĪANGWĀKLTHUM HŌBIL

a da tkānī sha a tkash gaulthit.

Wil hī shidāt ga gigīangwaklthum gunklāg gut ada dumt līazak da Minister a dum wī amkou dit a ligi gūal ligi alish ga da Verses a Shaōnshk gish ga Shimoigiat ga lakāga gut in yāk a dit. Ada dum wul hou da da gau damt ga da da n’tkalān Verses.

    Zida ltha zunsh yeltk a da hadak ga da giat na hadak ga dit gu na wāl dit, ada wāl da da gau hoigiak a dit dilth gup wilalaut, ada dumt dimaut ga na auzun dit a gundidōlshit. Ezekiel xviii. 27.
    Nēunō na wul gishgīshūt, ada lthāwila shkāhoksh ga na hadak gūt a hazāklth gūt. Psalm li. 3.
    Yū zant a na hadak gūt, ada ma shalthīl tkānī na gishgīshum wālūt. Psalm li. 9.
    Na ōmgauksh ga Shimoigiat ga lakāga gwashum haiikut: gwashum giluksha-aiitikshum gaud O Shimoigiat altha ma dum shkāghuit. Psalm li. 17.
    Bakbēgul gagaudshimt, ada al aina na wishwash a shimt, ada yilyēltk ga shim ash ga Mīyān ga na Shimoigiat ga shimt; āwul ama gauid ga, ada hūkgumgaud ga, laltgum lthūnti ga, ada wīlēksh ga na ama giat, ada gāghunsh ga hadak ga ga. Joel ii. 13.
    Mīyān ga Shimoigiat gum ga nha wāl da da gumgaudit dilth shalthilukshat, zō ltha libilt wālt gum gat nīat ga; ada althga dup wāunsh ga amhoush ga Mīyān ga Shimoigiat gum ga, a dum wālukshum gish ga na wilaigiaut ga, gu ltha dau-i dada hazazāklth gum. Daniel ix. 9, 10.
    O Mīyān shita gaudī, ada ma am dapt, ain a da lthūndunt, op ma za zīabuli. Jeremiah x. 24.
    Gilukshat-aiitiksha shim, āwul ltha gaiyim gwai shga na kingdomsh ga lakāga. Matthew iii. 2.
    Dum haldumbānū ada n’dum gau Nagwādū, ada dum hou-i gish niat, Nagwādi, ltha hadaki gish ga lakāga dilth zant, ada althga gik tkalāmi alth dumt kshlthgōlthunīa gwan. Luke xv. 18, 19.
    Gilau ma dap a tkalwālimlth O Mīyān, āwul althgat nālth didōlsh a da zant gu za wha hadak gut. Psalm cxliii., 2.
    Ami houm da wha hadadak gumt ada lip giluksh yakyāmuk shimt; ada althga hoksh gulth shimhou a gum; ada al amī dup nēum na hadadak gumt, shimhou ga ada hoigiakt ga, a dumt shalthīl na hadadak gumt, dilth dumt shikshakshinumt a tkānī wha hoigiak a dit. 1 John i. 8, 9.

Shipshīebunum waikia haiizum ga num inkshgegedum wul hakhoksh ga dida Shaonshk gishga Shimoigiat ga lakāga dup dum nēun na whamat gum hadadak gumt, ada dup dum wha līyūāda dit ash ga hazāklth gish ga zalsh ga Tkāgutgiatgum Shimoigiat ga Nagwādum ga lakāga; ada al dup dum yagai nēun dit a mauakum, giluksh-aiitiksh dilth hūkwāunshgum gaudit; dup dum wul wā dum gunshālthilk a dit, ash ga na whati shābām āmt ga dilth na gumgaud ga. Ada zō gup am lthāwila dup dum da makmauakum nēun na hadadakum gish ga hazāklth gish ga Shimoigiat, ada yagai am gup zhū gum wālumt, zida shgait yām a dum doiyigumty ash ga wīlēkshum kshtām gu dokum gish ga gāanont ga; dilth dup dum tkalam’m gwanīazunsh ga na wīlēkshum amadālgush gum gish niat; dilth dup dum naknōsh ga shim n’thlōdukshum algiakt ga; gunlth dup dum gwanō gau gu nhahagaum tkamaut dilth auzunt. Nī nī gun na gwanō da da gwashim shkabū hakhoksh ga dīya gwa, ma dum shim hoksh gūt, a shikshakshgum gagaudit dilth makmauakum gāamhout ash ga āwāsh ga na halīdhāsh ga na āmsh ga lakāga.
 

 Evening Prayer

lōyāka houyū;

Shgait nēunshk gu dum hou tkānī giat at lōyāka Minister; tkānī da dum klthumgulgaiishuk ga dit.

    Tkāgutgiatk ada Hūkgumgaudum Nagwāt ltha dup kudaksh ada dup zunsh libagait wāluksh a na gaiinunt hoigiakum gwātgum mati. Ltha gul zhu dup yāk a na shanāshk dilth nhahagaum lip gagaudumi. Ltha dup bilau n’lthōdukshum yaoulthimgush gunt.
    Ltha althga walumi gau n’dum al wālumi: ada al ltha yagai wālum da gau, n’dum al wha wālum: gun althga shgūilth gutgiat a gum. Ada alt nūngunt O Mīyān gumgaudun a gum hākkum hadadakunumi.
    Gumgaudun ash dup nīat O Shimoigiat gut’in nēun na gishgīsh dit. Gikmakshun a lūgilukshat aiitikshum gagaud a dit, nīwālda na gup ēshgunt, malthk ga da da giatit ash Jesus Christ Mīyānum ga. Ada wān O Hūkgumgaudum Nagwāt ash nīat gulth gunwān, wāt ga da da gīoun, dum gup lthāwila ām’m, hoigiaka, dilth shakshgum dildōlshumt; dum wul lthaut ga n’lthōdukshum wānt. Amen.

Absolutiont dum gaulu hou Priest a dum haiitk ga dit, ashi klthumgulgaiishuk ga giatit.

Tkāgutgiatgum Shimoigiat, Nagwātsh ga Mīyānum gat Jesus Christ, gu wha hashaga da da dum zak a hadak ga da giat; yagai al dumt zunsh yēltk ga na hadak ga dit, ada dum didōlsh dit adat ginamsh ga gutgiatk ga dilth yaoulthumgush gut gish ga na Ministers gut ga, a dum algiakt ga dilth dumt malthit gish ga gilukshat aiitikshum ga-gaaudum zaptk ga, a dum shalthīlt ga hadadak ga dit. Nīat ga t’in shalthil na hadadak ga tkānīsh dup nīat gu shimhoum gilukshat-aiitiksha dit, dilth lugwul shimhoudikshit gish ga Amt ga na Mālsh gut ga. Nī nī gun shūun za gup dup gwanō dish nīat dumt ginam da da dgum shimhoum gilukshaiitikshum gaudit, dilth Am da Haiikut ga, dumt wul shalthgwushghūut ga gau hūwālumī gīoun; ada dum gup wul hāzush lthāwila shikshaksh gum dilth dum ām na dildōlshumt; dup dum wul wāsh ga whati shābām gun lūamagaud ga, a za lthā shābāt, āwult Jesus Christ Mīyānum dum gunwāl dit.

Ada dum wul klthumgulgaiishuk ga Minister, ada dum hou da da gigīangwāklth shga Mīyān ga, a dumt alūdāun amhou dit; a dum di klthumgulgaiishuk ga giatit ada dum dīt shila hou dit, a nī nī gwa dilth gup ligi n’da wul hoiik ga dit a Divine Service.
 

Confession & Absolution

Nagwādum gu zim lakāga n’lthōduksha na wānt. Am dum goiduksha na kingdom gunt. Shagaud-gun dum wāl halizokum nīwālda zim lakāga. Ginamlth a gum a sha gwa ām da shkabū wunēumt. Ada ma shalthīl na hadadakumi nīwālda dup wila shalthīl na hadak ga dī da gum. Ada gilau ma za dadēunt gum shpugait gun shpālt gaudit. Ada ma al dīlamaud gum a hadak gut. Awul nūngun nha wāl da da kingdom, dilth gutgiatit, dilth n’lthaumsh gut: ada dum lthā wila wāl dit. Amen.

Ada dum gik wul hou dit.

    O Mīyān gāga gagwultha gumi.
    Dīlamak. Ada dumt gwanīazun da zumak gum na ama-dālak shunt.
    Priest. O Shimoigiat dīun a ma dilamaud gum.
    Dīlamak. O Mīyān dīun a ma lthimaum’m.

Gwai dum wul shugait-maksh ga dit, ada dum hou Priest.

    Dum shugait n’lthaumsh ga ga Nagwāt ga dilth Lthgōlth ga ga, gunlth Am da Haiikut.
    Dīlamak. Na guni wila wālt gish ga wilhīshidhāt ga ga, gik wāldi gīoun, ada gup lthā dum wila wāl da wugait althga dum shābāt. Amen.
    Priest. Āma-daluksh ga Mīyān ga.
    Dīlamak. Dum ama-dāluksha ga na wāsh ga Mīyān.

Ada dum wul hou dī ligi dum līamī dada Psalmds nīwālda wila ama wān dit.

Ada wul gūal da Lesson wāt ga da da Lthā Testament nīwālda na hou dit.

N’tkalān dit ada wul Magnificat (ligi līamish ga gumgaudkshim Whagulgiat Mary) a Zimshīān nīwālda gwa.

Magnificat. St. Luke i. 46.

    46. Lthaud ash ga n’auzuni ga Mīyān ga:
    47. Ada lthshgwushgu na haiiki ga Shimoigiat Hamaut gi ga.
    48. Awul lthat tikinīsh ga na mauk gash ga tkalwālimlth gut ga: Awul nī wāt ga da da gīoun, tkānī wul-shishawa’nt ga giat dum in shawātū daltht gumgautk.
    49. Awul nīat ga gu gutgiatit ga lthat ’in lthautut: ada n’lthōduksh ga wāt ga.
    50. Ada gumgaud gish ga nakpizuuut gish niat: a tkānī wul-shishawa’nt ga giatit.
    51. Gwanīazunt ga gut giat gish ga anont ga: lthat bhōolsh ga ashazukshit ga a na wilwāluksh ga gagaud ga.
    52. Lthat tkakshwan dit ga gutladit ga ash ga na alwul-līwānt ga: adat sha-lakash ga makmauak gut ga.
    53. Sha-l-zaidat ga lhūgdīdīt ga a ām da gaut: ada alt gulamīiansh ga amagawālt ga.
    54. Wult āabuksh ga na gumgaud ga gunt lthimaumsh ga tkalwālimlth gut gut Israel: n’ltha gup ēsh gut gish ga na ganagwāt gumt dup Abrahām dilth klthgūut ga ltha dum wilawāl.
    Dum shugait n’lthaumsh ga ga Nagwāt ga, dilth Lthgōlth ga ga, gunlth Ām da Haiikut.
    Na guni wilawālt gish ga wilhī shidhāt ga ga, gik waldi gioun, ada gup ltha dum wila wal da wugait althga dum shabat. Amen.
 

Lord's Prayer

Ligi Psalm gwa.

Cantate Domino. Psalm xcviii.

    1. O Līamī nash Jehovah ga a shū līamit, āwul wālt gish ga lūshānālth gum gau ga: nāshim-yāōut ga, ada n’lthōdukshum anont ga gun lip gāgutgiatk ga.
    2. Lthā wilaiiyinsh Jehovah ga na gun-dimaudumsh gut ga: lthat alo gwanīazunsh ga hoigiakum wāld ga a guzilzālsh ga t’tin whawilait ga.
    3. Ltha āabuk dit ga na gumgaud ga, dilth na shimhout gish ga wālpsh Israel: ada tkānī wilgaaka halizoka lthat’in nī na gun-dimaudumsh gish ga Shimoigiat ga lakāga.
    4. Shugait-haun ash Jehovah tkānī lakyōbit: gākun ada līamīn, wīamhouun ada ma amadālukt.
    5. Ama-dāluksh Jehovah a lak hālīamīt kunaut: lak hālīamīt alth amhoun ama-dālgushgun.
    6. Hoiya-hāalgiakut, amhoum hāalgiakut: wiamlahou dan ash ga hazāklth gish Jehovah King ga.
    7. Am dum shugait-hau lakakshit, dilth tkānī lūwāldit: halizokut dilth tkānī lēwāldit.
    8. Am dum dhāshk ga gulaakshit, ām dum shugait ghulth-shgwushguada shikshganīsht hazaklth gish Jehovah: āwul ltha gugwaniyāt ga dum dapa halizokut, dumt hoigiakum dapa halizokut dilth giatit a shimhout.
    Dum shugait n’lthaumsh ga ga Nagwāt ga, dilth Lthgōlth ga ga, gunlth Ām da Haiikut.
    Na guni wilawālt gish ga wilhī shidhāt ga ga, gik waldi gioun, ada gup ltha dum wila wal da wugait althga dum shabat. Amen.

Ada dum gūal da Lesson a Shū Testament nīwālda na hou dit. N’tkalān dit ada wul Nunc Dimittis (ligi līamish Simeon) a Zimshīān nīwālda gwa.

Nunc Dimittis. St. Luke ii. 29.

    29. Mīyān shūun a ma anauk za giakshim daoultha tkalwālimlth gunt: nīwālda na lip houunt.
    30. Awul lthat nīsh da zālū: na gun-dimaudumsh gunt.
    31. Gu lthā gwildum-gouunt hazazaklth ga tkānī giatit.
    32. Goiba dumt’in sha goiba wilzokzokukt: dilth dum n’lthaumsh ga n’zapunt Israel.
    Dum shugait n’lthaumsh ga ga Nagwāt ga, dilth Lthgōlth ga ga, gunlth Ām da Haiikut.
    Na guni wilawālt gish ga wilhī shidhāt ga ga, gik waldi gioun, ada gup ltha dum wila wal da wugait althga dum shabat. Amen.

Ligi Psalm gwa.

Deus Misereatur. Psalm lxvii.

    1. Gumgautk ga Shimoigiat ga lakāga a gum, ada dumt gumgautk gum ga: ada dumt sha gugwaluksh ga zālt ga gum.
    2. Dum wul wilaiintk ga wilaigīaunt a lak halizokut: na amawālum gun dimaudumsh gunt a tkānī wilzokzokut.
    3. Am dumt ama-dālgun giatit O Shimoigiat: am tkānī giat a dumt’ in ama-dālgunt.
    4. Am dum gulthshkwushghūada wilzokzoka ada dum wīamlahou da dit: āwul ma dum hoigiakum dapa giatit, ada ma dum dadēuntk ga wilzokzokut a lak halizokut.
    5. Am dumt ama-dālgun giatit O Shimoigiat: am tkānī giat a dumt ‘in ama-dālgunt.
    6. Dum dagoiduksha yōb a na gian dit: ada Shimoigiat ga lakāga lip Shimoigiat gum ga dumt ’in shuulgunt ga.
    7. Dumt gumgautk ga num ga Shimoigiat ga lakāga: ada tkānī wilgāk ga yā halizokut dumt ’in shuulgunt ga.
    Dum shugait n’lthaumsh ga ga Nagwāt ga, dilth Lthgōlth ga ga, gunlth Ām da Haiikut.
    Na guni wilawālt gish ga wilhī shidhāt ga ga, gik waldi gioun, ada gup ltha dum wila wal da wugait althga dum shabat. Amen.
 

 

Ada dum wul līamī, ligi dum houdi da Creed a Apostles, gu Minister dilth giatit a dum maksh ga dit.

    Shimhoudikshanū gish ga gup gault ga Shimoigiat ga: Nagwāt ga: Tkagutgiatk ga ga: Inzabsh ga lakaga dilth halizokum: adat Jesus Christ ga gupgaulu Lthgōlth gut ga, Mīyānum ga: gu na goidukshit gish ga Am da Haiikt ga: kshlaklak gish ga whagulgiatk gish Mary: hāgunsh dup Pontius Pilate: tkaldāpgunt gish ga lak kuzāk, ada zakt ga, ada wākshit ga; tikidaoulth gish ga hābsh ga dhūit ga; kwun shā diga sha ga ada gik ginīat gut ga wātgut gish ga shpugait dhūit ga; ada mandāoulth gish ga zim lakāga; ada dhāt gish ga na shimyounsh ga anonsh ga Shimoigiat ga, Nagwāt ga, Tkāgutgiat ga ga. Dum gik goiduksh ga dum wātgut gish ga kwash ga a dunt dapsh ga dildōlshit ga dilth dhūit ga.
    Shimhoudikshanū da Am da Haiikut: dilth ām da shugait gūilum Churchut: dilth n’shilawāl da umām dit: dilth shalthīlth ga na hadadak gut: dilth dum gik nhanīada tkamaud: dilth aiegedum gundidōlshit. Amen.

Zida ltha goudit ada wul nīnī gigīangwāklth a gwa, tkānī da dum na da makmaugum gālthumgulgaiishu ga dit, ada dum kshkaugum hou dit a wīam hou dit.

Dum hoksh ga ga Mīyān ga gwashim.

Dilamak. Dilth na di haiikunt.
Minister. Shuun za gigīangwāklthum.
Mīyān gumgaudun a gum.
Gīat. Christ gumgaudun a gum.
Mīyān gumgaudun a gum.

 Ada dum wul hou Minister dilth giatit ash ga gigīangwāklthsh ga Mīyān ga a dum wīamlahou da dit.
 

Apostles' Creed

Nagwādum gu zim lakāga: n’lthōduksha na wānt. Am dum goiduksha na kingdom gunt. Shagaud-gun dum wāl halizokum, nīwālda zin lakāga. Ginamlth a gum a sha gwa ām di shkabū wunēumt. Ada ma shalthīl na hadadakumi, nīwālda dup wila shalthil na hadak ga di da gum. Ada gilau ma za dadēuntk gum shpugait gunshpālt gaudit. Ada ma al dīlamaud gum a hadak gut. Amen.

Ada dum wul haiitk ga Minister a dum hou dit.

    O Mīyān gwunīazun na gumgaudint a lakomt.
    Dīlamak. Ada ma ginam na gunlīmaut gunt a gum.
    Priest. O Mīyān dimaut gish Queen.
    Dīlamak. Ada gumgaudun naknūm a dup da hūit gunt.
    Priest. Wishwāshun na Ministers gunt a hoigiak a dit.
    Dīlamak. Ada ma sha galthgwushgū da na kshnaknīshgum zāpunt.
    Priest. O Mīyān dilamaut ga n’zapunt.
    Dīlamak. Ada ma gumgaudk ga na giant.
    Priest. Ginamlth gungiaksh a ashīt nūngumi O Mīyān.
    Dīlamak. Awul althgat gik nā za t’in lthānum amuksha nūngunt O Shimoigiat.
    Priest. O Shimoigiat lūshikshakshun gagaudumi.
    Dīlamak. Ada gilau ma za kbagā n’lthōduk shim Haiikunt a gum.

Ada dumt wul yāka da gwilīada Collects; kshgauga da dash ga shā ga; ada wul naanīyada dum gungiakshit; ada na gwilī da dum in lthimaum da tkānī gun-ashtīwālt, nīwālda t’in yāka gwa; gu gūpul da Collects lthāwila dum hoiika dada tkānī gigīangwāklthum hōbilt althga dum shilukshgiat gut.
 

Lord's Prayer

Naanīyā Collect a gigīangwāklthum hōbil.

O Shimoigiat gu wul wāt ga gungoiduksha tkānī shakshgum nahagaumt, tkānī am’m shagaudgut, dilth tkānī hoigiakum halthālshit, ginam gun-lū-giakshit a tkalhukwālimlth gunt gu lthgukshin halizokum dumt ginam dit; dum wul shimgiat wāluksha gagaudumt a dup dum wāan na yaoulthgumgush gunt, dilth gik wult nūngun t’in lthānum da dum wul wha libāshum da nibulthgaush gumt dum gun shkwait-gum giakshum dildōlshumt; āwult Jesus Christ Halamaut gum ga, dum gun wāl dit. Amen.
 

2nd Collect at Evening Prayer

Ni gwilī Collect a dum in lthimaum da tkānī gun ashtīwālt.

Sha goiba na shkēatk gumt gwunōyim da gwan O Mīyān; ada na wīlēkshum gumgaudunlth ma gun lthānum a tkānī gun ashtīwālt a atk a gwa; āwul na shīebunsh ga gaulū Lthgōlth gun Halamaut gumt Jesus Christ, dum gun wal dit. Amen.

Gwai dum yā ga līamit.
 

3rd Collect, for Aid against all Perils

Gigīangwaklth a dum wul ām wila wālsh Queen.

O Mīyān Nagwādum ga lakāga, lakā ada gutgiat King gulth Kings, Mīyānlth gāmīyāntk, t’in gup gaulū Algiak gulth Princes, gu t’in nī tkānī wāl diyā lak halizokut; shim shishgwungātiksh-a-num da gwan, ma dum ama-giatum nī ama Mīyānum Shigitumnā gumt Queen Victoria, ada nī ma ho’nt ā na ām Ām da Haiikunt, dum wul lthawila hukwaiyauksh ga da da na shigaud gunt, ada dumt lūyāka wilaigiaunt. Wīlēkshlth ma sha-ama wālt a na kshaginamum lakānt; ginamlth ash nīat dum nagum didōlsh dit a gutgiatit dilth dum ām wilawāl dit. Sha gutgetlth a dum gākshtā da da tkānī nibiltkaushk ga dit; ada zida lthā shābā gun-didōlsh a gwa, dumt wā aiegedum gun lthgwushghūit dilth gun lūama gaudit: āwult Jesus Christ. Mīyānum dum gun wāl dit. Amen.
 

Prayer for the Queen's Majesty

Gigīangwāklth a da Royal Family.

Tkagutgiatkum Shimoigiat wulukshawāt gulth tkānīlth ām, damakmaukum gwanōyum da gwan ma dum gumgaud gish Albert Edward, Prince of Wales, Princess of Wales, dilth gup tkānī wulnadalth dit, ada dilth nī Governor-General. Hanhonlth a Ām da Haiikunt; sha amagāwālth a na ām’m lakānt: gumgaud gulth a tkānī gun lū-ama-gaudit: ada ma duwitwā da da aiegedum kingdomt, āwult Jesus Christ Mīyānum ga dum gun wāl dit. Amen.
 

Prayer for the Royal Family

Gigīan a da Clergy dilt giatit.

Tkāgutgiatkum Aiegedum Shimoigiat gu t’in gaulū halthāl wīlēkshum n’lūshanālthashk gut; tikihaiizlth ā lakau Bishops gumt dilth Ministersit, dilth tkānī wil shugait-yikyā-giatit gu lip habilbaul da dit, na gutgiatum Haiikut a na āmint; dilth dumt wul shimhoum sha lthgwushghūun gun lthā ma wila tikiya’an na gumgauunt a lakau dit: ginam gwa O Mīyān dum wul lthaut ga t’in Awulmak dumt dilth Lākakyāt gun gut Jesus Christ ga. Amen.
 

Prayer for Clergy & People

Gigiangwaklth Saint Chrysostom.

Tkāgutgiatkum Shimoigiat ga lthat’in ginam ām da gum, a shugait guil gagaudumt dup dum gigīanak gunt gīoun; ada gup ēshgun, zida shugait wan dup kudōl dit ligi gwilaun dit a na wān gunwāl dit, dum ginanum a gwunōidit. Wāunlth gīoun O Mīyān n’nhahagaum dilth na gigīangwāklth a tkalhūkwālimlth gunt gu dum yagai gā-ām da dish dupnīat, ginamlth a gum a gwai halizok dup dum wilai na shimhouunt, dilth dum aiegedum dildōlshum gish ga halizokum gish ga gaugum ga. Amen.

2 Corinthians xiii.

Na āmsh ga Mīyān gut Jesus Christ, dilth na shīebunsh gish ga Shimoigiat ga lakāga, dilth na shila wālumsh gish ga Am da Haiik ga dum gup lthāwila hoksh ga da da gum.

Gwai wul Shābā wila giant ga gigīangwāklthum gunklāg gut a tkash gaulthit.
 


Pryaer of St. Chrysostom

Collect da da tkānī lip wila giatit dum hoiyik a da wha hoiyik a Litany.

    O Shoimoigiat ga lakāga nat Inzap a dilth t’in habilbaul tkānī giatit da makmaukum dup gwanō da da gwan a zō tkānī wul lukshgigiat a giatit dulth zō whamatkgum wilawal da giatit; a ma dum anauk ma dum wilaiiyin wilaigīaunt ash dup nīat, dilth na gun dimaudumsh gunt a tkānī wulzokzokut.
    Yagai shimnī dup gigīanak gunt ā dum wul ām wilawāl shugaitgūilum Churchut; dum wul ama dēuntksh a dit, dilth dumt algiak a da Am da na Haiikunt, a tkānīsh nā gu t’in malth ada lip giluksh shūwāt ga da da Christians, dum dadēuntksh a da da gaiinum shimhout, ada dumt dakiyāogwa shimhoudikshit, a shugait guilum gagaudit; a dum shugait n’dadaklth ga da da gungiakshit, dilth dum shimhoigiakum didōlsh dit;
    Kshtalān dat dup tkalmaga da da gwan, āwul na ām’m nagwādun tkānīsh na lū wunwantgum gagaud a dit ligi hākk ga dit, a gaudit, tkamau dit ligi wilawāl dit (shimnīsh dup nā nhahagaum da da na gigīangwāklthumt) a man dum ānauk a ma dum shagundaoulth a gagaudit ada ma lthimaumt a ligi lip gau n’na hākk ga dit, dilth ma dum ginam dish dup niat dīkgagaud dit a nish shpugait gun hākk ga dit dilth dum yagai gaām dum wul kshahākklth ga da da tkānī na gun wunwantgum gagaudit. Ada dup gwanō gwa āwult Jesus Christ ga dum gun wāl dit. Amen.

Prayer for all Conditions of Men

 

[Gwai dum houdi zida gup nhahagaum di alth na gigīangwāklth a Congregation.]

 

 

 

Shugait-doiyuk.

Tkagutgiatgum Shimoigiat, Nagwātlth tkānīlth gumgaud, nūngum wha tkal umam’m tkalhukwālimlth gun t’in shim da makmauk ga dup doiyukshun wātga da gagaudum āwul tkānī na āmint dilth na shīebunshgum amagiatun da gum dilth tkānī giatit (shimnīsh dup nīat gu nhahagaum da da dumt doiyukshum awul na shū gumgaudun ginamun dish dup nīat). Dup gumgaud gunt a ma wul zapumt, ada ma wul habilbauldum, dilth tkānī ām’m gau ya ashi dildōlshdumi; ada al gāakshlakā da da tkānī dit, awul na gādaaklthgum shiebunshgun a ma wul kshagigīaga halizokaai a nīnīsh ga Mīyānum Jesus Christ: dilth nīnīat’in lthimaum’m da āmt, dilth wul na bōish ga di gish ga na hoishk gish ga lakāga. Ada dup gik gwanō da da gwan, dup dum gialūksh a tkānī na gumgaudun a dup dum doiyikshunt; dilth dup dum wul gwaniazun dup amadāl gunt, a althga dum ksha gagwulth a gum ada al yagai wila dildōlshumt; a dum lip giluksh gilginamt gun da na jalthalshunt; dilth dum lthōdū dilth dum hoigiakum wālukshim da shkanuk za dildōlsh dum, āwult Jesus Christ Mīyānum ga dum gun wāl dit, ash nīat ga gunsh nūngunt dilth Am da Haiik dit dum shugait tkānī ama dāl gush gut dilth n’lthaumsh gut wugait althga dum shābāt.

General Thanksgiving

 

 

 

[Gwai dum da hou dī ya gwa zida hashaka na gun gigīangwāklth di dumt yen’n ama dāl gush gut.]

Return home

 

Web author: Charles Wohlers U. S. EnglandScotlandIrelandWalesCanadaWorld